Moskvada vokalçıların Müslüm Maqomayev adına II Beynəlxalq Müsabiqəsi keçirilib

Moskvada 20-21 oktyabr tarixlərində şəhərin ən böyük konsert zalı olan “Krokus Siti-Holl”-da vokalçıların Müslüm Maqomayev adına II Beynəlxalq müsabiqəsi keçirilib. Müsabiqə iki mərhələdən, yarımfinal və final mərhələlərindən ibarət olub. Müsabiqənin birinci günü yarımfinalda dünyanın 10 müxtəlif ölkəsindən olan 17 vokalçı çıxış edib və onlardan yalnız 10-u finala vəsiqə qazanıb.

Beynəlxalq müsabiqə ölməz sənətkar, dünya miqyaslı musiqiçi Müslüm Maqomayevin ifasında musiqilərlə başlayıb. Bundan sonra Svetoslav Belza münsiflər heyətinin tərkibini açıqlayıb. Münsiflər heyəti pianoçu, xalq artisti, Azərbaycanın Dövlət mükafatı Laureatı, Bakı Musiqi Akademiyasının rektoru Fərhad Bədəlbəyli, SSRİ xalq artisti Tamara Sinyavskaya, müğənni Layma Vaykule, İtaliyadan Vinçenso de Vivo, Moskvada Gilekon operanın direktoru Dmitriy Bertman, Rusiya Böyük Teatrının solisti, Elena Obrazsova kimi məşhur sənətkarlardan təşkil edilib. Münsiflər heytinə Maqomayevin həyat yoldaşı Tamara Sinyavskaya rəhbərlik edib.

Daha sonra münsiflər iştirakçıların ifalarını qiymətləndiriblər. Beynəlxalq müsabiqəyə ABŞ, Rusiya, Ukrayna, Azərbaycan, Belarus, Monqolustan, Şimali Koreya, Özbəkistan, Almaniya, Gürcüstandan olan vokalçılar qatılıb. Müsabiqədə Azərbaycanı Xəyyam Mustafazadə təmsil edib.

Müsabiqənin yarımfinal mərhələsində iki hissədən ibarət olan proqramda vokalçılar əvvəlcə opera və ariyalardan parçalar, daha sonra estrada janrında olan mahnılar ifa ediblər. Münsiflər heyəti hər bir çıxışı 10 ballıq şkala ilə qiymətləndirib. Yarımfinalın qalibi 113 balla Özbəkistan təmsilçisi Janizbek Piyazov olub. Azərbaycan təmsilçisi 14-cü yerdə qərarlaşıb. Müsabiqənin ikinci günü finala vəsiqə qazanmış 10 ifaçı əvvəlcə ariya sonra isə Müslüm Maqomayevin repertuarından olan musiqi parçaları ifa ediblər. Bu dəfə də qalib Özbəkistan təmsilçisi Janizbek Piyazov olub. O, 260 mümkün baldan rekord 226 bal toplayaraq Müslüm Maqomayev adına vokalistlərin II Beynəlxalq Müsabiqəsinin qalibi olub.

Beynəlxalq müsabiqənin bağlanışında məşhur müğənni Emin Ağalarov Müslüm Maqomayevin repertuarından “My Way” musiqi parçasını ifa edib. Beynəlxalq Müsabiqəni rəsmən bağlı elan edən Müslüm Maqomayevin həyat yoldaşı, SSRİ xalq artisti Tamara Sinyavskaya müsabiqə iştirakçılarına öz təşəkkürünü bildirib.

Qeyd edək ki, “Qran Pri”-dən əlavə münsiflər heyəti 1-ci, 2-ci və 3-cü yerlərin də qaliblərini müəyyən edib. Rusiya təmsilçisi Sergey Plyusin birinci yerə, Belarus təımsilçisi Anatoliy Sivko ikinci yerə, Rusiya təmsilçisi İrina Kostina və Almaniya təmsilçisi Vladimir Boldt üçüncü yerə layiq görülüblər.

Əlimərdan SULTANOV,

Moskva

Paritet.-2012.-23-24 oktyabr.-S.16.