Hüquqi şəxslərin dövlət büdcəsinə borclarının güzəştli ödənişi haqqında

AZƏRBAYCAN RESPUBLİKASININ QANUNU

Bu Qanun Azərbaycan Respublikasının hüquqi şəxslərinin (bundan sonra hüquqi şəxslərinin) dövlət büdcəsinə olan borclarının güzəştli ödənişinin həyata keçirilməsinin qaydalarını, güzəştli ödənişin şərtlərini və müddətlərini müəyyən edir.

Maddə 1. Əsas anlayışlar

1.0. Bu Qanunda tətbiq edilən əsas anlayışlar aşağıdakılardır:

1.0.1. Dövlət büdcəsinə borclar - vergi orqanları ilə hüquqi şəxslər arasında təsdiq edilmiş üzləşmə aktlarına görə dövlət büdcəsinə 2000-ci il oktyabr ayının 1-dək ödənilməli olan, lakin ödənilməmiş vergilər, qeyri-vergi ödənişləri üzrə borclar və vergi qanunvericiliyinin pozulmasına görə vergi orqanları tərəfindən hesablanmış penya və maliyyə sanksiyaları;

1.0.2. Cari ödənişlər - hüquqi şəxslər tərəfindən 2000-ci ilin oktyabr ayının 1-dən sonra dövlət büdcəsi qarşısında yaranan vergi və qeyri-vergi öhdəliklərinin qanunvericiliklə müəyyən edilmiş müddətlərdə və qaydada yerinə yetirilməsi;

1.0.3. Güzəştli ödəniş müddəti - bu Qanuna uyğun olaraq tətbiq edilən müddətlər.

Maddə 2. Qanunun qüvvədə olması müddəti

2.1. Bu Qanunun müddəaları onun qüvvəyə mindiyi tarixdən başlayaraq 5 il ərzində tətbiq edilir (güzəştli ödənişin son müddəti).

2.2. Bu Qanun hüquqi şəxslərin dövlət büdcəsinə 2000-ci ilin oktyabr ayının 1-dək olan borclarına tətbiq edilir.

Maddə 3. Dövlət büdcəsinə borcların ödənilməsinin təxirəsalınmasının müddətləri və güzəştli ödəniş hüququnun əldə olunması şərtləri

3.1. Hüquqi şəxslərin dövlət büdcəsinə 2000-ci il oktyabr ayının 1-dək olan borclarının ödənilməsi həmin şəxslərin vergi orqanlarına verdikləri ərizənin (bildirişin) daxil olduğu tarixdən təxirə salınır və onlar güzəştli ödəniş hüququnu əldə edirlər.

3.2. Dövlət büdcəsinə olan borclarına görə güzəştli ödəniş hüququ əldə etmiş hüquqi şəxsə cari ödənişləri rüblər üzrə ödəmək şərti ilə ödənilməsi təxirə salınmış borcları bu Qanunun qüvvədə olduğu müddətdə ödəmək hüququ verilir.

3.3. Güzəştli ödəniş hüququ əldə etmiş hüquqi şəxsin ödənilməsi təxirə salınmış borclarına 2000-ci ilin oktyabr ayının 1-dən penya hesablanması dayandırılır.

3.4. 2000-ci ilin oktyabr ayının 1-dən hüquqi şəxsin güzəştli ödəniş hüququnun alınmasına ərizə ilə (bildirişlə) müraciət etdiyi dövrədək olan cari öhdəliklər üzrə öhdəlikləri ərizə (bildiriş) verilən rüb və ya ondan sonrakı rüb ərzində ödənilməlidir.

3.5. Hüquqi şəxs bu Qanunun 3-cü maddəsinin tələblərini pozduqda güzəştli ödəniş hüququnu itirir və həmin tarixdən onun dövlət büdcəsinə olan borcları tam məbləğdə bərpa edilir.

3.6. Bu Qanunun qüvvədə olduğu müddət ərzində hüquqi şəxs təkrarən güzəştli ödəniş hüququnu əldə etmək üçün müraciət edə bilər.

Maddə 4. Dövlət büdcəsinə borcların ödənilməsi zamanı tətbiq olunan güzəştlər

4.1.Dövlət büdcəsinə borclarına görə güzəştli ödəniş hüququ əldə etmiş hüquqi şəxs büdcəyə olan borclarını bu Qanununa müəyyən edilmiş müddətlərdə ödədikdə aşağıdakı güzəştlər tətbiq olunur:

4.1.1. güzəştli ödəniş müddətinin birinci ilində ödənilməsi təxirə salınmış əsas borcun azı 25 faizi ödənilərsə, ödənilməsi təxirə salınmış əsas borcun qalan hissəsi, penya və maliyyə sanksiyalarının isə tam məbləği silinir;

4.1.2. güzəştli ödəniş müddətinin birinci iki ili ödənilməsi təxirə salınmış əsas borcun azı 45 faizi ödənilərsə, ödənilməsi təxirə salınmış əsas borcun qalan hissəsi, penya və maliyyə sanksiyalarının isə tam məbləği silinir;

4.13. güzəştli ödəniş müddətinin birinci üç ilində ödənilməsi təxirə salınmış əsas borcun azı 60 faizi ödənilərsə, ödənilməsi təxirə salınmış əsas borcun qalan hissəsi, penya və maliyyə sanksiyalarının isə tam məbləği silinir;

4.1.4. güzəştli ödəniş müddətinin birinci dörd ilində ödənilməsi təxirə salınmış əsas borcun azı 70 faizi ödənilərsə, ödənilməsi təxirə salınmış əsas borcun qalan hissəsi, penya və maliyyə sanksiyalarının isə tam məbləği silinir;

4.1.5. güzəştli ödənişin son müddətində ödənilməsi təxirə salınmış əsas borcun azı 75 faizi ödənilərsə, ödənilməsi təxirə salınmış əsas borcun qalan hissəsi, penya və maliyyə sanksiyalarının isə tam məbləği silinir.

4.2. Bu Qanunun 4.1.1 - 4.1.5.-ci maddələrində göstərilən güzəştli ödəniş müddətlərinin hər hansı birindən istifadə etməklə borclarını ödəmiş hüquqi şəxs sonradan cari ödənişləri yerinə yetirmədikdə, onun dövlət büdcəsinə əvvəlki borcları bərpa olunmur.

Maddə 5. Hüquqi şəxslərin dövlət büdcəsinə borcların güzəştli ödənişinin tətbiq dairəsi

5.1. "Müflisləşmə və iflas haqqında" Azərbaycan Respublikasının Qanununa uyğun olaraq barəsində iflas işi qaldırılan hüquqi şəxslərə, habelə "Özəlləşdirilən dövlət müəssisələrinin, aqrar islahatı nəticəsində ləğv olunmuş və işğal altında olan rayonların təsərrüfat subyektlərinin borcları haqqında" Azərbaycan Respublikasının Qanununda borclarının silinməsi nəzərdə tutulan müəssisə və təşkilatlara bu Qanun şamil edilmir.

5.2. Bu Qanuna uyğun olaraq dövlət büdcəsinə olan borclarına görə güzəştli ödəniş hüququ əldə etmiş hüquqi şəxslərin mülkiyyət və ya təşkilat-hüquqi forması, habelə hər hansı digər rekvizitləri dəyişildikdə, bu Qanunda nəzərdə tutulmuş hüquq və güzəştlər saxlanılır.

Azərbaycan Respublikasının Prezidenti Heydər Əlİyev

Bakı şəhəri, 24 oktyabr 2000-ci il

№ 935-IQ

Azərbaycan Respublikasının Qanunvericilik toplusu .- 2000.- 30 noyabr, № 11.- S.4513-4515.