Rus zabitini oynadı, indi də monqol imperatoru olmaq istəyir

Kamran Ağabalayev : “Bir neçə ssenarim Almaniya və Türkiyədə bəyənilib”

O, 1980-ci ildə Bakıda anadan olub. 190 nömrəli orta məktəbi, daha sonra Bakı Dövlət Universitetinin Hüquq fakültəsini bitirib. Evlidir, Müslüm və Əli adında iki oğlu var. Müsahibim kinoda və teatrda ilk addımlarını atan Kamran Ağabalayevdir. Onunla ilk rolunun məsuliyyətindən, teatrda səhnəyə qoyulan pyeslərinin uğurundan, kinoman kimi sevdiyi filmlərdən söhbət etdik.

-Səhv etmirəmsə, “Mən evə qayıdıram” filmində ilk rolunuzu ifa etmisiniz. Filmin montaj prosesində bəzi kadrlara baxdım və ifa tərziniz diqqətimi çəkdi. Nə vaxtsa aktyor olmağı fikirləşirdinizmi?

-Çox şadam ki, ifa tərzim xoşunuza gəlib. Sözün düzü, heç vaxt aktyor olmaq fikrində olmamışam. Dünya aktyorlarının, demək olar, hamısını tanıyıram, hətta onların həyat tərzlərinə belə bələdəm. Və bu peşənin çox çətin, məsuliyyətli olduğunun fərqindəyəm. Bu çətinliklərdən az da olsa, çəkinirdim. “Bunun məsuliyyətinin altından çıxa biləcəyəmmi?” bu sualı özümə tez-tez verirdim. İlk dəfə “Mən evə qayıdıram” filminin ssenarisini oxuyanda Savelyev obrazının mənə çox yaxın olduğunu düşünmüşdüm. Yaxın dostum olan aktyor-kaskadyor Murad Abdullayevin təkidiylə bu filmdə Savelyev obrazının kastinqindən keçməyə razılıq verdim. Böyük məsuliyyət idi. Çünki, bildiyiniz kimi, mən həm də rejissor Samir Kərimoğlunun bu filmdə birinci assistenti idim. İki çətin işin öhdəsindən gəlməliydim.

“Hətta mənə sual verməyə belə cəsarət etmirdilər”

-Rola necə hazırlaşırdınız? İlk rol ifanızı özünüz necə qiymətləndirirsiniz?

-Rola hazırlaşmağımda Murad Abdullayevin və Faiq Kərimoğlunun böyük əməyi olub. Mən uzun müddət professional idmanla məşğul olmuşam və aldığım zədə hərbi xidmətə çağırılmamağımla nəticələnib. Buna görə, filmdə zəhmli rus mayorunu oynamağım mənə bir az çətin görünürdü. Faiqlə Murad mənim bu obrazı yaratmağım üçün əllərindən gələni etdilər. İkisinə də çox təşəkkür edirəm. Həyatda çox şən biriyəm, lakin zabit libasını geyindiyim zaman tamamən dəyişirdim, bəziləri hətta mənə sual verməyə belə cəsarət etmirdilər. Deyilənə görə, çox zəhmli görünürmüş, amma özüm də dəyişdiyimi hiss edirdim. Kinoman olduğumdan, demək olar, hərbi mövzulu bütün filmləri izləmişəm. Və rola hazırlıq vaxtı o filmlər bir-bir gözümün qabağından keçirdi. Həmçinin hərbçi obrazını yaradan bütün aktyorlardan az da olsa, yararlanmağa çalışırdım.

-Şəxsən məndə belə təəssürat yarandı ki, Savelyev rolu Kamran Ağabalayevin həm də özüdür.

-Düz buyurursunuz, Savelyev rolu mənə çox bənzəyir. Çətin anlarda həmişə dostlarıma kömək etməyə hazıram. Bunu söz xatirinə demirəm, Savelyev obrazını heç vaxt unutmayacağam. İlk oynadığım roldur və mənə uğur gətirəcəyinə inanıram.

-İlk aktyor işi həm çox məsuliyyətli, həm də çətin olsa gərək. Bir tərəfdən obrazı yaratmaq və yaratmaqla kifayətlənməyib inandırmaq, digər tərəfdən özünü təsdiq etmək. Rejissor Samir Kərimoğlu ilə rol barəsində fikir ayrılığınız olurdumu?

-Ətrafımda peşəkarlar olduğundan əziyyət çəkdim desəm, yalan olar. Samir Kərimoğlu, Murad Abdullayev, operator Ayxan Salar, prodüser Nazim Hüseynov, baş prodüser Böyükağa Məmmədov sadaladığım peşəkarlara bariz nümunədir. Samirlə filmlərə baxış tərzimiz, fikirlərimiz eyni olduğundan aramızda fikir ayrılığı olmayıb. Ümid edirəm ki, tamaşaçılar Savelyev obrazını bəyənəcək. Yox, ümid etmirəm, hətta buna inanıram da. Kinoman olduğumdan bu cür obrazların sevildiyinin fərqindəyəm.

“Çingiz xan obrazını canlandırmaq istəyirəm”

-Aktyorluğu davam etdirmək istəyirsinizmi? Rol təklifləri varmı?

-Hazırda da aktyorluğumu davam etdirirəm. Cavid Təvəkkülün “Döngələr” serialında çəkilirəm. Son filmim isə Heydər Əliyev Fondunun təşəbbüsü ilə həyata keçirilən Yeqor Kançolovskinin, Nadir Maçanovun prodüseri olduğu “Bakı, mən səni sevirəm” layihəsində “Rəssam” novellasında çəkilmişəm. Rejissor isə Samir Kərimoğludur. Bundan başqa, “Space” TV-də nümayiş olunacaq “Cənnət” serialında da baş mənfi qəhrəmanlardan birinə təsdiq olunmuşam. Bir il ərzində bu, az deyil. .

-Hansı obrazı canlandırmaq istəyirsiniz?

-Çox böyük məmnuniyyətlə Çingiz xanı və hər hansı filmdə iblisi canlandırardım.

- Dünya və Azərbaycan kinosunda bəyəndiyiniz filmlər və rejissorlar kimlərdir?

-Azərbaycanda çəkilən və Yusif Vəliyevin də oynadığı bütün filmlərə maraqla baxıram. Ümumiyyətlə, bu aktyoru çox sevirəm. Bizim hər bir zamanda istedadlı aktyorlarımız olub. Bugünkü gündə Qurban İsmayılov, Murad Abdullayev, Rasim Cəfərov, Zaur Şəfiyev belələrindəndir. Dünya kinematoqrafıyasından isə durmadan günlərlə danışa bilərəm. Devid Finçer, Ron Hovard, Kristofer Nolan, Darren Aranofski, Frensis Ford Koppola, Takaşi Miike, Conatan Demmi, Alexandro Amenabar, Ues Kreyven bəyəndiyim rejissorlardandır. Sevdiyim iki aktrisanı deyim, keçək aktrisalar. Azərbaycandan Laləzar Mustafayeva, Hollivuddan isə Hilari Suonkdur. Aktyorlara gəlincə, birinci sırada Entoni Xopkins gəlir, onun oyun tərzini çox sevirəm. Bundan başqa, Xavyer Bardem, De Niro, Al Paçino, Conni Depp, Rayan Qoslinq, Kristian Beyl, Entoni Kvin də sənətinə heyran olduğum aktyorlardandır. Filmlərə gəlincə, sizin üçün top 10-umu açıqlayıram: “Xaç atası”, “Yeddi”, “Quzuların səssizliyi”, “Şübhəli şəxslər”, “Çapıqlı üz”, “Üzüklərin sahibi”, “Bir cənub şəhərində”, “Əsgər Rayanın xilası”, “Basketbolçunun gündəliyi”, “Mizeri”. Sonuncu film Stivin Kinqin ssenarisi əsasında çəkilib, ümumiyyətlə Kinqin əsərləri əsasında çəkilən əksər filmləri bəyənirəm.

“O filmin həyatımda çox böyük rolu var”

-Ən çox baxdığınız filmlər həm də ən çox sevdiyiniz filmlərdirmi? Yoxsa ...

Ən çox baxdığım filmlər dramaturgiyası güclü olan filmlərdir. Bu filmlərdən nəyi isə (süjet xəttini, obrazları, xarakterləri, daxili və xarici konfliktləri) öyrənməyə çalışıram. Eyni zamanda bu mövzuda mütaliə etməyi çox sevirəm. Çünki hələ öyrəniləsi çox şey var.

-Həyatınıza, düşüncənizə təsir edən filmlər olubmu?

Olub. Bayaq bilərəkdən sadaladığım top 10-da onun adını çəkmədim. Çünki hardasa bu sualı gözləyirdim. Bu film Ron Hovardın “Cindrella man” filmidir. Bu filmin həyatımda çox böyük rolu var. Ailə, qarşıya qoyulan məqsəd, bir parça çörək naminə çalışmaq, həyatdan hər şeyin yaxşısını istəmək baxımından fikirlərimə çox təsir edən film olub. “Həyatıma çox bənzəyirmi bu film” sualını versəniz, bu suala qəti cavab vermək istəmirəm deyəcəm.

“İlk dəfə bütün folklor qəhrəmanlarımız bir arada”

-Söhbətin bu yerində keçid alaq teatrdakı işlərinizə. Sizi Gənc Tamaşaçılar Teatrının yeni imzası kimi tanıyırlar. Teatrda sizin müəllifi olduğunuz iki pyes Yeni il və Novruz bayramı ərəfəsində tamaşaçılara təqdim olunub. Məndə olan məlumata görə, həmin teatrda artıq üçüncü pyesiniz - “Hekayəti-Şahzadeyi Xəzər” də səhnələşdirilir. Pyesin çox maraqlı, özünəməxsus adı var, amma istərdim bu haqda özünüz danışasınız.

-“Teatrın yeni imzası” - düşünürəm ki bu ad üçün hələ gəncəm. Amma sağ olsunlar Gənc Tamaşaçılar Teatrının direktoru Mübariz Həmidov və rejissor Nicat Kazımov mənə inandılar və şans verdilər. Ümumiyyətlə, bir çox tanıdığımız dramaturqlar Gənc Tamaşaçılar Teatrından çıxıb. Bu mənada Mübariz müəllimin istiqamət götürdüyü yolu alqışlayıram. Mənə şans verməyinə görə demirəm, bu gün mənəm, sabah o biri. Mənim bəxtim həm də onda gətirdi ki, pyeslərimə Nicat Kazımov kimi istedadlı rejissor quruluş verib. “Hekayəti-şahzadeyi- Xəzər” Hollivud təcrübəsindən istifadə etdiyim bir formada yazılmış pyesdir. Folklorumuzda çox maraqlı qəhrəmanlarımız var və mən bu qərara gəldim ki, onların hamısını bir yerə yığıb maraqlı bir pyes yazım. Pyesi Nicat Kazımovun köməyi ilə yaza bildim. Maraqlı iş olacaq. Eksprementdir, məncə ilk dəfədir ki, bütün folklor qəhrəmanlarımız bir arada təqdim olunacaq. Mövzu isə klassikdir - xeyir və şərin mübarizəsi. Bir daha sizin vasitənizlə Mübariz müəllimə və Nicat Kazımova minnətdarlığımı bildirirəm.

“Hər yazar ssenarist adını rahat daşıyacağını sanırsa, yanlış fikirdədir”

- Bəs ssenari yazırsınızmı? Tarkovski deyirdi ki, mən yazıçının ssenaristə çevrilməsinə inanmıram. Siz necə fikirləşirsiniz? Teatr və kino üçün yazan adam ilk öncə nəyi bilməlidir?

-Ssenari yazıram və yaxud yazmağa çalışıram. Hər yazar ssenarist adını rahat daşıyacağını sanırsa, yanlış fikirdədir. İlk dəfə ssenari yazmaq təklifini Samir Kərimoğludan aldım. Və indiyə qədər yazdıqlarımda onun böyük əməyi var. Personajların yükü, obraz nə edir, niyə edir, nə zaman edir, kimin üçün edir, nə naminə edir, xarici, daxili konfliktlər, açıq və bağlı sonluq və sair bu kimi ssenari terminlərini Samir Kərimoğluya və bir də Robert Makkininin kitablarına müraciət etməklə öyrənməyə çalışıram. Bir neçə ssenarim Almaniya və Türkiyədə bəyənilib, hazırda danışıqlar gedir. Tarkovskinin fikirlərinə gəlincə, onun sözlərinə münasibət bildirmək mənim üçün hələ tezdir.

Gələcək planlarınız necədir?

-Deyirlər, Allahı güldürmək istəyirsənsə, plan qur. Heç bir planım yoxdur. Allahın qismətindən qaçmaq olmaz.

Nərmin MURADOVA

Paritet.-2012.-3-4 may.-S.16.