NAXÇIVANIN RABİTƏ İŞÇİLƏRİ BEŞ İLLİK YUBİLEYLƏRİNİ QEYD ETMİŞLƏR

Naxçıvan Muxtar Respublikasında Rabitə və İnformasiya Texnologiyaları Nazirliyi yaranmasının 5 illiyi münasibətilə mərasim keçirilmişdir.

Mərasim iştirakçıları əvvəlcə Heydər Əliyev Muzeyinin önündə ümummilli liderin abidəsini ziyarət etmiş, önünə gül dəstələri qoymuş və muzeylə tanış olmuşlar.

Naxçıvan MR rabitə və informasiya texnologiyaları naziri Rövşən Məmmədov ötən 5 ildə muxtar respublikanın ərazisinin 80 faizindən çoxunu əhatə edən CDMA texnologiyasına əsaslanan simsiz rabitə şəbəkəsinin istifadəyə verildiyini bildirmişdir. O, məlumat vermişdir ki, mərkəzi idarəetmə sistemi və 19 baza stansiyasından ibarət şəbəkəyə 2 nömrə planı tanıdılmış, mobil telefonlar üçün 060 zona kodu və 7 rəqəmli nömrələmə planı, stasionar telefonlar üçün isə simli şəbəkəyə uyğun 6 rəqəmli nömrələmə planı tətbiq edilmişdir. Artıq “Naxtel” abunəçilərinin sayı 4 mini ötmüşdür.

Nazir qeyd etmişdir ki, bu illər ərzində 9 rabitə evi və 7 poçt bölməsi əsaslı təmir olunaraq müasir avadanlıqlarla təchiz olunmuş, 2 rabitə evi tikilib istifadəyə verilmişdir. Naxçıvan MR-də nömrələmə sisteminin beynəlxalq standartlara uyğunlaşdırılması ilə yanaşı, əlavə otuz min nömrə ehtiyatı yaradılmışdır. Həmçinin, Kəngərli rayonuna ayrıca 48 prefiksinin verilməsinə şərait yaranmışdır.

Naxçıvan Muxtar Respublikasının telekommunikasiya şəbəkəsinin Trans-Asiya-Avropa (TAE) magistralı üzərindən təşkil edilməsi layihəsi uğurla başa çatdırılmışdır. Uzunluğu 134 kilometr olan və Naxçıvan ərazisi vasitəsilə İran və Türkiyə üzərindən keçən beynəlxalq xətlərə qoşulan bu optik magistral bölgə ölkələri üçün mühüm əhəmiyyətə malikdir.

Yubiley mərasimində bir qrup qabaqcıl rabitə işçisinə qiymətli hədiyyələr təqdim olunmuşdur.

Rabitə Dünyası.- 2009.- 6 mart.- S.12.