| Uşaqların sevimli yeri

Təlim–tərbiyənin keyfiyyətinin daha da yüksəldilməsi üçün istedadlı uşaqlarla işin təşkili önəmli vasitədir. Uşaqların yaradıcılıq imkanlarının vaxtında aşkara çıxarılması, bu imkanların düzgün məcraya yönəldilməsi pedaqoji sahədə çalışan hər bir müəllim və tərbiyəçidən böyük məharət və ustalıq tələb edir.

Mingəçevir şəhərindəki Uşaq Yaradıcılıq Mərkəzi uşaq və yeniyetmələrin bilik, bacarıq və vərdişlərə yiyələnməsində, istedadlı uşaqların üzə çıxarılmasında müstəsna rol oynayır.

Mərkəzin işçiləri tez–tez məktəblərdə olur, burada fəaliyyət göstərən dərnəklər haqqında şagirdlərə məlumat verir, onların müvafiq dərnəklərə cəlb olunması üçün əməli işlər görürlər. Bu gün Uşaq Yaradıcılıq Mərkəzində 19 adda dərnək fəaliyyət göstərir. Bu dərnəklərdə öz işinin mahir bilicisi olan müəllimlər çalışır.

Milli rəqs dərnəyi, demək olar ki, bütün tədbirlərin bəzəyidir. Bakıda keçirilən respublika xalq yaradıcılığı folklor müsabiqəsinin qalibi olan dərnək üzvləri dəfələrlə müxtəlif yarışlarda uğurla çıxış etmiş, doğma şəhərə dəyərli mükafatlarla qayıtmışlar.

“Milli Kukla Teatrı” dərnəyi isə sanki nağıllar aləmidir. Hər bir cansız kuklaya can verən uşaq ondan ayrılmaq istəmir. Bu teatrda elə bir cazibə qüvəsi var ki, uşaqları ona əbədi olaraq bağlayır. İl ərzində “Kukla teatr”ında 7 əsər tamaşaya qoyulmuş, ilin sonunadək daha bir tamaşanın hazırlanması nəzərdə tutulmuşdur.

Uşaq Yaradıcılıq Mərkəzinə xeyli müdətdir ki, təcrübəli pedaqoq Ədalət Quliyeva rəhbərlik edir. Uzun illər bu tərbiyə ocağında müəllim işləmiş Ədalət xanım öz bacarığı, təlim–tərbiyə prosesinə göstərdiyi canyanğısı ilə nəinki Mingəçevir şəhərinin təhsil işçiləri arasında, həmçinin onun hüdudlarından kənarda da böyük ad–san qazanmışdır.

Bu günlərdə Mingəçevirdə olarkən kollektivin işi ilə maraqlandıq. Açığını demək lazımdır ki, burada gördüklərimiz bizdə böyük heyranlıq hissi yaratdı.

Vahid bir orqanizmi xatırladan kollektivin işə doğma münasibəti bizi valeh etdi.

Söhbətimiz zamanı mərkəzin direktoru dedi:

—Dünya nura boyanar bir körpə təbəssümündən, bir körpə gülüşündən! deyənlər necə də haqlıdır. Hər dəfə bu sətirləri oxuyanda gözümün qarşısında bu təhsil ocağının qapısından içəri girən yüzlərlə bacarıqlı, istedadlı dərnək üzvləri durur. Hər birinin də öz aləmi var—sirli, sehrli.

Öz körpə baxışları ilə bir işı gördükdə gözləri sevincdən parlayır, dünyanın ən xoşbəxt adamına çevrilirlər.

Uşaqdan–böyüyə hamının rəğbət bəslədiyi, sevə–sevə, həvəslə gəldiyi bu məkanın adı Mingəçevir Uşaq Yaradıcılq Mərkəzidir — Azərbaycan təhsilinin ayrılmaz bir hissəsi olan məktəbdənkənar təhsil müəssisəsi.

Uşaq və yeniyetmələrin asudə vaxtının səmərəli keçməsi, xüsusi istedada malik uşaqların üzə çıxarılması, uşaqlarda sənətə, peşəyə həvəs yaradılması, sağlam həyat tərzinin təbliği yolunda müəssisəmizin rolu böyükdür.

Mingəçevir Şəhər Uşaq Yaradıcılıq Mərkəzi öz iş planlarında yuxarıda göstərdiyimiz hər bir şərti əsas tutaraq məktəbinə, ailəsinə, vətəninə, xalqına layiq övladların yetişdirilməsi üçün məzmunlu tədbirlər keçirir.

Uşaq Yaradıcılıq Mərkəzi uşaqlara yalnız bilik, bacarıq və vərdişlər aşılamır, eyni zamanda onların müstəqil, demokratik, prinsipial şəxsiyyət kimi formalaşmasını təmin edir. Tədbirlər planına əsasən il ərzində bütün tarixi günlər, milli və dövlət bayramları, xatirə günləri qeyd olunur, sərgilər təşkil edilir. İstedadlı uşaqlarımız dərnəklərə tədbirdən–tədbirə daha da həvəslə üzv olur, dərnək rəhbərlərınin yaxın dostuna çevrilirlər. Əlbəttə ki, bu münasibət onların gələcək həyatında mühüm rol oynayır. Belə uşaqlar müəyyən auditoriyalarda sərbəst fikir söyləyə bilirlər, müstəqil olaraq özünüidarəetmədə hər hansı bir tədbirin keçirilməsində öz mülahizələrini irəli sürür və yerinə yetirirlər.

Yaradıcı dərnəklərin üzvləri dərnək rəhbərlərinin səyi, pedaqoji bacarıqları nəticəsində öz yaradıcılıq qabiliyyətlərini üzə çıxarır, gələcəkdə hansı peşənin sahibi olacaqlarından asılı olmayaraq bu gün keçirilən tədbirin fəal iştirakçısı olurlar.

Mərkəzdə fəaliyyət proqramına əsasən “Sağlam həyat tərzi”, “Yaşam bacarıqları”, “Narkomaniyaya yox deyək!”, “Mən vətənimi sevirəm!”, “Mənim nurlu şəhərim”, “Müstəqil ölkənin xoşbəxt övladlarıyıq”, “Şən uşaqlar” və s. mövzuları əhatə edən tədbirlər təkcə uşaqların deyil, valideynlərin və şəhər ictimaiyyətinin böyük marağına səbəb olur.

Gənclərin vətənpərvər, mübariz ruhda böyüməsində təşkil olunan tədbirlərin böyük rolu var. “Qanlı Yanvar!”, “Xocalı harayı!”, “31 mart–Azərbaycanlıların soyqırımı—qanlı tarix!”, “Şəhid torpağım!”, “Vətən yolunda!” və s. tədbirlər yeniyetmə və gəncləri torpağın hər qarışı üçün müdafiəyə səsləyır.

Ötən dərs ilində Azərbaycan Respublikasının Milli Qəhrəmanı Mübariz İbrahimov adına Gənclərin I Ümumrespublika Teatr Festivalı keçirildi. Festivalda Uşaq Yaradıcılıq Mərkəzinin dram dərnəyinin üzvləri Qazax Nağı Akif oğlunun “Qisas” tamaşasını oynadılar. Yüksək ifa bacarığı dərnəyin üzvlərinə uğur qazandırdı və onlar diplom və pul mükafatı ilə III yerin qalibi oldular. İştirakçıların mübarizə əzmi ilə oynadıqları tamaşa Mingəçevir məktəblilərinə nümayış olundu.

Mərkəzdə vaxtaşırı keçirilən müsabiqə xarakterli tədbirlər uşaqların bacarıq və qabiliyyətlərini daha da təkmilləşdirir, onların dünyagörüşünü artırır.

Uşaqlar arasında “Azərbaycan Respublikasının dövlət müstəqilliyinin 20 illiyi”, “10 dekabr — Beynəlxalq İnsan Hüquqları Günü!”, “Mən və hüquqlarım!” mövzuslarında keçirilən uşaq rəsmlərinin müsabiqəsi buna misaldır.

Uşaq yaradıcılıq mərkəzlərinin dərnək üzvlərinin əl işlərinin respublika müsabiqəsində iştirak etmək üçün “Bədii tikmə”, “Bədii keramika”, “Gənc dizayner”, “Biçmə–tikmə” dərnəklərinin hazırladıqları əl işləri təqdim olunub. İncə zövqlə işlənən bu işlər uşaq təxəyyülünün məhsuludur. Ümid edirik ki, bu müsabiqədə də qalib işlərimiz, mükafatımız olacaq.

Mərkəz ümumtəhsil məktəbləri ilə sıx əlaqəli işləyir. Belə olmazsa, dərnəklərdə fəaliyyət göstərən dərnək üzvlərinin sayı çox az olar. Şəhərin tam orta məktəblərinin rəhbərləri də mərkəzin işi ilə maraqlanır və birlikdə müəyyən tədbirlər keçirirlər. Məktəb uşaq birlik rəhbərlərı ilə metodist Ülviyyə Kərimovanın apardığı seminar məşğələlər UBR–nin məktəbdən sonra şagirdlərin boş dayanmamalarına, asudə vaxtlarının səmərəli keçirmələrinə nəzarət etmələrinə kömək edir.

Ü.Kərimova dram, R.Əhmədova bədii tikmə, A.Məmmədov bədii keramika, təsviri sənət, A.Quliyev bədii qiraət, M.Tağıyeva milli rəqs, Ə.Quliyeva kukla teatrı, T.İsmayılov “Bacarıqlı əllər”, G.Süleymanova, T.Həşimova dərzilik, C.Abuşova vokal və s. dərnək rəhbərlərinin uşaqlara sevgisi, öz işinə məsuliyyətlə yanaşmaları mərkəzin işini daha da fəallaşdırır.

Elə bir şəhər tədbiri olmaz ki, orada Uşaq Yaradıcılıq Mərkəzinin rolu olmasın. Respublika üzrə keçirilən müsabiqələrin əksəriyyətinin iştirakçısı və qalibi olan mərkəzdə bu gün də qaynar həyat davam edir.

İlham PƏNAHOV,

Respublika.- 2012.- 19 dekabr.- S. 6.