Osloda “Azərbaycan Evi”nin növbəti layihəsi

Norveçdə yaşayan gənc diaspor fəalımız “jiu-jitsu” idman növü üzrə ölkə çempionatında ən yüksək nəticə göstərərək qızıl medala layiq görülüb

Osloda “Azərbaycan Evi”-nin təşkilatçılığı ilə məşhur mügənni Cavid Təbrizli və onun musiqi qrupunun möhtəşəm konserti keçirilib. Konsertdə Osloda yaşayan tanınmış aşıq sənətinin təmsilçisi gözəl saz ustası Cəfər Cəfərzadə də ifa edərək aşıq musiqisi ilə konsertə rəng qatıb.

“Azərbaycan Evi”-nin idarə heyətinin üzvü Ramil Əliyev məlumat verib ki, qısa zamanda fəaliyyətə başlamasına baxmayaraq Oslodakı “Azərbaycan Evi” böyük layihələri ilə Norveçdə diaspor fəaliyyəti göstərərək ölkəmizi Skandinaviyada təmsil və təbliğ edir: “Bu layihələrə misal olaraq deyə bilərəm ki, Azərbaycandan dəvət etdiyimiz Azərbaycan Dövlət Rəqs ansamblının dörd solistinin iştirakı ilə intensiv milli rəqs kursları, Norveçdə yaşıyan Azərbaycan qadınlarının toplantısı, Azərbaycanın Müstəqillik gününün qeyd olunması, Norveçlə Azərbaycan arasında diplomatik əlaqələrin qurulmasının 20 illiyinə həsr olunmuş Oslo Universitetində təşkil etdiyimiz mədəni proqram, Oslo Universitetinin beynəlxalq festivalında rəqs qrupu ilə Azərbaycanın təmsili və sairə layihələri göstərə bilərəm”.

Osloda “Azərbaycan Evi”-nin yaranması isə ən böyük nailiyyətimizdir deyən R. Əliyev bildirib ki, artıq Norveçdə yaşıyan azərbaycanlıların görüş mərkəzi olan məkanımız vardır və bu məkan bütün həmvətənlilərimizin doğma məkanı olacağını hədəflədiyimiz “Azərbaycan Evi”-idir. “Azərbaycan Evi”-nin əsas məqsədlərdən biri Norveçdə təşkilatlanmış, vahid və güclü Azərbaycan icmasının formalaşmasına nail olmaq, yerli Azərbaycan təşkilatlarına və qruplarına dəstək olmaqdır.

Sonda R.Əliyev onu da qeyd etdi ki , Cavid Təbrizlinin konserti günü Norveç Azərbaycanlıları Gənclər Təşkilatının (NAYO) fəal üzvü olan Hüseyn Abbaszadə Osloda keçirilmiş “jiu-jitsu” idman növü üzrə ölkə çempionatında ən yüksək nəticə göstərərək qızıl medala layiq görülüb. Hüseyn Abbaszadə “Azərbaycan Evi” və konsert iştirakçıları tərəfindən sürəkli alqışlarla təbrik olundu və nörveçdə azərbaycanlı gəncin nailiyyəti xalqımızın və Norveçdə yaşayan bütün azərbaycanlıların uğuru kimi qiymətləndirilib.

NƏRMİN

Paritet.-2012.-17-19 noyabr.-S.16.