Mirzə Cəlil dühasının işıgında

Azərbaycanın demokratik ictimai-fikir tarixində əvəzsiz yeri olan böyük mütəfəkkir, görkəmli dramaturq, naşir, publisist Cəlil Məmmədquluzadənin 140 illik yubileyi haqqında Azərbaycan Respublikasının Prezidenti İlham Əliyevin 6 fevral 2009-cu il tarixli sərəncamı və Naxçıvan MR Ali Məclis sədrinin bu sərəncamın icrasını təmin etmək məqsədilə imzaladığı 14 fevral 2009-cu il tarixli sərəncam yubiley tədbirlərinə start verdi.

"Mirzə Cəlil günləri"nin keçirilməsi ənənəsinə sadiq qalan Naxçıvan Dövlət Universitetinin Tarix-filologiya fakültəsinin Azərbaycan ədəbiyyatı və jurnalistika ixtisaslarının müəllim və tələbələrindən ibarət heyət yubiley günlərində Cəlil Məmmədquluzadənin Nehrəm kəndində, 1890-1897-ci illərdə dərs dediyi məktəbdə yaradılmış xatirə muzeyinə ekskursiya etdilər. Muzeyin direktoru, Naxçıvan MR Əməkdar mədəniyyət işçisi Akif Hacıyev muzeyin 1898-ci ildən fəaliyyət göstərdiyini, burada Mirzə Cəlil, onun müasirləri, mollanəsrəddinçilər və s. bağlı 553 maddi-mədəniyyət nümunəsinin qorunub saxlanıldığını və nümayiş etdirildiyini bildirdi.

60 illik ömrünün böyük bir qismini Cəlil Məmmədquluzadə irsini, şəxsiyyətini və müasirlərini araşdırmağa həsr etmiş görkəmli mirzəcəlilşünas İsa Həbibbəyli yazıçının Nehrəm kəndindəki pedaqoji və ədəbi fəaliyyəti haqqında ətraflı məlumat verdi. Akademik, Mirzə Cəlilin 1893-cü ildə 8 nəfər azərbaycanlı qızını təhsilə cəlb etdiyini, Azərbaycan maarifçilik tarixində özünəməxsus iz qoyduğunu bildirdi, mətbuatın və maarifçilik ideyalarının yayılması, Nehrəm kəndinin meteoroloji qeydiyyatının aparılması, ipəkçilik işinin təşkili kimi xidmətlərindən söz açdı.

Naxçıvan MR Əməkdar müəllimi, universitetin Tarix-filologiya fakültəsinin dekanı İman Cəfərli Azərbaycan ədəbıyyatının nəhəng simalarından olan Cəlil Məmmədquluzadənin bədii-publisistik irsinin tədrisinin əhəmıyyətindən, muzeyin təqdirəlayiq fəaliyyətindən, Mirzə Cəlillə bağlı son elmi tədqiqatlarından söz açdı.

Mehriban Sultan

Paritet.- 2009.- 19-21 fevral.- S. 12.