Turizmin inkişaf etdirilməsində gənclərin rolu

Bu günlərdə “Atlant” istirahət kompleksində Turizmə Dəstək Gənclər Koalisiyasının, Psixologiya və Konsultasiya Mərkəzinin (PCC) nəzdində fəaliyyət göstərən PC CLUB -un gənclərlə konfransı keçirilmişdir.

Psixologiya və Konsultasiya Mərkəzinin işçiləri Lalə Allahverdiyeva və Günel Osmanlının təqdimatı ilə keçirilən konfransda gənclərin liderlik xüsusiyyətləri, keyfiyyətlərinin inkişaf etdirilməsi və bu inkişafın yeni nəslin psixologiyasına göstərdiyi təsirin önəmindən söhbət açılmışdır.

Psixologiya və Konsultasiya mərkəzində fəaliyyət göstərən PS CLUB-un rəhbəri, BDU -nun sosial elmlər və psixologiya fakültəsinin tələbəsi, “Respublika” qəzetinin əməkdaşı Lalə Allahverdiyeva və mərkəzin meneceri Günel Osmanlı turizmin inkişaf etdirilməsində psixologiyanın əvəzedilməz rolunun vacibliyindən danışmış və tədbir iştirakçılarını maraqlandıran suallara ətraflı cavab vermişlər.

Lalə Allahverdiyeva çıxışında demişdir: “Gələn ay ölkəmizdə “Eurovisio” Beynəlxalq mahnı müsabiqəsi keçiriləcəkdir. Turistlərə kömək məqsədilə Azərbaycanı necə tanıtmaq və onların yaddaşında Azərbaycanın əsrarəngiz gözəllikləri, zəngin təbiəti, fauna və florası, mehriban, qonaqpərvər bir diyar olması barədə, hər bir gənc çalışmalıdır. Biz Azərbaycan həqiqətləri, Dağlıq Qarabağ problemi, qonşu Ermənistanın təcavüzü nəticəsində 20 ildən artıqdır ki, hələ də işğal altında qalan ərazilərimiz barədə qonaqları məlumatlandırmalıyıq. Erməni yalanını faktlarla sübut etməliyik. Məhz bu yöndə Heydər Əliyev Fondunun həyata keçirdiyi qlobal tədbirlər biz gəncləri daha da ruhlandırır. Öz ölkəmizin inkişafı naminə ana dilimizi qorumaqla xaricdən gələn qonaqlara mədəniyyətimizi, tariximizi, qədim soykökümüzü, milli-mənəvi dəyərlərimizi yüksək səviyyədə təbliğ etməliyik. Bu baxımdan gənclərimiz nümunə olmalıdırlar.

Sonda tədbirin təşkilatçıları, Turizmə Dəstək Gənclər Koalisiyası ictimai birliyinin sədr müavini Kənan Qubadzadə çıxış edərək konfrans iştirakçılarına təşəkkürünü bildirmişdir.

Rauf İlyasoğlu

Respublika.-2012.- 29 aprel.- S.8.