XOCALI RABİTƏÇİLƏRİ İLƏ GÖRÜŞ KEÇİRİLDİ

Xocalı soyqırımının 17-ci ildönümü ilə əlaqədar Rabitə və İnformasiya Texnologiyaları Nazirliyində Xocalı rabitəçilərinin iştirakı ilə anım mərasimi keçirilmişdir.

Xocalı qurbanlarının ruhu bir dəqiqəlik sükutla yad edilmişdir.

Mərasimdə çıxış edən xocalı rabitəçiləri faciədə baş vermiş dəhşətli olaylar barədə danışmış, onlara mənəvi dəstək olanlara təşəkkür edərək, xocalılara xüsusi qayğı ilə yanaşan ölkə başçısı, Ali Baş Komandan İlham Əliyevə minnətdar olduqlarını bildirmişlər.

Rabitə və informasiya texnologiyaları naziri Əli Abbasov mərasimdə çıxış edərək ümummilli liderimiz Heydər Əliyevin təkidi və təşəbbüsü ilə ilk dəfə 1994-cü ildə Xocalı faciəsinin soyqırım kimi qiymətləndirildiyini vurğulamış, ölkə prezidenti İlham Əliyev cənablarının tapşırığı ilə Xocalı soyqırımı haqqında beynəlxalq miqyasda təbliğat işlərinin gücləndirildiyi barədə söhbət açmışdır.

Çıxışlarda möhtərəm prezidentimiz İlham Əliyev cənablarının rəhbərliyi ilə Azərbaycan hökumətinin Xocalı soyqırımı haqqında həqiqətlərin dünya ictimaiyyətinə olduğu kimi çatdırılması, onun soyqırım kimi tanınması üçün ardıcıl və məqsədyönlü fəaliyyət göstərdiyi vurğulanmış, ölkə başçısının bu barədə danışarkən dediyi: “Biz mübarizədə öz gücümüzə, potensialımıza, beynəlxalq hüquqa, dünya azərbaycanlılarının həmrəyliyinə arxalanırıq” - sözləri səsləndirilmişdir.

Mərasimdə faciənin 17-ci ildönümü ilə əlaqədar Heydər Əliyev Fondunun dəstəyi ilə dünyanın bir çox ölkələrində geniş təbliğat-təşviqat işlərinin görüldüyü qeyd edilmiş, bu günlərdə Koliforniyanın Berkeli Universitetində “Xocalıya ədalət” şüarı ilə bir həftəlik silsilə tədbirlərin keçirildiyi, həmin tədbirlərdə Heydər Əliyev Fondu tərəfindən Xocalı coyqırımı haqqında hazırlanmış sənədli filmin nümayiş etdirildiyi, İstanbulda eyni şüar altında beynəlxalq kompaniyanın davam etdiyi, Stokholmun mərkəzi meydanında mitinqlərin keçirildiyi, ümumiyyətlə, bu cür tədbirlərin Avropa, Asiya, Amerika qitələrinin demək olar ki, bütün böyük şəhərlərində təşkil olunduğu və geniş təbliğat kompaniyasının aparıldığı vurğulanmışdır.

Mərasimin sonunda nazir Əli Abbasov Xocalı rabitə işçiləri ilə səmimi söhbət etmiş, onların sosial problemləri ilə maraqlanmış, xocalılara yaxından köməklik göstərilməsi üçün müvafiq tapşırıqlar vermişdir.

Camaləddin Dostəli

Rabitə dünyası.- 2009.- 27 fevral.- S.10.