Möhtəşəm hadisələrlə yaddaqalan il

“İdman ili” uğurla başa çatır

Başa çatmaqda olan 2012–ci il ölkə həyatının bütün sahələrində olduğu kimi, idmanda da çox uğurlu olmuşdur. Qeyd edək ki, möhtərəm Prezidentimiz İlham Əliyevin müvafiq sərəncamı ilə 2012–ci ilin ölkəmizdə “İdman ili” elan edilməsi Azərbaycan idmanının inkişafına yeni bir təkan vermişdir. O da çox fərəhləndirici haldır ki, 2012–ci il həm də bir çox idman hadisələri ilə yadda qalacaqdır. İlk növbədə cənab İlham Əliyevin Azərbaycan Milli Olimpiya Komitəsinin prezidenti seçilməsinin 15 ili tamam olmuşdur. Həmçinin MOK–un yaranmasının 20 illik yubileyi ölkə ictimaiyyəti və idmansevərlər tərəfindən təntənə ilə qeyd edilmişdir. Xüsusi vurğulanmalıdır ki, 1993–cü ildə ümummilli lider Heydər Əliyevin yenidən hakimiyyətə qayıdışından sonra Azərbaycanda bütün sahələrdə olduğu kimi, idmanda da uğurlar başlamışdır. İdman meydançaları, qurğuları bərpa edilmiş, yenilərinin tikintisinə start verilmiş, keçmiş İttifaqın ayrı–ayrı respublikalarında çalışan idmançılar, mütəxəssislər ölkəyə dəvət olunmuşlar. 1995–ci ilin 5 martında böyük öndər bir qrup idmançı ilə görüşmüş, onları mükafatlandırmışdır. Müstəqil respublikamız ilk dəfə 1996–cı ildə Atlantada (ABŞ) keçirilən Yay Olimpiya oyunlarına qatılmışdır.

Respublikamızda Olimpiya hərəkatının genişlənməsi cənab İlham Əliyevin adı ilə bağlıdır. Belə ki, dövlət başçımızın 1997–ci ildə MOK–un prezidenti seçilməsindən sonra bu sahədə inkişaf daha da sürətlənmişdir. O qədər də böyük olmayan bir dövr — 15 il ərzində idman sahəsində görülən işlərin həcmini əsrə bərabər dəyərləndirmək olar. Statistikaya diqqət yetirsək, görərik ki, möhtərəm İlham Əliyev MOK–a rəhbərlik etdiyi vaxtdan indiyədək idmançılarımız bütün Yay Olimpiya oyunlarında ardıcıl qələbələr qazanmış, olimpiadadan–olimpiadaya mükafatların sayı yüksələn xətlə artmışdır. Belə ki, millimiz 2000–ci ildə Sidneydə 3 medal (2 qızıl, 1 bürünc), 2004–cü ildə Afinada 5 medal (1 qızıl, 4 bürünc), 2008–ci ildə Pekində 7 medal (1 qızıl, 2 gümüş, 4 bürünc) əldə etmişdir.

Bu templə qələbələrini davam etdirən idmançılarımız XXX London Yay Olimpiya oyunlarında yeni zirvələr fəth etdilər. Onlar idmanın 16 növündə 53 idmançı ilə təmsil olunduğumuz olimpiadada iki qızıl, iki gümüş, altı bürünc medala sahib çıxdılar. Beləliklə, ölkələrin cədvəlində Azərbaycan 30–cu yerə layiq görüldü, medalların sayına görə 24–cü, Avropa ölkələri arasında 15–ci, müsəlman ölkələri arasında isə 3–cü yeri tutdu. Bu, doğrudan da, böyük və tarixi nailiyyətdir. 200–dən çox ölkə arasında yalnız 35–nin təmsilçilərinin iki və daha çox qızıl əyara sahib çıxması və onlar arasında Azərbaycanın da yer alması respublikamızın dünya idman arenasında söz sahibi olmasının göstəricisidir.

Əlbəttə, istər Yay Olimpiya oyunlarında, istərsə də beynəlxalq yarışlarda, mötəbər çempionatlarda bir çox idman növlərində böyük nailiyyətlər qazanılmasına dövlətimizin bu sahəyə yüksək diqqət göstərməsi və güclü maddi–texniki bazanın yaradılması stimul verir. Bu baxımdan qeyd edə bilərik ki, paytaxtımızda və eləcə də bölgələrdə idman infrastrukturunun yaradılması istiqamətində mühüm işlər görülmüşdür. Son illərdə Bakı ilə yanaşı, Gəncədə, Naxçıvanda, Sumqayıtda, Şəkidə, Şamaxıda, Lənkəranda, Qazaxda, Bərdədə və sair bölgələrdə Olimpiya İdman kompleksləri tikilib gənclərin istifadəsinə verilmişdir. Hətta cəbhə bölgəsində yerləşən Ağdamın Quzanlı qəsəbəsində müasir idman qurğusu tikilmişdir. Hazırda ölkəmizdə 2000–ci ildən bəri 35 Olimpiya İdman Kompleksi tikilib istifadəyə verilib, 8 kompleksdə isə işlər davam edir.

Ümumiyyətlə, yaxın gələcəkdə elə bir rayon mərkəzi qalmayacaqdır ki, orada müasir standartlara cavab verən olimpiya kompleksləri olmasın. Çünki bu mərkəzlərdə həm peşəkar idmançılar məşq edirlər, eyni zamanda bölgələrdəki uşaqlar, yeniyetmələr, gənclər öz vaxtlarını səmərəli keçirirlər.

Hazırda Bakıda 80 min tamaşaçı tutumu olan yeni Olimpiya stadionu tikilir, həmçinin Gimnastika Sarayının, Su İdman Növləri Sarayının inşasına start verilib. 2012–ci ilin idman uğurlarından biri də Tofiq Bəhramov adına Respublika Stadionunun əsaslı təmir olunub yenidən qurulmasıdır. Fəaliyyətə başlamasının 60 illik yubileyini qeyd edən və respublikanın bir nömrəli arenası sayılan stadionun əsaslı təmir və yenidənqurmadan sonra 16 avqust 2012–ci il tarixdə açılış mərasimində dövlət başçımız cənab İlham Əliyev də iştirak etmişdir. 85 min 700 kvadratmetr ərazisi olan, oturacaqlarının sayı 29 min 870–dən 31 min 200–ə çatdırılan stadionun ot örtüklü futbol meydançası FİFA standartlarına tam uyğun şəkildə yenidən qurulmuşdur. Bakıda T.Bəhramov adına Respublika Stadionunda 16 ölkənin futbol komandalarının iştirakı ilə keçirilən FİFA U–17 qadınlararası dünya çempionatı isə artıq Azərbaycanın çoxsaylı beynəlxalq tədbirlərə ev sahibliyi etməsi ənənəsinə sadiq qalmasından xəbər verir. FİFA prezidenti Jozef Blatter və digər rəsmi qonaqlar dünya çempionatının açılış mərasimdə iştirak edərək təşkilati tədbirlərin yüksək səviyyədə olduğunu vurğuladılar. Onu da xüsusi qeyd etməyə dəyər ki, T.Bəhramov adına Respublika Stadionunda baş tutan Fransanın və Koreya Xalq Demokratik Respublikasının komandaları arasında final oyununu möhtərəm Prezidentimiz cənab İlham Əliyev də izlədi.

Nəhayət, 2012–ci ildə yaddaqalan idman hadisələrindən biri də dekabrın 8–də Avropa Olimpiya Komitəsinin 2015–ci ildə birinci Avropa Olimpiya oyunlarının Bakıda keçirilməsi ilə bağlı qərar qəbul etməsidir. Avropa Olimpiya Komitəsinin (AOK) Azərbaycanı seçməsinin əsas səbəblərindən biri bu gün ölkəmizin möhtəşəm beynəlxalq tədbirlərin, yarışların keçirilməsində böyük təcrübəyə malik olmasıdır. Bu münasibətlə Azərbaycan xalqını təbrik edən Prezident İlham Əliyev demişdir: “Birinci Avropa Olimpiya oyunlarının Bakıda keçirilməsi barədə qərar böyük tarixi hadisədir. Bu, bizə göstərilən böyük inamdır, böyük etimaddır, böyük hörmətdir, eyni zamanda, üzərimizə düşən böyük məsuliyyətdir. Mən şübhə etmirəm ki, biz bu sınaqdan da uğurla və şərəflə çıxacağıq, bu oyunları yüksək səviyyədə keçirəcəyik”.

Bəli, “İdman ili”ni uğurla başa vuran Azərbaycan idmançıları 2013–cü ili alnıaçıq qarşılayırlar.

Akif İSMAYILOV,

T.Bəhramov adına Respublika

Stadionunun direktoru,

əməkdar bədən tərbiyəsi və

idman xadimi.

Respublika.- 2012.- 29 dekabr.- S. 7.