“Festivalın ətrafında daha çox gənclərin cəmlənməsini istəyirik”

Jalə Əliyeva : “Gələn il daha fərqli bir layihə ilə qarşınıza çıxacağıq”

Gənclər və İdman Nazirliyi, Mədəniyyət və Turizm Nazirliyi, Azərbaycan - Amerika Alyansının dəstək verdiyi Gənclərin II Ümumrespublika Teatr Festivalı final mərhələsinə çatıb. Ekologiya, ətraf mühitin mühafizəsi mövzusuna həsr edilən festivalın qiymətləndirmə mərhələsi Dövlət Gənc Tamaşaçılar Teatrında noyabrın 27-dən dekabrın 1 - dək davam edəcək.

Festival çərçivəsində istər peşəkar, istərsə də həvəskar gənc teatr kollektivlərində seçim aparılıb. 8 Bakı, habelə Sumqayıt, Ucar, Zaqatala, Ağdam, Zərdab truppalarının iştirak etdiyi festivala ümumilikdə 100-dən artıq gənc qatılaraq, 13 maraqlı, aktual mövzulu tamaşalar hazırlanıb. “Zibil düşüncə”, “13 yaşlı qızın gündəliyi”, “Ekosit”, “Qoy nəfəs alım”, “Zibilə düşdük”, “Oksigen balonu” və s tamaşalarla 4 gün ərzində tamaşaçıları, xüsusən də gənc auditoriyanı teatra səsləyəcək festival zamanı tanınmış sənət adamlarının iştirakı ilə ustad-dərslərin yer aldığı və həyəcanla gözlənilən 3 günlük Art Kamp keçiriləcək.

Festivalın ideya rəhbəri, millət vəkili Jalə Əliyeva “Paritet”ə müsahibəsində bildirdi ki, festivalın builki mövzusunun yaranmasına Heydər Əliyev Fondunun vitse-prezidenti, Azərbaycan gəncliyinin bariz nümunəsi Leyla Əliyevanın 12 iyul 2011- ci ildə elan etdiyi yeni qlobal gənclər ekoloji kampaniyası - “Ətraf mühitin müdafiəsi fəaliyyətində beynəlxalq dialoq” (International Dialogue on Environmental Action - İDEA) zəmin yaradıb.

-Məlum olduğu kimi festival iyul ayının 12-dən start götürüb. Bu da təsadüfü deyildi. Ötən il 12 iyulda H.Əliyev Fondunun vitse-prezidenti, Azərbaycan gəncliyinin bariz nümunəsi Leyla Əliyeva tərəfindən “İDEA- Ətraf mühitin müdafiəsi fəaliyyətində beynəlxalq dialoq” təşəbbüsü irəli sürüldü. Biz də istərdik ki, teatra gələn gənclərimiz vətəni sevməyin yolunun vətənin hər daşını, hər küçəsini, hər güşəsini, hər ağacını, hər çiçəyini sevməkdən başladığını səhnədən gözləriylə görsünlər. Bu səbəbdən də “Biz inkişaf zamanındayıq” İB tərəfindən festivala İDEA kampaniyasının fəaliyyətə başladığı və ildönümünün qeyd olunduğu 12 iyulda start verildi. Festival çərçivəsində məqsəd həm gəncliyi yaradıcı dialoqa cəlb etmək, həm də gənc teatr kollektivlərinin hər üzvünü ekoloq -səfir olmağa həvəsləndirməkdir. Festivalımız start götürdüyü gündən bəri çox geniş marağa səbəb oldu. Doğrusu, biz düşünürdük ki, mövzu bəlkə də teatr tamaşaları üçün uyğun deyil, çətinliklərlə qarşılaşa bilərik. Bəlkə də arzu etdiyimiz səviyyədə və kəmiyyətdə ssenari təqdim olunmaz. Amma düşündüyümüzün tam əksi oldu. Çox sayda ssenari festivala təqdim olundu. Münsiflər heyəti bu ssenariləri dəyərləndirdilər.

-Bir festival bitib, ikincisinin də sonuna gəlirsiniz. Qarşınıza qoyduğunuz məqsədlərə çata bildinizmi?

- Bu festivalı keçirərkən qarşımıza bir məqsəd qoyduq; teatrımızın, mədəniyyətimizin inkişafına kömək etmək, gənclərimiz arasında teatr sənətinə məhəbbəti artırmaq. Qeyd edək ki, gözəl sənət nümunələri ilə bərabər eyni zamanda mədəniyyətimizdə, plüralizmin, demokratiyanın gətirdiyi sərhədsizlik də mövcuddur. Bunun üçün biz mədəniyyətimizi bu sərhədsizlik məkanında bayağılıqdan qorumaq məqsədilə bir üsul düşündük. Bu üsul həm də teatra xidmət etməli idi. Bu gün mədəniyyət sahəsində gənclərin müraciət edə biləcəyi resurslar, obyektlər var; teatr, kino, televiziya və s... Xüsusilə insanın öz daxili ilə baş-başa qalacağı bir sahə kimi teatrın adını çəkə bilərəm. Və düşündük ki, teatrın yetişən nəslin arasında populyarlığını özünə qaytarmaq, 40-50-60 il bundan əvvəlki Azərbaycan teatrını yenidən canlandırmaq üçün biz bu addımı atdıq. Elə ilk festivalda mövzumuz vətənpərvərlik idi. Vətənpərvər bir gənc necə olmalıdır, vətəni üçün nə etməlidir? Ötən il tamaşalarla bu fikri gəncələrə aşılaya bildiksə, bu il də ekologiya mövzusunu prioritet bir mövzu kimi seçdik. Eyni zamanda qeyd edim ki, biz yalnız sənətin inkişafına deyil, bu sənət yolu ilə ideologiyaya xidmət etmək istədik. Yəni məqsədimiz gənclər arasında bir təbliğat mexanizmi yaratmaqdan ibarətdir.

-Sizcə, festival teatr aləminə hansı töhfələr verdi?

-Mən birinci festivalın nəticələrini deyə bilərəm, çünki ikincini tam başa çatdırmamışıq. Bu festival teatr aləminə yeni gözəl yaradıcı gənclər qatdı.Çünki kifayət qədər yaradıcı, teatrlarımız üçün lazım olan gənclər kəşf etdik. Hətta keçən il son tamaşadan sonra bir neçə rejissorlar tərəfindən filmlərə dəvət alan gənclərimiz oldu. Əgər festivalda iştirak edən gənclərin içərisindən heç olmasa 4-5-nə yaşıl işıq aça bildiksə, düşünürəm ki, bu çox böyük uğurdur. Eyni zamanda o iştirakçıları da dəstəkləməyə gələnlər də gənclər idi və bir gün ərzində Gənc Tamaşaçılar Teatrı o qədər gənci qarşıladı.

-Hər iki festivalda gənclərin aktivliyi sizi qane etdimi?

-Bizim şərtimiz ondan ibarətdir ki, bu festivalda ancaq 30 yaşa qədər olan, hələ bu sənətdə sözünü deməmiş, qeyri- populyar, hətta qeyri -peşəkar gənclər iştirak edə bilirlər. Hər iki festivalda da gənclərin aktivliyi məni qane etdi. Çox sağlam düşüncəli, vətənpərvər, dövlətinə, millətinə bağlı olan və ölkəsinin gələcəyini düşünən təəssübkeş gənclər bizim yanımızda idi. Bunun üçün həmin gənclərə minnətdaram.

-Festivalın gələn il davamı olacaqmı? Və hansı mövzuya həsr olunması planlaşdırılır?

-Addımdan-addıma biz də püxtələşirik, çatışmazlıqları görürük, onları yenidən təkrarlanmamağa çalışırıq, daha irəliyə addım ataraq festivalın ətrafında daha çox gənclərin cəmlənməsini istəyirik. Bu festivalı başa çatdıraq, noyabr ayından sonra bu barədə düşünəcəyik. Əslində elə indidən bu barədə düşünürük, sadəcə hazırda fikirlərimiz, bütün qüvvəmiz festivalın sona qədər davam edib, yekunlaşmasına yönəlib. Artıq festivalın birinci mərhələsi də arxada qalıb. 12-30 avqust tarixində pyes-ssenarilərin qəbulu və seçimi aparılıb. Publisist -jurnalist Yaşar Əliyev, Yeni Yazarlar və Sənətçilər Qurumunun sədri Aydın Əbilov və gənc yazar Qaraqan tərəfindən 5 ballıq sxem üzrə qiymətləndirmə olub. 35 ssenaridən 13-ü seçilib. Hazırda ikinci mərhələnin də sonuna yaxınlaşırıq. Belə ki, 30 avqust - 24 noyabr tarixləri arasında seçilmiş yaradıcı heyətləhə tamaşaları hazırlamaq üçün vaxt verilib. Üçüncü mərhələ 24-30 noyabr tarixlərində 13 gənclər truppası Bakıda toplaşacaq və Dövlət Gənc Tamaşaçılar Teatrında hazırlanan tamaşalara baxış keçiriləcək. I yerin qalibinə 3000 AZN, II yerin qalibinə 2000 AZN, III yerin qalibinə isə 1000 AZN mükafat veriləcək. Bundan başqa müxtəlif nominasiyalar üzrə də qaliblər müəyyən olunacaq. Ötən ildə olduğu kimi “Ən yaxşı ssenarist”, “Ən yaxşı rejissor işi”, “Ən yaxşı baş rol ifaçısı”, “Ən yaxşı aktrisa” və s. olacaq.

Festivalı mütləq davam etdirəcəyik, amma qaldı bu festival bölgələrimi, regionlarımı əhatə edəcək, ya türkdilli ölkələrinmi festivalı olacaq, beynəlxalq müstəviyəmi çıxacaq-bu sadəcə bizdən asılı olan bir şey deyil, sponsorlardan, dəstəkdən asılı olaraq qərar veriləcək. Təbii ki, ideyamız var, qismət olarsa, o da olar. Bircə onu deyə bilərəm ki, gələn il daha fərqli bir layihə ilə qarşınıza çıxacağıq.

Mən xüsusilə hər iki festivalda bizə dəstək verdiyinə görə gənclər və idman naziri Azad Rəhimova öz minnətdarlığını bildirirəm. Eyni zamanda Azərbaycan - Amerika Alyansı hər zaman okeanın o tayında gənclərlə bağlı uğurlu layihələrə dəstək verir və Azərbaycan həqiqətlərini dünyaya car çəkir. Eyni zamanda Mədəniyyət və Turizm Nazirliyi bizə öz yardımını əsirgəmədi.

-Sizi tez-tez teatrlarda görürük. Çox maraqlıdır, axırıncı dəfə sizi ən çox təsirləndirən hansı tamaşa olub?

-Düşünmədən o tamaşanın adını deyə bilərəm; vilyonçu Tağıyevin həyatından bəhs edən “Messanat”... Bir neçə il bundan əvvəl Akademik Milli Dram teatrının səhnəsində qoyulan bu tamaşanı sevə-sevə izlədim. Təbii ki, indi mən klassik tamaşaları sadalamaq istəmirəm, çünki dəfələrlə o tamaşalara baxmışıq, sevirik. Amma son dövrlərdə izlədiyim tamaşalar içərisində məni həm aktyorların oyunu ilə, rejissor işi və ssenarisi ilə təsirləndirən “Messanat” oldu. Bir çox insanların özünə örnək götürə biləcəyi tarixi həqiqəti bir daha canlandırdı o tamaşa.

Nərmin MURADOVA

Paritet.-2012.-17-19 noyabr.-S.9.