Milli bayrağımız bütün azərbaycanlıların qürur mənbəyidir

Dövlətimizin başçısı cənab İlham Əliyev milli-mənəvi dəyərlərimizə, mədəniyyətimizə, dövlət atributlarına daima xüsusi diqqət və qayğı göstərir. Gündən-günə inkişaf edən, gözəlləşən paytaxtımız Bakı şəhərinin ən görkəmli yerində, böyük bir ərazidə Dövlət Bayrağı Meydanının açılışı bunu bir daha əyani şəkildə təsdiq etmişdir. Bununla bağlı Prezident İlham Əliyev 2007-ci il noyabrın 17-də Bakıda Dövlət Bayrağı Meydanının yaradılması barədə, 2009-cu il noyabrın 17-də isə Dövlət Bayrağı Gününün təsis edilməsi haqqında sərəncamlar imzalamışdır. Eyni zamanda, 2007-ci il dekabrın 30-da Bakının Bayıl qəsəbəsində, Hərbi Dəniz Qüvvələrinin bazası yaxınlığında dövlət başçısının iştirakı ilə Dövlət Bayrağı meydanının təməli qoyulmuşdur. Bayraq qülləsinin layihəsini Amerika Birləşmiş Ştatlarının "Trident Support" şirkəti hazırlayıb. Azərbaycanın "Azenko" şirkəti isə layihənin icrasını həyata keçirib. Qısa zaman kəsiyində müasir standartlar səviyyəsində inşa olunən qüllənin açılış mərasimi sentyabrın 1-də olmuşdur. Mərasimdə iştirak edən Prezident İlham Əliyev Dövlət Bayrağı Meydanının əhəmiyyətindən danışıb. Eyni zamanda Azərbaycanın beynəlxalq aləmdə yüksək imicə malik ölkəyə çevrildiyini, dövlətin yürütdüyü siyasətin əsas məqsədinin respublikamızın daha da güclənməsinə xalqımızın firavan həyat sürməsinə yönəldiyini vurğulayıb.

"Bayraq Meydanı Bakının bir mədəniyyət mərkəzinə, Azərbaycanın bir siyasi mərkəzinə çevriləcəkdir. Ölkəmizin mərkəzi olan Bakı şəhərində belə möhtəşəm meydanın yaradılması doğrudan da böyük hadisədir" -deyən Prezident İlham Əliyev bir daha bəyan edib ki, bizim bayrağımız qurur mənbəyimizdir. Bizim bayrağımız canımızdır, ürəyimizdir!

Həqiqətən də bayrağımız tariximizin şanlı səhifəsidir. Ona görə ki, milli həmrəyliyin yaradılması və qorunmasında, ölkəmizin beynəlxalq müstəvidə tanınmasında milli bayrağımız mühüm əhəmiyyət kəsb edir.

Bu baxımdan Dövlət Bayrağı Meydanının qurulması tarixi hadisədir. 162 metr hündürlüyündə olan qüllə öz əzəməti və möhtəşəmliyi ilə hər kəsi heyran qoyur, və dünyanın ən yüksək bayraq qülləsi kimi qiymətləndirilir. Təsadüfi deyil ki, Ginnes dünya rekkordlar təşkilatı Azərbaycan Dövlət Bayrağı qülləsinin dünyada ən hündür bayraq qülləsi olduğunu təsdiq etmişdir. Eyni zamanda, Bayraq Meydanında qurulmuş Azərbaycan Respublikasının gerbi, dövlət himninin mətni, qızıl suyuna salınaraq bürüncdən hazırlanmış ölkəmizin xəritəsi meydana xüsusi gözəllik, füsunkarlıq verir.

Dövlət Bayrağı Meydanının açılışı dünya dövlətlərində yaşayan həmyerlilərimiz tərəfindən hədsiz sevinc və qürur hissi ilə qarşılanıb. ABŞ-da yaşayan həmyerlilərimiz Vaşinqtondakı Azərbaycan Ticarət və Mədəniyyət Mərkəzinə toplaşaraq, bu tarixi hadisəni mavi ekran qarşısında izləmişlər. Fərəhli haldır ki, dünyanın bir çox aparıcı və nüfuzlu telekanallar ölkəmizdə həyata keçirilən islahatları, yenidənqurma işlərini, sosial-iqtisadi inkişaf strategiyasını yüksək qiymətləndirirlər.

BBC telekanalı da ölkəmizdəki dinamik inkişafı yüksək qiymətləndirərək, Dövlət Bayrağı Meydanının açılışı haqqında süjet hazırlamışdır. Böyük Britaniyanın BBC telekanalının hazırladığı bu süjetdə dünyanın ən hündür bayraq qülləsinin məhz Azərbaycanda ucaldıldığı önə çəkilir, eyni zamanda bildirilir ki, Bakıda tikilən bayraq qülləsi Misirdəki Xeops piramidası və Londondakı "Londonun gözü" adlı mənzərə çarxından hündurdur. Süjetdə 2,5 min kvadratmetr ərazini əhatə edən qüllənin Ginnesin rekordlar kitabına düşdüyü barədə də məlumət verilib.

Dünyanın maraq dairəsinə çevrilən bu tarixi hadisə onu göstərir ki, daima yüksək zirvələrdə dalğalanan üçrəngli bayrağımız gün gələcək ki, işğal altında qalan torpaqlarımızda əzəmətlə dalğalanacaqdır.

Prezident İlham Əliyevin vurğuladığı kimi, "Azərbaycan ərazi bütövlüyünü bərpa edəndən sonra milli dövlət bayrağımız bu gün hələ də işğal altında olan torpaqlarda qaldırılacaqdır. Bizim bayrağımız Dağlıq Qarabağda, Xankəndidə, Şuşada dalğalanacaqdır. O günü biz hər an öz işimizlə yaxınlaşdırmalıyıq. Eşq olsun Azərbaycan bayrağına!

Yaşasın Azərbaycan!

Tural ASİFOĞLU

Respublika.- 2010.- 14 sentyabr.- S. 3.