Uzaq Zeyvə yaxın olacaq...

Qədim Şabran torpağında bir yurd yeri də Zeyvə kəndidir. Sıx meşələrin, yaşıl ormanların qoynunda binə-bölgə bağlamış bu ucqar dağ kəndi rayon mərkəzindən təxminən 30-35 kilometr uzaqlıqdadır. Yaşı az qala VI-VII əsrlərə gedib çıxan Zeyvə kəndinin adının mənasını araşdırıcılar "künc, bucaq, guşə" (cəmiyyətdən uzaq) kimi yozurlar.

Bəlkə də bir vaxtlar elə beləcə də olub. Lakin uzaq Zeyvənin adı əsrlərin uzaqlığında Avropa ölkələrinə yaxın olub...

Yeddinci yüzilliyin salnaməçisi, alban tarixçisi Musa Kalankatuklu "Ağvan tarixi" əsərində yazır ki, Azərbaycanın şimal hissəsində ipək parçalar və müxtəlif rəngli parlaq xalçalar hazırlanır.

Toxunduğu kəndin adı ilə məşhur olan "Zeyvə" çeşnili xalçalar da Avropa rəssamla-rının bir sıra məşhur tablolarında zinət vasitəsi kimi geniş istifadə edilib.

XV əsr intibah dövrünün görkəmli holland rəssamı Hans Memlingin və elə həmin əsrdə yaşamış holland boyakarlıq sənətinin banilərindən hesab edilən Yan Van Eykin tablolarında Zeyvə xalıları təsvir edilib.

Rayonun bu ucqar dağ kəndi gözdən uzaq düşdüyündən əvvəllər qayğıya, diqqətə də möhtac olub. Zeyvə kəndi 5-6 para kəndi əhatə edən Pirəbədil inzibati ərazi dairəsinin tərkibində olub. Yolların bərbadlığı, gediş-gəlişin çətinliyi bu kəndə lazımi diqqət yetirməyə bir elə imkan verməyib.

Ölkəmizin hər bir bölgəsinə, az qala irili-xırdalı hər bir kənd-kəsəyinə möhtərəm Prezidentimiz cənab İlham Əliyevin böyük diqqət və qayğısı indi bu kənddən də yan keçməyib.

—Prezident İlham Əliyevin imzaladığı 2 aprel 2010-cu il tarixli Azərbaycan Respublikası Qanununa əsasən rayonumuzun inzibati ərazi bölgüsündə qismən dəyişikliklər edilmiş, Pirəbədil kənd inzibati ərazi dairəsi tərkibindən ayrılan Zeyvə və Kilvar kəndləri mərkəzi Zeyvə kəndi olmaqla Zeyvə kənd inzibati ərazi dairəsi yaradılmışdır. Əlbəttə, bu da dövlət başçımızın ölkənin hər bir vətəndaşı kimi Zeyvə və Kilvar sakinlərinin də sosial qayğılarının həllinə, maddi rifah hallarının daha da yaxşılaşdırılmasına diqqətinin yeni bir nümunəsidir! - Zeyvə yerli kənd sakinləri ilə açıq havada keçirilən növbəti görüşündə öz çıxışına Şabran Rayon İcra Hakimiyyətinin başçısı Novruz Novruzov bu sözlərlə başladı. Sonra rayon icra hakimiyyətinin başçısı qeyd etdi ki, bəlkə də zeyvəlilər bir vaxtlar "gözdən uzaq" olmaları ilə şikayətlənməkdə haqlı idilər. Artıq son illər kəndin xeyli abadlaşması, kənd sakinlərinin özləri üçün yeni fərdi mənzil tikintilərini genişləndirməsi indi Zeyvənin də diqqət mərkəzində olmasından xəbər verir. Uzun illər idi ki, kənd orta məktəbi darısqal, yararsız bir binada yerləşirdi. Heydər Əliyev Fondunun dəstəyi ilə "Yeniləşən Azərbaycana yeni məktəb" layihəsi çərçivəsində yaraşıqlı məktəb binası artıq öz qapılarını kənd uşaqlarının üzünə açıb.

Kənd sakinlərindən birinin görüşdə dilə gətirdiyi fakt Novruz müəllimi də çox sevindirdi, məmnun etdi; son üç ildə məktəbə gələn şagirdlərin sayı hər il orta hesabla 6-7 faiz artır. Deməli, müstəqil Azərbaycanımızın sabahkı qurucuları olan gənc nəslin sayı bu kənddə də artır.

Çıxış edənlər problemlərə də toxundular. Çayqovuşan adlı yerdə asma körpüyə ehtiyac var, zeyvəlilər də öz evlərində təbii qazın yanacağı günü səbirsizliklə gözləyirlər.

Rayon icra hakimiyyətinin başçısı Novruz Novruzov bu problemlərin də həll ediləcəyini, kəndin 2012-ci ildə qazlaşdırılacağının nəzərdə tutulduğunu bildirdi. Bu ilin isti iyul-avqust aylarında Zeyvə meşələrindəki yanğınlara toxunan icra hakimiyyəti başçısı kənd camaatını ehtiyatlı olmağa çağırıb dedi:

—Möhtərəm Prezidentimiz cari ili "Ekologiya ili" elan edib. Dövlət başçımızın hər bir çağırışına şabranlılar həmişə layiqincə cavab verib. Təbiətin yaşıl ciyəri olan meşələrimizi təkcə qorumaqla kifayətlənməməliyik, hərə bir ağac əkib yaşıllıqları daha da çoxaltmalıdır.

Beləcə, rayon rəhbəri ilə kənd sakinlərinin dialoqu işlərin xeyrinə, insanların sosial, məişət qayğılarının, problemlərinin həlli istiqamətində faydalı şəkildə davam etdi.

Şabran Rayon icra Hakimiyyətinin başçısı Novruz Novruzov görüşünün sonunda kənd adamlarına təzə bir şad xəbər də verdi: rayon mərkəzi Şabrandan Zeyvə kəndinəcən olan 34 kilometr yola asfalt döşənməsi ilə bağlı Nazirlər Kabinetinə təklif verilib və yaxın vaxtlarda bu layihə reallaşdırılacaq.

Bax, o zaman uzaq Zeyvə də daha yaxın olacaq.

Aydın TAĞIYEV

Respublika.- 2010.- 3 sentyabr.- S. 6.