2011-ci il Azərbaycanın turizm tarixində qızıl hərflərlə yazılan il olub

2011-ci ili yola saldıq. Ötən il ölkədə iqtisadi, sosial və bir sıra sahələrdə iş uğurla yekunlaşdı. Ötən ilin ən mühüm sahəsi isə turizm sektoru idi.

Belə ki, qeyri-neft sektorunun inkişafını qarşıya məqsəd qoyan Azərbaycan dövləti bu sektorun ayrılmaz hissəsi olan turizmin inkişafına xüsusi diqqət yetirir. Bu diqqəti 2011-ci ili “Turizm ili” elan edilməsində də gördük. Turizm Azərbaycan üçün yeni bir sahə olsa da, ötən ildə dövlət tərəfindən görülən işlər bu sektorun inkişaf etdiyini göstərdi. Bu sektorun əhəmiyyətini önə çəkən dövlət başçısı ötən ilin iyul ayının 20-də imzaladığı sərəncamla turizm ili ilə bağlı “Tədbirlər Plan”ı qəbul etdi. 46 müddəadan ibarət olan plan turizm sektorunun bütün sahələrini əhatə edirdi. Ötən ilin turizm ili elan edilməsi ilə bağlı bu il yanvarın 16-da Nazirlər Kabinetinin 2011-ci ilin sosial-iqtisadi inkişafının yekunlarına və 2012-ci ildə qarşıda duran vəzifələrə həsr olunmuş iclasdakı nitqində Prezident İlham Əliyev “Turizm ili” ərzində bu sahəyə daha da böyük diqqət göstərildiyini bildirib: “Biz Azərbaycanı müasir, yüksək səviyyəli və elitar turizm mərkəzinə çevirməliyik. Mən dünya turizm xəritəsində Azərbaycanın yerini belə görürəm. Beynəlxalq qurumlarla əlaqələrimiz güclənir. Müxtəlif tədbirlər keçirilmişdir. Bizim gözəl, təbii şəraitimizlə tanış olmaq üçün gələnlərin sayı da artmaqdadır”. Dövlət başçısı bildirib ki, 2011-ci ili “Turizm ili” elan etməyimiz də hesab edirəm ki, düzgün addım idi.

Dövlət başçısının dediyi kimi, ötən ildə görülən işlər ilin “Turizm ili” elan edilməsi qərarının doğru bir addım olduğunu göstərdi.

Azərbaycanın turizm potensialı bütün dünyada təbliğ edilir

Turizm sektorunun inkişafı üçün ilk növbədə ölkənin malik olduğu potensialın təbliği önəmlidir. Azərbaycanın turizm potensialına diqqət yetirdikdə bunun kifayət qədər və dünya ölkələrindən fərqlənən bir sıra cəhətlərə malik olduğunu görmək olur. Əsas olan bunun təbliğidir ki, ötən ildə dövlət tərəfindən bu istiqamətdə xeyli işlər görülüb. Belə ki, ölkəmizin turizm potensialının dünya miqyasında təbliği məqsədilə hər il dünyanın aparıcı ölkələrində 20-yə yaxın beynəlxalq turizm sərgisində təmsil olunuruq. Bundan başqa, təkcə ötən il ölkənin turizm potensialının zənginliyindən, imkanlarının genişliyindən bəhs edən 9 dildə 50-dək reklam-çap məhsulları hazırlanaraq dünyanın bir sıra böyük şəhərlərində - İstanbul, Berlin, Moskva, Pekin, Tokio, Milan, London, Əl-Küveyt, Kiyev, Tbilisi, Daşkənddə keçirilən ənənəvi beynəlxalq turizm sərgilərində ziyarətçilərə paylanıb. Azərbaycanın turizm potensialına dair reklam çarxları 2011-ci ildən etibarən “EuroNews”, “Travel Channel”, “CNN”, “National Geographic”, “BBC” və “CNBC” kimi dünyanın ən məşhur telekanallarında mütəmadi olaraq yayımlanır. Həmçinin, hər ilin aprel ayında Bakı şəhərində “AİTF” Beynəlxalq Turizm Sərgisi və Ümumrespublika Daxili Turizm Sərgisi keçirilir. Ölkəmizin turizm potensialının beynəlxalq aləmdə tanıdılması məqsədilə Almaniya, Avstriya, Türkiyə, Yaponiya, Misir, Mərakeş, Küveyt, Yunanıstan və digər ölkələrin bir sıra turizm şirkətləri və kütləvi informasiya vasitələrinin nümayəndələri üçün mütəmadi olaraq info-turlar təşkil olunur. Milli-mənəvi dəyərlərin qorunması, həmçinin yeni turizm marşrutlarının yaradılması məqsədilə, Avropa Şurasının Kiyev təşəbbüsü çərçivəsində həyata keçirilən “Şərab Yolları” və “Aleksandr Düma Qafqazda” marşrutlarının layihələri, “Azərbaycanda alman yaşayış məskənləri” layihəsi, TÜRKSOY çərçivəsində “Dədə Qorqud İrsi” beynəlxalq mədəni turizm layihəsi, BMÜTT çərçivəsində həyata keçirilən “Böyük İpək Yolu” layihəsi, “Babaların Tarixi Zəfər və Şəhadət Yolu” layihəsi hazırlanıb. “Azərbaycanda şərab yolları” layihəsi çərçivəsində “Beynəlxalq Mədəniyyət və Turizm Mübadiləsi Assosiasiyası” yaradılıb. Xəzər dənizi üzrə kruiz marşrutlarının təşkilində əməkdaşlığa dair Qazaxıstan, Azərbaycan, İran, Rusiya və Türkmənistan hökumətləri arasında saziş layihələri də işlənib hazırlanıb.

Bu istiqamətdə görülən işlərin nəticəsidir ki, Azərbaycana gələn turistlərin sayı günü-gündən artmaqdadır. Həmçinin, əvvəlki illərə nisbətən ölkədən istirahət məqsədilə xaricə üz tutan yerli turistlər də öz istirahətlərini ölkə daxilində həyata keçirirlər.

“Turizm ili”ndə görülən işlər barədə danışan Azərbaycan Turizm İnstitutunun prorektoru Eldar Aslanov “Paritet”ə açıqlamasında bildirib ki, ötən il ölkənin turizm potensialının təbliği sahəsində mühüm işlər görülüb: “Azərbaycan 20-dən çox turizm sərgisində iştirak etdi. Bu Azərbaycanın mütəşəkkilliyi, ora qatılan şirkətlərin sayı, həm də turizm potensialının sərgilənməsi üçün icarəyə götürülən pavilyonun həcmi baxımından diqqətəlayiq oldu. 2011-ci ildə beynəlxalq mediada, xüsusilə Azərbaycan haqqında CNN-də gedən fimlərdə milyonlarla insan Azərbaycan haqqında məlumatlarla tanış oldu. Fransanın tanınmış 6 qəzetində təkcə ötən il ölkəmizin turizm potensialı ilə bağlı məqalələr çap olundu”. Onun sözlərinə görə, bütün bunlar təbliğat işlərinin düzgün aparıldığını göstərir.

Ötən il ərzində inşa edilmiş 46 turizm obyektindən 22-i təhvil verilib

Turizm sektorunda ən vacib amillərdən olan infrastruktur ötən il ərzində turistlərə keyfiyyətli xidmət edəcək səviyyədə qurulub. Ölkədə yeni istifadəyə verilən hotellər də buna nümunədir. Dövlət başçısı nitqində bununla bağlı bildirib ki, ötən il təkcə Bakıda beşulduzlu 3 mehmanxana açılmışdır: “Bu il ən azı yenə də Bakıda beşulduzlu 3 yeni mehmanxana açılacaqdır. Bölgələrdə də bu proses gedir. İndi bölgələrdə beşulduzlu mehmanxanalar tikilir, ən azı 4-ü tikilir. Ən vacib turizm mərkəzlərinə özüm baş çəkirəm, vəziyyətlə tanış oluram. Şahdağ Turizm Kompleksi bu il istifadəyə veriləcəkdir. Bu da dünya miqyasında nadir xizək kurortu olacaqdır. Mən hesab edirəm ki, dünyanın ən gözəl xizək mərkəzlərindən biri olacaqdır. Çünki dünyanın ən gözəl yerlərində olan müsbət təcrübəni biz ora gətiririk, tətbiq edirik”.

Qeyd edək ki, qış turizminin inkişafı məqsədilə Qusar rayonunun Ləzə kəndi yaxınlığında, Şahdağın ətəklərində salınan “Şahdağ qış-yay turizm kompleksi” həm təyinatına, həm də nadir layihə strukturuna görə xüsusi önəm daşıyır. Belə ki, kompleksin tikintisində əsas diqqəti idmanın qış növlərinə, əsasən dağ xizək idmanının inkişafına yönəltmək nəzərdə tutulub ki, bu da respublikada turizmin və idmanın qış növlərinin inkişafı, respublika vətəndaşları və xarici turistlərin mükəmməl istirahəti üçün kompleksin ərazisində tennis, qolf, futbol və basketbol meydançaları, üstüörtülü idman qurğuları, hovuzlar, əyləncə - oyun kompleksləri, istirahət edənlərə piyada və at gəzintisi və digər xidmətlərin göstərilməsinə hesablanıb. Gündəlik beş min turist qəbul etmək iqtidarında olacaq kompleksdə müxtəlif həcmdə üç, dörd, beş ulduzlu otellərin, kiçik yaylaq evlərinin və kotteclərin eləcə də, ticarət mərkəzləri, restoranlar, əyləncə xidməti və məişət obyektlərinin tikintisi də nəzərdə tutulub. Dəniz səviyyəsindən 1300 metrlə 2554 metr arasındakı hündürlükdə yerləşən “Şahdağ qış-yay turizm kompleksi”nin ərazisi 2045 hektardan artıq sahəni əhatə edir ki, bu da turistlərin rahat istirahətinə geniş imkanlar yaradır.

O cümlədən, yeni istifadəyə verilən və inşası davam etdirilən 5 ulduzlu hotellər də turistlərin istifadəsinə verilir. Bundan başqa, ötən il ərzində inşa edilmiş 46 turizm obyektindən 22-i təhvil verilib. Məlumat üçün bildirək ki, ölkədə 10 il bundan öncə cəmi 6 min turistin yerləşdirmə yeri var idisə, bu gün isə 31 mindən artıq yataq yeri mövcuddur. Onların 11 mini isə Bakı yerləşir. Ötən ilin hesabatlarına görə, turizm sektorunun inkişafı nəticəsində yay mövsümündə 55 min yerli turist istirahətini təşkil etmək üçün xaricə üz tutmuşdursa, ilin sonunda bu rəqəm minimuma enib.

E.Aslanov bildirib ki, ötən il turizm sektorunda son on ildə görülən işlərin yeni mərhələsi açıldı. Onun sözlərinə görə, bu həm turizm infrastrukturunun güclənməsi baxımından, həm turizm kadrlarının hazırlanması baxımından, həm xarici turistlərin cəlb olunması, həm də Azərbaycanın turizm potensialının dünyada təbliğ olunması baxımından ötən il yada qaldı: “Ölkədə çoxsaylı turizm obyektləri istifadəyə verildi. Bu ildə yeni hotellər istifadəyə veriləcək. 40-dan çox hotelin paytaxtda və regionlarda tikintisi davam edir”. E.Aslanov turizm sektorunda kadr hazırlığı sahəsində də yeniliklərə imza atıldığını bildirib: “Avstryanın turizm universiteti ilə magistr sahəsində müqavilə imzalanıb. O cümlədən, ötən ilin dekabr ayının 6-da Turizm Peşə Məktəbi yarandı. Bu il 5 regionda -Şəkidə, Qusarda, Şəmkirdə, Göygöldə və Masallıda regional peşə məktəblərinin yaradılması da nəzərdə tutulur”.

“2011-ci il Azərbaycanın turizm tarixində qızıl hərflərlə yazılan il olub”

Ötən il, turizm sektorunda bu sahəyə yatırılan investisiyalarla da diqqəti cəlb edir. Statistik məlumatlara görə, ötən ilin ilk 4 ayı ərzində bu sektora 50.4 milyard manat vəsait yatırılıb. Bu, əvvəlki illərin göstəricilərindən 27 faiz çoxdur ki, nəticədə turizm sektoruna yatırılan investisiyalar bu sənayenin ölkədəki inkişaf dinamikasını 1.7 dəfə üstələyib. Bununla yanaşı, turizm sektorunun investisiyaların ümumi həcmində payı 1.9 faiz təşkil edib ki, bu da onun ölkənin ÜDM-nin formalaşdırılmasındakı payını artırıb.

E.Aslanov ötən ilin nəticələrinə rəğmən, 2011-ci ilin Azərbaycanın turizm tarixində qızıl hərflərlə yazılan il olduğunu deyib.

“Bu, təkcə ilin “Turizm ili” elan olunduğuna, 5-6 beşulduzlu hotel şəbəkələrinin açıldığına görə deyil. Həm də bu il Azərbaycanda nəinki turizmlə bağlı təşkilatlar, o cümlədən bütün cəmiyyət bu işdə yaxından iştirak etdi. Bütün qüvvələr səfərbər olundu. Görülən işlər onu göstərdi ki, Azərbaycan dövləti və cəmiyyəti bizim üçün yeni olan, çətin görünən işin öhdəsindən layiqincə gəlməyi bacardı. Bu isə, dövlətlə cəmiyyətin müştərək işləməsi, dövlətin öz cəmiyyətinə etimadı və insanların dövlət başçısına olan inamı sayəsində əldə edildi”-deyə prorektor bildirib.

Onun sözlərinə görə, turizm sektorunun inkişafı Azərbaycanın xarici siyasətindən, nəqliyyat xidmətindən, ölkəyə giriş-çıxışın, asudə vaxtın səmərəli təşkilindən, ölkədə ictimai asayişdən, bank sektorunun mütəşəkkil təşkil olunmasından, standartlaşdırmadan, sanitar nəzarətin edilməsi ilə bağlıdır ki, bütün bunlar da Azərbaycanda mövcuddur: “Eyni zamanda, dövlət başçısının digər sahələr kimi bu sektora olan qayğısının nəticəsində müsbət nəticələr əldə edilir. Prezident İlham Əliyevin turizmə qayğısı, həyata keçirdiyi tədbirlər hamı üçün bir mesaj oldu”.

E.Aslanov qeyd edib ki, 2012-ci ildə də bu tədbirlər davam edəcək: “Bu tədbirlər bu il də davam edəcək. Bu il ölkədə musiqi yarışması, futbol üzrə qadınlar arasında dünya çempionatı kimi beynəlxalq tədbirlərin keçirilməsi bunu deməyə əsas verir. Həm də dövlət başçısının apardığı siyasət digər sahələr kimi turizm sektorunun da diqqətdən kənarda qalmayacağını göstərir”.

Asif NƏRİMANLI

Paritet.- 2012.- 19 yanvar.- S. 1;3.