İnformatika üzrə Ümumrespublika Olimpiadası başa çatıb

AMEA İnformasiya Texnologiyaları İnstitutunda (İTİ) Dünya telekommunikasiya və informasiya cəmiyyəti gününə həsr olunan ali məktəb tələbələri arasında İnformatika üzrə Ümumrespublika Olimpiadasının final mərhələsi keçirildi. AR Rabitə və İnformasiya Texnologiyaları Nazirliyi (RİTN), Heydər Əliyev Fondu, Təhsil Nazirliyi və AMEA İTİ-nin birgə təşkilatçılığı ilə olimpiadanın keçirilməsində məqsəd müasir gənclərin İKT biliklərini daha da təkmilləşdirmək, informatika və proqramlaşdırma sahəsində istedadlı tələbələri aşkara çıxarmaq, bu sahədə onlara dəstək göstərməkdir.

Tədbirdə RİTN-in İnformasiya cəmiyyətinin inkişafı şöbəsinin müdiri Rüfət Gülməmmədov, AR Təhsil Nazirliyinin təhsilin idarəolunmasının informasiya sistemləri şöbəsinin müdiri İsmayıl Sadıqov, Heydər Əliyev Fondunun əməkdaşı Niftalı Əliyev, Bakı Dövlət Universitetinin dosenti, fizika-riyaziyyat elmləri namizədi Ramin Mahmudzadə, AMEA İTİ-nin elmi katibi Mədinə Səidova və Tədris-İnnovasiya Mərkəzinin müdiri Rəsmiyyə Mahmudova iştirak ediblər.

Qeyd edək ki, bu il olimpiadaya 7 ali təhsil müəssisəsindən 31 komanda qatılmışdır. Olimpiadada iştirak etmək istəyən tələbələrin sayının ildən-ilə artması ölkəmizdə dövlət siyasətinin əsas prioritetlərindən olan İKT sahəsində dinamik inkişafın, informasiya cəmiyyəti quruculuğu siyasətinin uğurla aparılmasının, informasiya əsrində müasir informasiya və kommunikasiya texnologiyalarına artan marağın göstəricisidir.

2 mərhələdən ibarət olan olimpiadada ölkəmizin ali təhsil müəssisələrindən - Bakı Dövlət Universiteti, Azərbaycan Dövlət Neft Akademiyası, Azərbaycan Texniki Universiteti, Qafqaz Universiteti, Naxçıvan Dövlət Universiteti tələbələrinin təşkil etdiyi komandalar və müsabiqədən kənar Azərbaycan Türk Özəl və Bakı Özəl Türk liseyləri iştirak etmişdir. Final mərhələsində balların 30%-ni toplamış 17 komanda - Bakı Dövlət Universitetinin 4 (“Overflow”, “BSU1”, “Oscar”, “ENG 1”), Azərbaycan Dövlət Neft Akademiyasının 3 (“ADNA1”, “Leker”, “Alfa”), Azərbaycan Texniki Universitetinin “Tornado”, Qafqaz Universitetinin 5 (“Qafqaz şahinləri”, “Qafqaz U2” “Qafqaz U7”, “Qafqaz U4”, “Qafqaz U3”), Naxçıvan Dövlət Universitetinin “NDU2”, Azərbaycan-Türk Özəl Liseyinin 2 (“Olischool”, “ATOL”) və Bakı Özəl Türk Liseyinin “Chipmunks” komandası iştirak etmişdir.

Olimpiadanın final mərhələsinin nəticələrinə görə, Bakı Dövlət Universitetinin “Overflow” komandası 1-ci, Qafqaz Universitetinin “Qafqaz şahinləri” komandası 2-ci, Bakı Dövlət Universitetinin “BSU1” komandası isə 3-cü yerə layiq görüldülər. Olimpiadada müsabiqədənkənar iştirak edən Bakı Özəl Türk Liseyinin “Chipmunks” komandası da balların ümumi nəticəsinə görə 1-ci yerə müvafiq bal toplayaraq qeyri-rəsmi olaraq birincilik qazandı.

Rabitə dünyası.- 2009.- 15 may.- S.4.