Sumqayıt: 2012-ci ilin I rübü yüksək nailiyyətlərlə yekunlaşıb

Aprel ayının 26-da respublikamızın iri sənaye mərkəzi olan Sumqayıt şəhərində 2012-ci ilin I rübündə Sumqayıt şəhərinin sosial-iatisadi inkişafının yekunları haqqında şəhər icra hakimiyyətinin hesabatına həsr edilmiş tədbir keçirilmişdir. Hesabatın dinlənilməsi və müzakirəsi üçün yerli müəssisə və təşkilat rəhbərləri, şəhərin fəalları və sakinləri Sumqayıtın Tarixi Muzeyinin salonuna yığışmışdılar.

Tədbiri giriş sözü ilə Sumqayıt Şəhər İcra Hakimiyyətinin başçısı Eldar Əzizov açdı. O, ölkəmizdə son 8-9 ildə gedən hərtərəfli inkişaf proseslərininin yüksək səviyyədə davam etməsindən danışdı.

Dünyada gedən və gah artan, gah da səngiyən maliyyə böhranı fonunda 2012- ci ilin I rübündə Azərbaycanda ümumi daxili məhsul 0,5 faiz artmış, qeyri-neft sektorunda isə artım 7,7 faiz olmuşdur. Həmin dövrdə ümumi sənaye istehsalında 0,3 faiz artım qeydə alınmışdırsa, qeyri-neft sənayesində bu rəqəm 16,5 faiz olmuşdur. Əhalinin gəlirləri 14 faiz artaraq inflyasiyanı 10 dəfədən çox üstələmişdir. Bu rəqəmləri söyləməklə E.Əzizov bu il aprel ayının 16-da Azərbaycan Respublikası Nazirlər Kabinetinin 2012-ci ilin I rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasda dövlət başçısı İlham Əliyevin nitqindən bəzi məqamları bir daha tədbir iştirakçılarının nəzərinə çatdırdı.

Sonra E.Əzizov Sumqayıtda gedən geniş quruculuq-abadlıq işlərindən danışdı və qeyd etdi ki, möhtərəm Prezidentimiz bizim qarşımızda tələb qoyub ki, Sumqayıt qısa zamanda Bakı səviyyəsinə çatmalıdır. Bunun üçün cənab Prezident bizə hər cür köməklik də göstərir. Sumqayıtın inkişafı naminə gördüyü bu işlərə görə biz cənab Prezidentə öz dərin minnətdarlığımızı bildiririk.

Bundan sonra Sumqayıt ŞİH başçısının müavini Sahib Quliyev 2012-ci ilin I rübünün yekunu ilə bağlı geniş məruzə etdi. Məruzəçi dedi ki, cari ilin birinci rübü ərzində Sumqayıtda şəhər həyatının bütün sahələrində uğurlar əldə olunmuş, abadlıq və quruculuq işləri geniş vüsət almış, insanların rifah halının daha da yaxşılaşdırılması istiqamətində bir çox infrastruktur layihələr həyata keçirilmişdir.

Şəhər üzrə ümumi məhsul buraxılışı 153.0 milyon manat olmuş, ötən ilin müvafiq dövrü ilə müqayisədə 102,0 faiz təşkil etmişdir. Sosial-iqtisadi sahələrdə çalışan işçilərin orta aylıq əməkhaqqı ötən ilin müvafiq dövrü ilə müqayisədə 1,2 faiz artaraq 350 manat olmuşdur. Sənaye sahələrində istehsal olunmuş məhsulun həcmi 101.4 milyon manat təşkil etmiş, ötən ilin müvafiq dövrü ilə müqayisədə artım 31,7 faiz olmuşdur. Energetika məhsulları 3,4 dəfə, yüngül sənaye məhsulları 2,6 dəfə, yeyinti sənayesi məhsulları 46,1 faiz, tikinti materialları istehsalı 33,3 faiz artmışdır.

Əhaliyə göstərilən pullu xidmətlər 34.1 milyon manat təşkil etmiş, ötən ilin müvafiq dövrü ilə müqayisədə 42,6 faiz artmışdır. Şəhər büdcəsinin gəlirlər proqnozu 14.8 milyon manata qarşı 15.2 milyon manat olmuş və yaxud 103,1 faiz yerinə yetirilmişdir.

Şəhərin kimya və neft-kimya müəssisələrinin enerji təchizatı sahələrində xeyli təmir-bərpa işləri aparılmış, əhəmiyyətli tədbirlər həyata keçirilmişdir. Etilen-polietilen zavodunun “Polimir-120” istehsalatında ilk dəfə olaraq robot sistemli paketləmə kompleksinin quraşdırılması uğurla başa çatdırılmışdır. Ötən ilin sonunda təməli qoyulmuş Azot gübrəsi – karbamid zavodunun inşası ilə əlaqədar zəruri işlər görülməkdədir. Birliyin “Səthi Aktiv Maddələr” zavodunun ərazisində “Azərsu” Səhmdar Cəmiyyətinin sifarişi əsasında “Hidromakina” MMC tərəfindən plastik və polad borular istehsalı müəssisəsinin yaradılmasına başlanılmışdır.

Azərbaycan Respublikasının Prezidenti cənab İlham Əliyevin “Sumqayıt Kimya Sənaye Parkının fəaliyyətinin təmin edilməsi ilə bağlı tədbirlər haqqında” məlum sərəncamının icrası ilə bağlı hazırlıq işləri davam etdirilməkdədir. Parkın yaradılması çoxsaylı iş yerlərinin açılmasına imkan verəcəkdir.

“Azərboru” ASC-də boru istehsalının genişləndirilməsi istiqamətində tədbirlər davam etdirilmişdir. Müəssisədə işləyənlərin sayı ötən ilin müvafiq dövrü ilə müqayisədə artmışdır.

“İntertekstil” ASC-də pambıq iplik və trikotaj məhsullar istehsalı davam etdirilmişdir. Hazırda müəssisədə işləyənlərin sayı 400 nəfərdən çoxdur və bunların əksəriyyətini qadınlar təşkil edir.

“Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nda Sumqayıt şəhəri üzrə müəyyən olunmuş tədbirlər icra olunmaqdadır. Sumqayıtın mövcud sənaye potensialından səmərəli istifadə edilməsi və gücləndirilməsi baxımından cari ilin əvvəlindən bir sıra yeni istehsal sahələrinin tikintisi istiqamətində əhəmiyyətli işlər həyata keçirilməkdədir.

Azərbaycan Respublikasının Prezidenti cənab İlham Əliyev son bir ildə 3 dəfə Sumqayıta gəlmişdir. Onun diqqət və qayğısı sayəsində Sumqayıtda elektroenergetika sahəsində yeni infrastruktur layihələrinin həyata keçirilməsi davam etdirilməkdədir. Ən müasir avadanlıqlarla təchiz olunmuş Sumqayıt Texnologiyalar Parkında artıq 15 iri, müasir istehsal sahələri fəaliyyət göstərir, bir neçə zavodun tikintisi isə davam etdirilməkdədir.

“Bismak” Qida Sənaye Kompleksi MMC-də karamel istehsalı sahəsi istifadəyə verilmiş, istehsal gücü gündə 120 ton olan Çörək zavodunun inşası davam etdirilməkdədir. “Delta Qrup” MMC tərəfindən tutumu 4000 ton, ümumi sahəsi 8900 kvadratmetr olan soyuducu anbar kompleksinin inşası yekunlaşmaq üzrədir, həmin ərazidə “Azərsun Holdinq” şirkətlər qrupu tərəfindən Kağız və karton istehsalı kombinatı və Yağ istehsalı fabrikinin inşası davam etdirilir.

Sumqayıt Elektrik Stansiyası rüb ərzində 638,8 milyon kv/saat elektrik enerjisi istehsal edilərək zəncirvarı enerji sisteminə ötürmüşdür ki, bu da keçən ilin eyni dövrü ilə müqayisədə 109 faiz təşkil etmişdir.

Rüb ərzində şəhərdə genişmiqyaslı abadlıq, quruculuq, yaşıllaşdırma işləri davam etdirilmişdir.

Şəhərə dəvət olunmuş görkəmli memarların iştirakı ilə ümummilli lider Heydər Əliyevin adını daşıyan parkda “Heydər Əliyev Mərkəzi”nin, “Nəsimi” adına mədəniyyət və istirahət parkının, “Bələdiyyə parkı”nın abadlaşdırılaraq yenidən qurulması, yeni yaşıllıqların salınması, dekorativ kol və bitkilərin əkilməsi məqsədilə tərtib edilmiş layihələr üzrə işlər davam etdirilir. Şəhər icra hakimiyyəti inzibati binasının fasadının yenidənqurulması və binanın əsaslı təmiri həyata keçirilməkdədir, “Bələdiyyə parkı” ərazisində Sumqayıt Şəhər Polis İdarəsinin inzibati binasının tikintisi və mövcud obyektlərin müasir üslubda yenidən qurulması işləri başa çatmaq üzrədir, Sumqayıt Cümə məscidində əsaslı təmir-bərpa, yenidənqurma və abadlıq işləri davam etdirilir, Heydər Əliyev prospektində 34 və 36-cı məhəllələrin arasında yerləşən mövcud obyektlərin sökülərək buranın müasir üslubda yenidən qurulması işləri aparılır. “Kimyaçı” Mədəniyyət Sarayında əsaslı təmir işləri, ətraf ərazinin və qarşıdakı meydanın yenidən qurulması, M.Hüseynzadə adına şəhər stadionunun yenidən qurulması üçün layihələndirmə işlərinə başlanılmışdır. Bundan başqa, Heydər Əliyev və Koroğlu prospektlərinin, N.Nərimanov və Sülh küçələrinin abadlaşdırılaraq mövcud tikililərin tərtib edilmiş layihələr üzrə yenidən qurulması, sıxlıq yaratmış obyektlərin digər əraziyə köçürülməsi, bordür və işıq sütunlarının yenidən qurulması, 36, 4, 16 və 17-ci məhəllələrdəki binaların dam örtüklərinin və fasad hissələrinin təmiri işləri aparılır. Şəhərətrafı ərazilərin abadlaşdırılması, çimərliklərin bərpa edilməsi qısa müddətdə şəhərin paytaxt standartlarına uyğunlaşdırılması üzrə aparılan işlərin tərkib hissəsidir.

Şəhərdə iri miqyasla başlanılan abadlaşdırma və yenidənqurma işlərinin tərkib hissəsi olaraq Sülh küçəsi, Azərbaycan və Heydər Əliyev prospektlərində yeni səki daşlarının qoyulması, yaşıllıq sahələrinin salınması ilə bağlı işlər həyata keçirilmişdir. Səki və piyada yollarına, meydança və xiyabanlara 5000 kvadratmetr üzlük plitələr döşənmiş, Heydər Əliyev prospektində yol və ayırıcı zolaqların yanlarına 3800 p/metr qranit səki daşları qoyulmuşdur. Heydər Əliyev prospekti və Sülh küçəsindəki yaşayış binalarının fasadlarının üzlənməsi, Azərbaycan prospekti və S.Vurğun küçələrinin kəsişməsində yerləşən yaşayış binalarının fasadlarında və dam örtüklərində kompleks təmir, bərpa və yenidənqurma işləri davam etdirilir. Şəhərin küçə, park və xiyabanlarında, məhəllə və mikrorayonların ərazilərində 7 min kvadratmetrə yaxın yeni qazon sahələri salınmış, sahələrə 700 kubmetrdən çox münbit torpaq verilmişdir. 3500 ədəd dekorativ gül, 1000-dən çox dekorativ kol və 2000-dən artıq ağac əkilmişdir. “Heydər parkı” və “Nəsimi parkı” ərazisində, Heydər Əliyevin abidəsinin ətrafında kompleks şəkildə yenidənqurma, abadlaşdırma və yaşıllaşdırma işləri aparılmış və həmin işlər hazırda davam etdirilir.

Möhtərəm Prezidentimizin tapşırıq və göstərişlərini rəhbər tutaraq əhali ilə işi, onların qayğıları ilə yaşamağı, son nəticədə sakinlərin rifah halının günü-gündən daha da yaxşılaşdırılmasını, sosial-məişət problemlərinin həllinə nail olmağı biz öz fəaliyyətimizdə prioritet istiqamətlər kimi müəyyənləşdirmişik və bu yolla da fəaliyyətimizi davam etdiririk.

Hesabat dövrü ərzində əhaliyə elektrik enerjisı, təbii qaz, su və digər kommunal xidmətlərin göstərilməsi sahəsində bir sıra tədbirlər həyata keçirilmiş, ayrı-ayrı avadanlıqlar yeniləri ilə əvəz olunmuş, əlavə xətlər çəkilmiş, müasir sayğaclar quraşdırılmışdır. Bütün bunların nəticəsidir ki, sərt keçən builki qış mövsümündə şəhər və qəsəbələrin sakinləri enerjidaşıyıcılarla təminatla bağlı ciddi problemlərlə üzləşməmişlər.

Şəhərdə əhalinin gündəlik istifadə etdiyi xidmət sahələrindən biri də nəqliyyatdır. Son illər ərzində sərnişinlərə xidmət səviyyəsinin yüksəldilməsi məqsədilə müasir, estetik baxımdan yaraşıqlı və işıqlandırılmış dayanacaqlar quraşdırılmış, eləcə də şəhərdaxili bir neçə marşrutlara iritutumlu və rahat avtobuslar buraxılmışdır.

Hesabat dövründə Telekommunikasiya Qovşağı tərəfindən tarif gəliri proqnozu 105 faiz yerinə yetirilmiş, abonentlərin sayı 380 ədəd artırılaraq istifadə tutumu 57,7 minə çatdırılmışdır. Genişzolaqlı internet istifadəçilərinin sayı artaraq 4300-ü ötmüşdür.

Cari ilin birinci rübündə şəhərin təhsil müəssisələrində tədrisin keyfiyyətinin yaxşılaşdırılması istiqamətində bir sıra mühüm işlər görülmüş, maddi-texniki baza möhkəmləndirilmiş, istedadlı şagirdlərin aşkara çıxarılması ilə bağlı tədbirlər həyata keçirilmişdir.

Rüb ərzində şəhər əhalisinə göstərilən səhiyyə xidməti işi bütün sahələr üzrə yaxşılaşdırılmış, xəstəliklərin profilaktikası, əhaliyə, o cümlədən ana və uşaqlara göstərilən tibbi xidmətin keyfiyyətinin artırılması, əlilliyin azaldılması və reabilitasiyası sahəsində müvafiq tədbirlər həyata keçirilmişdir.

Azərbaycan Respublikasının Prezidenti cənab İlham Əliyevin sərəncamı ilə 2012-ci ilin “İdman ili” elan edilməsilə əlaqədar “Azərikimya” İstehsalat Birliyilə birgə şəhərdə fəaliyyət göstərən idarə, müəssisə və təşkilatlar arasında idmanın şahmat, dama, stolüstü növləri üzrə yarışlar təşkil olunmuşdur.

Şəhər idmançıları respublika və beynəlxalq səviyyəli yarışlardan 252 medal əldə etmişlər. Bunlardan 81-i qızıl, 81-i gümüş, 90-ı bürünc medaldır.

İdman növləri üzrə milli yığma komanda heyətlərində beynəlxalq səviyyəli yarışlarda iştirak edən idmançılarımız tərəfindən qazanılmış 24 medaldan 2 qızıl, 2 gümüş, 1 bürünc medal Dünya, Avropa çempionat və birincilikləri, kubok yarışlarında əldə olunmuşdur. Bu medallardan 2 qızıl, 2 gümüş medal Olimpiya oyunlarının proqramına daxil olan idman növləri üzrədir.

Bu ilin əvvəlindən ötən ildən başlanılmış irimiqyaslı layihələrin həyata keçirilməsi davam etdirilmiş və şəhərin siması günü-gündən dəyişməkdədir. Sumqayıtı müasir sənaye şəhərinə çevirmək, yeni texnoparklar yaratmaq istiqamətində də işlər uğurla həyata keçirilməkdədir. Son nəticədə bu işlərin hamısı şəhərimizin görkəmini dəyişməklə gözəl şəhərlərindən birinə çevirmək, şəhər sakinlərinin rifah halını əsaslı şəkildə daha da yaxşılaşdırmağa istiqamətlənmişdir.

Sonda tədbir iştirakçıları Azərbaycan Prezidentinə müraciət ünvanladılar.

Söhrab SƏFİYEV

Respublika.- 2012.- 29 aprel.- S.3.