Bərdədə tələbə adını qazanan məzunlarla görüş keçirilmişdir

Yeni dərs ili qarşısında

Bu il bərdəli məzunlar respublikanın ali məktəblərinə qəbul imtahanlarında əldə etdikləri yüksək göstəriciləri ilə fərqlənmişlər. 268 nəfər məzun ölkənin müxtəlif ali məktəblərinə qəbul olmuşdur. Bu da əvvəlki illərlə müqayisədə ən yaxşı nəticə kimi diqqəti cəlb edir. Daha fərəhlisi budur ki, tələbə adını qazanan gənclərdən 53 nəfəri 500-dən yuxarı bal toplamışdır. 28 nəfər isə 600-dən çox bal toplayaraq qədim Bərdənin adını daha da ucaltmışlar.

Bu günlərdə yüksək bal toplayan tələbələrlə rayon ictimaiyyəti nümayəndələrinin görüşü keçirilmişdir. Əvvəlcə tələbə adını qazanan gənclər və qabaqcıl təhsil işçiləri ümummilli liderimiz Heydər Əliyevin abidəsi önünə gül-çiçək dəstələri düzmüş, onun nurlu xatirəsini ehtiramla yad etmişlər.

L.Səfərov adına şəhər Mədəniyyət evində keçirilən görüşdə rayon icra hakimiyyətinin başçısı İlham Ağayev gəncləri qazandıqları yüksək nailiyyətlər münasibətilə təbrik edərək onların valideynlərinə göz aydınlığı vermiş, müəllimlərinə isə minnətdarlığını bildirmişdir.

Haqlı olaraq qeyd olunmuşdur ki, gənc nəslin təlim-tərbiyyəsinə, dövlət qayğısı, milli təhsilimizin əsaslı inkişafı, ulu öndər Heydər Əliyevin adı ilə bağlıdır. Bu gözəl ənənə bu gün də uğurla davam etdirilir. Ölkə Prezidenti cənab İlham Əliyevin siyasətində təhsilə və gənclərə dövlət qayğısı mühüm yerlərdən birini tutur. Bununla yanaşı təhsilin maddi-texniki bazasını möhkəmləndirilməsi, yeni və müasir məktəb binalarının inşa olunması, istedadlı uşaqların himayəyə götürülməsi Heydər Əliyev fondunun həyata keçirdiyi "Yeniləşən azərbaycana yeni məktəblər layihəsi" bu diqqət və qayğının ən bariz nümunəsidir.

RİH başçısı İ.Ağayev bu gün tələbə adını qazanan gənclərə elmə, biliyə daha dərindən yiyələnməyi, yüksək ixtisaslı kadrlar kimi yetişməyi, harada olurlarsa-olsunlar bərdəli adını həmişə uca tutmağı tövsiyyə etmişdir.

Görüşdə rayon Təhsil şöbəsinin müdiri Rahilə İsmayılova çıxış edərək rayonda təhsilin bu günkü vəziyyəti, qəbul imtahanları zamanı əldə olunan göstəricilər barədə ətraflı məlumat vermişdir. Belə bir faktı önə çəkmişdir ki, ölkə Prezidentinin xeyir-duası ilə fəaliyyətə başlayan və görkəmli alim, akademik Zərifə xanım Əliyevanın adını daşıyan texniki fənnlər təmayüllü məktəb-liseyin bu uğurlarda daha çox payı vardır. Belə ki, bu il həmin məktəbdən 47 nəfər məzun ölkənin müxtəlif ali məktəblərinə qəbul olunmuşdur. Diqqəti cəlb edən mühüm fakt budur ki, həmin məktəbin məzunlarından 10 nəfəri qəbul imtahanlarından 600-dən çox bal toplamışdır. Bu, respublikanın orta ümumtəhsil məktəbləri arasında ən yüksək göstəricilərdən hesab olunur.

Təhsil şöbəsinin müdiri belə bir faktı da önə çəkdi ki, yüksək bal toplayan məzunlarımızın sırasında kənd məktəblərini bitirənlər də üstünlük təşkil edir. 685 bal toplayaraq rayon üzrə ən yüksək göstəriciyə nail olan məzun məhz Kürdborakı kənd orta məktəbinin yetirməsidir. Razılıq hissi ilə qeyd olundu ki, şəhər 2 və 3 saylı orta məktəblərin məzunları da qəbul imtahanlarında xüsusilə fərqlənmişdir.

Ölkə Prezidentinin müvafiq sərəncamına uyğun olaraq keçirilən "İlin ən yaxşı müəllimi" müsabiqəsinin qalibi -Akademik Zərifə Əliyeva adına texniki fənnlər təmayyüllü məktəb-liseyin müəllimi Püstə Həsənova çıxış edərək ölkəmizdə, eləcə də rayonumuzda təhsilin inkişafına, məktəblərin maddi-texniki bazasının möhkəmləndirilməsinə göstərilən diqqət və qayğıdan danışmış, bu şəraiti yaradanlara bütün təhsil işçiləri adından minnətdarlığını bildirmişdir.

Ən yüksək bal toplayaraq tələbə adını qazanan Hüseyn Məlikli, valideynlər adından Habil Qəhrəmanov çıxış edərək gənclərin hərtərəfli inkişafına, müstəqil dövlətimizin layiqli vətəndaşları kimi yetişməsinə, azərbaycanlı gənclərin dünya meridianlarında layiqincə təmsil olunmalarını göstərdiyi diqqət və qayğıya görə dövlətimizin başçısı cənab İlham Əliyevə dərin minnətdarlıqlarını bildirdilər.

Görüşdə rayon icra hakimiyyətinin başçısı İlham Ağayev qəbul imtahanlarında ən yüksək bal toplayaraq tələbə adını qazanan gənclərə qiymətli hədiyyələr təqdim etmişdir. "Qarabağ" xalq çalğı alətləri ansanbılının üzvləri isə onları maraqlı konsert proqramı ilə təbrik etmişlər.

Bu unudulmaz görüş həm tələbə adını qazanan gənclərin, həm onların valideynlərinin, həm də müəllimlərin qəlbində dərin iz buraxmışdır.

Salman ALIOĞLU

Respublika.- 2010.- 1 sentyabr.- S. 3.