Müəllim ömrü

Respublikamızın ən qabaqcıl məktəblərindən biri olan Bakı şəhər Osman Mirzəyev adına 190 saylı orta ümumtəhsil məktəbi zəngin tarixi ənənələri olan təhsil ocaqlarındandır. Bu gün müstəqil Azərbaycanın çiçəklənməsi naminə çalışan neçə-neçə görkəmli şəxsiyyətləri yetirən bu nümunəvi təhsil ocağının müəllim kollektivi yeni dərs ilinə hansı əhval-ruhiyyəylə başlayıb?

190 saylı orta məktəbin direktoru, respublikanın Əməkdar müəllimi, Bakıxanovlar nəslinin layiqli davamçısı Afət xanım Bakıxanova və təlim-tərbiyə işləri üzrə direktor müavini Qənirə xanım Əmircanova ötən illərin uğurlarından, yeni dərs ilinin qayğılarından danışırlar.

Afət xanım Bakıxanova:

-Hər yeni dərs ilinin başlanması ötənlərin təkrarı olsa da, bu təkrarda bir gözəllik, bir orijinallıq, bir paklıq, zəriflik var. İlk dəfə əlinə çanta götürüb sinif otağına qədəm qoyan ay işığı körpə balalar, həyəcan, intizar içində övladlarının yolunu gözləyən gənc analar, qayğılı, düşüncəli müəllimlər... Bu anları yaşamağın, bu hiss və həyəcanları görməyin özü bir ömürdü. Müəllim ömrü bax belədi!

Yeni dərs ili başlayıb. Qayğılıyam, sevinc içindəyəm. Nəzərdə tutduğumuz işlərin çoxunu həyata keçirmişik. Görüləsi işlərimiz də hələ çoxdur. Hər şeyin fövqündə isə heç şübhəsiz, şanlı keçmişi olan 190 saylı məktəbin adı-sanı, ucalığı dayanır.

Burda oxuyan hər bir şagird fəxr edir ki, o, 190 saylı məktəbdə oxuyur. Dərs deyən müəllim fəxr edir ki, 70 illik zəngin tarixi olan nümu-nəvi bir məktəbin müəllimidir. Mən fəxr edirəm ki, respublikanın Əməkdar müəllimi Sona xanım Tağıyeva kimi bir maarif fədaisindən sonra bu gözəl kollektivə rəhbərlik edirəm. Sona xanım Azərbaycan maarifinin sonuncu mogikanlarından idi. Biz ondan işə can yandırmağı, fədakarlığı, Vətən sevgisini öyrəndik.

Son vaxtlar dövlətimizin elmə, təhsilə, maarif və mədəniyyətə göstərdiyi diqqət və qayğısı hamı kimi məni də çox sevindirir.

Azərbaycanın birinci xanımı, YUNESKO-nun, İSESKO-nun xoşməramlı səfiri, Heydər Əliyev Fondunun prezidenti, millət vəkili Mehriban xanım Əliyevanın məktəb tikintisilə, mədəniyyətimizlə bağlı gördüyü möhtəşəm işlər qəlbimizdə qürur hissi doğurur. Bu, millətə, xalqın tərəqqisinə xidmət etmək nümunəsidir.

Həmişə dövlətimizin qayğısını hiss etmişik. Məktəbimiz beş ildir ki, əsaslı təmir olunub, yeni avadanlıqlarla, mebellə təmin edilib. Bəzi xırda işləri öz daxili imkanlarımız hesabına başa çatdırmışıq. Akt zalımız isə yenidən qurulur.

Görülən hər işin sonunda uğur dayanır. Məktəbimizi bu il bitirən məzunların böyük bir hissəsi yüksək balla ali məktəblərə qəbul olunmuşlar. 2 nəfər 600-dən, 10 nəfər isə 500-dən yuxarı bal toplamışdır.

10 nəfər məzunumuz müxtəlif ölkələrin ali məktəblərinə qəbul olunmuşdur.

Əlbəttə, yetirmələrimizin qazandığı bu uğurlarda heç şübhəsiz müəllimlərimizin böyük payı vardır. Artıq üç ildir ki, möhtərəm Prezidentimiz İlham Əliyevin sərəncamı ilə "Ən yaxşı məktəb", "Ən yaxşı müəllim" müsabiqəsi keçirilir. Fərəhli haldır ki, ilk qaliblər arasında məktəbimizin qabaqcıl müəllimləri də yer alıblar. Təlim-tərbiyə işləri üzrə direktor müavini Qənirə xanım Əmircanova iki dəfə, ibtidai sinif müəllimi Aygün Haşımova və tarix müəllimi Pərvanə Xəlilova müsabiqənin qalibi adını qazanmışlar.

Biz bu cür fədakar, maarif yolunda ömrünü şam kimi əridən müəllimlərimizlə fəxr edirik. 190 saylı məktəb isə ötən il "Ən yaxşı məktəb" müsabiqəsinin qalibi kimi 10 min manat pul mükafatına layiq görülmüşdür.

Fəxr edirəm ki, rəhbərlik etdiyim məktəb "Ən yaxşı məktəb" adına layiq görülüb. Bu uğurda unudulmaz Sona xanımın, bütün müəllimlərin, şagirdlərin, məktəbdə çalışan ən adi insanların belə payı var. Əlbəttə, ayrı-ayrı müəllimlərin adını xüsusi qeyd etmək lazımdır. Qənirə xanım Əmircanova, Nüşabə Ağayeva, Lalə Məmmədova, Həsən Vəliyev, Təranə Əzizova... Bunlar müəllim adını həmişə uca tatan, ona hörmət gətirən maarif fədailəridir.

Qənirə xanım haqqında ayrıca danışmaq istəyirəm. Neçə illərdir ki, bir yerdə çalışırıq. Sona xanım bizi "Rəfiqələr" deyə çağırardı. Olduqca işgüzar, qayğıkeş, həssas olan bu insan işlədiyi məktəbi doğma evi, ocağı qədər sevir. Yüksək mədəniyyətə, intellektə malik belə ziyalılarımıza hər yerdə ehtiyac var. Düşünürəm ki, yeni dərs ili ilə, qayğı və problemlərlə bağlı Qənirə xanımın öz fikirləri var.

190 saylı orta məktəbin təlim-tərbiyə işləri üzrə direktor müavini Qənirə xanım Əmircanova:

-Məktəbdə təlim-tərbiyə işi kimi ağır və məsuliyyətli bir missiyanı həyata keçirmək çətin olduğu qədər də şərəflidir. 1300 nəfərlik şagird kontingenti ilə çalışan 131 nəfərlik müəllim heyəti... hələ yüzlərlə valideynləri, nənələri, babaları demirəm. Biz hər gün bu insanlarla canlı ünsiyyətdə olur, hər birinin dərd-səri, qayğı və problemləri ilə üzləşirik. Hətta evdə olanda belə bu qayğı və düşüncələrdən ayrıla bilmirəm. Düşünəndə ki, kiminsə sənin köməyinə ehtiyacı var, necə rahatlıq tapmaq olar. Məktəb, uşaqlar mənim həyatımdır. Onların arasında nə qədər dostlarım var. Bu diqqət bu qayğı, bu sevgi elə güclüdür ki, hətta oğlum buna qısqanclıqla yanaşır, bu hiss, bu duyğuysa çox şirindi.

Məktəbimizdə öz işini sevən pedaqoqlar çoxdur. Direktor müavinləri Minayə Soltanova, Zülfiyyə Muradova, qabaqcıl müəllimlərdən Svetlana Hidayətzadə, Rivvaniyə Qasımova, Ruqiyyə Hüseynova, Zemfira Rüstəmova, Sabir Allahverənov, Şərqiyyə Mehdiyeva, Sədrəddin Rüstəmov, Sevda Nadirova, Nüşabə Mürsəlzadə, Sevda Hüseynova, Şərqiyyə Rüstəmova, Sənəm Atakişiyeva, Qönçə Qasımova, Məsmə İmanova və başqa müəllimlərimiz yeni dərs ilinə yeni-yeni uğurlar qazanmaq arzusuyla başlamışlar. Yetişən nəslin vətənpərvərlik ruhunda tərbiyə edilməsi, böyüməsi ən aktual məsələlərdən biridir.

Bu işdə ədəbiyyatın rolu danılmazdır. Məhz buna görə də biz tez-tez görkəmli ədəbiyyat və incəsənət xadimləri ilə görüşlər keçirir, maraqlı əsərlərin müzakirəsini təşkil edirik. 100 il öncə Əli bəy Hüseynzadənin təşəbbüsü ilə nəşr edilən, cəmi bir il ömrü olan "Füyuzat" jurnalının 2007-ci ildə yeni nəslin təşəbbüsü ilə təzədən işıq üzü görməsi hamımızı sevindirdi.

Biz jurnalın yaradıcı heyəti ilə məktəblilərin çox maraqlı bir görüşünü təşkil etdik. Bundan başqa, xalq şairi Sabir Rüstəmxanlının ssenari müəllifi olduğu "Cavadxan" filminin yaradıcı heyəti ilə də görüş məktəblilərin yaddaşına həmişəlik həkk olundu. Tanınmış şair və yazıçılardan Söhrab Tahir, Nahid Hacızadə, Xəzər Universitetinin rektoru Hamlet İsaxanlı, gənc şair Varis məktəblilərin yaxın dostlarıdır.

Bir vaxt bu məktəbi bitirmiş tanınmış ədəbiyyat və incəsənət xadimləri də öz doğma ocaqlarını unutmurlar.

Filologiya elmləri doktoru, professor, Kamal Abdulla, Afaq Məsud, Ofelya Sənani, Elçin Şıxlı, Azər Qasımov, Eldar Mansurov, Hacı İsmayılov, Ramiz Əzizbəyli və başqaları doğma məktəblə əlaqələrini kəsmirlər.

Bakı Slavyan Universitetinin rektoru, yazıçı Kamal Abdullanın şəxsi təşəbbüsü ilə 190 I saylı məktəbdə "Ali və orta təhsilin koordinasiya mərkəzi" yaradılıb. Məqsəd orta məktəblə ali məktəbin, qarşılıqlı, birgə fəaliyyətinə nail olmaqdır. Hazırda universitetin tanınmış professor və müəllimləri şagirdlərimizə müxtəlif fənlərdən ustad dərsləri keçirirlər.

Məktəblilərimiz Bakı Slavyan Universitetinin bir çox tədbirlərində maraqlı çıxışlar etmişlər.

Bundan başqa, ötən dərs ilində Fövqəladə Hallar Nazirliyi ilə birgə əməkdaşlıq nəticəsində "Fövqəladə hallar şagirdlərin gözü ilə" layihə-sərgi keçirilmiş, gözəl əl işləri, müxtəlif idman oyunları ilə çıxış edən məktəblilər xüsusi diplom və hədiyyələrlə mükafatlandırılmışlar.

Bu yaxınlarda iki şagirdimiz-Camal və Səbuhi FHN-nin xətti ilə Ukraynada keçirilmiş yarışlarda Azərbaycanı təmsil etmiş, doğma məktəbə qalibiyyətlə qayıtmışlar.

On günə yaxındır ki, respublikamızda yeni dərs ili başlayıb. Bütün təhsil ocaqlarında olduğu kimi, Osman Mirzəyev adına 190 saylı orta məktəbin kollektivi də yeni dərs ilində böyük uğurlar qazanmaq arzusundadır. Fürsətdən istifadə edib respublikamızın bütün orta məktəblərində və elm təhsil müəssisələrində çalışan fədakar insanları təbrik edir, onlara cansağlığı, yeni dərs ilində, uğurlar arzulayıram.

Zülfüqar ŞAHSEVƏNLİ

Respublika.- 2010.- 24 sentyabr.- S. 2.