Həştərxanda 25 min nəfərlik güclü azərbaycanlı icması var

“Azərbaycanlı adını biz həm Həştərxanda, həm də müstəqil Azərbaycan qarşısında layiqincə doğrultmağa çalışırıq”

“Azərbaycanın müstəqilliyinin və dövlətçiliyinin möhkəmləndirilməsi, onun mövqeyinin dünya müstəvisində gücləndirilməsi, erməni təcavüzünə məruz qalmış Azərbaycan xalqının haqq səsinin dünyaya çatdırılması, Dağlıq Qarabağ probleminin ədalətli həllinə nail olunması və digər ümummilli məsələlərin həlli dünyada yaşayan bütün soydaşlarımız kimi, Həştərxan azərbaycanlılarının da birliyini və həmrəyliyini daha zəruri edən amilə çevrilib”. Bu sözləri Ümumrusiya Azərbaycan Konqresinin Həştərxan regional bölməsinin sədr müavini İrahid Mirişov rəsmi mediada birində yayımlanan yazısında bildirir. Qeyd olunur ki, Konqresin Həştərxan regional bölməsi ötən dövr ərzində cəmiyyətə inteqrasiya, burada yaşayan azərbaycanlıların təşkilatlanması, hüquq və azadlıqlarının müdafiəsi, milli-mənəvi dəyərlərinin qorunması, ictimai-siyasi fəallığının artırılması istiqamətində mühüm işlər görüb.

Həştərxanda güclü Azərbaycan diasporu var

İ.Mirişov bildirir ki, Həştərxandakı Azərbaycan diasporu tarixi vətənləri ilə nəfəs alır, daim onun təəssübkeşliyini çəkir və qayğıları ilə yaşayır. “Vətəndaşlıq borcu bizi yaşadığımız ölkə qarşısında hansı məsuliyyətə təhkim edirsə, milli mənsubluq hissi, azərbaycançılıq amalı hər birimizi müstəqil Azərbaycan dövləti qarşısında eyni məsuliyyətə sövq edir. Odur ki, azərbaycanlı adını biz həm Həştərxanda, həm də müstəqil Azərbaycan qarşısında layiqincə doğrultmağa çalışırıq”. Onun sözlərinə görə, Xəzər dənizində Azərbaycanla sərhəd qonşuluğuna malik Rusiyanın Həştərxan vilayətində yaşayan azərbaycanlılar fəaliyyətləri ilə artıq sanballı bir qüvvəyə çevrildiklərini sübuta yetiriblər. “Həştərxan şəhərində yaşayan 25 mindən çox azərbaycanlının formalaşdırdığı diaspor üzvləri kifayət qədər fəallıq nümayiş etdirir, Azərbaycan reallıqlarının, burada yaşanan inkişafın həm Rusiya, həm də dünya ictimaiyyətinə çatdırılmasında mühüm bir missiyanı layiqincə yerinə yetirirlər. Eyni zamanda, Azərbaycan diasporu Həştərxanın vilayət rəhbərliyi və ictimaiyyəti tərəfindən ən etibarlı tərəfdaş və yaşanan inkişafa böyük töhfələr verən təbəqə kimi qəbul olunur. Artıq Həştərxanda güclü Azərbaycan diasporunun mövcudluğu burada yaşayan soydaşlarımızın milli və vətəndaş hüquqlarının qorunmasında səylərin birləşdirilməsinə əlverişli zəmin yaradır. Bu birlik, öz növbəsində tarixi vətənindən ayrı düşmüş insanların milli-mənəvi dəyərlərə bağlılığını qoruyan vasitə kimi çıxış etməkdədir”.

Qeyd edilir ki, Həştərxan vilayəti ilə Azərbaycan arasında səmərəli dostluq və əməkdaşlıq münasibətlərinin daha da inkişaf etdirilməsində diaspor qüvvələri mühüm rol oynayır. Azərbaycan üçün çox vacib olan lobbiçilik fəaliyyətinin formalaşdırılmasında və onun ölkənin həyati maraqlarına yönəldilməsində də ÜAK-ın Həştərxan regional bölməsi üzərinə düşən missiyanı layiqincə yerinə yetirir. “Ona bəslənən ümidləri tam doğrultmağa çalışan Həştərxanın azərbaycanlı diasporu vilayətin ictimai-siyasi həyatında fəal iştirak edir, şəhər hökuməti və hakimiyyətin digər şaxələri ilə sıx əməkdaşlığa xüsusi önəm verir, müxtəlif partiyalar və ictimai təşkilatlarla qarşılıqlı fəaliyyət göstərir, ən mühüm ictimai tədbirlərdə yaxından iştirak edir. Doğma dilimizi, milli-əxlaqi dəyərlərimizi, azərbaycanlıların bir xalq, millət kimi formalaşdırdığı şanlı tarixi və vətənimizin şərəfini qorumaq kimi üzərimizə düşən müqəddəs vəzifəni layiqli şəkildə yerinə yetirməyə çalışırıq. Həmçinin, Həştərxan icmasına sıx inteqrasiya fonunda vilayətlə Azərbaycan arasında qarşılıqlı əlaqələrin daha intensiv şəkildə inkişafına nail olmaq fəaliyyətimizin prioritet istiqamətlərindəndir. Prezident İlham Əliyevin Dünya Azərbaycanlılarının III Qurultayında tarixi əhəmiyyət kəsb edən və proqram xarakteri daşıyan çıxışında səsləndirdiyi fikirlər, qarşıya qoyduğu vəzifələr isə fəaliyyətimizin əsas istinad nöqtələrini təşkil edir”

“Xocalıya ədalət” kampaniyası Həştərxanda da keçirilib

Heydər Əliyev Fondunun vitse-prezidenti Leyla xanım Əliyevanın təşəbbüsü ilə başlanmış “Xocalıya ədalət” kampaniyası Həştərxanda da keçirilib. Şəhər ictimaiyyəti erməni cəlladlarının dinc azərbaycanlılara qarşı hansı vəhşiliklərlə müşayiət olunan soyqırımı törətməsindən daha yaxından agah olublar. İ.Mirişov bildirir ki, Ermənistan-Azərbaycan, Dağlıq Qarabağ münaqişəsi ilə bağlı əsl həqiqətlərin nədən ibarət olması, Azərbaycan torpaqlarının beynəlxalq hüquq normalarının kobud şəkildə pozularaq indiyə qədər işğal altında qalması faktoru, bu barədə Həştərxan vilayətinin çoxsaylı ictimaiyyətinin daha dolğun şəkildə məlumatlandırılması istiqamətində fəaliyyətimiz davamlı olaraq genişlənir. “Burada bizim hamımızı azərbaycanlı olmaq kimi böyük bir məsuliyyət hissi, amalı birləşdirir. Azərbaycanlı adını həm öz ölkəmiz, həm də müstəqil Azərbaycan qarşısında layiqincə doğrultmağa çalışırıq və bu, 2010-cu ilin oktyabrında Prezident İlham Əliyevin Həştərxana səfəri zamanı bizimlə görüşündə verdiyi əsas tövsiyələrdən biridir”.

Həştərxanda məktəblər, körpülər tikilir

Ötən il mayın 19-da isə Həştərxanın mərkəzində, Naberejnaya Privoljskovo Zatona küçəsində Heydər Əliyev adına parkın təntənəli açılışı olub. 3,5 hektar ərazidə salınan istirahət parkında geniş abadlıq və yaşıllaşdırma işləri aparılıb, mindən artıq ağac əkilib. Burada müasir işıqlandırma sistemi quraşdırılıb və gözəl fəvvarə yaradılıb, oturacaqlar qoyulub. Elə həmin gün Rusiya və Azərbaycan Dostluğu körpüsünün təməli qoyulub. Körpü Heydər Əliyev adına park ilə Birinci Pyotrun abidəsi ucaldılmış parkı birləşdirəcəkdir. “Xatırladaq ki, 2010-cu il oktyabrın 27-də ümummilli lider Heydər Əliyevin abidə kompleksinin Prezident İlham Əliyevin iştirakı ilə təntənəli açılış mərasimi zamanı Həştərxan vilayətinin qubernatoru A.Jilkinin xahişini nəzərə alaraq, Azərbaycanın dövlət başçısı park boyu axan Volqa çayının qolunun digər tərəfində yaşayan əhalinin istirahətini təmin etmək məqsədilə qolun üzərindən piyada keçid körpüsünün tikintisinin həyata keçirilməsini qərara alıb və bununla bağlı müvafiq göstəriş verib. Sözügedən tapşırığın yerinə yetirilməsi üçün körpünün layihəsini hazırlamaq məqsədilə dünyada aparıcı layihə institutlarından biri olan “VolqoMostStroyProyekt” institutuna sifariş verilib və sözügedən layihə institutunun mütəxəssisləri tərəfindən işlənib. Cari ilin fevralında sözügedən körpünün tikintisinə başlanılıb. Layihənin sifarişçisi Ümumrusiya Azərbaycan Konqresinin Həştərxan regional bölməsidir. Körpünün tikintisi cari ilin sonunadək başa çatdırılacaqdır. 50 metrdən artıq uzunluğa və 6 metr enə malik olacaq körpünün metal konstruksiya şəklində tikilməsi nəzərdə tutulur. Körpünün bədii tərtibatı Azərbaycan və Rusiya milli elementlərini əks etdirən ikili ornamentlə bəzədiləcək. “Rusiya və Azərbaycan: regionlararası əməkdaşlığın yeni üfüqlərinə doğru” mövzusuna həsr edilən forum çərçivəsində keçirilən təməlqoyma mərasimi zamanı Azərbaycan və Rusiya nümayəndə heyətlərinin rəhbərləri Əli Həsənovun və Sergey Vinokurovun birgə bəyanatında deyilir ki, bu körpü Rusiya və Azərbaycan xalqlarının möhkəm dostluq münasibətlərinin əyani göstəricisi olacaqdır. Bu mühüm layihənin birbaşa müəllifi olan Prezident İlham Əliyevə Həştərxandakı Azərbaycan diasporu olaraq dərin təşəkkürümüzü bildiririk”.

Ötən ilin oktyabrında Həştərxanda ulu öndər Heydər Əliyevin adını daşıyan 11 nömrəli məktəbin təntənəli açılış mərasimi olub. Bakı küçəsində yerləşən təhsil ocağı Heydər Əliyev Fondunun təşəbbüsü və Azərbaycan dövlətinin maliyyə dəstəyi ilə yenidən qurulub, yeni korpuslar inşa edilib. Bu məktəbin açılması Azərbaycan-Rusiya humanitar əlaqələrini möhkəmləndirən mühüm hadisələrdən birinə çevrilib və vilayət icması tərəfindən böyük razılıqla qarşılanmışdır. Əsaslı təmirdən sonra məktəbin siması büsbütün dəyişib, binanın özülü möhkəmləndirilib, iki yeni korpus tikilib. Korpuslarda müasir idman kompleksi, iclas salonu və yeməkxana yerləşmiş, istilik sistemi və elektrik xətləri təzələnmişdir. Elektrik təchizatını daha etibarlı etmək üçün dörd transformator qoyulmuş, dərnək fəaliyyəti üçün kabinet açılıb. Təhsil müəssisəsi yeni kompyuterlər, mebel, yeməkxana avadanlığı ilə təchiz edilib. “Qeyd edilənlərin məntiqi nəticəsidir ki, Həştərxan Şəhər Duması əsası ümummilli lider Heydər Əliyev tərəfindən qoyulan Rusiya-Azərbaycan dostluğunun və strateji tərəfdaşlığın inkişafı və möhkəmlənməsində xidmətlərinə, Həştərxanda iri sosial-mədəni və iqtisadi layihələrlə bağlı təşəbbüslərinə, bu layihələri və Rusiyadakı Azərbaycan diasporunun fəaliyyətini dəstəkləməsinə görə Prezident İlham Əliyevi “Həştərxan şəhərinin fəxri vətəndaşı” adına layiq görüb”.

Həştərxanda azərbaycanlı sahibkarlara böyük etimad var

İ.Mirişovun sözlərinə görə, Həştərxan şəhər təsərrüfatının və infrastrukturun yenidən qurulmasında, təhsil sahəsinin inkişaf etdirilməsində Azərbaycandan olan iş adamlarının iştirakı davamlı surətdə artır. Həştərxanda azərbaycanlı sahibkarlara böyük etimad var və onların öz sahələrində peşəkar olmalarına əhali arasında inam mövcuddur. “Bir zəruri faktı vurğulayım ki, rəhbərlik etdiyim N.Nərimanov adına Çörəkbişirmə Kombinatının normal fəaliyyət göstərməsi üçün vilayət rəhbərliyi tərəfindən hər cür dəstək göstərilir. Həştərxanda yaşayan hər bir soydaşımız yaxşı bilir ki, qarşısında duran mühüm vəzifələrdən biri də tarixi vətən - müstəqil Azərbaycanla sıx əlaqə saxlamaqla yanaşı, yaşadığı ölkədə azərbaycançılığı ehtiva edən milli dəyərləri qorumaq, tanıtmaq, yaşatmaq, inkişaf etdirməklə bağlıdır. Bundan başqa, harada yaşamasından asılı olmayaraq, sağlam milli adət və ənənələrin, mədəni dəyərlərin qorunub saxlanılması, yeni nəsillərə ötürülməsi dünya azərbaycanlılarının mənəvi borcudur. Qeyd edilən səpkidə ümumi məqsədlər ətrafında birləşmək, təşkilatlanmaq, Həştəxan ictimaiyyətilə sıx təmas qurmaq, siyasi və mədəni həyatda fəal iştirak etmək qarşımızda duran ümdə məsələlər sırasında yer alır. Bu da, öz növbəsində, ümumilikdə Azərbaycan-Rusiya əlaqələrinin genişlənməsinə böyük töhfələr verir”.

Qeyd edək ki, ÜAK-ın Həştərxan regional bölməsinin sədri Ədalət Hüseynovun Azərbaycan Respublikası ilə Rusiya Federasiyası arasında dostluq əlaqələrinin inkişafındakı xidmətlərinə və diaspor quruculuğu sahəsindəki səmərəli fəaliyyətinə görə bu günlərdə Prezident İlham Əliyev tərəfindən 3-cü dərəcəli “Vətənə xidmətə görə” ordeni ilə təltif edilməsi haqqında sərəncam verilib.

N.ELDARQIZI

Paritet.-2012.-17-19 mart.-S.10.