“Günay” uşaq teatrı studiyası tamaşaçıların rəğbətini qazanır

Fiziki və psixoloji cəhətdən sağlam, bilikli, zəngin mənəviyyata malik yeni–yeni nəslin böyüməsi dövlət siyasətinin əsas istiqamətlərindən biridir. Odur ki, ölkəmizdə uşaqlarda yaradıcılıq imkanlarının, istedadının inkişaf etdirilməsi üçün lazımi şərait yaradılıb. Uşaq və yeniyetmələrin yaradıcılıq qabiliyyətinin, istedadının üzə çıxarılması ayrı–ayrı təşkilatların, mütəxəssislərin üzərinə böyük məsuliyyət qoyur. “Günay” uşaq teatr studiyası da bu istiqamətdə mühüm addımlar atır. Kollektiv nəinki respublikamızda, bir çox Avropa ölkələrində böyük nüfuz qazanıb.

Studiya 2003–cü ildə “Yaşıl Teatr” konsert kompleksinin nəzdindən “Günay” estetik uşaq studiyasının əsasında yaranıb. Onun yaradılmasında əsas məqsəd gənc nəsli milli və dünya dramaturgiyası, poeziya, musiqi, incəsənət ilə yaxından tanış etmək, uşaq və yeniyetmələrin yaradıcı və estetik imkanlarını inkişaf etdirmək olmuşdur.

Bütün tamaşaların ssenarisini, quruluşunu və musiqi tərtibatını özümüz hazırlayırıq. Repertuarımıza milli vətənpərvərlik mövzusuna aid tamaşalarla yanaşı, Şekspir, Puşkin, Lermontov və başqa klassiklərin əsərləri də daxildir. Kollektivimiz çoxsaylı xarici qastrollardan hər dəfə mükafat, fəxri fərman və medallarla Vətənə qayıdır. Xarici ölkələr arasında Almaniya, Fransa, Çexiya, Rusiya və başqaları vardır. Qonaq olduğumuz ölkələrin tamaşaçılarının fikrincə, azərbaycanlı uşaqları mənəviyyatına və vətənpərvərlik hislərinə görə daha yüksəkdə olduqları ilə fərqlənirlər.

Bu ilin yay mövsümündə kollektivimiz növbəti dəfə böyük uğura imza atdı. Belə ki, “Günay” teatrı Polşanın Kelse şəhərində “Avropanın istedadları” şüarı altında keçirilən uşaq və yeniyetmələrin yaradıcılığına həsr olunmuş 39–cu beynəlxalq müsabiqədə 2 bürünc medala və fəxri fərmana sahib oldu. Xatırladım ki, həmin müsabiqədə Polşa və Rusiyanın müxtəlif regionlarından, həmçinin Ukrayna, Belarus, Qazaxıstan, Moldova, Serbiya və başqa ölkələrdən kollektivlər iştirak edirdilər. Onu da deyim ki, bizim teatr həmin tədbirdə M.F.Axundovun “Müsyö Jordan və dərviş Məstəli şah” və Andersonun “Su pərisi” əsərlərini səhnəyə çıxarmışdı. Kollektivimizin ifa etdiyi “Yallı” milli rəqsi də bu festivalda yaddaqalan oldu.

Xarici ölkələrə səfərlər “Günay” kollektivi üçün bir ənənəyə çevrilib. Biz gələn ilin əvvəli üçün Almaniyanın Bremen şəhərində keçiriləcək uşaq teatrlarının festivalına dəvət almışıq. Artıq bu səfərə hazırlıq görülür. Biz indi məşqləri Bakı Uşaq Teatrının binasında keçiririk ki, bu da müsbət nəticə verir. Yaradılan şəraitə görə teatrın direktoru İntiqam Soltana öz minnətdarlığımızı bildiririk.

Əldə etdiyimiz nailiyyətlər kollektivimizin hər bir üzvünün, xüsusilə də uşaqların gərgin əməyinin və bacarığının bəhrəsidir. Bütün bunlar balaca aktyorları sevindirməklə yanaşı, həm də onları daha böyük həvəslə çalışmağa, istedadlarını artırmağa ruhlandırır.

Larisa TARUSOVA,

“Günay” uşaq teatrı studiyasının

rəhbəri.

Respublika.- 2012.- 24 noyabr.- S. 6.