“START” da “Qızıl palma budağı”nı qazanmış Abbas Kiarostaminin master klassı olacaq

Fehruz Şamıyev: “Bu il festivalın tarixində bir ilk olacaq”

Gələn həftə Bakıda VIII “START” Tələbə və Gənclərin Beynəlxalq Film Festivalına start veriləcək. “Cinema” Gənc Kinematoqrafçılar Mərkəzinin təsis etdiyi festival Gənclər və İdman Nazirliyinin, Mədəniyyət və Turizm Nazirliyinin təşkilatçılığı ilə reallaşır.

28-30 noyabrda baş tutan VIII “START” Tələbə və Gənclərin Beynəlxalq Film Festivalının predizenti Fehruz Şamıyev “START”ın sadəcə təcrübə mübadiləsi aparmaq, beynəlxalq kino bazarına çıxmaq üçün şans meydanı deyil, Azərbaycan kimi kino sənayesi inkişaf etməkdə olan bir ölkədə onun həm də kino təhsilinin səviyyəsini öyrənməyə imkan verdiyi bildirdi. “Məhz belə festivallarda müqayisə üçün geniş imkan yaranır, müvəffəqiyyətlər və çatışmayan cəhətlər dərhal üzə çıxır. Digər tərəfdən belə festivallarda daimi iştirak edən gənclərin ambisiyaları artır, rəqabət hissi güclənir. “START” bu ambisiyaların güclənməsinə və reallaşmasına təkan vermək istəyilə meydana gəldi”. Onun sözlərinə görə festivalın miqyası genişləndikcə tələbə və gənclərin festivala marağı da artır. “Həm yerli, həm də əcnəbi tələbələrin ixtiyarına verilən festivalın saytı təkmilləşərək daha geniş informasiyanın yayılmasına, daha çox tələbənin bu festivala film göndərməsinə şərait yaradır. Bizim festivalın şərtləri də çoxlarına maraqlıdır. Belə ki, “START”da başqa festivallarda olduğu kimi saysız-hesabsız mükafatlar yoxdur. Ona görə də şərtlərimiz bir qədər sərtdir. Bu da özlərini sənətə həsr etmək istəyən və istedadına güvənən gənclərin xoşuna gəlir və məmnuniyyətlə yarışmaya qatılırlar. “START” həmişə minimum güzəşt və maksimum istedadın tərəfdarıdır”.

Yeri gəlmişkən, qeyd edək ki, bu il festivalın nominasiyalarında cüzi dəyişikliklər də olub. Buna aydınlıq gətirən F.Şamıyev əlavə etdi ki, qaliblər “Ən yaxşı bədii film”, “Ən yaxşı sənədli film”, “Ən yaxşı cizgi filmi”, “Ən yaxşı eksperimental film” və “Ən yaxşı film- Qran Pri” uğrunda yarışacaq. “Mən xüsusilə qeyd etmək istəyirəm ki, hər il festivala göndərilən animasiya filmləri öz keyfiyyəti ilə seçilir. Çox peşəkar animasiya filmləri ilə qarşılaşırıq. Bu il festivalın müsabiqə proqramına 9 animasiya filmi daxil etmişik”.

Almaniya, İspaniya, Polşa, Cənubi Koreya, Pakistan ümumilikdə isə 20-dən çox ölkədən göndərilən 250 -ə yaxın tələbə və gənclərin filmini Festivalın Təşkilat Komitəsinin üzvləri seçib. Festival cizgi, bədii və sənədli film növlərini əhatə edib, “Yerli” və “Beynəlxalq” yarışma proqramlarından ibarət olacaq.

Müsabiqəyə təqdim olunan yerli və əcnəbi ekran əsərləri tanınmış kinematoqrafçılar və kino mütəxəssislərindən ibarət beynəlxalq və yerli münsiflər heyəti tərəfindən qiymətləndiriləcək. “Festivalda iki - “Yerli” və “Beynəlxalq” müsabiqə proqramı olduğundan jüri üzvlərimizi də bu proqrama əsasən seçdik. “Yerli”müsabiqədə filmlər 3 nəfərdən ibarət yerli münsiflər heyəti : rejissor Elxan Cəfərov, İlqar Safat və “New Baku Post” qəzetinin təsisçisi, jurnalist Tural Əliyev tərəfindən qiymətləndiriləcək. “Beynəlxalq” müsabiqədə isə filmləri 5 nəfərdən ibarət beynəlxalq jüri heyəti seçəcək. Yeniliyimizdən biri də məhz bu jürinin seçilməsidir. Bu, festivalın tarixində bir ilk olacaq. Belə ki, biz builki festivalı Azərbaycanın ilk qadın kinorejissoru Qəmər Almaszadəyə ithaf etdiyimizdən beynəlxalq müsabiqənin münsiflər heyətinin üzvləri ancaq yaradıcı, sənətdə öz sözlərini demiş xanımlardan ibarət olacaq. Onlar Azərbaycanın xalq artisti, Azərbaycan Respublikası Kinematoqrafçılar İttifaqının ilk sədri Şəfiqə Məmmədova, iranlı rejissor, ssenarist Təhminə Milani, ekspert jurnalist, publisist, PR mütəxəssis İlhamiyyə Rza, rusiyalı prodüser Yelena Yatsura, polşalı rejissor Culiya Kolbergerdir”.

O həmçinin bildirdi ki, festival çərçivəsində dünya şöhrətli rejissor, Kann Film Festivalının “Qızıl palma budağı”nı qazanmış Abbas Kiarostaminin master klassı olacaq. “Bundan başqa festival çərçivəsində xarici tələbələrin paytaxtımıza qonaq gəlməsi artıq ənənəyə çevrilib. Amma bütün bunlar haqda və deyilməyən digər yenilikləri festivalla bağlı keçirəcəyimiz mətbuat konfransında bildirəcəyik. Çünki bəzi məlumatlar həmin vaxta qədər tam olaraq dəqiqləşəcək”.

Məlumat üçün bildirək ki, “START” Tələbə və Gənclərin Beynəlxalq Film Festivalı ilk dəfə olaraq 2004-cü ildə “Cinema” Gənc Kinematoqrafçılar Mərkəzi tərəfindən təsis edilib. Azərbaycanın ilk peşəkar rejissoru Səməd Mərdanovun adını daşıyan festival növbəti illərdə digər ölkələrin tələbələrini də özünə cəlb etməklə əhatə dairəsini daha da genişləndirib. Çünki Festivalın təşkilatçı və təsisçilərinin məqsədi regionda (Yaxın Şərq, MDB) ən mötəbər tələbə film festivalının məhz Azərbaycanda keçirilməsinə nail olmaq idi. Beləliklə, artıq 2005-ci ildən festival beynəlxalq statuslu oldu. Məqsəd tələbələrin filmlərinin baxışını və müzakirəsini keçirmək, aralarından ən istedadlılarını müəyyən etmək, gənc müəlliflərə dövlət qayğısını, diqqəti artırmaq, onları həvəsləndirmək və bu sahədə dünya praktikasında baş verən proseslərlə tanış etmək idi. Bununla yanaşı hər il Azərbaycanda gənc kinematoqrafı və onun problemlərini diqqət mərkəzinə gətirən festival əsasən azərbaycanlı tələbələrin kinoda gələcək istiqamətlərini müəyyənləşdirməyə imkan verir. “START” həm də yerli tələbə rejissorların əcnəbi həmkarları ilə əlaqələr qurmasında start nöqtəsidir.

Qeyd edək ki, festivalın açılışı 28 noyabr saat 16: 00 da Nizami Kino Mərkəzində keçiriləcək. Filmlərin nümayişi 28- 30 noyabr tarixlərində saat 11: 00- dan başlayaraq Nizami Kino Mərkəzində nümayiş olacaq. Giriş sərbəstdir.

N.MURADOVA

Paritet.-2012.-24-26 noyabr.-S.15.