Yeni tədris ilinə yeni uğurlarla

Ulu öndərimiz Heydər Əliyevin 13 iyun 2000-ci il tarixli fərmanına əsasən Naxçıvan Politexnik Texnikumunun bazasında təşkil edilən və Azərbaycan Respublikası Nazirlər Kabinetinin 26 avqust 2003-cü il tarixli qərarı ilə müstəqil instituta çevrilən Naxçıvan Müəllimlər İnstitutu öz fəaliyyətini uğurla davam etdirir. 21 nəfər tələbə ilə fəaliyyətə başlayan institutda hazırda 700-dən çox tələbə təhsil alır ki, onların da təhsili ilə 55 nəfər professor-müəllim heyəti məşğul olur. Onlardan 6 nəfəri elmlər doktoru, professor, 25 nəfəri elmlər namizədi, dosentdir. 2010/2011-ci tədris ilində tələbə qəbulu planı 210 nəfərdən 250 nəfərə çatdırılmışdır. 2009-2010-cu tədris ilindən başlayaraq "İbtidai sinif müəllimliyi", "Riyaziyyat və informatika müəllimliyi", "Təsviri incəsənət müəllimliyi", "Məktəbəqədər təlim və tərbiyə" və "Təhsildə sosial psixoloji xidmət" ixtisasları üzrə tələbə qəbulu aparılır. 2004-cü ildən isə təhsilin magistratura pilləsində də "ibtidai təhsilin pedaqogika və metodikası" və "Pedaqogika nəzəriyyəsi və tarixi" ixtisasları üzrə kadr hazırlığı aparılır.

İnstitutda "Dillər və ədəbiyyat", "Pedaqogika və ictimai elmlər", "Ali riyaziyyat və informatika", "Riyaziyyat və tədrisi metodikası" və "Ümumi fənlər" kafedraları fəaliyyət göstərir. Kafedralarda elmi-tədqiqat və elmi-metodiki işlərin təşkili və yerinə yetirilməsi daim diqqət mərkəzində olmuşdur. Hazırda 45 əməkdaş elmi-tədqiqat və elmi-metodiki işləri yerinə yetirir. Son bir ildə institut əməkdaşlarının 160-dən çox məqalə və tezisi, 12 kitabı, o cümlədən 7 monoqrafiya, 5 dərs vəsaiti və həmçinin 6 metodik vəsaiti, 13 proqram materialı çap edilmişdir. Əməkdaşlar tərəfindən dövri mətbuatda müasir dövrün aktual problemlərinə dair yazılar dərc olunmuş, radio və televiziya verilişlərində çıxışlar, diskusiyalar aparılmışdır.

İnstitutda ali təhsilin magistratura pilləsində kadr hazırlığına da xüsusi diqqət yetirilir. Bu günədək institutun magistr pilləsini 22 nəfər bitirmiş və onlar müxtəlif müəssisələrdə işlə təmin olunmuşlar. Elmi-pedaqoji kadrların hazırlanması isə xüsusi diqqət mərkəzində olmuşdur. Belə ki, son bir ildə institut əməkdaşlarından 2 nəfəri doktorluq, 2 nəfəri isə namizədlik dissertasiyasını müvəffəqiyyətlə müdafiə etmişdir.

Naxçıvan Müəllimlər İnstitutunda hər il may ayında ümummilli lider Heydər Əliyevin anadan olmasının ildönümünə həsr olunmuş "Müasir təlim metodları və yeni pedaqoji texnologiyanın təlim-tərbiyə prosesində tətbiqi" mövzusunda elmi-praktik konfrans keçirilir. Konfransda muxtar respublikanın ali təhsil müəssisələri əməkdaşları ilə bərabər, orta məktəb müəllimləri də fəal iştirak edir və konfransın materialları çap olunur. 2007-ci ildən başlayaraq hər il noyabr ayında Naxçıvan Müəllimlər institutu Naxçıvan Dövlət Universiteti, AMEA Riyaziyyat və Mexanika İnstitutu, AMEA Naxçıvan bölməsi ilə birlikdə fizika, riyaziyyat və texnika elmləri üzrə beynəlxalq konfrans keçirir. Konfransda Azərbaycanın tanınmış alimləri maraqlı mövzularla çıxış edir, Türkiyə və İran İslam Respublikasından gəlmiş alimlər məruzələr edirlər.

İnstitut müasir tələblərə cavab verən maddi-texniki bazaya malikdir. 47 ədəd müasir kompyuter dəstindən tədrisdə və idarəetmə işlərində geniş istifadə olunur. İnformatika fənninin tədrisi üçün iki kompyuter kabinəsi fəaliyyət göstərir. Kabinələrin hər birində 12 dəst kompyuter qoyulmuş və şəbəkə sisteminə qoşulmuşdur. Dərs məşğələlərindən əlavə olaraq dekanlıq tərəfindən tərtib olunmuş qrafik əsasında bütün ixtisaslar üzrə tələbələr hər gün dərsdən sonra 12 nəfərlik qruplarla kabinələrdə sərbəst olaraq kompyuterlərdə məşğul olurlar. 2009-cu ilin iyun ayında instituta 1 ədəd elektron-interaktiv lövhə verilmişdir. Hazırda onların sayı 6-ya çatdırılmış və yeni tədris ilindən bütün fənlər üzrə dərslərin bir hissəsi bu lövhələrdən istifadə olunmaqla tədris olunacaqdır.

Naxçıvan Müəllimlər İnstitutuna göstərilən dövlət qayğısı bu gün də davam etdirilir. İnstitut kollektivi çalışır ki, onlara göstərilən qayğıdan bəhrələnərək ölkəmizə və muxtar respublikaya savadlı və səriştəli yetkin kadrlar hazırlanmasında üzərlərinə düşən şərəfli işi layiqincə yerinə yetirsinlər.

Ə.CABBAROV

Respublika.- 2010.- 25 avqust.- S. 2.