| Dünya Bankı ilə səmərəli əməkdaşlıq əlaqələri genişlənir

Dövlət Sosial Müdafiə Fondunda (DSMF) Dünya Bankının Azərbaycan üzrə ölkə meneceri xanım Larisa Leşenko və Dünya Bankının eksperti Anjela Priqojina ilə görüş keçirilib. Fondun fəaliyyəti barədə qonaqlara məlumat verən DSMF sədri Səlim Müslümov bildirib ki, ötən müddət ərzində fondun qurumlarının 87 faizi avtomatlaşdırılmış iş yerləri ilə təmin edilib və bu gün fondun mərkəzi informasiya bazasında 1,272 milyon nəfər pensiyaçı və 2,1 milyon nəfərdən çox sığortaolunan barədə məlumatlar toplanıb. Fondun sədri sığorta–pensiya sisteminin növbəti illərdə texniki, institusional təkmilləşmə və maliyyə dayanıqlığı baxımından inkişaf istiqamətləri barədə məlumat verib.

L.Leşenko Azərbaycanın sığorta–pensiya sistemində görülən işləri yüksək dəyərləndirib. Bu barədə DSMF–nin ictimaiyyətlə əlaqələr sektorundan verilən məlumatda o da vurğulanır ki, qonaq təmsil etdiyi qurumun fondla yaxından əməkdaşlıq etdiyini önə çəkərək, növbəti illərdə əməkdaşlığın daha da dərinləşməsində maraqlı olduğunu, həmçinin yeni pensiya təminatı sisteminin islahatı konsepsiyasının işlənib hazırlanmasında Dünya Bankının mütəxəssislərinin öz köməkliklərini əsirgəməyəcəklərini bildirib. Xanım A.Priqojina sığorta–pensiya sisteminin növbəti inkişaf mərhələsinin yalnız sosial məsələləri deyil, eləcə də maliyyə xarakterli elementləri əhatə etməli olduğunu qeyd edib. Bu istiqamətdə Dünya Bankının mütəxəssislərinin böyük təcrübəyə malik olduqlarını və Azərbaycanın da bu təcrübədən yararlana biləcəyini diqqətə çatdırıb.

Mustafa Kamal,

Respublika.- 2012.- 25 dekabr.- S. 5.