“Hər bir gəncin dəstəyə böyük ehtiyacı var”

Gülüstan Əliyeva: “Mədəniyyətin inkişafına xidmət edən belə festivallar daima keçirilməlidir”

Gənclər və İdman Nazirliyi ilə Mədəniyyət və Turizm Nazirliyinin birgə layihəsi olan Ekologiya mövzusuna həsr olunmuş “Gənclərin II Ümumrespublika Teatr Festivalı”na ssenari qəbulu artıq başa çatıb. Ssenarilər səhnələşdirilmək üçün bölgələrdə komandalara paylanılıb. “Bizə idea lazımdır” devizi ilə keçirilən festivalın əsas məqsədi - gənclərdə teatra olan marağı artırmaq, istedadlı gəncləri teatra cəlb etmək və onlara ekologiya ilə bağlı olan problemləri çatdırmaq, fikirlərini bu problemlərə yönəltməkdir.

Təəssüratlarını bizimlə paylaşan Akademik Opera və Balet Teatrının solisti, əməkdar artist Gülüstan Əliyeva Gənclərin II Ümumrespublika Teatr Festivalını yüksək qiymətləndirdiyini bildirdi.

- Bu festivalı yalnız alqışlamaq lazımdır. Mən festivalın ideya rəhbər millət vəkili Jalə Əliyevaya öz dərin minnətdarlığımı bildirirəm. Ona görə ki, gənclərə hər zaman dəstək olur. Bildiyim qədər keçən il də belə gözəl festival keçirilmişdi, özü də milli qəhrəman Mübariz İbrahimovun xatirəsinə həsr olunmuşdu. Mən gənclərə dəstək olan belə layihələrin keçirilməsi xəbərini eşidəndə inanın ki, sevincimdən gözlərim dolur. Çünki hər bir gəncin dəstəyə böyük ehtiyacı var.

- Gənc nəslin teatral mühitdən uzaq düşməsi fikri ilə razılaşırsınızmı?

- Qətiyyən. Mənim çalışdığım Akademik Opera və Balet Teatrı, Muğam Teatrı həmişə gənclərlə dolu olub. Səhnə arxasından həmişə baxıb fikir verirəm və görürəm ki, salonda oturub tamaşanı seyr edənlərin 70 faizdən çoxunu gənclər təşkil edir. Elə həmkarlarım arasında da opera, muğama böyük maraq göstərirlər. Hər bir gəncin arzusudur ki, Opera Teatrında Leylini, Məcnunu oynasın. Yaxud da digər klassik əsərlərdə əsas partiyanı ifa etsin. Təbii ki, informasiya və internet əsrində yaşayır, sosial həyatda. Cəmiyyətdə bir dinamika hiss olunur. Gənclər də bəzən dözümsüzlük, səbirsizlik nümayiş etdirirlər. Amma bu fikri də bütün gənclərə şamil etmək olmaz. Dediyim kimi gənclərin əksəriyyəti sənəti sevən və onun fanatı olan cavanlardır. Mən hesab edirəm ki, bu məqamda gəncləri qınamaqdan, onları günakar çıxarmaqdansa, tamaşalarda dinamikanı artıraq.

-Bunu hansı formada edək?

-Məsələn, klassik tamaşalarda əvvəlki mizanları dəyişək, quruluşda yeniliklər edək, orkestrovkalar fərqlənsin və s. Məsələn Opera Teatrında “Leyli və Məcnun” operası indiyə qədər dörd quruluşda təqdim olunub. Teatrın rəhbərliyinin də məqsədi bu idi ki. yeni quruluşda dinamika, yeni baxaşlar olsun. Çünki tamaşadakı dekorasiyalar 60-70-, hətta 80-ci illərdən qalma idi. Bu dekorasiyalar yeniləndi, boş səhnələr götürüldü, fərqli bir görkəmdə tamaşaçılara təqdim olundu. Artıq tamaşada dinamika var və hər kəsin marağına səbəb olur.

-Yekun olaraq, Gənclərin II Ümumrespublika Teatr Festivalından gözləntiləriniz nələrdir?

-Çox şey. Gənclərin yaradıcılıq həvəsi artacaq, teatra daha dərindən bağlanacaqlar və bu sənətə can yandıracaqlar. Mən çox arzulayardım ki, bu festival hər zaman keçirilsin və ənənəyə çevrilsin. Çünki belə festivallara böyük ehtiyac var. Mədəniyyətin inkişafına xidmət edən belə festivallar daima keçirilməlidir.

Nərmin MURADOVA

Paritet.- 2012.- 6-8 oktyabr.- S.16.