Tarixlər şahidi cavan Şabran...

Regionların sosial-iqtisadi inkişafı

Az qala iki min iləcən gəlimli-gedimli olan qədim Şirvan yolunun üstündə binə-bölgə bağlamış, yaşı III-V əsrlərə gedib çıxan ulu Çıraqqala, əzəmətli Şabran rayonu, çox təəssüflər ki, uzun müddət yolçuların nəzərində ölkənin şimalına yolüstü ötüb keçilən bir bölgə təəssüratı yaradıb. Böyük bir əraziyə, 110 min hektar torpaq sahəsinə, bir tərəfi Xəzər, bir tərəfi isə dağlar, meşələr-bir sözlə, zəngin təbiətli Şabran, əslində, güclü iqtisadi potensiala malikdir...

Şabran Rayon İcra Hakimiyyətinin başçısı Novruz Novruzov bizimlə söhbətində vurğuladı ki, mohtərəm Prezidentimiz cənab İlham Əliyevin imzaladığı regionların sosial-iqtisadi inkişafı dövlət proqramları bütövlükdə respublikamızın dinamik inkişafında mühüm rol oynadığı kimi, bizim Şabranın da tərəqqisində böyük təkan oldu.

Bu ilin avqust ayının 12-si şabranlıların yaddaşında əziz, unudulmaz bir tarix kimi qalacaqdır. Həmin gün Azərbaycan Respublikasının Prezidenti cənab İlham Əliyev Bakı-Rusiya Federasiyası sərhədi yolunun üzərində yerləşən Şabran dairəvi yolu və körpü kompleksinin açılışında iştirak etdi.

Uzun illər beynəlxalq əhəmiyyətli bu magistral yol Şabran şəhərinin mərkəzindən keçməklə təkcə ekologiyanı pozmur, həm də qəzalara, tıxaclara səbəb olurdu. Bu yolun dörd kilometri Şabran şəhərini iki yerə ayırırdı. Əlbəttə, bu da şəhər sakinlərində müəyyən narahatlıqlar yaradırdı. İndi Bakı-Rusiya Federasiyası sərhədi yolunun üzə-rində yerləşən Şabran dairəvi yolu və körpü kompleksinin istifadəyə verilməsi ilə magistral yol rayon mərkəzindən çıxarılaraq şəhərin üstündən dağların qoynu ilə uzunluğu 540 metr, eni və hündürlüyü 23 metr olan körpü ilə keçib gedir.

-Bu il aprel ayının sonları, mayın əvvəllərində on rayonun icra hakimiyyəti başçıları ilə birgə mən də isveçrədə oldum, - dedi. Məlumdur ki, möhtərəm Prezidentimiz dünyaya, Qərbə inteqrasiyada qabaqcıl təcrübənin, mütərəqqi ənənələrin öyrənilib tətbiq edilməsinə böyük önəm verir və Avropanın ən inkişaf etmiş ölkələrindən olan İsveçrəyə səfərimizin də məqsədi elə bu idi. Sonra da Novruz Novruzov qürurla: —İsveçrədə heyrət ediləsi çox şey var, o cümlədən rahat şose yolları, nəhəng körpülər. Ancaq onlara baxdıqca, dövlət başçımız cənab İlham Əliyevin sərəncamları ilə son illərdə ölkəmizin paytaxtında tikilən çoxsaylı yeraltı keçidlər, körpülər, mərtəbəli yollar, elə biri bizim Şabran rayonundan keçib gedən betondan tikilmiş, çox geniş Bakı-Rusiya Federasiyası magistral yolu, respublikamızda hələ ki, ən böyük-üçmərtəbəli dayaqlar üzərində tikilmiş 16 aşırımdan ibarət uzunluğu 540 metr olan körpü gözlərim önündə canlanırdı, - deyə sözünü tamamladı. - Həm də fərəhlənirdim ki, bizdəki tikililər burada gördüklərimdən daha qiymətli inşaat materialları ilə üzlənib, daha yaxşı işıqlandırılıb, memarlıq elementləri də onlardakından zəngindir.

Möhtərəm Prezidentimiz İlham Əliyevin apardığı uğurlu iqtisadi siyasətin nəticəsidir ki, Şabran rayonunda son bir neçə ildə kərpic, üzüm emalı, meyvə-şirə zavodları tikilərək istifadəyə verilib, kiçik emal müəssisələri fəaliyyətə başlayıb, rayonda quşçuluq artıq sənaye səviyyəsinə çatdırılıb. Bunların da nəticəsində yeni iş yerləri açılıb.

Heydər Əliyev Fondunun prezidenti, millət vəkili Mehriban xanım Əliyevanın təşəbbüsü ilə "Yeniləşən Azərbaycana yeni məktəb" proqramı çərçivəsində rayonda son illər 10 yeni məktəb tikilib, bir çox tədris ocaqları isə əsaslı təmir edilərək lazımi avadanlıqlarla təmin olunmuşdur.

Əhalinin sosial qayğıları da Şabranda uğurla həll edilir. Rayon mərkəzində hər cür tibbi şəraitə malik 8 çarpayılıq ikimərtəbəli xəstəxananın tikintisi davam edir, şəhərin qaz şəbəkəsi yeraltıpoljetilen borularla dəyişdirilir.

İqtisadi inkişafın nəticəsidir ki, son vaxtlar rayonda abadlıq-quruculuq işlərinin həcmi daha da genişlənib.

Son vaxtlar bu bölgəyə yolu düşənlər belə bir ifadəni işlətməyi xoşlayırlar: "Keçmiş Dəvəçinin təkcə adı dəyişməyib. İndi elə şəhər özü də Şabran adına layiq dəyişib, abadlaşıb, gözəlləşib".

Rayon statistika idarəsi müasir tələblərə cavab verən avadanlıqlarla təchiz edilmiş yeni ikimərtəbəli binaya köçüb, möhtəşəm mədəniyyət sarayı yaxın günlərdə öz qapılarını tamaşaçıların üzünə açacaq.

Şabranın mərkəzi bazarının girişində maraqlı memarlıq üslubunda qapı inşa edilib, ətraf abadlaşıb. İndi rayon mərkəzinə qonaq gələnlər az qala ünvanları qarışdırırlar. Axı, hər gün yeni bir tikinti, yeni bir bina...

Heydər Əliyev Mərkəzinin, eləcə də multimediya mərkəzinin, Qarabağ müharibəsi əlilləri və iştirakçıları üçün 16 mənzilli iki yaşayış evinin və digər obyektlərin isə inşası davam edir.

Şabran şəhərinin şimaldan giriş hissəsi indi sanki bu torpağın keçmişi ilə bugününü özündə birləşdirir, maraqlı kompozisiya yaradır.

Uzun səfər yollarından yorğun düşüb yerə çökmüş "Dəvə karvanı" kompleksi və ondan azca aralı isə müstəqil Azərbaycanımızın üçrəngli müqəddəs, əzəmətli bayrağının üstündə dalğalanacağı beşmərtəbəli orijinal bir qüllə.

Şəhərin mərkəzində artıq inşası başa çatmış mavi günbəzli bulaq-qüllə isə artıq Şabranın hüsnünə yeni bir yaraşıqdır.

Dahi Nizaminin müasiri olmuş XII əsr klassik Azərbaycan poeziyasının banilərindən olan ulu Xaqaninin misralarından boylanır qədim Şabran:

Mən məna yaradan tutiyəm, əfsus,

Şabran qalasında olmuşam məhbus...

Şirvanı "ana" bilib özünə "ata" hesab

etdiyi Təbrizdə ömrünü tamamlayan boyük Xaqaninin həyatının məşəqqətli yeddi ayı bu qədim torpaqda keçib. Şirvanşahlara xəyanətdə ittiham edilən Xaqani hökmdarın əmrilə Şabranda yeddi ay həbsdə yatmış, Öz məşhur "Həbsiyyə"sini buradakı zindanda yazmışdır. Maraqlıdır ki, poeziyamızda ilk zindan şeirləri də elə Şabran torpağında yaranıb. Xaqaninin özünə müəllim hesab etdiyi Fələki Şirvani də ondan bir qədər əvvəl Şabranda dustaq olmuş, burada yazdığı şeirləri "Həbsiyyə" adlandırmışdı.

Aradan neçə-neçə əsrlər keçəndən sonra, budur, Xaqani yenə də Şabran torpağına "qayıdır". Ancaq bu dəfə... Abidə kimi, heykəl kimi. Bir vaxtlar Şamaxıdan qolu bağlı dustaq kimi payi-piyada gəldiyi, sonra da qəlbində sonsuz ağrı-acı ilə ayrıldığı qədim Şabrana bu gəlişindən Xaqani bu dəfə məmnunluq duyacaq, "ana" bildiyi Şirvan torpağındakı incikliyini də unudacaq... Şabran Rayon İcra Hakimiyyətinin başçısı Novruz Novruzovun təşəbbüsü ilə rayon mərkəzində poeziyamızın klassiklərindən olan Xaqaninin yaxın vaxtlarda heykəli ucaldılacaq.

Heykəlin yaxınlığında milli ornamentlərlə inşa edilən dairəvi orijinal tikili "Poeziya evi" kimi nəzərdə tutulub. Bu poeziya evində yaxın vaxtlarda səslənəcək yerli ədəbi qüvvələrin, eləcə də paytaxtda yazıb-yaradan tanınmış qələm sahiblərinin şeirlərini ustad Xaqani də, yəqin ki, "eşidəcək" və ruhu şad olacaq!

Körpülər həm də həmişə rəmz hesab olunub. Bugünlə gələcək arasında bir rəmz! Açılışında cənab Prezidentimiz İiham Əliyevin iştirak etdiyi Şabran körpüsü də müstəqil respublikamızın bütün regionları kimi, bu gün dinamik inkişafda olan Şabranın daha inamlı gələcəyinin nişanələrindəndir.

Aydın TAĞIYEV

Respublika.- 2010.- 8 sentyabr.- S. 5.