“Çağ”daşlığın 20 illiyi

Gülüstan sarayında “Çağ” Öyrətim İşlətmələri Şirkətinin 20 illik yubileyinə həsr olunan “Müasir Azərbaycan və “Çağ” öyrətim” adlı konfrans keçirilib. “Etimada sədaqətlə 20 il” devizi altında keçirilən tədbirdə təhsil naziri Misir Mərdanov, millət vəkilləri, dövlət qurumlarının rəsmiləri və təhsil ictimaiyyətinin nümayəndələri iştirak edib.

Tədbirdə ilk öncə Türkiyənin prezidenti Abdulla Gülün tədbirə ünvanlanan təbrik məktubu oxunub. Sonra şirkətin 20 illik fəaliyyətindən bəhs edən film nümayiş olunub.

Daha sonra Şirkətin (ÇÖİŞ) idarə heyətinin sədri Ənvər Özərən şirkətin 20 illik fəaliyyətinə qısa nəzər salıb. Ənvər Özərən Azərbaycan ilə Türkiyənin tarixi birliyindən danışmış, ulu öndər Heydər Əliyevin “Biz bir millət, iki dövlətik”, böyük şəxsiyyət Mustafa Kamal Atatürkün “Azərbaycanın sevinci sevincimiz, kədəri kədərimizdir” müdrik kəlamlarını xatırladıb.

O bildirib ki, ümummilli lider Heydər Əliyevin təhsilin inkişafına daim böyük önəm verib və onun ideyaları bu gün prezident İlham Əliyev tərəfindən uğurla həyata keçirilir: “Tarix baxımında 20 il ərzində qısa bir zaman kimi görünsə də bu illər ərzində şirkət mühüm işlər görərək yeniliklərə və uğurlara imza atıb. Ulu öndər Heydər Əliyev Naxçıvanda Ali Məclisin sədri vəzifəsində işləyərkən, 1992-ci il dekabrın 1-də Türkiyə özəl təhsil qurumu ilə bağladığı təhsil müqaviləsi Azərbaycanda ilk Azərbaycan-Türkiyə özəl təhsil müəssisələrinin fəaliyyətinə yol açıb. Ölkədə təhsilə göstərilən xüsusi diqqət və qayğıdan danışan Ə.Özərən qeyd edib ki, ÇÖİŞ-in təhsil müəssisələri –Azərbaycan-Türkiyə özəl liseyləri, “Araz” kursları və Qafqaz Universiteti öz fəaliyyətləri ilə respublikaya 530–dan çox beynəlxalq dərəcəli qızıl, gümüş və bürünc medallar qazandırıb. Hazırda bu məktəblərdə çalışan müəllimlərin 80%-nin yerli kadrlardan ibarətdir.Bu isə eyni zamanda, "Çağ"ın daha bacarıqlı, bilikli müəllimlər də yetişdirməsindən xəbər verir. Təhsil müəssisələri məzunlarının 99 faizi Azərbaycanın və dünyanın nüfuzlu ali məktəblərinə ən yüksək ballarla qəbul olunurlar. Ə.Özərən müvafiq sahənin inkişafı üçün bundan sonra da təhsil müəssisələrinin səmərəli fəaliyyət göstərəcəklərinə əminliyini bildirib.

Rəhbərlik etdiyi ÇÖİŞ-in fəaliyyəti haqqında məlumat verən Ə. Özərən bildirib ki, şirkətin ölkəmizdə fəaliyyət göstərən təhsil müəssisələri xalqımızın dahi rəhbəri Heydər Əliyevin xeyir-duası ilə həyata vəsiqə almışdır. Həmin təhsil ocaqlarının müəllim və şagirdləri ümummilli liderimizin etimadını daim doğrultmaq əzmindədirlər.

ÇÖİŞ hazırda 10 lisey, 1 gimnaziya, 1 ibtidai məktəb, 13 ali təhsilə hazırlıq kursları və 1 ali təhsil müəssisəsini-Qafqaz Universitetini özündə birləşdirir. 1994-cü ildən bu günədək liseylərimizin şagirdləri 530-dan çox qızıl, gümüş və bürünc medallar qazanmışlar. Respublika fənn olimpiadalarında isə şagirdlərimiz 230 qızıl, 248 gümüş, 245 bürünc medallara sahib olmuşlar.

Ənvər Özərən deib ki, məzunlarımızın 99 faizi hər il dünyanın ən müxtəlif universitetlərinin nüfuzlu fakültələrinə daxil olur. Hazırda məzunlarımızın böyük bir hissəsi ABŞ-ın Hyuston, Texas və Viskonsin universitetlərində, Rusiyanın M.V.Lomonosov adına Moskva Dövlət Universitetində, Almaniya, Türkiyə, Çin, İsveçrə və digər ölkələrin universitetlərində təhsillərini müvəffəqiyyətlə davam etdirirlər.

Araz kurslarında şagirdlər Azərbaycan universitetlərinə qəbul imtahanlarına hazırlanmaqla yanaşı, burada, həmçinin Türkiyədə ali təhsil almaq istəyənlər üçün TCS proqramı üzrə kurslar da təşkil olunur.

Təhsil naziri Misir Mərdanov isə çıxışında “Çağ”ın Azərbaycana gəlişi və dövrlər ərzindəki fəaliyyətinin tarixini vərəqləyib. “20 illik tarix əslində qısa bir zamandır. Lakin “Çağ”ın bu tarixinin səhifələrini vərəqlədikcə onlarla iyirmi ildə görülən işlərin şahidi olmaq olar. 20 ildir ki, “Çağ” Azərbaycan təhsili üçün bir örnəkdir.Bu şirkət Azərbaycan təhsilinə dünya təcrübəsinə əsaslanan bir yenilik gətirib. 20 il ərzində “Çağ” Öyrətim Azərbaycanın təhsil sisteminin tərkib hissəsində özünəməxsus bir yer tutub. Onun fəaliyyəti ölkə təhsili üçün hər zaman nümunə olub və bu gün də işini uğurla davam etdirir. Rahat şəkildə deyə bilərik ki, onlar bu fəaliyyətləri ilə ulu öndər Heydər Əliyevə verdikləri sözə hörmətlə, sədaqətlə əməl ediblər.Bütün bu kimi uğurlar “Çağ”da fəaliyyət göstərən doğru, dürüst adamların əməyinin nəticəsidir. Son illər bu məktəblərə axının artmasının da əsasını halallıqda axtarmaq lazımdır. Halallıq olan yerdə həm inkişaf, həm də tərəqqi var. “Çağ”ın ölkəmizdə fəaliyyətinin iki onilliyi tamam olur. Hər kəs bilir ki, təhsildə hər hansı bir nailiyyət əldə etmək o qədər sadə məsələ deyil.Bunun üçün 10 qat artıq çalışmaq lazımdır. “Çağ” öyrətim 20 il ərzində Azərbaycan təhsilinin inkişafında çox böyük xidmət göstərib. Qarşıdan isə yeni onilliklər gəlir. Əminəm ki, onlar təhsilimizdə hələ çox yeniliklər gətirəcəklər. Gələcək illərdə də “Çağ” Öyrətim Azərbaycanda çalışaraq Azərbaycan təhsilini daha da irəliyə aparacaq”.

Türkiyə Türkiyə parlamenti sədrinin müavini Mehmet Sağlam ulu öndər Heydər Əliyevin təhsilə böyük diqqət və qayğı göstərdiyini xatırladıb.

Müasir dünyada təhsilin önəmli rolunu vurğulayan M. Sağlam ÇÖİŞ-nin bundan sonra da səmərəli fəaliyyət göstərəcəyinə əminliyini bildirib, təhsil işçilərini təbrik etmiş, onlara yeni nailiyyətlər arzulayıbb.

Milli Məclisin deputatı Fəttah Heydərov, rabitə və informasiya texnologiyaları naziri Əli Abbasov və digər çıxış edənlər də ulu öndər Heydər Əliyevin təhsilə xüsusi əhəmiyyət verdiyini vurğulamış, “Çağ” Öyrətim İşlətmələri Şirkətinin bu sahənin inkişafındakı rolundan danışmışlar.

Tədbirdə Azərbaycanda təhsilin inkişafındakı xüsusi xidmətlərinə görə, “Çağ Öyrətim” şirkətinin bir qrup əməkdaşı Təhsil Nazirliyinin qabaqcıl təhsil işçisi döş nişanı, fəxri fərman ilə təltif olunub.Konfransın sonunda 20 illik fəaliyyəti dövründə “Çağ” Öyrətim İşlətmələri Şirkətinin məzunları olan və bu gün öz fəaliyyətləri ilə fərqlənən insanlara fəxri fərman və hədiyyələr təqdim olunub.

N.ELDARQIZI

Paritet.-2012.-29-30 noyabr.-S.11.