Təlim-tərbiyə işləri müasir tələblər səviyyəsinə qaldırılır

Respublikamızın hər yerində olduğu kimi, Beyləqan rayonunun təhsil işçiləri də 2010-2011-ci dərs ilinə qazanılmış uğurları davam etdirmək əzmi ilə başlamışlar. Rayonda həyata keçirilən təhsil islahatları həm keyfiyyətcə, həm də kəmiyyətcə yeni məzmun daşıyır, milli təhsilin yüksək səviyyəyə qaldırılması üçün bütün imkanlardan səmərəli istifadə olunur. Bölgə müxbirimiz rayon Təhsil Şöbəsinin müdiri Tofiq Sadıqovla görüşərək bu sahədə görülən işlər barədə oxuculara məlumat verməyi xahiş et-mişdir. T.Sadıqov demişdir:

-Ümummilli lider Heydər Əliyevin müəllifi olduğu və 1999-cu ildən bəri uğurla həyata keçirilən "Azərbaycan Respublikasının Təhsil sahəsində islahat Proqramı" ölkəmizin təhsil quruculuğunda taleyüklü əhəmiyyətli hadisə olmuşdur. Proqramda təhsilin gələcək inkişafı konsepsiyası və strategiyası müəyyənləşdirilməklə, mərhələlər üzrə təhsil sisteminin strukturunda, idarə edilməsində, məzmununda, maddi-texniki bazasında islahatların aparılması uğurla davam etdirilir. Bu baxımdan Beyləqan rayonunun pedaqoji kollektivləri də öz səylərini əsirgəmirlər.

Hazırda rayonda 54 ümumtəhsil məktəbi fəaliyyət göstərir və məktəblərdə 13644 şagirdin təlim-tərbiyəsi ilə 1982 pedaqoji işçi məşğul olur. Şagirdlərin qabiliyyətlərinin inkişaf etdirilməsi məqsədilə 3 məktəbdənkənar müəssisəyə 4556 şagird cəlb olunmuşdur. Bundan başqa, rayonda 30 məktəbəqədər tərbiyə müəssisələrindəki 43 qrupda 825 uşaq tərbiyə alır.

Təhsildə müvəffəqiyyət əldə etmək üçün birinci növbədə keyfiyyətə fikir verir, qabaqcıl təcrübələrin üzə çıxarılması və tətbiqi, açıq və nümunə dərslərinin təşkili sahələrində ardıcıl iş aparırıq. Şagird nailiyyətlərinin dəqiq qiymətləndirilməsi, hər bir gəncin və yeniyetmənin fərdi hazırlığına, şəxsən nəyə qadir olduğuna diqqət yetirilməsi təhsilin keyfiyyətinin yüksəldilməsinə, ədalətliliyin bərqərar olmasına, şəffaf tədris şəraitinin yaranmasına müsbət təsir göstərir. Qiymətləndirmə metodlarının daha şəffaf, daha qüsursuz olması normal təhsil üçün vacib şərtdir. Şagird görəndə ki müəllim onun əməyini dəqiq qiymətləndirir, şişirtməyə, yaxud qərəzçiliyə yol vermir, onda daha da həvəslənir, daha yaxşı oxuyur, öz üzərində daha yaxşı çalışmağa başlayır. Mən bu sözləri deyərkən ulu öndərimiz Heydər Əliyevin bir kəlamını xatırlayıram: "Ədalət hər yerdə lazımdır, amma məktəbdə ədalət hamısından çox lazımdır... Əgər məktəbdə gənc, uşaq ədalətsizliklə qarşılaşırsa, onda belə təsəvvür yaranır ki, elə bu dünya ədalətsiz dünyadır. Buna yol vermək olmaz".

Milli Kurrikulumla əlaqədar rayonun ümumtəhsil məktəblərində bu sahədə əvvəlcədən zonalar üzrə ibtidai sinif, ana dili, riyaziyyat müəllimləri və məktəb rəhbərlərinin treninqi keçirilmiş, 75 ibtidai sinif müəllimi xüsusi kurslara cəlb olun-muşdur. İl boyu buraxılış siniflərində sınaq-test yoxlamaları aparılmış, nəticələr ətraflı təhlil edilərək pedaqoji kollektivlərə çatdırılmışdır. Ötən dərs ilində 988 şagird buraxılış imtahanlarrında iştirak etmiş, onlardan 881-i orta təhsil haqqında attestat almışdır. 161 məzunumuz ölkənin ali məktəblərinə qəbul olunmuş, 13 nəfər 500-dən yuxarı bal toplamışdır. Şəhər 1,3 və 4 saylı lisey, Dünyamalılar kənd 1 saylı, İkinci Şahsevən, Soltanbud, Bünyadlı, Günəşli, Şəfəq kənd orta məktəblərinin yetirmələri bu sırada daha çox fərqlənmişlər.

Məktəblərimizdə təlim-tərbiyənin səmərəliliyini artırmaq məqsədilə müxtəlif məzmunlu müsabiqə və yarışların keçirilməsi sistem halını almışdır. Xüsusi istedada malik olan yeniyetmə və gənclərlə aparılan işə ayrıca diqqət yetirilir. Bu sahədə xüsusi Dövlət Proqramı ilə bağlı istedad bankı yaradılmış, istedadlı uşaqlarla mükəmməl iş sistemi qurulmuşdur. Bunun nəticəsində şəhər 4 saylı və Araz qəsəbə orta məktəblərinin şagirdləri məktəblilərin fənn olimpiadalarının respublika mərhələsində qalib olmuşlar. Uşaqların respublika Forumunda 3 nəfər rayon məktəblisi uğurla iştirak etmişdir. "Şahin" və "Cəsurlar" hərbi-idman oyunlarının keçirilməsinə diqqət əvvəlki illərdəkinə nisbətən xeyli artırılmış, nəticələr pis olmamışdır.

Möhtərəm Prezidentimiz cənab İlham Əliyevin "Azərbaycan Respublikasında ümumtəhsil məktəblərinin informasiya və kommunikasiya texnologiyaları ilə təminatı Proqramının (2005-2007-ci illər) təsdiq edilməsi haqqında" sərəncamında irəli sürülmüş müddəalara uyğun olaraq ümumtəhsil məktəblərinə kompyuter dəstləri verilmişdir.

Məktəbdənkənar müəssisələrin fəaliyyəti də qənaətbəxşdir. Uşaq-gənclər İdman Məktəbinin işləri haqqında təkcə rayonda deyil, respublikamızda da yaxşı sözlər eşidirik. Son bir neçə ildə məktəbdə xeyli idman ustası və dərəcəli idmançılar yetişdirilmiş, 6 nəfər müəllim "Əməkdar məşqçi" adına layiq görülmüşdür. Rayon uşaq yaradıcılıq mərkəzində uşaq və yeniyetmələrin yaş xüsusiyyətləri və maraqları nəzərə alınmaqla 12 dərnək fəaliyyət göstərir. Burada şagirdlərin sənətə və fəal əmək vərdişlərinə istiqamətləndirilməsi üçün ən müasir metodlar bacarıqla tətbiq olunur, müxtəlif sərgilər, müsabiqələr, kütləvi tədbirlər təşkil olunur.

Məktəblərin maddi-texniki bazası getdikcə möhkəmləndirilir. Yeni dərs ili ərəfəsində Yeni Mil, Hərami, Təzəkənd, Bolsulu kənd orta məktəblərinin binaları təmir olunmuş, hazırda 360 yerlik şəhər 3 saylı orta məktəbində tədris korpusu inşa olunur. Şəhər məktəblərində istilik sistemləri yenidən qurulmuşdur. Cari tədris ilində məktəblər üçün 140 adda əyani tədris vəsaitləri, 530 dəst şagird masası, 65 müəllim masası, 187 müəllim stulu, 53 yazı lövhəsi, digər inventar və avadanlıqlar alınmışdır. 81 adda 42582 nüsxə dərslik pulsuz olaraq təhsil müəssisələrinə çatdırılmışdır.

Təhsil millətin gələcəyidir. Rayonun pedaqoji kollektivləri tədrisin keyfiyyətinin yüksəldilməsi istiqamətində yeni tədris ilində də ardıcıl və məqsədyönlü iş aparacaq, təlimin səviyyəsini hər vasitə ilə yüksəldəcəklər.

Sabir MUSTAFAYEV

Respublika.- 2010.- 25 sentyabr.- S. 6.