5 ildə Xocalı soyqırımı ilə bağlı 50-yə yaxın ölkədə 1000-dən artıq tədbir keçirilib

Bu il də diaspor təşkilatlarımız tərəfindən dünyanın onlarla ölkəsində soyqırımının 20-ci ildönümü münasibətilə tədbirlər keçiriləcək

Azərbaycanın ən ağrılı problemlərindən biri, erməni hərbi birləşmələrinin 1992-ci ilin fevralın 26-da törətdiyi Xocalı soyqırımına hələ də dünya birliyi tərəfindən lazımi qiymətin verilməməsidir. Bu soyqırımının hüquqi qiymətini alması və cinayətkarların cəzalanması istiqamətində Azərbaycan dövləti ilə yanaşı, diaspor təşkilatları da mübarizə aparır. Müstəqilliyimizin bərpasından sonra təşkilatlanmış formada, koordinasiyalı şəkildə fəaliyyət göstərən Azərbaycan diasporu hər il soyqırımının ildönümü münasibətilə, o cümlədən, ilin digər vaxtları Xocalı soyqırımını dünya ictimaiyyətinə çatdırır, baş verənləri tarixi faktlarla nümayiş etdirir. Diaspor təşkilatlarının bu istiqamətdə fəaliyyəti, gördükləri işlər, keçirilən tədbirlər haqqında Diasporla İş üzrə Dövlət Komitəsi tərəfindən 2011-ci ilin iyun ayının 5-də Bakıda keçirilən Dünya Azərbaycanlılarının III Qurultayı münasibətilə nəşr olunan “Qurultaya hesabat” kitabında ətraflı məlumat verilib. Belə ki, kitabda Dünya Azərbaycanlılarının II Qurultayının keçirildiyi 2006-cı ildən III Qurultaya qədər olan vaxtı əhatə edən məlumatlarda Xocalı soyqırımı ilə bağlı diaspor təşkilatlarımızın keçirdiyi tədbirlər illər üzrə yer alıb.

2006-cı il: Xocalı soyqırımının 14-cü ildönümü müxtəlif ölkələrdə qeyd olunub

Xocalı soyqırımının 14-cü ildönümünün qeyd olunduğu 2006-cı ilin fevral ayında Azərbaycan Türk Kültür Mərkəzinin təşəbbüsü ilə Haaqada yerləşən Beynəlxalq İnsan Haqları Məhkəməsinin qarşısında mitinq keçirilib. Mitinqə Hollandiyada fəaliyyət göstərən Azərbaycan və türk diaspor təşkilatları qatılıb. Polşada da bu ölkədəki Azərbaycan səfirliyinin, Azərbaycan-Polşa Mədəniyyət Assosiasiyasının, Azərbaycan-Polşa Mədəniyyət Cəmiyyətinin, Demokratik Azərbaycan Təşkilatının və Azərbaycan Mədəniyyət və İnformasiya Mərkəzinin iştirakı ilə soyqırımı ilə əlaqədar anım mərasimi keçirilib.

Özbəkistanın Daşkənd şəhərində “Azərbaycan Evi”, Azərbaycanlıların Milli-Mədəni Mərkəzlərinin Assosiasiyası və Azərbaycan Gənclər Təşkilatı bu ölkədəki Azərbaycan səfirliyi ilə birlikdə soyqırımına həsr olunmuş konfrans keçirib. Soyqırımının ildönümü ilə əlaqədar, Türkiyədə də müxtəlif tədbirlər keçirilib. İstanbul-Azərbaycan Kültür və Dayanışma Dərnəyi azərbaycanlı tələbələrin, diplomatik korpusun nümayəndələri və ictimai xadimlərin iştirakı ilə İstanbulda soyqırımının 14-cü ildönümünü qeyd edib. Tədbir Türkiyənin İzmir, İzmit, Ankara, Adana və digər şəhərlərində də təşkil olunub.

Kanadada Azərbaycan Təşkilatları Federasiyası tərəfindən isə Xocalı soyqırımını əks etdirən, soyqırımı haqqında məlumatların yer aldığı xüsusi kart nəşr olunaraq Kanadanın parlament və rəsmi qurumlarına, həmçinin, bir çox ölkələrin parlamentlərinə, beynəlxalq təşkilatlara göndərilib. Federasiya üzvləri Kanada parlamentinin binası və Ermənistanın Kanadadakı səfirliyi qarşısında ermənilərin xalqımıza qarşı törətdikləri soyqırımı və terror aktlarınıa etiraz olaraq mitinq də keçiriblər. Almaniyanın Mayns şəhərində isə “Soyqırımlar tarixi və Qərbin erməni iddiaları” mövzusunda elmi-praktiki konfrans keçirilib. Almaniyanın bir sıra nüfuzlu ictimai xadimləri, habelə kütləvi informasiya vasitələrinin nümayəndələrinin iştirakı etdiyi konfransda Xocalı soyqırımı haqqında həqiqətlər alman cəmiyyətinə çatdırılıb.

2007-ci il: Soyqırımına həsr olunmuş etiraz aksiyaları, konfranslar, anım mərasimləri, sərgilər təşkil olunub

Xocalı soyqırımının baş verməsinin 15 ili tamam olduğu 2007-ci il tarixində də diaspor təşkilatları silsilə tədbirlər keçirib. Bu tədbirlərə Heydər Əliyev Fondu xüsusilə dəstək göstərib. Belə ki, Fond soyqırımının 15-ci ildönümü ilə əlaqədar xarici ölkələrdəki Azərbaycan icma və birliklərini müvafiq məlumatlar və sənədlərlə təmin edib. Fondun keçirdiyi tədbirlərə diaspor təşkilatları da dəstək veriblər. Xocalı soyqırımının dünya ictimaiyyəti tərəfindən soyqırımı aktı kimi tanınması üçün diaspor təşkilatlarımız Azərbaycanın səfirlikləri ilə birlikdə keçirilən tədbirlərdə Fond tərəfindən hazırlanan təbliğat vasitələrinin yayılmasında fəal iştirak ediblər. Kitabda bildirilir ki, Xocalı soyqırımı haqqında məlumatları dünya ictimaiyyətinə çatdırmaq məqsədilə 2007-ci ildə dünyanın müxtəlif ölkələrində tədbirlər təşkil edilib. Belə ki, DİDK dəstəyi ilə Benilüks Azərbaycanlıları Konqresi Niderland Krallığının Haaqa şəhərində beynəlxalq konfrans təşkil edib, Amsterdam şəhərində böyük yürüş-mitinq keçirilib. Bununla yanaşı, Helsinki şəhərində Finlandiya-Azərbaycan Dostluq Cəmiyyəti, Çexiyada fəaliyyət göstərən “Azəri-Çex” Cəmiyyəti, Almaniyanın Köln şəhərində Almaniya Azərbaycan Kültür Ocağı, Hedelberq şəhərində Azərbaycan Kültür Cəmiyyəti, Böyük Britaniyada London-Azərbaycan Gəncləri Klubu, Danimarkanın Hillerd şəhərində Azərbaycan-Danimarka Dostluq Cəmiyyəti, Parisdə Azərbaycan-Fransa Gənclik Assosiasiyası, Strasburq şəhərində “Azərbaycan evi”, İsveçin Stokholm şəhərində Dünya Azərbaycanlıları Konqresi, Höteborq şəhərində İsveç-Azərbaycan Federasiyası, Norveçdə “Xəzər-Yanvar” dərnəyi, İsveçrədəki Azərbaycanlıların Mədəniyyət Mərkəzi, Tallində “Aydan” Eston-Azərbaycan Mədəniyyət Mərkəzi və digər ölkələrdəki diaspor təşkilatlarımız tərəfindən soyqırımına həsr olunmuş etiraz aksiyaları, konfranslar, anım mərasimləri, sərgilər və s. tədbirlər təşkil edilib.

2008-ci il: Soyqırımı ilə bağlı dünyanın 60-dək şəhərində tədbirlər təşkil olunub

Xocalı soyqırımının 16-cı ildönümü ilə əlaqədar isə 2008-ci ildə dünyanın 60-dək şəhərində Azərbaycan diaspor təşkilatları tərəfindən müxtəlif tədbirlər təşkil olunub. Fevralın 21-də Niderlandda fəaliyyət göstərən Azərbaycan icma və birliklərinin dəstəyi ilə “NED3” yerli televiziya kanalında Azərbaycan haqqında 3 hissədən ibarət film nümayiş edilib. Filmdə Azərbaycanın təbiəti, tarixi, inkişafı ilə yanaşı, Xocalı soyqırımı, məcburi köçkün və qaçqınlar haqqında süjetlər əks olunub. Fevralın 23-də Nyu-York şəhərində Türk Mərkəzinin binasında Xocalı soyqırımı qurbanlarının xatirəsinə həsr olunmuş konfrans və fotosərgi keçirilib. Azərbaycan və Türkiyə diplomatik korpuslarının rəsmi nümayəndələri və ictimai xadimlərin iştirak etdiyi tədbirdə Xocalı soyqırımı, Dağlıq Qarabağ münaqişəsi haqqında iştirakçılara ətraflı məlumat verilib. Fevralın 24-də isə Haaqada Niderlandda fəaliyyət göstərən Holland-Azəri-Türk Dərnəyinin təşəbbüsü və Heydər Əliyev Fondu, Azərbaycanın Niderlanddakı səfirliyi, DİDK-nin dəstəyi ilə soyqırımı şəhidlərinə həsr olunmuş abidənin açılışı olub. Qeyd edək ki, bu, Azərbaycanın xaricində Xocalı soyqırımı qurbanlarının xatirəsinə ucaldılmış ilk abidədir. Abidənin açılışı münasibətilə keçirilmiş tədbirdən sonra diaspor təşkilatlarının toplantısı keçirilib, o cümlədən, Heydər Əliyev Fondunun diaspor təşkilatlarına göndərdiyi rəsm əsərlərindən ibarət sərgi təşkil olunub.

Fevralın 25-də Vaşinqtonda soyqırımla bağlı Vaşinqton-Azərbaycan Mədəniyyət Mərkəzi, Amerika-Azərbaycan Ticarət Palatası və Amerika Azəbaycanlıları Şəbəkəsinin (USAN) təşkilatçılığı ilə Ermənistan səfirliyi binasının qarşısında piket keçirilib. Aksiyada Vaşinqton, Merilend və Virciniyada fəaliyyət göstərən azəri diaspor təşkilatlarının nümayəndələri və tələbələr iştirak ediblər.

Fevralın 26-da isə, Azərbaycanın BMT-dəki Daimi Nümayəndəliyinin binasında Azərbaycan diasporunun fəal nümayəndələrinin iştirakı ilə keçirilmiş anım mərasimində diplomatlar, ictimaiyyət nümayəndələri, xarici media təmsilçiləri və digərləri iştirak ediblər.

Fevralın 26-da Xocalı soyqırımı qurbanlarının xatirəsini Mayns, Brüssel şəhərində, Nyu-Yorkda, Kanadanın Toronto şəhərində də diaspor təşkilatlarımız tərəfindən anılıb, aksiyalar təşkil olunaraq soyqırımı törədənlərin cəzalandırılması tələb olunub.

2009-cu il: “Xocalıya Ədalət” kampaniyası dünyanın 100-dən artıq şəhərində aparılıb

Kitabda 2009-cu ilin Heydər Əliyev Fondunun vitse-prezidenti Leyla Əliyeavnın təşəbbüsü ilə 2008-ci ilin may ayından başlayan “Xocalıya ədalət” kampaniyasının daha geniş vüsət aldığı il kimi göstərilir. Bu kampaniya çərçivəsində dünyanın bir çox ölkələrində Xocalı soyqırımı ilə bağlı həqiqətləri yaymaq məqsədilə etiraz aksiyaları, elmi-praktiki konfranslar və digər tədbirlər həyata keçirilib. Azərbaycan diaspor təşkilatlarının da fəal şəkildə iştirak etdiyi kampaniya dünyanın 100-dən artıq şəhərində təşkil olunub. Bununla yanaşı, Litvada slaptai.lt internet saytında ermənilərin Azərbaycan xalqına qarşı törətdiyi soyqırımı və terror aktlarından bəhs edən “Erməni terroru” sənədli filmi nümayiş olunub. Fevralın 20-də isə, Londonda parlament önündə soyqırımının 17-ci ildönümünə həsr olunmuş piket keçirilib. Piketdə faciəni törədənlərə qarşı etiraz şüarları səsləndirilib, soyqırımı ilə bağlı məlumat vərəqələri paylanılıb. Fevralın 22-də “Qarabağ”, “Odlar yurdu”, “Ərk”, “Azərbaycan” cəmiyyətlərinin təşkilatçılığı ilə Stokholmun mərkəzi meydanında mitinq keçirilib. Fevralın 23-da İçveçdə fəaliyyət göstərən AFİ təşkilatı İsveç parlamentinə ünvanlanmış müraciətlər qəbul edib. Mürciətdə Xocalı soyqırımı, eləcə də Qarabağ münaqişəsinə dair həqiqətlər yer alıb. Almaniyadakı Azərbaycanlıların Koordinasiya Mərkəzi fevralın 26-da Berlində soyqırımının 17-ci ildönümü münasibətilə anım mərasimi keçirib. 1992-ci il 26 fevral gününün dəhşətlərini əks etdirən “Xocalı soyqırımı” adlı sənədli film nümayiş etdirilib. Azəri diasporunun təşkilatçılığı ilə fevralın 24-də “Kanal Avropa”da (Düsseldorf), fevralın 25-də TGRT-də (Franfurkt), fevralın 27-də isə Foks TV-də Xocalı soyqırımı ilə bağlı verilişlər efirə gedib. ABŞ-da da Azərbaycan diasporu Xocalı soyqırımı ilə bağlı etiraz aksiyası təşkil edib. Aksiyada Ermənistanın təcavüzkarlıq siyasətini pisləyən şüarlar səsləndirilib. Amerika azərbaycanlıları beynəlxalq ictimaiyyəti Xocalı soyqırımına hüquqi və siyasi qiymət verməyə çağırıblar.

2010-cu il: Soyqırımının tanıdılması üçün bütün vasitələrdən istifadə edilib

Xocalı soyqırımının 18-ci ildönümünün qeyd olunduğu 2010-cu ildə soyqırımının daha mütəşəkkil formada tanıdılması üçün Heydər Əliyev Fondu xarici ölkələrdəki Azərbaycan icma və birliklərini müvafiq məlumatlar və sənədlərlə təmin edib. Əsas məqsəd soyqırımının növbəti ildönümünün yüksək səviyyədə qeyd olunması və faciənin əsl mahiyyətinin dünya ictimaiyyətinə çatdırılmasıdır. “Xocalıya ədalət” beynəlxalq məlumat və təşviqat kampaniyası bu il ərzində də aparılıb. Kampaniyaya uyğun olaraq, dünyanın bir çox ölkələrində etiraz aksiyaları, elmi-praktiki konfranslar və digər tədbirlər təşkil edilib. 2010-cu ilin fevralın 19-da Almaniyada fəaliyyət göstərən AAKM tərəfindən internet vasitəsilə federal parlament və Almaniya siyasi partiyalarının funksionerlərinə, ictimai qurumlara, KİV, QHT-lər, mədəniyyət və elm xadimlərinə Xocalı həqiqətlərini əks etdirən müraciət yayımlanıb.

Xocalı soyqırımı həqiqətlərini daha dəqiq şəkildə və tarixi faktlara söykənən sənədlər əsasında geniş Litva ictimaiyyətinə çatdırmaq, elmi, siyasi və akademik dairələrdə, həmçinin, din və mədəniyyət təşkilatlarında obyektiv rəylər yaratmaq məqsədilə AMEA-nın İnsan Hüquqları İnstitutunun hazırladığı “Erməni terror və quldur birləşmələrinin bəşəriyyətə qarşı cinayətləri (XIX-XXI)” müxtəsər xronoloji ensiklopediyasından Litva dilinə tərcümə edilən geniş parçalar və soyqırımı faktlarının illüstrasiyalı görüntüləri internet saytlarında yerləşdirilib. Bununla yanaşı, İsveçdə fəaliyyət göstərən İsveç-Azərbaycan Federasiyası və İsveç Azərbaycanlıları Konqresi tərəfindən Qarabağ Komitəsi yaradılıb. 27 fevral 2010-cu il tarixində Stokholmun Sergelstorq meydanında Qarabağ Komitəsinin təşkilatçılığı ilə Xocalı soyqırımı və Qarabağın işğalına etiraz mitinqi keçirilib.

2011-ci il: Soyqırımı törədənlərin cəzalandırılması üçün beynəlxalq ictimaiyyətə müraciətlər qəbul olunub

Bu ildə də Xocalı soyqırımının 19-cu ildönümü ilə bağlı dünyanın müxtəlif ölkələrində diaspor təşkilatları tərəfindən tədbirlər keçirilib. Fevral ayı ərzində Ukraynanın Nikolayev şəhərində Xocalıda qətlə yetirilmiş insanların yad edilməsi, soyqırımı həqiqətlərinin Ukrayna ictimaiyyətinə çatdırılması məqsədilə tədbir keçirilib. Ukraynanın I kanalı tərəfindən Xocalı soyqırımı haqqında hazırlanan sənədli film nümayiş etdirilib. Simferopol şəhərinin mərkəzi kitabxanasında da Xocalı qurbanlarının xatirəsinə həsr olunmuş tədbir keçirilib. Amerika-Azərbaycan Şurası tərəfindən ABŞ konqresmenlərinə Xocalı soyqırımından bəhs edən məktublar göndərilib. Şimali Azərbaycan Mədəniyyət Mərkəzi Azərbaycanın Los-Ancelesdəki konsulluğu ilə birgə San-Fransisko şəhərində soyqırımına həsr olunmuş anım mərasimi keçirib. Mayamidə Florida Beynəlxaq Universitetində Amerika-Azərbaycan Mədəniyyət Mərkəzi tərəfindən təşkil olunmuş tədbirdə isə azəri diasporunun üzvləri tələbə və müəllim heyəti qarşısında Xocalı soyqırımı haqqında məruzələrlə çıxış ediblər.

“Xocalıya ədalət” kampaniyası çərçivəsində Türkiyənin müxtəlif şəhərlərində Türkiyə-Azərbaycan Dərnəyi və TSAM imzatoplama kampaniyası aparıb. Qazaxıstanda isə Azərbaycanlıları Mədəniyyət Mərkəzinin təşkilatçılığı ilə Astana və Almatı şəhərlərinin 11 vilayətində soyqırımının 19-cu ildönümü ilə bağlı silsilə tədbirlər keçirilib. Eyni zamanda, İsraildə İsrail-Azərbaycan Beynəlxalq Assosiasiyası tərəfindən təşkil olunan Knessetin deputatları, siyasi və ictimaiyyət təşkilatlarının rəhbərliyi, səfirlik və diplomatik nümayəndələrinin iştirakı ilə anım mərasimi keçirilib.

Son 5 il ərzində diaspor təşkilatlarımız tərəfindən Xocalı soyqırımının tanıdılması ilə bağlı aparılan işlərə nəzər yetirdikdə məlum olur ki, diasporumuz bu istiqamətdə dünyanın 50-yə yaxın ölkəsində aksiya, mitinq, elmi-praktiki konfrans, sərgi, ümumilikdə 1000-dən çox tədbir keçirilib.

Ukraynada “Xocalı ayı” çərçivəsində tədbirlərə Xarkov şəhərində start verilib

Diaspor təşkilatlarımız bu il də soyqırımının 20-ci ildönümü ilə bağlı silsilə tədbirlər keçirməyə hazırlaşır. DİDK-dən qəzetimizə verilən məlumata görə, Xocalı faciəsinin 20-ci ildönümü münasibəti ilə dünyanın onlarla ölkəsində tədbirlər, soyqırımı qurbanlarının anım mərasimləri, sərgi və konfranslar, kütləvi aksiyalar keçiriləcək. Belə ki, Rusiyanın Moskva və digər şəhərlərində Ümumrusiya Azərbaycanlıları Konqresi, Heydər Əliyev Fondunun Rusiya nümayəndəliyi və AMOR-un təşkilatçılığı ilə anım mərasimləri, dəyirmi masa və konfranslar keçiriləcək, Xocalıda dinc əhalinin qətlə yetirilməsini əks etdirən fotosərgilər, sənədli filmlər nümayiş etdiriləcək: “Fevralın 26-da AMOR tərəfindən Moskvada “Xocalıya ədalət” çərçivəsində Rusiyanın ayrı-ayrı regionlarında soyqırmının 20-ci ildönümünə həsr olunmuş tədbirlər təşkil olunacaq. Xocalı faciəsinin ildönümü münasibəti ilə tədbirlər Ukrayna, Belarusiya, Estoniya, Litva, Latviya və Moldavada da baş tutacaq. İslam Konfransı Gənclər Forumunun və Ukrayna Azərbaycanlı Gənclər Birliyinin təşəbbüsü ilə Ukraynada fevral ayı “Xocalı ayı” elan olunub ki, artıq bu tədbirlərə Xarkovda start verilib.

Fevralın 25-də, həmçinin, UAK-ın təşkilatçılığı ilə Kiyev şəhərində soyqırımının 20-ci ildönümünə həsr olunmuş anım mərasimi də keçiriləcək.Ayın 26-da Minskdə Belarusiya Azərbaycanlı İcmaları Konqresi, 27-də isə Kişinyov şəhərində Moldova Azərbaycanlıları Konqresinin təşkilatçılığı ilə soyqırımı qurbanlarının xatirəsinə həsr olunmuş tədbirlər keçiriləcək, yerli KİV-də soyqırımı ilə bağlı materiallar dərc olunacaq: “Fevralın 24-də Vilnüsdə Litva Azərbaycanlıları Cəmiyyəti, fevralın 25-də Tallində “Aydan” Estoniya-Azərbaycan Mədəniyyət Mərkəzi Azərbaycanın bu ölkədəki səfirliyi ilə birgə soyqırımı qurbanlarının xatirəsini anacaq. Avropanın ayrı-ayrı ölkələrində, o cümlədən, Almaniya, Fransa, İtaliya, Danimarka, İsveç, Niderland, Polşa, Rumıniya, Macarıstan, Finlandiya, Çexiyada keçiriləcək tədbirlərdə bu ölkələrdəki azəri diasporu ilə yanaşı, türk, yəhudi icmalarının, eləcə də adıçəkilən ölkələrin ictimai-siyasi təşkilatlarının, həmçinin, parlamentlərinin nümayəndələrinin qatılacağı gözlənilir. Azərbaycanlı diasporunun Almaniyadakı Mərkəzi Şurası tərəfindən soyqırımının tanıdılması məqsədilə fevralın 10-dan başlayaraq, Berlində “Biz sülh istəyirik” adlı silsilə rəsm müsabiqələrinə start verilib. Fevralın 11-də Almaniyanın Hamburq şəhərində Saksen-Anhalt Əyaləti üzrə Alman-Azərbaycan Mədəniyyət Cəmiyyəti təşkilatçılığı ilə soyqırımının 20-ci ildönümünə həsr olunmuş boks turniri keçirilib, yarışı izləyən 600-dən artıq tamaşaçıya Xocalı soyqırımı haqqında məlumat verilib. Maqdeburq şəhərində fevralın 17-də Almaniya Sosial Demokrat Partiyasının toplantısında soyqırımına dair məruzə təqdim olunub, fevralın 18-də soyqırımı qurbanlarının xatirəsinə həsr olunmuş avtomobil yürüşü keçirilib. Fevralın 26-da isə alman yazıçısı Rolf Kunşun alman dilində nəşr olunmuş “Xocalı” kitabının təqdimat mərasimi keçiriləcək”.

Diasporumuz Avropa Komissiyasının önündə “Hamımız xocalılıyıq! Hamımız türkük!” deyəcək

Bu ayın 24-də Berlində Almaniyadakı Azərbaycanlıların Koordinasiya Mərkəzinin və Atatürkçü Düşüncə Dərnəyi Berlin-Brandenburq Cəmiyyətinin təşkilatçılığı ilə soyqırımının 20-ci ildönümünə həsr olunmuş “Qafqazda sülhün qorunması və Türkiyə-Azərbaycan münasibətləri” mövzusunda konfransın da keçiriləcəyi qeyd olunan məlumatda bildirilir ki, fevralın 25-də isə Berlin-Bakı Qalereyası Bakı Pantomima teatrı ilə birgə Berlində soyqırımına həsr olunmuş foto və rəsm sərgisi təşkil edəcək, tamaşaçıların diqqətinə soyqrımından bəhs edən ədəbi-bədii kompozisiya təqdim edəcək: “Fevralın 25-də Berlində Azərbaycan Evi, Almaniya-Azərbaycan Həmrəylik Cəmiyyəti, AAKM birgə təşkilatçılığı ilə soyqırımının 20-ci ildönümü münasibətilə etiraz aksiyası baş tutacaq. O cümlədən, soyqırımının 20-ci ildönümünə həsr olunmuş tədbirlər Almaniyanın Drezden, Kassel, Hannover və Mayns şəhərlərində də keçiriləcək. Böyük Britaniya və Şimali İrlandiya Birləşmiş Krallığında fəaliyyət göstərən Avropa-Azərbaycan Cəmiyyəti də soyqırımının 20-ci ildönümü ilə bağlı silsilə tədbirlər keçirəcək, bununla yanaşı, fevralın 22-də Londonda soyqırımına həsr olunmuş rəsm əsərlərin ən ibarət sərgi təşkil edəcək. BAK tərəfindən isə, fevralın 22-də Amsterdamda azərbaycanlı uşaqların Xocalıya aid əl işləri və rəsmlərindən ibarət sərgi, fevralın 23-də Haaqada “Uşaq rəsm sərgisi” təşkil ediləcək. Fevralın 28-də BAK-ın təşkilatçılığı ilə Brüsseldə soyqırımının 20-ci ildönümü münasibətilə mitinq keçiriləcək. Brüsseldəki Place Schuman meydanında Avropa Komissiyasının önündə saat 13.00-15.00 arasında keçiriləcək “İnsanlıq ayıbı Xocalıya ədalət mitinqi”ndə “Hamımız xocalılıyıq! Hamımız türkük!” şüarlarının sədaları altında ölkədə fəaliyyət göstərən azəri və türk diaspor təşkilatlarının, siyasi partiya və ictimai təşkilatların nümayəndələrinin iştirakı planlaşdırılıb”. Məlumata görə, fevralın 25-də İsveçin Malmö şəhərində İAK-nin təşkilatçılığı ilə soyqırımına həsr olunmuş konfrans, fevralın 26-da Stokholm şəhərində Azərbaycan Federasiyası İsveçin təşkilatçılığı ilə seminar keçiriləcək. Fevralın 26-da isə, AFİ tərəfindən Stokholmda soyqırımının 20-ci ildönümünə həsr olunmuş kütləvi etiraz aksiyasının keçirilməsi planlaşdırılıb: “Fevralın 26-da, həmçinin, ASAİF təşkilatçılığı ilə İngiltərə, Misir, İtaliya, Fransa, Niderland və Kanadada soyqırımının 20-ci ildönümü ilə bağlı tədbirlər keçiriləcək. Fevralın 25-də Danimarka və Rumıniyada, fevralın 26-da Finlandiya və Macarıstanda soyqırımı qurbanlarının xatirəsi anılacaq. Fevralın 25-də Praqanın Sülh meydanında “Azəri-Çex” Cəmiyyətinin təşkilatçılığı ilə “Xocalıya ədalət” çərçivəsində kütləvi etiraz aksiyasının keçirilməsi planlaşdırılıb. Gürcüstan, Qazaxıstan, Özbəkistan, Qırğızıstanda da anım mərasimləri, konfrans və sərgilər təşkil olunacaq. Belə ki, fevralın 26-da Qazaxıstanın Astana şəhərində Qazaxıstan Azərbaycanlıları Mədəniyyət Mərkəzləri İttifaqının təşkilatçılığı ilə “Xocalı soyqırımı-XX əsrin dəhşətli faciəsi” mövzusunda konfrans keçiriləcək”.

“Türkiyə bunu tanı, unutma Xocalını” şüarları səslənəcək

Xocalı soyqırımının 20-ci ildönümü münasibətilə tədbirlərin Türkiyənin bir sıra şəhərlərində də keçiriləcəyi bildirilən məlumatda qeyd olunur ki, fevralın 26-da İstanbulun Taksim meydanında Türkiyədə təhsil alan azərbaycanlı tələbələrin, ASAİF, İstanbul Türkiyə-Azərbaycan Dərnəyinin, Türkiyə-Azərbaycan Dərnəkləri Federasiyasının, Azərbaycan və Türkiyə qeyri-hökumət təşkilatlarının, KİV nümayəndələrinin iştirakı ilə ““Türkiyə bunu tanı, unutma Xocalını” süarı ilə izdihamlı yürüş-mitinqin keçirilməsi planlaşdırılıb. “Fevralın 26-da Misirin paytaxtı Qahirədəki Eyn-əş-Şəms Universitetində Qahirə-Türk Araşdırmalar Mərkəzinin Azərbaycanın Misirdəki səfirliyi ilə birgə təşkil etdiyi konfrans, Dubayda BƏƏ-də fəaliyyət göstərən “Azərbaycan” Cəmiyyətinin təşkilatçılığı ilə elmi-praktiki konfrans, Küveytdə “Vətənsevər” Azərbaycan-Küveyt Mədəniyyət və Dostluq Cəmiyyətinin təşkilatçılığı ilə anım mərasimi keçiriləcək”-deyə DİDK-dən bildirilib. Soyqırımının 20-ci ildönümü münasibətilə tədbirlərin ABŞ-ın Nyu-York, Los-Anceles, San-Fransisko, Hyuston şəhərlərində də təşkil olunacağı vurğulanan məlumatda Amerikadakı diaspor təşkilatlarımızın təşkil etdiyi tədbirlərdə türk, yəhudi və digər icmaların nümayəndələrinin iştirak edəcəyi deyilir. Bildirilir ki, soyqırımı qurbanlarının xatirəsi Avstraliya, Yeni Zelandiya, ABŞ, Kanada və Meksikada da yad ediləcək: “Fevralın 26-da Avstraliya-Azərbaycan-Türk Dostluq Birliyi təşkilatı tərəfindən Sidney sakinlərinə əvvəlcədən istehsal olunmuş üzərində “Xocalı faciəsi-1992-ci il” yazısı olan köynəklər paylanacaq, Azərbaycan-Yeni Zelandiya Dostluq Cəmiyyəti tərəfindən anım mərasimi keçiriləcək. Kanadanın Ottava, London və Kalqari şəhərlərində diaspor təşkilatlarımızın təşkilatçılığı ilə soyqırımla bağlı anım mərasimləri baş tutacaq”. Fevralın 26-da soyqırım qurbanlarının xatirəsi Meksikada fəaliyyət göstərən Latın Amerikasındakı Azərbaycan Assosiasiyası tərəfindən təşkil olunacaq anım mərasimində anılacaq.

Asif NƏRİMANLI

Paritet.-2012.-21-22 fevral.-S.12-13.