«Sosial sığorta haqqında» Azərbaycan Respublikası Qanununa dəyişikliklər və əlavələr edilməsi barədə

Azərbaycan Respublİkasının Qanunu

Azərbaycan Respublikasının Milli Məclisi qərara alır:

I. «Sosial sığorta haqqında» Azərbaycan Respublikası Qanununa (Azərbaycan Respublikasının Qanunvericilik Toplusu, 1997-ci il, № 5, maddə 348; 1999-cu il, № 11, maddə 609) aşağıdakı dəyişikliklər və əlavələr edilsin:

1. 13-cü maddəyə aşağıdakı redaksiyada yeni ikinci hissə əlavə edilsin:

«Banklar tərəfindən təsərrüfat subyektlərinə bank hesabları açıldıqda həmin subyekt məcburi dövlət sosial sığortası sahəsində idarəetməni həyata keçirən müvafiq icra hakimiyyəti orqanında onun uçota alınması barədə sənəd təqdim etməlidir».

2. 13-cü maddənin ikinci hissəsi müvafiq olaraq üçüncü hissə hesab edilsin.

3. 14-cü maddənin üçüncü hissəsinin ikinci abzasında «33» rəqəmi «30» rəqəmi ilə əvəz edilsin.

4. 14-cü maddənin üçüncü hissəsinin altıncı abzası aşağıdakı redaksiyada verilsin:

«-vəkillər kollegiyasının üzvləri üçün gəlirlərinin 20 faizi miqdarında;».

5. 14-cü maddənin üçüncü hissəsinə aşağıdakı redaksiyada yeddinci, səkkizinci, doqquzuncu, onuncu, on birinci və on ikinci abzaslar əlavə edilsin:

«xüsusi notarius, sərbəst auditor, sərbəst mühasib, fərdi etektif fəaliyyəti ilə məşğul olan şəxslər üçün - gəlirlərinin 20 faizi miqdarında;

Bakı, Sumqayıt və Gəncə şəhərləri üzrə:

ticarət və ictimai iaşə obyektlərində fərdi sahibkarlıq fəaliyyəti ilə məşğul olan şəxslər üçün — ölkə üzrə ötən ilin orta aylıq əmək haqqının 30 faizi miqdarında;

əhaliyə məişət və nəqliyyat xidməti göstərən fərdi sahibkarlıq fəaliyyəti ilə məşğul olan şəxslər üçün — ölkə üzrə ötən ilin orta aylıq əmək haqqının 25 faizi miqdarında;

fərdi sahibkarlıq fəaliyyətinin digər növləri ilə məşğul olan şəxslər üçün — ölkə üzrə ötən ilin orta aylıq əmək haqqının 20 faizi miqdarında;

ticarət və ictimai iaşə obyektlərində, əhaliyə məişət və nəqliyyat xidməti sahəsində, eləcə də fərdi sahibkarlıq fəaliyyətinin digər növləri ilə məşğul olan şəxslər üçün nəzərdə tutulan məcburi dövlət sosial sığorta haqqı məbləğləri bu Qanunun 14-cü maddəsinin üçüncü hissəsinin doqquzuncu — on birinci abzaslarında Bakı, Sumqayıt və Gəncə şəhərləri üzrə müəyyən edilmiş məcburi dövlət sosial sığorta haqqının respublika tabeli digər şəhərlərdə 80 faizi, rayon mərkəzlərində, digər şəhərlərdə və qəsəbələrdə 60 faizi, kənd yerlərində 50 faizi tətbiq edilir».

6. 14-cü maddənin üçüncü hissəsinin səkkizinci abzası çıxarılsın.

7. 14-cü maddənin üçüncü hissəsinin yeddinci və doqquzuncu abzasları müvafiq olaraq on üçüncü və on dördüncü abzaslar hesab edilsin.

8. 14-cü maddənin dördüncü hissəsi aşağıdakı redaksiyada verilsin:

«Məcburi dövlət sosial sığorta haqqı sosial sığorta ödəmələri üzrə xərclər çıxıldıqdan sonra hər ay üçün sonrakı ayın əvvəlində nağd və ya nağdsız hesablaşma qaydasında ödənilir. Qonorar ödəyən hüquqi və fiziki şəxslər məcburi dövlət sosial sığorta haqqını hər dəfə qonorar hesablandıqda ödəyirlər. Məcburi dövlət sosial sığorta haqlarının ödənilməsi əmək haqqı ödənişləri ilə eyni vaxtda həyata keçirilir».

9. 18-ci maddəyə aşağıdakı məzmunda ikinci hissə əlavə edilsin:

«Məcburi dövlət sosial sığortası sahəsində idarəetməni həyata keçirən müvafiq icra hakimiyyəti orqanı məhkəmələrə iddia ərizələrinin verilməsi üçün dövlət rüsumunu ödəməkdən azaddır».

10. 21-ci maddənin birinci hissəsinin ikinci abzasında «pozmalarına görə» sözlərindən sonra «, o cümlədən uçota durmadıqda həmin dövr ərzində hesablanmalı olan məcburi dövlət sosial sığorta haqqı bərpa edilməklə,» sözləri əlavə edilsin.

11. 21-ci maddənin birinci hissəsinin beşinci abzasından «qəsdən» sözü çıxarılsın.

12. 21-ci maddənin birinci hissəsinə aşağıdakı redaksiyada yeni səkkizinci və doqquzuncu abzaslar əlavə edilsin:

«sığortaedənlərin işçilərinin sayının gizlədilməsinə görə (əmək müqaviləsi olmadan işləyənlər olduqda və ya müqaviləsi olduğu halda hesabatdan gizlədildikdə) hər işçiyə görə - sığorta edənin fəaliyyət dövrünün hər ayı üçün ölkə üzrə əvvəlki ilin orta aylıq əmək haqqının 50 faizi məbləğində cərimə;

məcburi dövlət sosial sığorta haqları əmək haqqı ödənişləri ilə eyni vaxtda həyata keçirilmədiyi halda, eləcə də hesablaşma və digər hesablar üzrə köçürmə əməliyyatlarının aparılması qanunvericiliyə uyğun olaraq dayandırıldığı müddətdə köçürmə əməliyyatı apardığına görə — kredit təşkilatlarına ödənilməli olan məcburi dövlət sosial sığorta haqqı məbləğinin 10 faizi miqdarında cərimə;».

13. 21-ci maddənin birinci hissəsinin səkkizinci abzası müvafiq olaraq onuncu abzas hesab edilsin.

14. 21-ci maddənin ikinci hissəsi aşağıdakı redaksiyada verilsin:

«Məcburi dövlət sosial sığorta haqları üzrə yaranmış maliyyə sanksiyaları sığortaedənlərin kredit təşkilatında olan hesabından, habelə kredit təşkilatında sığortaedənin hesabı olmadıqda məhkəmənin qanuni qüvvəyə minmiş qərarı əsasında tutulur».

II. Bu Qanun 2001-ci il yanvarın 1-dən qüvvəyə minir.

Azərbaycan Respublikasının Prezidenti Heydər ƏLİYEV

Bakı şəhəri, 24 oktyabr 2000-ci il

№ 936-IQD

Azərbaycan Respublikasının Qanunvericilik toplusu .- 2000.- 30 noyabr, № 11.- S.4515-4516.