Göyçay: dinamik inkişaf uğurla sabaha aparır

Regionların sosial-iqtisadi inkişafı

"Göyçay rayonunun çox böyük potensialı vardır. Kənd təsərrüfatının, digər sahələrin, emal sahələrinin inkişafı üçün lazımi tədbirlər görülür. Mən ümid edirəm ki, Göyçay həmişə olduğu kimi, növbəti illərdə də Azərbaycanda iqtisadi inkişaf sahəsində ön sıralarda olacaqdır. Bütün bu işləri görmək üçün, əlbəttə ki, rayon ictimaiyyəti səfərbər olunmalıdır. Bu səfərbərlik vardır və mən ümid edirəm ki, Göyçayın uğurlu inkişafı növbəti illərdə də davam edəcəkdir".

İlham ƏLİYEV,

Azərbaycan Respublikasının Prezidenti

Rayonun iqtisadiyyatı da, sosial həyat tərzi də qədim tarixi köklərə söykənir. Bu köklərdən bəhrələnərək bütün sahələr dinamik inkişaf etdirilmiş, daha uğurlu sabahlar üçün möhkəm baza yaradılmışdır. Son illərin tərəqqisi də bunu təsdiqləyir. Bu gün Göyçayda icra orqanlarından başlayaraq, bütün strukturlarda rayonun yüksəlişi naminə qayğıkeşlik, təşəbbüskarlıq əhval-ruhiyyəsi hökm sürür.

Elə buna görə də Göyçay hər gün yeniləşir.

Rayon icra hakimiyyətinin başçısı Mənsur Məmmədov söhbət əsnasında bildirdi ki, rayonda əhalinin sosial həyat tərzinin yaxşılaşdırılmasında böyük dönüş yaranmışdır. Tikinti-quruculuq, abadlıq işləri əvvəlki illərlə müqayisədə qat-qat yüksəlmişdir. Kənd əhalisinin içməli su ilə təminatının yaxşılaşdırılması məqsədi ilə içməli su mənbəyi olmayan 18 kənd yaşayış məntəqəsində Ekologiya və Təbii Sərvətlər Nazirliyi tərəfindən sutəmizləyici qurğuların inşa edilməsi planlaşdırılmışdır. İndiyə kimi 10 kənddə bu qurğuların quraşdırılması üçün torpaq sahələri seçilmiş, Çaxırlı və Bəydöül kəndlərində isə bu istiqamətdə tikinti işlərinə başlanmışdır.

Rabitə və poçt xidmətinin maddi-texniki bazasının möhkəmləndirilməsi istiqamətində müəyyən tədbirlər görülmüşdür.

7 kənddə rabitə sisteminin əsaslı şəkildə yenidən qurulması üçün hazırlıq işləri aparılmış, Qaraxıdır kəndində ATS avadanlıqlarının quraşdırılması üçün yeni bina inşa edilmiş, yeni ATS quraşdırılmışdır. Digər 6 kənddə də yeni binaların inşa edilməsi və elektron ATS-in quraşdırılması nəzərdə tutulmuşdur.

Əhalinin elektrik enerjisi, təbii qaz və digər yanacaq növləri ilə təchizatının yaxşılaşdırılması sahəsində bir sıra işlər görülmüşdür. İndi əhali elektrik enerjisi, şəhər əhalisi təbii qazla fasiləsiz təchiz olunur. Kənd yaşayış məntəqələrinin təbii qazla təminatının bərpa edilməsi üçün də tədbirlər görülür. "Azəriqaz" İstehsalat Birliyinin Layihə İnstitutu tərəfindən rayon mərkəzinə bitişik kəndlərin qaz xətlərinin yenidən qurulması üçün layihə-smeta sənədləri hazırlanır. Qaraməryəm bölgəsi kəndlərinin təbii qazla təminatının bərpa edilməsi üçün layihə-smeta sənədləri hazırlanması isə başa çatdırılmış və podratçı təşkilata təqdim edilmişdir. Cəyirli, Kürdəmiş və Türkmən kəndlərini təbii qazla təmin edən 6,5 kilometr uzunluğunda orta təzyiqli daşıyıcı kəmərin tikintisi başa çatdırılmaq üzrədir. Qarabaqqal və Hacalıkənd kəndlərində kənddaxili qaz xətlərində bərpa işləri aparılır.

Şəhərin abadlaşdırılması və yaşıllaşdırılması, küçə və meydanların yenidən qurulması istiqamətində xeyli işlər görülmüşdür. 150 kvadratmetrə yeni asfalt örtüyü salınmış, səkilərə 1200 kvadratmetr üzlük örtüyü vurulmuş, yeraltı keçid əsaslı təmir edilmiş, 50 mindən artıq ağac əkilmişdir. 20-yə yaxın yaşayış binasının üst örtükləri yeniləri ilə əvəz edilmişdir. İctimai binaların ümumi istifadədə olan daxili su təchizatı və kanalizasiya sistemlərinin yenidən qurulması işləri başa çatdırılmaq üzrədir.

Azərbaycan Respublikasının Prezidenti cənab İlham Əliyevin ölkədə sahibkarlığın inkişafının stimullaşdırılması ilə bağlı gördüyü işlər rayonda özəl sektorun dinamik inkişafına güclü təkan vermişdir. Yerli sahibkarlar və iş adamları rayonun sosial-iqtisadi inkişafının sürətləndirilməsində, əhalini narahat edən problemlərin həllində fəal iştirak edirlər. İnvestorların rayona cəlb edilməsi üçün əlverişli mühitin yaradılmasının nəticəsidir ki, ilin ötən dövründə Konserv, Süd və Kərpic zavoduna, Broyler Quşçuluq fabrikinə yüz minlərlə manat investisiya qoyulmuşdur. Sahibkarlığa Kömək Milli Fondundan alınmış güzəştli kredit hesabına maliyyələşdirilən ən böyük obyekt "Paralel" MMC-nin soyuducu anbar kompleksində tikinti işləri sürətlə aparılır və cari ilin meyvə mövsümünə qədər soyuducu anbar kompleksinin istifadəyə verilməsi nəzərdə tutulur.

Göyçayın yaxın bir neçə ildə təhsil, səhiyyə və mədəniyyət müəssisələrinin maddi-texniki bazasının möhkəmləndirilməsi istiqamətində bir sıra tədbirlər həyata keçirilməsi nəzərdə tutulmuşdur. Qəza vəziyyətində olan məktəblər üçün yeni binaların inşası üçün hazırlanmış xüsusi proqrama müvafiq olaraq Şıxbəy kəndində 180 yerlik məktəb binasının tikintisi üçün torpaq sahəsi seçilmiş, məktəb binasının layihələndirilməsi üçün müvafiq texniki şərtlər toplanmış və hazırda binanın layihələndirilməsi işləri aparılır. 360 yerlik Qara-məryəm kənd orta məktəbinin əsaslı təmiri və yenidən qurulması işlərinə başlanılmışdır. Yaponiya hökumətinin dəstəyi ilə rayon təcili və təxirəsalınmaz tibbi yardım stansiyasının əsaslı yenidən qurulması üçün hazırlıq işləri görülür. Xalq şairi Rəsul Rzanın ev-muzeyi aparılan əsaslı təmir işlərindən sonra istifadəyə verilmişdir.

Göyçay aqrar rayonudur. Bu sahənin inkişafında da diqqəti cəlb edən cəhətlər çoxdur. Məsələn, cari ilin birinci yarısında rayon üzrə kənd təsərrüfatında ümumi məhsulun həcmi 27 milyon 473 min 500 manat olmuşdur ki, bu da ümumi məhsul istehsalının 38,3 faizini təşkil etməklə 2009-cu ilin müvafiq dövrünə nisbətən 2,6 faiz çoxdur. Taxılçılıqda yüksək məhsuldarlıq əldə edilməsi məqsədi ilə toxumçuluq sahəsinin inkişaf etdirilməsinə xüsusi diqqət yetirilir. Bu məqsədlə rayonda indiyədək 8 özəl toxumçuluq təsərrüfatı yaradılmışdır. Əkilən torpaqların suvarma suyu ilə təminatının yaxşılaşdırılması və münbitliyinin artırılması üçün də müəyyən tədbirlər həyata keçirilmişdir.

Rasim AMANOV

Respublika.- 2010.- 7 oktyabr.- S. 6.