Qusar yeni dəsr ilinə hazırdır

Ötən dərs ilinin uğurları ürəkaçan olmuşdur. Təhsilin şəbəkəsi genişləndirilərək Əvəcuq və Suvacal kənd əsas məktəbləri orta məktəb kimi fəaliyyətə başlamışdır. 2009-2010-cu tədris ilində ümumi orta təhsil kursu üzrə buraxılış imtahanlarında iştirak etmiş 1472 nəfərdən 1303 nəfəri ümumi orta təhsil haqqında şəhadətnamə almış, XI siniflər üzrə imtahanlarda iştirak etmiş 1152 nəfərdən 921 nəfəri tam orta təhsil haqqında attestat almışdır. Məzunlardan 450 nəfəri ali məktəblərə qəbul olunmaq üçün ərizə vermişdir. Şagirdlərimizin buraxılış imta-hanlarında göstərdiyi nəticə ötən illə müqayisədə yüksək olmuşdur. Ali məktəblərə qəbulun nəticələrinə görə, 108 nəfər məzunumuz tələbə adını qazanmışdır. Bu, ötənilki nəticə ilə müqayisədə 14 nəfər çoxdur. Qeyd edim ki, ali məktəblərə qəbul olunan və 500-dən yuxarı bal toplayan məzunların sayı ilbəil artır. Builki məzunlardan 16 nəfəri 500-dən yuxarı, 3 nəfər məzun isə 600 baldan yuxarı nəticə göstərmişdir. Yüksək bal toplayanlar şəhər 1, 2 saylı və Hil kənd orta məktəbinin şagirdləridir.

Məlumdur ki, istedadlı şagirdlərin aşkara çıxarılmasında fənn olimpiadaları müstəsna əhəmiyyət kəsb edir. Bunu nəzərə alaraq olimpiadaların məktəb və rayon turlarının son dərəcə obyektiv keçirilməsinə xüsusi diqqət yetirmişik. Nəticədə, Yuxarı Zeyxur kənd orta məktəbinin IX sinif şagirdi Ağacanov Canmirzə olimpiadanın respublika turunda kimya fənni üzrə III yeri tutmuş, şəhər 1 saylı orta məktəbin XI sinif şagirdi İsmayılov Sərxan ulu öndər Heydər Əliyevin anadan olmasının 87-ci ildönümü münasibətilə keçirilmiş respublika inşa müsabiqəsində qalib çıxaraq, qiymətli hə-diyyə ilə mükafatlandırılmış, ona xaricə turist səfəri üçün pulsuz yollayış verilmişdir. İlk dəfə keçirilən elektron təhsil və innovativ müəllim respublika müsabiqəsində şəhər internat məktəbinin müəllimi Mülki Babaxanov iki nominasiya üzrə qalib gələrək, I və II yerləri tutmuş, ona iki ədəd "Notebook" hədiyyə verilmişdir. Şəhər 5 saylı orta məktəbin X sinif şagirdi Bəyova Anelya sərhəd qoşunlarının 90 illiyinə həsr olunmuş inşa müsabiqəsində III yeri tutaraq, Azərbaycan Respublikası Sərhəd Xidmətinin rəhbərliyi tərəfindən pul mükafatına layiq görülmüşdür. Respublika Prezidentinin müvafiq sərəncamı ilə şəhər 1 saylı orta məktəbin müəllimi Rübabə Üzdənovaya təlimdə yüksək nailiyyətlərinə görə "Əməkdar müəllim" fəxri adı verilmişdir.

Hazırda rayonumuzda yeni dərs ilinə ciddi hazırlıq görülür. 2010-2011-ci tədris ilində rayonun ümumtəhsil məktəblərinin I siniflərinə 1179 nəfər şagird qəbul ediləcəkdir. Ümumilikdə isə, rayonun 49 orta, 22 əsas və 19 ibtidai məktəbində 15077 nəfər şagird təhsil alacaqdır ki, onların da təlim-tərbiyəsi ilə 2000 nəfərdən çox müəllim məşğul olacaqdır. Rayonda 13 məktəbəqədər təhsil müəssisəsi fəaliyyət göstərir. Bu müəssisələrdə 550 uşaq ictimai tərbiyə və təhsillə əhatə olunmuşdur. Həmin təhsil müəssisələrində 68 nəfər pedaqoji işçi çalışır. Bu tədris ilində 150 nəfər bağça tərbiyəsi almış uşaq məktəbə yola salınacaqdır.

"2008-2010-cu illərdə Azərbaycan Respublikasında təhsil sisteminin informa-siyalaşdırılması üzrə Dövlət Proqramı" çərçivəsində rayonumuzun məktəblərində fəaliyyət göstərən pedaqoji işçilərin informasiya və kommunikasiya texnologiyalarının tətbiqi sahəsində peşəkarlıq səviyyəsinin artırılması istiqamətində təlim-treninqləri həyata keçirilmişdir. Təqdirəlayiq haldır ki, bu təlimlər əvvəllər təlimçi kimi xüsusi kurs keçmiş yerli kadrlar tərəfindən aparılır. Bu günə kimi 600 nəfərdən yuxarı müəllim həmin təlim kurslarından keçmişdir ki, bu da rayon üzrə ümumi müəllimlərin 30 faizindən çoxdur. Hazırda kurslar müvəffəqiyyətlə davam etdirilir. Bundan əlavə, təlimi Azərbaycan və rus dillərində olan məktəblərin I siniflərində dərs deyəcək ibtidai sinif müəllimləri üçün də təlim kursları təşkil etmişik.

Ümumtəhsil məktəblərinin maddi-texniki bazasının gücləndiriməsi, yeni dərs ilinə hazırlanması istiqamətində də çox iş görülmüşdür. Məktəblərimizdə təmir işləri artıq başa çatmaq üzrədir. Şəhər 2, Köhnə Xudat, Bədişqala, Avaran, Kuzun-qışlaq kənd orta, Hil-Sirt, Yeni Tahircal, Çubuqlu, Üzdənoba kənd əsas və Sudur-palasa kənd ibtidai məktəbləri yerli büdcə hesabına əsaslı təmir olunmuşdur. Şəhər 4 saylı orta məktəb üçün Dövlət Neft Şirkəti tərəfindən yüksək keyfiyyətlə inşa olunmuş 340 yerlik müasir məktəb binası yeni dərs ilində şagirdlərin istifadəsinə veriləcəkdir.

Məktəblərimizin fənn kabinetləri və sinif otaqları yeni-yeni əyani və texniki vasitələrlə zənginləşdirilmişdir. 294059 ədəd müxtəlif adlı dərslik gətirilərək məktəblərə paylanmışdır. Bir sözlə, rayonumuzun məktəbləri yeni dərs ilinə tam hazırdır.

Niftəli FƏRZƏLİYEV

Respublika.- 2010.- 28 avqust.- S. 3.