2008-ci İLİN MÜHÜM HADİSƏLƏRİ

2008-ci il dünya tarixində maliyyə və iqtisadi böhran ili kimi yadda qalsa da, Azərbaycan üçün 2008-ci il növbəti uğurlu il olmuşdur. 2008-ci ildə nəzərdə tutulmuş bütün proqramlar uğurla icra edilmişdir. Azərbaycan iqtisadiyyatı yüksək sürətlə inkişafını davam etdirmiş və ölkədə infrastruktur və digər layihələr vaxtlı-vaxtında icra olunmuşdur.

23-28 yanvar

Azərbaycan Prezidenti İlham Əliyev İsveçrənin Davos şəhərində keçirilən ənənəvi Dünya iqtisadi forumunda iştirak etmişdir.

14 mart

BMT-nin Baş Məclisi “Azərbaycanın işğal olunmuş ərazilərində vəziyyət” barədə 9 bənddən ibarət qətnamə qəbul etmişdir. Qətnamədə Azərbaycan Respublikasının beynəlxalq səviyyədə tanınmış sərhədləri çərçivəsində ərazi bütövlüyü dəstəklənir, Ermənistan qoşunlarının işğal edilmiş bütün ərazilərdən tamamilə və qeyd-şərtsiz çıxarılması tələb olunur.

7 may

Bakıda ümummilli lider Heydər Əliyevin 85 illiyinə həsr olunmuş “Demokratiya və sabitlik naminə: əməkdaşlığın yeni imkanları” mövzusunda beynəlxalq konfrans keçirilmişdir. Azərbaycan Prezidenti İlham Əliyev konfrans iştirakçılarını qəbul etmişdir.

10 may

Bakıda, “Gülüstan” sarayında müstəqil Azərbaycan dövlətinin memarı və qurucusu, ümummilli lider Heydər Əliyevin 85 illik yubileyinə həsr olunmuş xatirə gecəsi keçirilmişdir. Azərbaycan Prezidenti İlham Əliyev xatirə gecəsində nitq söyləmişdir.

14-15 may

Heydər Əliyev Fondunun prezidenti, YUNESKO-nun xoşməramlı səfiri Mehriban Əliyevanın təşəbbüsü ilə Bakıda, “Gülüstan” sarayında “Avropada subregional çərçivədə savadlılıq problemlərinə baxış: tərəfdaşlıq əlaqələrinin qurulması və innovativ yanaşmaların tətbiqinə dəstək” mövzusunda YUNESKO-nun regional konfransı keçirilmişdir. Azərbaycan Prezidenti İlham Əliyev konfrans iştirakçılarına təbrik göndərmişdir.

27 may

Bakıda, “Gülüstan” sarayında Azərbaycan Xalq Cümhuriyyətinin 90 illiyinə həsr olunmuş mərasim keçirilmişdir. Prezident İlham Əliyev mərasimdə nitq söyləmişdir.

10-11 iyun

Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın təşəbbüsü, YUNESKO və İSESKO-nun dəstəyi ilə Bakıda “Mədəniyyətlərarası dialoqda qadınların rolunun genişləndirilməsi” mövzusunda beynəlxalq konfrans keçirilmişdir. Konfransda müxtəlif ölkələrdən 300-dən çox nümayəndə, o cümlədən bir neçə ölkənin birinci xanımları iştirak etmişdir.

26 iyun

Azərbaycan Respublikası Silahlı Qüvvələrinin 90 illiyi münasibətilə Bakıda hərbi parad keçirilmişdir. Paradda 4500-dən çox hərbçi, hərbi texnika, o cümlədən döyüş təyyarələri və vertolyotları, hərbi gəmilər iştirak etmişdir.

24 iyul

Qarsda Azərbaycan, Gürcüstan və Türkiyə prezidentlərinin iştirakı ilə Bakı-Tbilisi-Qars dəmir yolunun Türkiyə hissəsinin təməli qoyulmuşdur. Bu dəmir yolu üç ölkənin ərazisindən keçməklə Avropanı Asiya ilə birləşdirəcəkdir.

8-24 avqust

Pekində XXIX Yay Olimpiya oyunları keçirilmişdir. Avqustun 8-də saat 8.08 dəqiqədə başlanan təntənəli açılış mərasimində 70 ölkənin dövlət və hökumət başçıları, o cümlədən Azərbaycan Prezidenti İlham Əliyev, 9 kral ailəsinin nümayəndələri iştirak etmişdir. Ölkəmizin idmançıları Olimpiadada 1 qızıl, 2 gümüş, 4 bürünc medal qazanmış, Azərbaycan 204 ölkə arasında 39-cu yeri tutmuşdur.

1-4 sentyabr

Bakıda AzərTAc-ın ev sahibliyi ilə Asiya və Sakit Okean Ölkələri Xəbər Agentlikləri Təşkilatı (OANA) İcraiyyə Komitəsinin 30-cu iclası keçirilmişdir. Birinci dəfə idi ki, 21 ölkənin milli informasiya agentliklərinin rəhbərləri və yüksək vəzifəli təmsilçiləri Azərbaycan paytaxtına gəlmişdilər. Eyni zamanda, ilk dəfə olaraq, Avropa Xəbər Agentlikləri Alyansının (EANA) prezidenti Volfqanq Vislozil də iclasa dəvət olunmuşdu. Azərbaycan Prezidenti İlham Əliyev iclas iştirakçılarına təbrik göndərmiş, sentyabrın 2-də onları qəbul etmişdir.

10 sentyabr

Dünya Bankı və Beynəlxalq Maliyyə Korporasiyasının biznes mühitinin əlverişliliyi vəziyyətini əks etdirən “Doing Business-2009” hesabatında Azərbaycan 2008-ci ildə dünyada ən islahatçı ölkə elan olunmuşdur.

5 sentyabr

Prezident İlham Əliyev “2008-2015-ci illərdə Azərbaycan Respublikasında yoxsulluğun azaldılması və davamlı inkişaf Dövlət Proqramı”nın təsdiq edilməsi haqqında Sərəncam imzalamışdır.

19 sentyabr

Zaqatala hava limanı istifadəyə verilmişdir. Azərbaycan Prezidenti İlham Əliyev açılış mərasimində iştirak etmişdir. Yeni hava limanında saatda 100-120 sərnişinə xidmət göstərmək mümkündür.

(Ardı səh.6-da)

4 oktyabr

Azərbaycan Prezidenti İlham Əliyevin 2008-ci il 15 yanvar tarixli Sərəncamına əsasən yaradılmış M.V.Lomonosov adına Moskva Dövlət Universitetinin Bakı filialının açılışı olmuşdur.

8 oktyabr

Lənkəran beynəlxalq hava limanı istifadəyə verilmişdir. Azərbaycan Prezidenti İlham Əliyev açılış mərasimində iştirak etmişdir. Uçuş-enmə zolağının uzunluğu 3300 metr olan hava limanı iri yük və sərnişin təyyarələrini qəbul etməyə imkan verir.

9 oktyabr

Bakı Metropoliteninin “Nəsimi” stansiyasının açılışı olmuşdur. Azərbaycan Prezidenti İlham Əliyev mərasimdə iştirak etmişdir. 1967-ci il noyabrın 6-da istifadəyə verilmiş Bakı metrosunun hazırda 21 stansiyası var. 2025-ci ilədək stansiyaların sayı 60-dan çox olacaqdır.

15 oktyabr

Azərbaycan Respublikasında növbəti prezident seçkiləri keçirilmişdir. Ali dövlət vəzifəsi uğrunda 7 namizəd mübarizə aparmışdır. Yeni Azərbaycan Partiyasının namizədi İlham Heydər oğlu Əliyev 88,73 faiz səslə ikinci dəfə prezident seçilmişdir.

24 oktyabr

Heydər Əliyev Sarayında Azərbaycan Respublikasının Prezidenti İlham Əliyevin andiçmə mərasimi olmuşdur.

25 oktyabr

Müasir dövrün görkəmli musiqi xadimi, müğənni, bəstəkar, Azərbaycanın xalq artisti, SSRİ xalq artisti Müslüm Maqomayev ömrünün 67-ci ilində Moskvada vəfat etmişdir. O, oktyabrın 29-da Bakıda, Fəxri xiyabanda dəfn olunmuşdur.

10 noyabr

XX əsr Azərbaycan ədəbiyyatının görkəmli nümayəndəsi, alim və pedaqoq Mir Cəlal Paşayevin 100 illiyi Parisdə YUNESKO səviyyəsində qeyd olunmuşdur. Azərbaycanın birinci xanımı, YUNESKO-nun xoşməramlı səfiri Mehriban Əliyeva yubiley mərasimində iştirak etmişdir.

14 noyabr

Bakıda, “Gülüstan” sarayında IV Enerji sammiti keçirilmişdir. Sammitdə Azərbaycan Prezidenti İlham Əliyev, Türkiyə Prezidenti Abdullah Gül, Litva Prezidenti Valdas Adamkus, Ukrayna Prezidenti Viktor Yuşşenko, Gürcüstan Prezidenti Mixeil Saakaşvili, Polşa Prezidenti Lex Kaçinski, Bolqarıstanın vitse-prezidenti Angel Marin, Macarıstanın Baş naziri Ferents Dyurçan, Estoniyanın Baş naziri Andrus Ansip, ABŞ-ın energetika naziri Samuel Bodman, Avropa İttifaqının enerji məsələləri üzrə komissarı Andris Piebalqs, ümumən 21 ölkənin nümayəndələri iştirak etmişdir. Forumun yekunu olaraq Bakı Enerji Sammitinin Bəyannaməsi qəbul olunmuşdur.

21 noyabr

Azərbaycan, Türkiyə, Qazaxıstan və Qırğızıstan parlamentlərinin rəhbərləri İstanbulda Türkdilli Dövlətlərin Parlament Assambleyasının yaradılması haqqında saziş imzalamışlar. Assambleyanın ikinci konfransı Bakıda keçiriləcəkdir.

21 noyabr

Sankt-Peterburqun Dövlət Akademik Mariya Teatrı görkəmli bəstəkar, SSRİ və Azərbaycanın xalq artisti Arif Məlikovun 75 illiyi münasibətilə Heydər Əliyev Sarayının səhnəsində “Məhəbbət əfsanəsi” baletini göstərmişdir. Bəstəkarın 1961-ci ildə - 28 yaşında yazdığı bu balet dünyanın 60-dan çox teatrında tamaşaya qoyulub və indi də bir çoxlarının repertuarında qalır.

27 noyabr

Azərbaycan Prezidenti İlham Əliyev görkəmli fırça ustası, SSRİ-nin və Azərbaycanın xalq rəssamı, Sosialist Əməyi Qəhrəmanı, SSRİ və Azərbaycan Dövlət mükafatları laureatı, Rusiya Rəssamlıq Akademiyasının vitse-prezidenti Tahir Salahova Azərbaycanın ən ali mükafatını - “Heydər Əliyev” ordenini təqdim etmişdir. Noyabrın 29-da Tahir Salahovun 80 illiyi münasibətilə “Gülüstan” sarayında rəsmi qəbul təşkil olunmuşdur.

29 noyabr

Dünya şöhrətli bəstəkar, SSRİ xalq artisti, Dövlət mükafatları laureatı, Sosialist Əməyi Qəhrəmanı Qara Qarayevin 90 illiyi münasibətilə “Yeddi gözəl” baleti Azərbaycan Dövlət Akademik Opera və Balet Teatrında yeni quruluşda tamaşaya qoyulmuşdur.

2-3 dekabr

Bakıda Avropa Şurasının üzvü olan dövlətlərin mədəniyyət nazirlərinin “Mədəniyyətlərarası dialoq Avropada və onun qonşu regionlarında davamlı inkişafın və sülhün əsasıdır” mövzusunda konfransı keçirilmişdir. Azərbaycan Prezidenti İlham Əliyev konfransda nitq söyləmişdir.

26 dekabr

Milli Məclis Azərbaycan Respublikasının Konstitusiyasına əlavələr və dəyişikliklər edilməsinə dair ümumxalq səsverməsinin (referendumun) keçirilməsi haqqında qərar qəbul etmişdir. Ümumxalq səsverməsi (referendum) 2009-cu il martın 18-nə təyin olunmuşdur.

27 dekabr

Bakıda Beynəlxalq Muğam Mərkəzinin açılışı olmuşdur. Azərbaycan Prezidenti İlham Əliyev və xanımı, Heydər Əliyev Fondunun prezidenti Mehriban Əliyeva mərasimdə iştirak etmişlər. Dünyada ilk Muğam mərkəzinin təməli 2005-ci ilin aprelində YUNESKO-nun baş direktoru Koişiro Matsuuranın iştirakı ilə qoyulmuşdu.

Rabitə dünyası.- 2009.- 13 fevral.- S. 5-6.