Azərbaycan diaspor təşkilatının sədri Litvanın müstəqilliyi ilə bağlı dövlət tədbirinin əsas məruzəçilərindən biri olub

Litva azərbaycanlıları cəmiyyətinin sədri, 1988-1992-ci illərdə Litva Sayudis hərəkatı Seyminin üzvü və hazırda Litva Milli İcmalar Şurasının sədri Mahir Həmzəyev bir neçə gün əvvəl Vilnüsdə Seymin binasında keçirilən Litva Respublikasının dövlət müstəqilliyinin bərpa edilməsinin 22-ci ildönümünə həsr olunmuş rəsmi dövlət tədbirində əsas Diasporla İş üzrə Dövlət Komitəsinin məlumatına görə, ölkənin 350-yə yaxın etnik təşkilatı adından təbrik çıxışı etmiş Mahir Həmzəyev “Milli icmalar Litvanın Azadlıq yolunda” mövzusunda nitq söyləmişdir. Onun məruzəsində 1988-2012-ci illərdə Milli İcmalar Şurasının tarixi və fəaliyyət aspektləri ilə yanaşı, milli azlıqların müxtəlif dövrlərdə Litva dövlət müstəqilliyinin bərpa edilməsinə verdiyi mühüm töhfələrdən danışılıb və bununla bağlı 1944-1951-ci illərdə Litva partizan müqaviməti hərəkatında fəal iştirak etmiş azərbaycanlı döyüşçü Şakir Sadıqovun ölkənin azadlığı uğrunda keçdiyi şərəfli mübarizə yolu da vurğulanıb.

Təntənəli yığıncaqda dövlət rəsmiləri - Litva Respublikasının Prezidenti Dalya Qribauskayte, ölkənin sabiq Prezidenti Valdas Adamkus, 1990-1992-ci illərdə Litva Respublikası Ali Sovetinin sədri, istiqlalçı millət vəkili və ilk müstəqil dövlət başçısı, hazırda isə Avropa Parlamentinin üzvü Vitautas Landsbergis, LR Seyminin sədri İrena Degutiene, LR Baş naziri Andryus Kubilyus, 1990-cı ilin martın 11-də Litva müstəqilliyinin bərpa edilməsi barədə tarixi Akta imza atmış istiqlalçı deputatlar, birinci müstəqil Litva hökumətində çalışmış nazirlər, indiki Seymin, LR Nazirlər Kabinetinin və Avropa Parlamentinin üzvləri, LR Konstitusiya Məhkəməsinin Sədri və Konstitusiya Məhkəməsinin hakimləri, LR Ali Məhkəməsi, Apelyasiya Məhkəməsi və Baş İnzibati Məhkəməsinin sədrləri, Litvanın xüsusi təyinatlı dövlət qurumlarının və Silahlı Qüvvələrinin rəhbərləri, Litva katolik kilsəsinin başçıları, digər dini konfesiyaların rəhbərləri, xarici ölkələrin Litvadakı diplomatik nümayəndəliklərinin təmsilçiləri, Litva ali məktəblərinin rektorları, Seymin tabeliyində olan dövlət institusiyalarının rəhbərləri, 1988-ci ildə Litva Sayudis hərəkatını yaradan təşəbbüs qrupunun üzvləri, 1944-1956-cı illərdə Litva azadlığı uğrunda partizan müqavimət hərəkatında iştirak etmiş şəxslər və onların ailə üzvləri, siyasi dissidentlər, sovet dövrünün vicdan məhbusları, Litvanın milli icmaları və digər qeyri-hökumət təşkilatlarının nümayəndələri, siyasi partiyalar və gənclər hərəkatının təmsilçiləri, məşhur ictimai-mədəni xadimlər və digər hörmətli qonaqlar iştirak etmişlər.

Tədbirdə Azərbaycanın Litvadakı səfiri Həsən Məmmədzadə də iştirak edib.Təntənəli bayram mərasimi Litva dövlət himnini səsləndirilməsi və daha sonra Seymin sədri İrena Degutinenin giriş sözü ilə başlayıb. Daha sonra təbrik çıxışları olub. Litva müstəqilliyinə səs vermiş istiqlalçı deputat, görkəmli yazıçı və dramaturq Kazis Saya, Litva yevangelik-lüteran kilsəsinin yepiskopu Mindaugas Sabutis, istiqlalçı deputat, Seymin üzvü və Litvanın müdafiə naziri Rasa Yuknyaviçiene, istiqlalçı deputat və Seymin üzvü Vidmantas Jiemyalis, Litva Sayudis hərəkatı Seym Şurasının üzvü, milli mədəniyyət və incəsənət sahəsində Litvanın dövlət mükafatı laureatı, görkəmli şair Marseliyus Martinaytis təbrik məruzələri etmişlər.

Toplantıdan əvvəl parlamentin sərgi galereyasında Litva Seyminin Dəftərxanası və Milli İcmalar Şurası tərəfindən birgə təşkil edilmiş sərginin təntənəli açılışı olub. “Milli icmalar Litvanı azadlığa aparan yolda” başlığı altında düzənlənmiş sərgi stendlərində 1988 - 1992-ci illərdə ölkənin milli azlıq təşkilatlarının Litva dövlət müstəqilliyinin bərpa olunması və onun möhkəmləndirilməsi yolunda göstərdiyi fəaliyyəti əks etdirən fotoşəkillər, sənədlər, nəşr materialları, əşyalar və digər tarixi eksponatlar nümayiş etdirilib.

Sərgi eksponatları sırasında Litva azərbaycanlıları cəmiyyətinin sözügedən dövrdə Litva milli azadlıq hərəkatındakı fəaliyyətini, müstəqillik uğrunda apardığı mübarizəni və digər mühüm ictimai-siyasi işləri əks etdirən materiallar da qoyulmuşdu. Sərginin açılışında Litva azərbaycanlıları cəmiyyətinin fəallarından Adilə Əfəndi və Zəkəriyyə Pirsaatov da iştirak etmişlər.

1990-1992-ci illərdə Litva Respublikası Ali Soveti sədrinin müavini, Litva müstəqilliyinə səs vermiş istiqlalçı deputat, hazırda Litva Respublikası Seymi sədrinin birinci müavini, millət vəkili Çeslovas Vitautas Stankyaviçyus sərginin təntənəli açılışında giriş sözü ilə çıxış etmiş və Litva Milli İcmalar Şurasına təbrik müraciəti edərək, ən yeni tarixi dövrdə litvalılar üçün bütün taleyüklü proseslərdə bilavasitə iştirak edib və ağır illərdə Litva dövlətinə loyal münasibət göstərmiş etnik azlıqların nümayəndələrinə Seymin rəhbərliyinin təşəkkürlərini çatdırıb.

Litva kütləvi informasiya vasitələri müstəqilliyin bərpa edilməsinin ildönümü ilə bağlı həyata keçirilən bayram layihələrini geniş işıqlandırmışlar. Seymdə keçirilmiş rəsmi dövlət tədbiri isə Litva ictimai televiziyası və milli radiosu ilə canlı yayımlanıb.

İSMAYIL

Paritet.-2012.-20 mart.- S.12.