Canım Türkiyə

Şirin layla deyən dilin dilimdi,

Yaşayıb-yaradan elin elimdi.

İgidlər yurdudu Ana torpağın;

Yanıb şölə saçır nurlu çırağın.

Haqqın qüdrətidir sənin dayağın,

Göylərə baş çəkir uca bayrağın!

Özünə güvəncdir iti yarağın,

Hünər meydanından gəlir sorağın.

Yolun ədalətin—Tanrı yoludur,

Məsləkin, amalın, eşqin uludur!

Dağ kimi həmişə ucadır başın,

Canında qeyrət var burda hər daşın.

Ucaldır adını hər oğlun, qızın,

Parlayır səmada tale ulduzun.

Yoluna nur saçır əzəldən bəri

Böyük Atatürkün vəsiyyətləri.

Bu yoldan heç zaman dönən deyilsən,

Göydə Günəş kimi sönən deyilsən.

Birliyin əzmindən qüvvət alırsan,

Ürəkdən-ürəyə körpü salırsan.

Qəlbləri bir canda birləşdirəndə

Tanrının xilqəti görünür səndə!

Hər qarış torpağın sərvətdi, vardı,

Qoynunda yaşayan nə bəxtiyardı...

Sənsən insanlığın həyat meracı,

Başına qoymusan qardaşlıq tacı!

Böyük türk dünyası sənin varındı,

Xalqa sədaqətin, etibarındı...

Əzəldən belədi sənin diləyin,

Dostluqla yeyilir halal çörəyin.

Sən möhkəm dostluğun təməl daşısan

Nə qədər füsunkar, gözəl diyarsan.

Həyatın mənası gülür gözündə,

Xoşbəxtlik rəmzi var sənin üzündə...

Zəkan işıqlıdır, hikmətin dərin;

Gözündə ucasan bütün bəşərin!

Dünyanın ən ali məclislərində

Layiqli liderlik edirsən sən də!

Tanrı vergisidi sənin varlığın,

Aləmə bəllidir fədakarlığın!

Tərəqqi, yüksəliş gücü var səndə,

Qüdrətli ölkəsən Yer kürəsində...

Sən zəfər soraqlı şəfəqli dansan,

Tanrının xilqəti—nəqşi-cahansan!

Ay mənim sevincim, canım Türkiyə,

Şöhrətim, şərəfim, şanım Türkiyə!..

Əjdər QİYASLI

Respublika.- 2010.- 29 avqust.- S. 4.