Bakıda Bülbülün abidəsinin açılışı olub

Prezident İlham Əliyev: “Bundan sonra Şuşada yenidən Bülbülün, Natəvanın, Üzeyir Hacıbəylinin abidələri qurulacaq”

Azərbaycan Prezidenti İlham Əliyev oktyabrın 31-də Bakıda, Bülbül prospektində görkəmli opera müğənnisi, SSRİ Xalq Artisti Bülbülün xatirəsinə ucaldılmış abidənin açılışında iştirak edib. Prezident abidənin üzərindəki örtüyü götürüb, önünə gül dəstəsi qoyub.Dövlət başçısı mərasimdə çıxış edib.

Bakı Musiqi Akademiyasının rektoru, xalq artisti Fərhad Bədəlbəyli, xalq artisti Arif Babayev, Rusiyanın xalq artisti, Vokalçıların Bülbül adına VI Beynəlxalq müsabiqəsinin münsiflər heyətinin sədri Sergey Leyferkus, fransız sənətkar, müsabiqənin bədii rəhbəri Robert Koerner, görkəmli müğənninin oğlu Polad Bülbüloğlu Azərbaycan musiqi sənətinin inkişafında Bülbülün əvəzsiz xidmətlərindən danışıblar.

Polad Bülbüloğlu atasının xatirəsinin əbədiləşdirilməsinə göstərdiyi diqqət və qayğıya görə Bülbülün ailə üzvləri adından dövlət başçısına minnətdarlığını bildirib.Qeyd edək ki, abidənin müəllifi əməkdar incəsənət xadimi Akif Əsgərovdur. Tuncdan hazırlanan abidənin postamentlə birlikdə hündürlüyü 4,6 metrdir.

Preizdent çıxışında deyib ki, Azərbaycan yaxın zamanda Dağlıq Qarabağı erməni işğalından azad edəcək və orada tarix və mədəniyyət abidələrini bərpa edəcək:”Biz qədim Azərbaycan torpaqlarında ikinci erməni dövlətinin yaradılmasına imkan verməyəcəyik və mütləq ərazi bütövlüyümüzü bərpa edəcəyik .Bundan sonra Şuşada yenidən Bülbülün, Natəvanın, Üzeyir Hacıbəylinin abidələri qurulacaq. Əminəm ki, biz bu abidələrin açılış mərasimlərində iştirak edəcəyik. Şuşa və Xankəndidə isə Azərbaycanın milli bayrağı qaldırılacaq”.

Prezidentin sözlərinə görə, Bülbülün repertuarında olan xalq mahnıları, muğam, opera partiyaları Azərbaycan musiqisinin “qızıl fondu”nu təşkil edir. İlham Əliyev xatırladıb ki, Bülbül Qarabağ torpağında anadan olub.

Dövlət başçısı qeyd edib ki, ermənilər işğal edilən torpaqlarda Azərbaycanın tarix və mədəniyyət abidələrini məhv ediblər.

Paritet.-2012.-1-2 noyabr.-S.3.