Regionlarda İKT sürətlə inkişaf edir

Neftçala rabitəsi

Azərbaycanın rayonları sırasında özünəməxsusluğu ilə seçilən Neftçalada bu gün bütün sahələrdə sürətli inkişaf müşahidə olunur. Möhtərəm Prezidentimiz İlham Əliyev cənablarının tapşırıq və tövsiyələrinə uyğun olaraq rayonda bütün istiqamətlərdə aparılan islahatlar, quruculuq öz bəhrəsini vermiş, rayonun abadlığı istiqamətində böyük işlər görülmüşdür. Rayon icra hakimiyyətinin həyata keçirdiyi bu işlərdə yaxından iştirak edən rayon rabitəçiləri öhdələrinə düşən işin layiqincə yerinə yetirilməsi istiqamətində təxirəsalınmaz tədbirlər həyata keçirirlər.Bunun nəticəsidir ki, rayonda bu sahədə də böyük uğurlar əldə edilmişdir. İnformasiya və kommunikasiya texnologiyaları

Neftçalada informasiya və kommunikasiya texnologiyalarının inkişafı istiqamətində çox böyük işlər görülmüşdür. Neftçala TKQ-nin rəisi Zülfəli Muradov bizimlə söhbətində bildirdi ki, ötən il rayon mərkəzi ATS-nin, kənd və qəsəbələrin tam elektronlaşması başa çatmışdır. Mərkəzi stansiya tam rekonstruksiya olunaraq 2000 nömrə tutumlu stansiya müasir standartlara cavab verən 4000 nömrə tutumlu elektron stansiya ilə əvəz olunmuşdur. Stansiya əvvəlki stansiyadan fərqli olaraq müxtəlif servis xidmətləri ilə təmin olunmuş, müasir “İdeya” proqramı ilə təchiz edilmişdir. İstifadəçilərin rahatlığının təmin olunması istiqamətində həyata keçirilmiş tədbirlər nəticəsində qovşağın inzibati binasında əhaliyə hər cür xidmət göstərən müasir abunə şöbəsi yaradılmışdır. Bundan başqa, internet istifadəçiləri üçün internetklub da yaradılmışdır. Rayonda hərbi hissədə əsgərlərin öz yaxınları ilə telefon əlaqəsi yaratması üçün GSM tipli taksofon quraşdırılmışdır.

Müasir kənd rabitəsi

RİTN “Aztelekom”İB-nin dəstəyi ilə aparılmış gərgin və məqsədyönlü işlər nəticəsində rayonun Yeniqışlaq, Xolqarabucaq, Yuxarı Qaraimanlı, Cəngənə, Qaçaqkənd, Xəzərkənd, Müşfiq, Ərəbqardaşbəyli, Sübhi, Qazaxbərəsi kəndlərində müxtəlif tutumlu elektron ATS-lər qurulmuşdur. Rayonun Mirqurbanlı kəndində Həsənabad qəsəbəsində yerləşən EATS-dən çəkilmiş telefonlar fəaliyyət göstərirdi. “Aztelekom”İB-nin və icra hakimiyyətinin köməkliyi ilə aparılmış işlər nəticəsində müvafiq yer ayrılmış və EATS tikilərək əhalinin istifadəsinə verilmişdir.

Rayonun Xolqarabucaq kəndi istiqamətində 70 km məsafədə yeraltı kabellər ləğv edilmiş, 2 ədəd radioreleyka avadanlığı Qırmızıkənd vasitəsilə bağlantı yaradılmış, mərkəzə çıxış təmin edilmişdir.

Xolqarabucaq zonasında ümumilikdə 160 cütləşmiş nömrələr fərdiləşmiş mal-material təmin edilmişdir. Kürqarabucaq kəndində daxili xətt şəbəkəsi yaradılmış, 110-a yaxın mənzil telefonlaşdırılmışdır. Bütün yuxarıda adları çəkilən kəndlərdə cari təmir və bərpa işləri aparılmış, Neftçala-Salyan yolkənarı hava rabitə xətlərində səliqə-sahman yaradılmış, çürümüş dirəklər yenisi ilə əvəz olunmuşdur.

Davamlı nailiyyətlər

Z.Muradov daha sonra bildirdi ki, qovşaq 2010-cu ilin 1-ci rübündə 2009-cu ilin 1-ci rübünə nisbətən böyük nailiyyətlər əldə etmişdir. Belə ki, 2009-cu ilin 1-ci rübündə 117700 min manat tarif planına qarşı 112872 manat gəlir əldə edilmişdirsə, 2010-cu ilin 1-ci rübündə bu rəqəm 121000 min manat plana qarşı 126174 faktiki gəlir əldə olunmuşdur.

Əhaliyə yüksək rabitə xidməti göstərən qovşaq 2009-cu ilin 1-ci rübündə 153 ədəd telefon çəkilişinə nail olmuşdusa, bu ilin uyğun dövründə bu rəqəm 301 ədədə çatdırılmışdır. 2010-cu ilin 3 ayı ərzində internet istifadəçiləri 1136 nəfərə çatdırılmışdır.

Neftçala TKQ-nin kollektivi rayon şəhər, qəsəbə və kənd telefon rabitəsinin günün tələbləri səviyyəsinə çatdırılması üçün bu ilin 1-ci rübündə də əzm nümayiş etdirmişlər. Belə ki, ilin birinci rübündə rayonda əhaliyə genişzolaqlı internet xidməti göstərmək üçün “Data Plus” şirkətinin 48 portluq avadanlığı quraşdırılmış, bunun da 40 ədədi əhalinin, idarə və müəssisələrin ixtiyarına verilmişdir. Ümumilikdə rüb ərzində ayrı-ayrı kənd və qəsəbələrdə 223 ədəd telefon çəkilişi aparılmışdır ki, bu da ötən ilin müvafiq dövrü ilə müqayisədə 120 ədəd çoxdur. Rüb ərzində həmçinin Neftçala-Salyan arasında fiber-optik kabel xəttinin çəkilməsi istiqamətində işlər davam etdirilir.

Neftçala TKQ-nin rəisi Zülfəli Muradov sonda RİTN “Aztelekom” İB və rayon icra hakimiyyətinin onlar qarşısında qoyduğu bütün tapşırıqların həyata keçirilməsi üçün bundan sonra da var qüvvələri ilə çalışacaqlarına söz verdi və yaradılan şəraitə görə rəhbərliyə öz təşəkkürünü bildirdi.

Neftçalada telekommunikasiya və informasiya texnologiyalarının inkişafı ilə yanaşı poçt rabitəsi də sürətlə inkişaf edir. Prezident İlham Əliyev cənablarının rəhbərliyi ilə ölkəmizdə bütün sahələrdə aparılan islahatlara paralel olaraq poçt rabitəsi sahəsində həyata keçirilən tədbirlər Neftçala poçtamtında da özünü göstərmişdir. Neftçala Poçt Filialının rəisi Ceyhun Əkbərov bizimlə söhbətində bildirdi ki, kollektivin gərgin səyi nəticəsində filial 2009-cu il və 2010-cu ilin I rübündə böyük uğurlar əldə etmişdir. 2009-cu il üzrə tarif gəliri proqnozunun 83400 manata qarşı 104520 manat yəni 125,3% yerinə yetirilməsi deyilənlərə əyani sübutdur.

Tarif gəliri artır

C.Əkbərov bildirdi ki, RİTN “Azərpoçt”MMC-nin dəstəyi ilə poçtamt tərəfindən həyata keçirilmiş tədbirlər nəticəsində 2010-cu ilin I rübü üzrə tarif gəliri proqnozu 116,4%, əhaliyə göstərilən rabitə xidmətlərindən əldə olunan gəlir 122,8% yerinə yetirilmişdir. Neftçala Poçt Filialı 2010-cu ilin I rübü üzrə 26360 manat proqnoza qarşı 30677 manat gəlir əldə etmişdir ki, bu da ötən illə müqayisədə 4317 manat çox olmuşdur.

Bundan başqa, 1580 manat əhaliyə göstərilən rabitə xidmətləri üzrə proqnoza qarşı 19421 manat gəlir əldə edilmişdir ki, bu da ötən ilin müvafiq dövrü ilə müqayisədə 5606 manat artıq olmuşdur. Neftçala Poçt Filialına verilmiş 2010-cu ilin I rübü 29660 manat istismar xərcinə 27404 manat əməl edilmişdir ki, bu da proqnozdan 2256 manat az olmuşdur.

2010-cu ilin 1 rübü üzrə poçt şöbələrində 254 ədəd bağlama qəbul edilmişdir ki, ötən il bu rəqəm 19 ədəd olmuşdur. Hərbi xidmət göstərən əsgərlərə isə 129 ədəd bağlama qəbul edilib yola salınmışdır.

2010-cu ilin 1 rübü ərzində 2001 ədəd sürətli pul baratı qəbul edilib yola salınmışdır ki, bu rəqəm keçən illə müqayisədə 667 ədəd çox olmuşdur. Bu da əhalinin poçta olan inamının get-gedə artdığını göstərir.

Xidmət keyfiyyəti artır

Ümumiyyətlə ötən illərlə müqayisədə istər respublikadaxili, istərsə də beynəlxalq məktub korrespondensiyasının sayının artımında xeyli dəyişiklik olmuş, əhaliyə poçt nişan satışı, banderol və qiymətli məktub kimi ənənəvi poçt xidmətlərindən əldə olunan gəlir ötən illə müqayisədə çox olmuşdur.

Şəhər və rayon mərkəzləri, həmçinin qəsəbələrdə mövcud olan poçt qutularının dislokasiya yerləri dəqiq müəyyənləşdirilmiş, poçt şöbələri olmayan ən kiçik kəndlərdə də poçt qutuları yerləşdirilmişdir.

Qeyd edək ki, rayon mərkəzində 3 , kəndlərdə isə 21 poçt şöbəsi fəaliyyət göstərir. Bunlardan 20-si yeni tikilmiş və müasir avadanlıqlarla təmin edilmişdir.

Poçt şöbələrində estetik təmir işləri görülmüş, poçtun xidmətlərindən istifadə edən əhalinin rahatlığı üçün münbit şərait yaradılmış, şöbələrdə insan faktoru ön plana çəkilmişdir.

2010-cu ilin I rübü ərzində əhalidən elektrik enerji, təbii qaz, su haqlarının qəbulu davam etdirilmişdir.

Sonda poçtamt rəisi onlara yaradılan şəraitə görə RİTN “Azərpoçt”MMC-nin rəhbərliyinə minnətdarlığını bildirərək kollektivin səyi ilə bundan sonra da nailiyyətlər estafetini davam etdirəcəklərini dedi.

Soltanov Rəvan

Rabitə dünyası.- 2010.- 14 may.- S.7.