Unudulmaz pedaqoq, nəcib insan

Yaşadığımız həyat özünün ziddiyətli, ağrılı-acılı günləri ilə yanaşı, hər birimizin yaddaşında həkk olunan hadisələri, sevincli anları ilə də əzizdir. Həyat bizə həm də ona görə əzizdir ki, onun bir-birinə oxşamayan maraqlı və qeyri-adi istedada malik insanları var. Xoşbəxtlikdən biz qələm sahiblərini digər peşə sahiblərindən fərqləndirən başlıca cəhət də belə insanları həyatda ictimaiyyətə tanıtmağımızdır. O kəslər xoşbəxtdirlər ki, sözün həqiqi mənasında, özündən sonra yaxşı ad, iz qoyub bu dünyadan gedirlər. Haqqında söhbət açdığımız Ediliya xanım Cəbrayılzadə kimi.

O, 1938-ci ildə Bakıda ziyalı ailəsində anadan olmuşdur. 1961-ci ildə Azərbaycan Politexnik İnstitutunun inşaat fakültəsini bitirdikdən sonra Layihə İnstitutunda, 1963-cü ildə isə Bakı Politexnik Texnikumunda çalışmışdır.

Ediliya Cəbrayılzadə 1964-cü ildə aspiranturaya daxil olmuş və 1968-ci ildə namizədlik dissertasiyasını uğurla müdafiə edərək texnika elmləri namizədi alimlik dərəcəsi almışdır. Onun tədqiqatlarının nəticəsi olaraq Gəncə alüminium zavodu tullantılarının ilk dəfə tikintidə istifadəsinin tətbiqi həyata keçirilmişdir. 1975-ci ildə indiki Azərbaycan Memarlıq və İnşaat Universiteti müstəqil ali məktəb kimi fəaliyyətə başlayanda Ediliya xanım fəaliyyətini burada — İnşaat materialları kafedrasında davam etdirmişdir. Onun "İnşaat materialları və məmulatları" fənnindən oxuduğu mühazirələri tələbələr həmişə maraqla dinləyər, laboratoriya məşğələlərinə həvəslə gələrdilər. O, tələbə və magistrlərin elmi-praktik konfranslarında, universitet Elmi Şurasının iclaslarında və digər kütləvi tədbirlərdə həmişə aktual mövzularda çıxış edib.

Ediliya Cəbrayılzadə 40-a yaxın elmi əsərin, 1 dərs vəsaitinin və müəlliflik şəhadətnaməsinin müəllifidir.

O, 35 il çalışdığı Azərbaycan Memarlıq və İnşaat Universitetinin təlim-tərbiyə sahəsi ilə yanaşı, Qadınlar Şurasının, sonralar isə YAP qadınlar təşkilatının sədri kimi onun ictimai həyatında da fəal rol oynamışdır. Respublikamız müstəqillik qazandıqdan sonra Ediliya xanım Azərbaycan qadınlarının I, II və III qurultaylarının nümayəndəsi, habelə qadın problemləri ilə bağlı bir çox yığıncaq və tədbirlərin iştirakçısı olmuşdur.

Ediliya xanım ömrünün 40 ilini, demək olar ki, respublikamızda qadın problemlərinin həllinə həsretmiş ziyalı qadındır. O, respublikamızın qadınlardan ibarət olan işçi qrupunun tərkibində ali və orta ixtisas məktəblərində təhsil alan tələbə qızların problemləri ilə yaxından tanış olar, onlara öz kömək əlini uzadardı.

Ediliya xanım öz fəaliyyətində qonşu ölkələrin qadın cəmiyyətləri ilə də sıx əlaqə yaratmağa səy göstərərdi: Bunu universitetimizin Qadınlar Şurası ilə Gürcüstan Texniki Universitetinin Qadınlar Şurası arasında yaranmış dostluq əlaqələri timsalında da aydın görə bilərdik. Bu gün ali təhsil müəssisələrində fəaliyyət göstərən qadın şuraları arasında bəlkə də yeganə bizim universitetin Qadınlar Şurasıdır ki, ən fəal iş aparır. Mərhum yazıçımız Əzizə Cəfərzadə hələ öz sağlığında demişdir ki, MDB ölkələri arasında ən fəal iş aparan qadın cəmiyyətləri Azərbaycandadır. Burada isə ən nümunəvi qadınlar təşkilatı Azərbaycan Memarlıq və İnşaat Universitetindədir. Şübhəsiz ki, bu da təşkilata rəhbərlik edən Ediliya xanımın yorulmaz əməyi və fəaliyyətinin nəticəsi idi.

Yeri gəlmişkən onu da xatırladaq ki, 1986-cı ildə universitetin tələbə qızlardan təşkil edilmiş "Sevinc" rəqs qrupu da Ediliya xanım Cəbrayılzadənin təşəbbüsü ilə yaradılmışdır. Hazırda bu qrupun adı "Buta"dır.

Ediliya xanımın əməyi hökumətimiz tərəfindən də layiqincə qiymətləndirilmişdir. Azərbaycan Respublikası Prezidentinin 21 aprel 2006-cı il tarixli Sərəncamına əsasən o, "Tərəqqi" medalı ilə təltif olunmuşdur.

Bu gün Azərbaycan Memarlıq və İnşaat Universitetində xatirəsi ehtiramla anılan İnşaat materialları kafedrasının dosenti, universitet Qadınlar Şurasının sədri, gözəl insan Ediliya xanım Cəbrayılzadə cismən aramızda olmasa da, ruhən bizimlədir.

Akif HACIYEV

Respublika.- 2010.- 9 sentyabr.- S. 4.