“DAGB Vətənin təbliği prosesinin önündə gedəcək”

Ramin Məmmədov: “Xaricdəki azərbaycanlı gənclərin daha da fəal olmaları üçün proqramlar işləyib hazırlayacağıq”

“Dünya Azərbaycanlı Gənclər Birliyi qısa zaman ərzində xarici ölkələrin nüfuzlu təşkilatları ilə gözəl əlaqələr qurmağı, həmin ölkələrin ictimai-siyasi, daxili həyatında vacib amilə çevrilməyi, ən qabaqcıl gənclər nümayəndələri ilə dostluq əlaqələri yaratmağı qarşıya məqsəd qoyub. Bunlar gəncliyimizi fərqləndirən və ümummilli liderin Azərbaycan gəncliyi ilə bağlı arzusunun əsas istiqamətlərindən biridir. Ulu öndərin Azərbaycan gəncliyinə fəal olmağa dair tövsiyələrini rəhbər tutaraq Prezident İlham Əliyevin rəhbərliyi ilə həyata keçirilən siyasətin, Ermənistan-Azərbaycan, Dağlıq Qarabağ münaqişəsi barədə gerçək məlumatların, ölkəmiz haqqında həqiqətlərin təbliği istiqamətində üzərimizə düşən vəzifələri layiqincə yerinə yetirməliyik”.

Bu barədə Dünya Azərbaycanlı Gənclər Birliyinin sədri Ramin Məmmədov yap.org.az saytına verdiyi müsahibəsində deyib.

Qeyd edək ki, DAGB-nin təsis qurultayı 12 mart 2012-ci il tarixində Bakıda keçirilən təsis qurultayında yaradılıb, R.Məmmədov isə Birliyin sədri vəzifəsinə seçilib.

R.Məmmədov bildirib ki, DAGB Azərbaycan həqiqətlərinin dünya ictimaiyyətinə çatdırılması, Vətənin təbliği prosesinin önündə gedəcək: “Həmçinin, xaricdəki azərbaycanlı gənclərin daha da fəal olmaları üçün proqramlar işləyib hazırlayacağıq. Bir sözlə, bu Birliyin yaradılması dünyanın müxtəlif ölkələrində təhsil alan və yaşayan gənclərin üzərinə böyük məsuliyyət qoyur. Prezident İlham Əliyevin qurultaya ünvanladığı məktubda da vurğuladığı kimi, Dünya Azərbaycanlı Gənclər Birliyi gənc nəslin mütəşəkkilliyinin artırılması, Azərbaycan həqiqətlərinin dünya ictimaiyyətinə çatdırılması, diasporun möhkəmləndirilməsi və mədəni irsimizin təbliği istiqamətində gənclərimizin fəaliyyətini daha yaxşı əlaqələndirməyə imkan verəcəkdir. Dövlət başçısı məktubunda bu mötəbər məclisin keçirildiyi günün Azərbaycan gənclər hərəkatının tarixinə əlamətdar hadisə kimi daxil olacağına inandığını vurğulayıb”.

Yüksək etimada layiq görüldüyü üçün ölkə rəhbərliyinə, ona etimad göstərən hər kəsə minnətdarlıq edən R.Məmmədov, Birliyin təsis qurultayının keçirilməsini Prezident İlham Əliyevin həm diaspor quruculuğuna, həm də gənclərə xüsusi diqqət və qayğısının nəticəsi olduğunu deyib: ”DAGB-nin sədri seçilməyimdə Yeni Azərbaycan Partiyasının da xüsusi rolu var. O mənada ki, hakim partiya dövlətin gənclər siyasətinin həyata keçirilməsində aktiv rol oynamaqla yanaşı, gənclərə öz bacarıqlarını açıq şəkildə ifadə etmək üçün geniş meydan verib. Partiyanın Gənclər Birliyi olaraq bizlər də yaradılmış bu imkandan lazımi şəkildə yararlanaraq, üzərimizə düşən vəzifələrin öhdəsindən layiqincə gəlməyə çalışırıq. Daha doğrusu, Prezident İlham Əliyevin gənclərə verdiyi önəm, göstərdiyi diqqət hər zaman biz gənclərə əlavə bir güc, mənəvi ruh yüksəkliyi verir. Dövlət başçısının gənclərə göstərdiyi diqqət və qayğıdan irəli gələrək YAP gəncləri kimi biz də öz fəaliyyətimizi məhz bu istiqamətdə qurmuşuq”.

Təsis qurultayından danışan R.Məmmədov bildirib ki, dünyanın müxtəlif ölkələrində yaşayan azərbaycanlı gənclərin nümayəndələrinin Bakıda bir araya gəlməsi olduqca qürurverici bir hadisədir: “Bu qurultayın keçirilməsi və birliyin yaradılması ideyası 2010-cu ilin noyabrında Almaniyanın Frankfurt şəhərində keçirilən Dünya Azərbaycanlı Gənclərinin I Konqresində irəli sürülüb. Qısa vaxt ərzində Diasporla İş üzrə Dövlət Komitəsi, Gənclər və İdman Nazirliyi, gənclər siyasəti ilə məşğul olan digər dövlət qurumları, o cümlədən xarici ölkələrdə fəaliyyət göstərən diaspor təşkilatlarının birgə səyi nəticəsində bu təşkilatın fəaliyyətinin əsas istiqamətləri müəyyən edilib”.

1994-cü ildən başlayaraq ölkədə gənclərimizin milli vətənpərvərlik ruhunda formalaşması istiqamətində mühüm işlər görüldüyünü diqqətə çatdıran birliyin sədri bildirib ki, ulu öndər Heydər Əliyev gənclər siyasətini dövlətin prioritet vəzifəsi elan etdikdən sonra Azərbaycan gəncləri üçün geniş inkişaf perspektivləri açılıb: “Ümummilli liderin müəyyənləşdirdiyi dövlət gənclər siyasətinin Prezident İlham Əliyev tərəfindən uğurla davam etdirilməsi nəticəsində Azərbaycan gəncləri hərtərəfli diqqət və qayğı ilə əhatə olunublar. Gənclər xaricdə təhsil almaq imkanı qazanıb və bu gün minlərlə azərbaycanlı gənc xarici ölkələrdə təhsil alır. Gənclərimiz müxtəlif beynəlxalq təşkilatlarda da ölkəmizi uğurla təmsil edirlər. Eyni zamanda, Azərbaycan gəncliyi də daim ölkədə gedən ictimai-siyasi proseslərdə aparıcı qüvvə kimi çıxış edir”. Onun sözlərinə görə, son illər Azərbaycan gəncliyinin xaricdə təşkilatlanması istiqamətində mühüm işlər görülüb. Birliyin sədri qeyd edib ki, bu gün Azərbaycanda, nəinki ölkə daxilində, onun hüdudlarından kənarda dövlətimizin təəssübünü çəkən, Vətənə xidmət işini öz amalına çevirən gənclər ordusu formalaşıb: “Bu gənclər ordusu hazırda intellekti, yüksək vətənpərvərliyi və fəallığı ilə Azərbaycan dövlətinə, millətinə layiqincə xidmət edir, ölkəmizi beynəlxalq aləmdə uğurla tanıdır. Heydər Əliyev Fondunun vitse-prezidenti, Dialoq və Əməkdaşlıq uğrunda İslam Konfransı Gənclər Forumunun (DƏİKGF) mədəniyyətlərarası dialoq üzrə baş əlaqələndiricisi Leyla xanım Əliyevanın bu istiqamətdə həyata keçirdiyi işlər xüsusilə qeyd olunmalıdır. Məhz Leyla xanım Əliyevanın rəhbərliyi ilə yaradılan Rusiyanın Azərbaycanlı Gənclər Təşkilatının (AMOR) səmərəli fəaliyyəti xarici ölkələrdə formalaşan digər azərbaycanlı gənclər təşkilatları üçün bir örnək təşkil edir”.

R.Məmmədov vurğulayıb ki, Rusiya Federasiyası Dövlət Dumasının sədri Sergey Narışkinin qurultay iştirakçılarına məktubu AMOR-un, nəinki Azərbaycan cəmiyyətinin və dövlətinin, eyni zamanda, Rusiyanın ictimai-siyasi və gəncliyinin həyatında ciddi bir amilə çevrildiyinin sübutudur: “Eyni zamanda, Xocalı soyqırımı ilə bağlı dünyada Azərbaycan hakimiyyətinin, DƏİKGF-in mədəniyyətlərarası dialoq üzrə baş əlaqələndiricisi Leyla xanım Əliyevanın təşəbbüsü ilə başlanmış “Xocalıya ədalət” kampaniyası çərçivəsində Azərbaycan gəncliyinin fəallığının hamımız şahidi olduq. Dünyanın 70-dək ölkəsində keçirilən aksiyalar, konfranslar, həmçinin, İstanbulun Taksim meydanındakı izdihamlı yürüş, müxtəlif ölkələrin parlamentləri qarşısındakı etiraz aksiyaları, Xocalıda yaşanan dəhşətli faciənin şəkillərinin nümayiş olunması və s. tədbirlər Azərbaycan gəncliyinin fəallığının sübutu idi”. Birliyin sədri bildirib ki, hazırda da xarici ölkələrdə fəaliyyət göstərən 50-dən çox azərbaycanlı gənclər təşkilatı ümummilli məsələlərdə hər zaman vahid mövqedən çıxış edir.

“Xaricdə yaşayan azərbaycanlı gənclərin cəmiyyətə daha sıx inteqrasiyası, ictimai-siyasi fəallığının artırılması, müxtəlif ölkələrin dövlət orqanları, parlament və hökumət üzvləri, kütləvi informasiya vasitələri ilə əlaqələrin möhkəmləndirilməsi, nüfuzlu beynəlxalq təşkilatlarla əməkdaşlığın qurulması, Azərbaycan həqiqətlərinin dünya ictimaiyyətinə çatdırılması sahəsində daha ciddi və daha konkret nəticələrin əldə olunması üçün mühüm addımlar atılır və hesab edirəm ki, Bakıda keçirilən qurultay da bu istiqamətdə uğurların əldə edilməsi üçün mühüm rol oynayacaq”-deyə DAGB-nin sədri vurğulayıb.

Asif NƏRİMANLI

Paritet.-2012.-15-16 mart.- S.5.