Şəhidlik zirvəsi

Azərbaycanın bütövlüyü uğrunda, torpaqlarımızın qorunmasında canlarından keçmiş şəhidlərimizin ömür yolu gənclərimizə örnəkdir. Hər bir Azərbaycan vətəndaşı öz milli qəhrəmanlarını tanımalı, onların keçdiyi həyat yolundan çox şeyləri öyrənməlidir.

Torpaqlarımızın qorunması, vətənimizin müdafiəsi uğrunda canından, qanından keçərək şəhidlik zirvəsinə ucalmaq ən böyük şərəf və qürurdur.

Azərbaycan öz müstəqilliyini bərpa etdikdən sonra dövlətimizə qarşı törədilən cinayətlərə, xüsusilə də erməni təcavüzü və terrorizminə qarşı xalqımız səfərbər olub Vətən və millət naminə düşmənə qarşı ölüm-dirim mübarizəsinə qalxdı. Bu mübarizədə minlərlə igid oğullarımız və qızlarımız şəhid oldu.

Şəhidlik zirvəsinə ucalanların xatirəsini yaşatmaq, onları gəncliyə nümunə göstərməksə hər kəsin vətəndaşlıq borcudur. Qəhrəmanlıq və vətənpərvərlik mövzusunda son illər daha çox kitablar nəşr olunmasının özü də bu amala xidmət edir.

Azərbaycanın elə bir bölgəsi, elə bir kəndi tapılmaz ki, orada bir şəhid məzarı olmasın. Onları yaşatmaq, tanıtmaq, hər şəhid ailəsinə hörmətlə yanaşmaq hamımızın vətəndaşlıq borcudur.

Minlərlə şəhid olan həmvətənlərimiz içərisində 210 nəfər Azərbaycanın Milli Qəhrəmanı adına layiq görülüb.

Bu yaxınlarda M.F.Axundov adına Azərbaycan Milli Kitabxanasının mətbəəsində "Milli qəhrəmanlar" adlı biblioqrafik vəsait çap olun-muşdur. Bu kitab vətənimizin tarixində, millətimizin ürəyində özlərinə ölməzlik abidəsi ucaldan Azərbaycanın Milli qəhrəmanlarına həsr edilmişdir.

Biblioqrafiyada 1992-2007-ci ilin may ayına qədər kitab, məcmuə və dövri mətbuat səhifələrində dərc edilmiş publisistik məqalələr və bədii ədəbiyyat nümunələri toplanmışdır. Vəsaitdə materiallar Milli qəhrəmanların soyadlarının əlifba sırası ilə verilmişdir. Əvvəlcə Milli Qəhrəman adına layiq görülməsi haqqında Azərbaycan Respublikası Prezidentinin Fərmanı, sonra onların qəhrəmanlıqlarını tərənnüm edən materiallar verilmişdir. Bu vəsait "Ön söz", "Rəsmi sənədlər" "Ümumi xarakterli materiallar", "Dövri mətbuatda çap olunan məqalələr", "Milli qəhrəmanlar" adlı başlıqlardan ibarətdir.

Biblioqrafik vəsaitdən istifadəni asanlaşdırmaq məqsədilə burada 3 köməkçi göstərilir: "Müəlliflərin əlifba göstəricisi", "Sərlövhələrin əlifba göstəricisi" və coğrafi adlar göstəricisi verilmişdir.

210 nəfər Milli Qəhrəman haqqında məlumatlar verilmiş bu kitab 233 səhifədən ibarətdir. Vəsaitin tərtibçisi Hərifət Həmidova, ixtisas redaktoru Kərim Tahirov (Milli Kitabxananın direktoru), redaktoru Mədinə Vəliyeva və rəyçisi Şəmistan Nəzirlidir. Kompyuter yığımı və dizayn Nazlı Şahbazovanındır.

Milli qəhrəmanlar haqqında daha bir yeni kitabça bu günlərdə işıq üzü görmüşdür.

Son dərəcə nəfis tərtibatda çap olunan bu kitabın tərtibçisi Milli Qəhrəmanlar Beynəlxalq İnformasiya Mərkəzinin sədri, "Milli qəhrəmanlar" qəzetinin baş redaktoru Mirbəşir Seyidzadədir. Dörd min tirajla çap olunaraq tez bir zamanda yayılan bu kitabın baş məsləhətçisi millət vəkili, Azərbaycanın Avropa Şurası Parlament Assambleyasındakı nümayəndə heyətinin üzvü Qənirə Paşayevadır.

"Örnək ömürlər" başlıqlı ön sözdə Q.Paşayeva yazır: "Mən istərdim ki, bu kitab gəncləri-mizin sevimli kitabına çevrilsin. Milli qəhrəmanlarımızı oxuyub, öyrənsinlər. Mən əminəm ki, onlar qəhrəmanlarımızı daha ətraflı öyrənsələr, tanısalar məhz onlara oxşamağa çalışacaq ki, bu da millətimiz, dövlətimiz və torpaqlarımızın işğaldan azad olunması üçün vacib və önəmlidir. Milli Qəhrəman zirvəsinə yüksələn bu vətəndaşlarımızın əksəriyyəti çox gəncdir və insan onların vətən sevgisi və düşüncəsinə sözün həqiqi mənasında qibtə edir! Şəhidlərimiz, Milli qəhrəmanlarımız arasında qohumlarım, uşaqlıq dostlarım, yaxınlarım olan insanlar da var və onları yaxından tanıyaraq deyə bilərəm ki, bu zirvələrə adi insanlar yüksələ bilməz. Bu zirvəyə yol ancaq Vətəni, Torpağı, Milləti canından artıq sevməkdən keçir. Bu bir Ulu Yoldur. Onlar məhz bu cür seçilmişlər idi və adlarını Vətənimizin, dövlətimizin tarixinə qızıl hərflərlə yazmaq kimi bir şərəfə nail oldular.

Mən istərdim ki, bu kitab məktəblərimizdə, universitetlərimizdə, bir sözlə, təhsil müəssisələrimizdə yayılsın və gənclərimizə öyrədilsin. Arzu edirəm ki, bu kitab qızlarımızın, oğlanlarımızın sevimli kitabına çevrilsin. Ata-ana olan zaman məhz bu cür övladlar yetişdirsinlər. Bir Şəhidin, bir Milli Qəhrəmanın ata və ya anası olmanın nə qədər şərəfli və qürurverici olduğunu hiss etsinlər. Dünyada bundan böyük qürur ola bilərmi?!"

Kitabda ümummilli liderimiz Heydər Əliyevin 5 may 1998-ci il tarixdə Prezident iqamətgahında Azərbaycanın Milli qəhrəmanlarına və şəhid olmuş Milli qəhrəmanların ailə üzvlərinə, valideynlərinə "Qızıl Ulduz" medallarının təqdim edilməsi mərasimindəki nitqi hər bir kəsdə vətənpərvərlik hissini daha da artırır.

Xatırladaq ki, 210 Milli Qəhrəman siyahısına bu yaxınlarda bir şəhid Qəhrəman da əlavə olundu-Mübariz İbrahimov! O da vətən yolunda canından keçərək Şəhidlik zirvəsinə yüksəldi.

256 səhifədən ibarət olan bu kitabın redaktoru Naim Vəliyevdir. Kitabda 210 Milli Qəhrəmanımızın qısa tərcümeyi-halı, keçdiyi şərəfli döyüş yolu və gözlərindən qığılcım yağan surətləri əks olunmuşdur.

"Milli qəhrəmanlar zirvəsi" kitabında dövlət himnimizlə yanaşı Azərbaycan Respublikasının təcavüzkar Ermənistan ordusu tərəfindən işğal olunmuş rayonlarımızın xəritəsi, ərazisi, əhalisinin sayı, coğrafi mövqeyi ayrı-ayrılıqda göstərilmişdir. Azərbaycan Respublikasının Prezidenti, Silahlı Qüvvələrin Ali baş komandanı İlham Əliyevin vətənpərvər çıxışı daha çox diqqəti cəlb edir: "Hər bir ölkə üçün onun ordusu çox vacib bir atributdur, çox önəmli bir rəmzdir. O cümlədən Azərbaycan üçün, xüsusən nəzərə alsaq ki, Azərbaycan hələ də müharibə şəraitində yaşayır, orduya diqqət daim yüksək səviyyədə olmalıdır. Bu gün Azərbaycanın Ordusu Cənubi Qafqazda ən güclü ordudur. Biz bu hərbi üstünlüyü əldə etmişik və gərək bunu möhkəmlədək. Bu üstünlük daha da böyük olmalıdır və biz buna da nail olacağıq. Bu münaqişəni həll etmək üçün, işğala son qoymaq üçün həm siyasi-diplomatik səylər göstərilməlidir, həm də düşmən bilməlidir ki, Azərbaycan Ordusu istənilən vaxtda öz torpaqlarını azad edə bilər!...

Ümidvarıq ki, güclənməkdə olan ordumuzla işğal olunmuş torpaqlarımız azad olunacaq və şəhidlərimizin ruhu şad olacaqdır.

Rauf İLYASOĞLU

Respublika.- 2010.- 19 avqust.- S. 10.