XXI ƏSRİN BÖYÜK QADINI

Həyatda hər bir kəsin yerini və taleyini tarix müəyyən edir. Odur ki, nə böyük, nə də kiçik rollar olmur. Öz həyat kitabını yazmağa ancaq sənin şəxsi, dərk edilmiş məsuliyyətin imkan verir. Bu kitabda hər bir kəs özünü şəxsi həyatının və dünyanın qurub-yaradıcısı, yaxud dağıdıcısı kimi təcəssüm etdirir. Kimsənsə, elə də olmalısan - bax, budur bizim həyatımız. Ona görə də özgələrin rollarını və obrazlarını gərək öz üzərinə götürməyəsən. Çünki sən də, dünyada yerin də yeganə və bənzərsizdir.

Mehriban Əliyeva

Bəli elə onun özünün də dünyadakı yeri də, rolu da yeganə və bənzərsizdir.

Mehriban Əliyeva - Azərbaycanın Birinci xanımı, millət vəkili, Azərbaycan-Amerika parlamentlərarası dostluq qrupunun rəhbəri, Heydər Əliyev Fondunun prezidenti, Azərbaycan Mədəniyyətinin Dostları Fondunun prezidenti, Azərbaycan Gimnastika Federasiyasının prezidenti, YUNESKO və İSESKO-nun xoşməramlı səfiri, fəlsəfə elmləri doktoru və 3 gözəl övladın anası!

Onun təkcə Azərbaycan üçün deyil, türk dünyası, müsəlman dünyası və ümumiyyətlə, dünyamız və insanlıq üçün xidmətlərini göz önündə canlandıran zaman görürük ki, o, bu gün türk və müsəlman dünyasının şəriksiz qadın lideridir.

Bu günlərdə Azərbaycanın birinci xanımı, Heydər Əliyev Fondunun prezidenti, YUNESKO və İSESKO-nun xoşməramlı səfiri Mehriban xanım Əliyeva Fransa Respublikası Prezidentinin Sərəncamı ilə “Şərəf Legionu” ordeninin zabit dərəcəsi ilə təltif edilmişdir.

Fransa dövlətinin başçısı Nikola Sarkozi Azərbaycan Respublikasının Prezidenti İlham Əliyevə göndərdiyi təbrik məktubunda bu barədə məlumat verərək bildirmişdir ki, Mehriban xanım Əliyeva bu ali mükafata Fransaya münasibətdə göstərdiyi xidmətlərinə və nümayiş etdirdiyi sadiqliyinə görə layiq görülmüşdür.

Bu xoş xəbəri dövlətimizin başçısına çatdırmaqdan məmnun olduğunu bildirən Nikola Sarkozi Prezident İlham Əliyevə xüsusi hörmət və ehtiramı olduğunu vurğulamışdır.

Dünyanın məşhur ictimai-siyasi, dövlət, mədəniyyət və elm xadimlərinə, sərkərdələrə verilən “Şərəf Legionu” ordeni 1802-ci ildə imperator Napoleon Bonapart tərəfindən təsis edilmişdir. Fransanın ən yüksək dövlət mükafatı olan “Şərəf Legionu” ordeninin 5 dərəcəsi vardır. On bir nəfərdən ibarət çox nüfuzlu Mükafat Komissiyası ordenə təqdim olunmuş şəxslər barədə məlumatları araşdırdıqdan sonra onun təqdim edilməsinə icazə verilir.

Fransa Respublikası və onun xalqı qarşısında xüsusi xidmətləri olan şəxslərə verilən “Şərəf Legionu” ordeninin zabit dərəcəsinə indiyədək dünyanın bir çox görkəmli insanları layiq görülmüşlər.

Bu Mehriban Əliyevanın fəaliyyətinə beynəlxalq aləmdə verilən növbəti yüksək qiymətin göstəricisidir.

Əslində Mehriban Əliyevanın həyatı, fəaliyyəti, dünyaya baxışı gənc qızlar və qadınlar üçün gözəl bir örnəkdir. O, türk və müsəlman qadınının bütün dünyada yüksək səviyyədə tanınması və qəbul edilməsi üçün yorulmaz bir fədakardır.

2004-cü ildə Azərbaycan şifahi xalq ədəbiyyatının və musiqi irsinin qorunub saxlanması və inkişaf etdirilməsi sahəsindəki yorulmaz səylərinə görə Mehriban Əliyeva YUNESKO-nun xoşməramlı səfiri adına layiq görülüb. Ümumiyyətlə, o, gördüyü işlərə görə YUNESKO-nun ən fəal xoşməramlı səfirləri sırasında dayanır. Onun fəaliyyəti nəticəsində YUNESKO-nun qərargahında böyük Azərbaycan ziyalılarının yubileyləri qeyd olunur, Azərbaycan mədəniyyətini təbliğ edən çoxlu sayda tədbirlər keçirilir.

O, YUNESKO ilə yanaşı, həm də müsəlman dünyasını özündə birləşdirən İslam Konfransı Təşkilatının ən böyük qurumu olan İSESKO-nun da xoşməramlı səfiridir və bu vəzifədə də müsəlman dünyasını layiqincə təmsil edir.

Sivilizasiyalararası dialoq daxil olmaqla, müxtəlif sahələrdə genişmiqyaslı və fədakar fəaliyyətinə, qayğıya ehtiyacı olan uşaqlara diqqətinə, onların yaşayış şəraitinin yaxşılaşdırılmasına, təhsilə, həmçinin islam aləmində görülən işlərə böyük dəstəyinə görə 2006-cı il noyabrın 24-də İSESKO-nun xoşməramlı səfiri adına layiq görülmüş Mehriban Əliyevanın 3 il ərzində gördüyü işlər təşkilat tərəfindən ən yüksək səviyyədə qiymətləndirilir.

Amerika Birləşmiş Ştatlarının nüfuzlu “Vaşinqton tayms” qəzetinin onun haqqında dərc etdirdiyi məqalədə deyilir: “Azərbaycanın Birinci xanımı Mehriban Əliyeva müsəlman dünyasındakı qadınlar üçün ən yaxşı nümunədir”.

O, həm də fəaliyyəti ilə mədəniyyətlər və sivilizasiyalararası dialoqa necə nail olmağın yolunu, qadınların bu sahədə nə qədər böyük rol oynaya biləcəyini də göstərir. O, Azərbaycan nümunəsində göstərdi ki, mədəniyyətlərarası və sivilizasiyalararası dialoqa yalnız qarşılıqlı hörmət və dözümlülüklə nail olmaq olar.

Mehriban Əliyevanın keçdiyi həyat yoluna nəzər saldıqda qısa zaman ərzində gördüyü böyük işlər insanı valeh edir. Bu sadəcə SEÇİLMİŞLƏRƏ verilən bir istedad, ağıl və güc sayəsində mümkündür.

O, həmişə işin asanından deyil, ən çətinindən yapışır. O, bütün dünyaya göstərdi ki, Azərbaycan qızı, yəni türk-müsəlman qızları öz gözəllikləri və təravətləri ilə idmanın gimnastika növündə də böyük uğurlar əldə edə bilərlər.

2002-ci ildə Azərbaycan Gimnastika Federasiyasının prezidenti seçilən Mehriban Əliyevanın fəaliyyəti nəticəsində Azərbaycan qızları qısa zaman ərzində Avropa və dünya çempionatlarının medallarını qazanmağa və hər kəsi Azərbaycan bayrağı qarşısında ayağa qaldırmağa nail oldular.

O, Azərbaycan qızlarının idmanın bu növündə də ən böyük uğurlara imza atmağa qadir olduğunu nümayiş etdirdi. Bu gün gimnastika sahəsində Azərbaycan qızları əldə etdikləri uğurlarla nəinki türk və müsəlman dünyasında liderdir, eləcə də bir çox Avropa və Qərb ölkələrini arxada qoyurlar. Bu, onun zəhmətinin bəhrəsidir. Bu böyük uğurların cəmi 7 il ərzində əldə edildiyini nəzərə alsaq, onun Azərbaycanda gimnastikanın inkişafında tarixi rol oynadığını görə bilərik.Onun rəhbərlik etdiyi Heydər Əliyev Fondu bu gün dünya miqyasında qəbul olunan bir təşkilata çevrilib. Fondun bir çox ölkələrdə (ABŞ, Rusiya, Türkiyə, Rumıniya, Gürcüstan və s.) nümayəndəlikləri fəaliyyət göstərir və qurum çoxsaylı layihələri ilə artıq təkcə Azərbaycanda deyil, onun hüdudlarından kənarda da böyük işlər görür. O deyir: “Mən insanlara kömək göstərmək istəyirəm. Konkret problemləri həll etmək, yardım edə bildikdə sevinc hissi keçirmək və səndən asılı olmayan səbəblər üzündən nəsə edə bilmədikdə təəssüflənmək, qəzavü-qədər, sağalmaz xəstəlik qarşısında bütün gücsüzlüyünü dərk edərkən əziyyət çəkmək, xilas edilmiş bir uşağın təbəssümünü gördükdə isə bir daha sevinmək istəyirəm. Bu, mənim seçimimdir”.

Xeyirxahlıq və humanizm, onun bütün fəaliyyətinin ana xəttini təşkil edir. Onun rəhbərlik etdiyi fond maddi vəziyyəti ağır olan minlərlə xəstəni əməliyyat və müalicə etdirərək yenidən həyata qayıtmalarına dəstək olmuşdur. O, bu kasıb insanların müalicə olunaraq sağlamlıqlarına qovuşmasına dəstək göstərməsindən mənəvi rahatlıq tapır və öz timsalında bu önəmli ənənələrin cəmiyyətdə daha da möhkəmlənməsində böyük rol oynayır.

Yoxsul insanlar daim onun rəhbərlik etdiyi fondun diqqət və qayğısındadır. Əslində bu gün Azərbaycan Prezidentindən sonra vətəndaşların ən çox müraciət etdiyi şəxsin Mehriban Əliyeva olması insanların ona olan böyük inam, etimad və sevgisinin göstəricisidir. Bu gün sadə insanlar ona mərhəmət, xeyirxahlıq və humanizm simvolu kimi baxırlar.

O, müasir Azərbaycanda ictimai həyatın xüsusi bir sektoru olan xeyriyyəçilik institutunun yenidən formalaşıb inkişaf etməsində böyük rol oynayır. O, müasir dünyada və müasir anlamda xeyriyyəçiliyin daha geniş anlam daşıdığını bəyan etdi və yeni bir məktəbin əsasını qoydu. Mehriban Əliyeva öz qəlbinin və vicdanının səsi ilə vəsaitini, qüvvəsini, vaxtını və enerjisini xeyirxah əməllərə, cəmiyyət və dünya üçün vacib məsələlərə təmənnasız sərf edir.

“İnsan öz xeyirxah niyyətlərini, istəklərini, imkanlarını və qabiliyyətlərini tətbiq etmək sahəsini həmişə tapa bilər” - deyən Mehriban Əliyeva cəmiyyətdə bu düşüncənin əməllərlə daha da möhkəmlənməsi üçün öz fəaliyyəti ilə nümunə göstərir.

O, hesab edir ki, hər bir vətəndaş dövlətinin və cəmiyyətinin inkişafı üçün təmənnasız kömək etməyi nəinki bacarmalıdır, bunu özü üçün bir vətəndaşlıq borcu kimi qəbul etməlidir. “Həmişə öz ləyaqətini saxlamaq, özünə və prinsiplərinə sadiq olmaq!” O, bu həyat devizi ilə yaşayır və uğurlar bir-birini əvəz edir.

Azərbaycanın hansı bölgəsinə getsəniz, hər kəs Mehriban Əliyevanın oradan millət vəkili olmasını arzulayır. Millət vəkili kimi təmsil etdiyi Əzizbəyov rayonu hər gün qurulur, inkişaf edir. Sadə insanlar bu qədər geniş fəaliyyət dairəsi olan bir insanın tez-tez onlara baş çəkərək problemləri, istəkləri ilə maraqlanmasını yüksək qiymətləndirir və qürur duyurlar. Çünki onları təmsil edən millət vəkili təkcə bölgəsi üçün deyil, dövləti və milləti üçün böyük işlər görən bir insandır. İnsanlar ona humanizmin simvolu kimi baxırlar.

Qadınlar onu gözəllik və üslubun etalonu hesab edirlər. O, isə hesab edir ki, əsil gözəllik insanın xarici gözəlliyi ilə daxili gözəlliyinin vəhdətindən yaranır.

Onun ən gözəl xüsusiyyətlərindən biri təvazökarlığıdır. Bu qədər böyük fəaliyyətə baxmayaraq, heç bir zaman özü haqqında danışmağı sevmir. O, öz işi ilə insanların sevgisini qazanır.

O, təkcə Birinci xanım deyil, həm də Möhtərəm Prezidentimiz İlham Əliyevin ən yaxın silahdaşıdır. Azərbaycanın inkişafı, gələcəyi ilə bağlı mübarizə aparan ən yaxın silahdaşı...

O, Azərbaycanın köklü bir ailəsinin qızı, birinin isə gəlini olaraq Vətənə, millətə xidmət düşüncələrinin hökm sürdüyü bir mühitdə həyata addımlarını atdı. Babası məşhur Azərbaycan yazıçısı və alimi Mir Cəlal Paşayev SSRİ-nin ən ağır dönəmlərində belə milli düşüncə, milli sevda ruhunu gənclərə aşılamaq üçün ədəbiyyatdan bir silah kimi istifadə etmişdir. Ana tərəfdən babası isə məşhur jurnalist, gözəl ziyalı Nəsir İmanquliyev idi. O, Azərbaycan Aviasiyasının inkişafında böyük xidmətləri olan, məşhur alim, Aviasiya Akademiyasının rəhbəri Arif Paşayevlə, təkcə Azərbaycanda deyil, keçmiş SSRİ məkanında və dünyada hörmətlə xatırlanan məşhur ərəbşünas alim Aida İmanquliyevanın tərbiyəsi ilə böyüyüb. İkinci böyük və çox önəmli məktəbi isə Azərbaycanın Ümummilli lideri Heydər Əliyevin ailəsində keçib. Amma o, hər zaman ailəsinin adını daha da yüksəklərə qaldırdı. Mükəmməl övlad, mükəmməl gəlin, mükəmməl həyat yoldaşı, mükəmməl ana və mükəmməl nənə oldu. Ən əsası isə o, millətinə və Vətəninə mükəmməl bir övlad oldu.

Rabitə dünyası.- 2010.- 19 fevral.- S.2.