Avropa Azərbaycanlıları Konqresinin IV Qurultayı keçirilib

Əli Həsənov: “Ölkəmiz barədə həqiqətlərin dünya ictimaiyyətinə çatdırılmasında diasporun üzərinə böyük məsuliyyət düşür”

Aprelin 29-da Almaniyanın paytaxtı Berlində Avropa Azərbaycanlıları Konqresinin (AAK) IV Qurultayı keçirilib. Diasporla İş üzrə Dövlət Komitəsindən “Paritet”ə verilən məlumata görə, qurultayda Konqresə üzv təşkilatların rəhbərləri, Azərbaycandan dövlət və hökumət nümayəndələri, millət vəkilləri, xarici ölkə deputatları, AAK-a üzv olmayan Azərbaycan cəmiyyət və birliklərinin, həmçinin digər xalqların diaspor təşkilatlarının təmsilçiləri iştirak ediblər.

Qurultayda çıxış edən Prezident Administrasiyasının İctimai-siyasi şöbəsinin müdiri Əli Həsənov Azərbaycan dövlətinin AAK-ın fəaliyyətini yaxından izlədiyini, təşkilatın yarandığı 2004-cü ildən bəri 4 dəfə qurultayının keçirildiyini, bu illər ərzində təşkilatın 3 prezidentinin seçildiyini və onların müvəffəqiyyətlə fəaliyyət göstərdiklərini vurğulayıb. “Azərbaycan xalqının ümummilli lideri Heydər Əliyev 1993-cü ildən başlayaraq diaspor quruculuğu işinə “azərbaycançılıq” ideologiyasını əsas amal elan edib. Hazırda o illərlə müqayisədə, hədəflərimiz daha da böyüyür. Azərbaycan Prezidenti İlham Əliyev bütün dünyada yaşayan azərbaycanlılara həm güvənir, həm də onların dayağıdır. Son illərdə ölkəmizin artan qüdrəti, qazandığı beynəlxalq əhəmiyyətli nailiyyətlər Azərbaycan dövlətinin düşmənlərini qıcıqlandırır, həmin qüvvələri antiazərbaycan fəaliyyətinə sövq edir”, - deyə şöbə müdiri qeyd edib. Azərbaycanın BMT Təhlükəsizlik Şurasının qeyri-daimi üzvü seçildiyini və həmin quruma sədrlik etdiyini xatırladan Ə.Həsənov həmin qüvvələrin, o cümlədən bəzi mətbu orqanlarının antiazərbaycan fəaliyyətini neytrallaşdırmaq, ölkəmiz barədə həqiqətlərin olduğu kimi dünya və Avropa ictimaiyyətinə çatdırılmasında diaspor təşkilatlarımızın üzərinə böyük məsuliyyət düşdüyünü diqqətə çatdırıb.

DİDK-nin sədri Nazim İbrahimov isə, çıxışında AAK-ın 4-cü qurultayının işinə uğurlar arzulayaraq bildirib ki, AAK 8 illik mövcudluğu dövründə çox mühüm işlər görüb. Komitə sədri bu illərdə AAK-ın tam mənası ilə diaspor təşkilatı kimi formalaşdığını deyərək qeyd edib ki, seçiləcək yeni rəhbər heyətə Dövlət Komitəsi dəstəyini davam etdirəcək.

“Azərbaycan həqiqətlərinin dünya ictimaiyyətinə çatdırılması əsas məqsədlərdəndir”

Başar Kömür konqresə sədr olduğu müddət ərzində təşkilatın keçdiyi inkişaf yolu, görülən işlər barədə məlumat verib. AAK-ın III qurultayından ötən müddət ərzində Avropa ölkələrində yeni Azərbaycan diaspor təşkilatlarının yaradılması prosesinin davam etdiyini deyən B.Kömür ötən müddət ərzində Avropa ölkələrində fəaliyyət göstərən cəmiyyət və dərnəklərinin fəaliyyətində mühüm keyfiyyət dəyişikliklərinin baş verdiyini diqqətə çatdırıb.

“2004-cü ildə 40-dan bir qədər artıq təşkilat tərəfindən təsis olunmasına baxmayaraq, hazırda III Qurultayın işində Avropanın müxtəlif ölkələrində fəaliyyət göstərən 61 azərbaycanlı cəmiyyəti və dərnəyi qatılıb. Toplantıda Almaniya 43, İsveç 23, Niderland 21, Fransa 12, Böyük Britaniya və Şimali İrlandiya ı 11 nəfərlə təmsil olunur”, - deyə o bildirib.

B.Kömür Avropada cəmiyyətlərin Azərbaycan xalqının və dövlətinin milli maraqlarının ardıcıl müdafiə olunması sahəsindəki fəaliyyətinin Azərbaycan dövləti tərəfindən yüksək dəyərləndirildiyini qeyd edərək 2011-ci il iyul ayında Bakı şəhərində keçirilən Dünya Azərbaycanlılarının III Qurultayında təltif olunan şəxslərin əksəriyyətinin Avropa ölkələrində fəaliyyət göstərən diaspor təşkilatlarının nümayəndələri olmasının təsadüf olmadığını vurğulayıb: “Azərbaycan həqiqətlərinin dünya ictimaiyyətinə çatdırılması, Ermənistanın Azərbaycana təcavüzü ilə bağlı beynəlxalq aləmin məlumatlandırılması Avropa ölkələrində fəaliyyət göstərən diaspor təşkilatlarının diqqət yetirdiyi əsas məsələlərdən olub. “20 Yanvar” faciəsinin, Xocalı soyqırımının, 31 mart-Azərbaycanlıların soyqırımı kimi tarixlərin ildönümləri Avropanın onlarla ölkəsində müxtəlif tədbirlərin, o cümlədən etiraz aksiyalarının, konfrans və dəyirmi masaların, sərgilərin keçirilməsi yolu ilə ictimaiyyətin diqqətinə çatdırılıb”, - deyə B.Kömür bildirib.

Fransa Milli Assambleyasının qondarma “erməni soyqırımı”nın inkarına görə cinayət məsuliyyəti müəyyən edən qanun qəbul etməsinə Avropanın bir sıra ölkələrində Azərbaycan diaspor təşkilatları tərəfindən kəskin etiraz bildirildiyini də diqqətə çatdıran AAK prezidenti deyib ki, Azərbaycanın zəngin mədəniyyətinin təbliği istiqamətində də mühüm işlər görülür: “Avropanın müxtəlif ölkələrində fəaliyyət göstərən Azərbaycan diaspor təşkilatları bu məqsədlə Azərbaycan incəsənət xadimlərinin konsert proqramlarını təşkil edir, onlarla ədəbi-bədii, musiqili tədbirlər keçirir. 2011-ci ildə Almaniyanın Düsseldorf şəhərində 56-cı “Avroviziya” mahnı müsabiqəsində Azərbaycan təmsilçilərinin tarixi qələbə qazanmasında xaricdə, xüsusən Avropa ölkələrində yaşayan soydaşlarımızın da fəallığı mühüm rol oynadı. Hələ yarışmadan əvvəl diaspor nümayəndələri müxtəlif sosial şəbəkələrdə, kütləvi informasiya vasitələrində, ictimaiyyət arasında Azərbaycan təmsilçilərini təbliğ ediblər”.

Avropada Azərbaycanın lobbiçiliyi güclənir

O, ötən dövr ərzində Avropa ölkələrində yaşayan azərbaycanlıların ictimai-siyasi fəallığının artırılması, hüquq və azadlıqlarının qorunması istiqamətində müxtəlif tədbirlərin həyata keçirildiyini bildirib: “2011-ci ildə Azərbaycan diasporunun fəal üzvlərindən olan Estoniya Mərkəzçi Partiyasının nümayəndəsi Eldar Əfəndiyev üçüncü dəfə Estoniya Parlamentinin millət vəkili, doktor Rahim Şmit Almaniya Federal Dövlətinin Raynlan Falts Əyalət Parlamentinin millət vəkili seçilib. 2011-ci ildə Almaniyadakı Azərbaycanlıların Koordinasiya Mərkəzi diaspor təşkilatı kimi Berlin torpağının Məsləhətçi Şurasının ictimai təşkilatlar siyahısına daxil edilib. Bununla da AAKM Almaniyada mühacirətdə yaşayan əcnəbilərin təmsilçisi kimi Məsləhətçi Şuranın seçkilərində iştirak etmək hüququ qazanıb. 2011-ci il dekabrın 5-də Berlin-Brandenburq İnteqrasiya və Miqrasiya məsələləri ilə bağlı Məsləhətçi Şuraya keçirilmiş seçkilərdə Berlində yaşayan soydaşımız, Türkiyə-Azərbaycan Birliyinin (TAB) İdarə Heyətinin üzvü Cəlili Maku Həbib öz namizədliyini irəli sürdü və gizli səsvermə nəticəsində Məsləhətçi Şuraya üzv seçildi”.

B.Kömür Danimarkanın Glostrub xəstəxanasının professoru və Kopenhagen Universitetinin baş elmi işçisi, həmyerlimiz Məsud Aşinanın 2011-ci ilin “Nevrologiya” sahəsi üzrə “Mogens Fog” mükafatına layiq görüldüyünü də qeyd edib: “Ötən dövr müxtəlif xalqların diasporları ilə əməkdaşlığın inkişaf etdirilməsi, xarici ölkələrin parlament və hökumət üzvləri, kütləvi informasiya vasitələri, elm adamları, siyasi partiya və təşkilatları ilə əlaqələrin yaradılması baxımından səmərəli olub. Bu baxımdan Almaniya və İsveçdə azəri və türk diaspor təşkilatlarının birgə keçirdiyi konfranslar böyük əhəmiyyət kəsb edir”. Onun sözlərinə görə, 2011-ci ildə Danimarkada fəaliyyət göstərən “Vətən” Cəmiyyətinin üzvləri bu ölkənin parlamentinin türk əsilli deputatları Hüseyn Arac və Yıldız Akdoğan, İsveç Azərbaycanlıları Konqresinin üzvləri İsveç parlamentinin Xarici işlər üzrə komitəsinin üzvü xanım Desiree Pethrusla, “Azərbaycan naminə” cəmiyyətinin nümayəndələri “Ətraf mühiti qoruma və Yaşıllar” partiyasının parlament qrupu başçısı Mehmet Kaplanla görüşərək, onlara Qarabağ həqiqətləri barədə informasiyalar veriblər.

B.Kömür Avropa ölkələrində yaşayan azərbaycanlı gənclərin milli-mənəvi dəyərlərimizə sədaqətinin qorunub saxlanılmasının, ölkəmizin maraqlarının qorunmasında fəal iştirakının təmin edilməsinin dövlət gənclər siyasətinin prioritet istiqamətlərindən olduğunu qeyd edib. Diaspor quruculuğu və Azərbaycan lobbisinin yaradılmasında gənclərin fəal iştirakının daha ciddi nailiyyətlər qazanmağa imkan yaratdığını qeyd edən B.Kömür bu mühüm amilin nəzərə alınmasının zəruriliyini və onun real həyatda öz təsdiqini tapmasına stimul yaradılması məqsədilə ötən dövrdə bir sıra əhəmiyyətli tədbirlərin həyata keçirildiyini vurğulayıb. “AAK-ın gündəliyində yarandığı gündən bir vacib məsələ var və bu məsələ həll olunana qədər biz onu gündəliyimizdən çıxarmayacağıq. Bu, işğal olunmuş torpaqların azad edilməsi məsələsidir. Bu məsələnin həllinə çalışmaq hər birimizin Vətən qarşısında müqəddəs borcudur”, - deyə o diqqətə çatdırıb. Qurultayda Azərbaycanın Almaniyadakı səfiri Pərviz Şahbazov, Belarus Azərbaycanlıları Konqresinin prezidenti Natiq Bağırov, Almaniya Azərbaycanlılarının Koordinasiya Mərkəzinin rəhbəri Samirə Patzer İsmayılova, Gürcüstan Azərbaycanlıları Mədəniyyət Mərkəzinin sədri Fazil Həsənov, Benilüks Azərbaycanlıları Konqresinin prezidenti Sahil Qasımov, TADEF sədri Bilal Dündar çıxış edərək AAK-ın bundan sonrakı hədəflərindən bəhs ediblər. Azərbaycan naminə fəaliyyət istiqamətində daha peşəkar və mütəşəkkil iş aparılmasının vacibliyini vurğulayan iştirakçılar Azərbaycan diaspor təşkilatlarının Avropa ölkələrində siyasi çəkisinin də artmasının sevindirici fakt olduğunu bildiriblər.

Samirə Patzer İsmayılova AAK-ın yeni prezidenti seçilib

Daha sonra, AAK-ın qətnaməsi, IV Qurultay nümayəndələrinin Azərbaycan Prezidenti İlham Əliyevə müraciəti və digər sənədlər qəbul edilib. Qətnamədə deyilir ki, qurultay xarici ölkələrdə fəaliyyət göstərən diaspor təşkilatlarının təbliğat sahəsində fəaliyyətinin daha da gücləndirilməsi, Ermənistanın Azərbaycana təcavüzü ilə bağlı beynəlxalq aləmin məlumatlandırılması və bu faktın Avropa dövlətlərinin parlamentlərinin, siyasi dairələrinin müzakirəsinə çıxarılmasını yeni dövrdə AAK-ın qarşısında duran prioritet vəzifələr kimi qiymətləndirir. Konqresə üzv olmaq üçün xarici ölkələrdə fəaliyyət göstərən bir sıra Azərbaycan diaspor təşkilatlarının üzvlüyə qəbul edilməsi və “Avropa Azərbaycanlıları Konqresi Fəxri Prezidentlərinin Məşvərət Şurası”nın yaradılması qərara alınıb.

Prezident İlham Əliyevə ünvanlanmış müraciətdə isə deyilir ki, Azərbaycan həqiqətlərinin dünya ictimaiyyətinə çatdırılması, mədəni irsimizin təbliği, həmvətənlərimizin hüquq və azadlıqlarının müdafiəsi, mili-mənəvi dəyərlərinin qorunması istiqamətində qazanılmış uğurların əsas səbəblərindən biri də dövlət başçısının diaspor quruculuğu işinə göstərdiyi yüksək diqqət və qayğının təzahürüdür.

Qurultayda AAK-ın tərkibi də seçilib. Belə ki, AAK-ın İcraiyyə Komitəsi və Nəzarət-Təftiş Komissiyasının tərkibi seçildikdən sonra, AAK-ın I vitse-prezidentləri və vitse-prezidentləri seçilib. Sahil Qasımov və Bulal Dündar AAK-ın I vitse-prezidenti, Belarus-Azərbaycan İcmaları Konqresinin sədri Natiq Bağırov, Azərbaycan Federasiyası İsveçin sədri Səttar Sevgin, Eldar Əfəndiyev, ÜAK-nin Moskva şəhər Təşkilatının sədri İlqar Hacıyev isə vitse-prezidentlər seçilib. Samirə Patzer İsmayılova isə, Avropa Azərbaycanlıları Konqresinin prezidenti seçilib. Toplantıda “Gücümüz birliyimizdədir” sənədli filmi nümayiş etdirilib, həmçinin Dünya Azərbaycanlılarının III Qurultayının yekunlarına həsr olunmuş kitabın təqdimatı keçirilib.

Qeyd edək ki, AAK 2004-cü il aprelin 17-də Berlində keçirilmiş toplantıda təsis edilib. Qurumun yaradılmasında əsas məqsəd Avropa ölkələrində məskunlaşmış soydaşlarımızın tarixi Vətənləri ilə əlaqələrinin daha da möhkəmləndirilməsi, dünya azərbaycanlıları arasında mənəvi, siyasi birliyin və həmrəyliyin təmin olunması, onların milli, sosial və vətəndaş hüquqlarının müdafiəsi, milli-mənəvi dəyərlərin birgə qorunması və Azərbaycan icma və birliklərinin regionda fəaliyyətlərinin əlaqələndirilməsidir. AAK-da Avropanın 27 ölkəsindən 60-dan artıq diaspor təşkilatı təmsil olunur.

Asif NƏRİMANLI

Paritet.-2012.-1-2 may.-S.3.