Milli Qəhrəmanın anım günü

Azərbaycanın Milli Qəhrəmanı Gültəkin Əsgərovanın adını daşıyan Nərimanov rayon 200 saylı tam orta məktəbdə Qarabağ uğrunda, vətənimizin bütövlüyü uğrunda şəhid olmuş tibb xidməti baş leytenantı, həkim–döyüşçü Gültəkin Əsgərovanın anım mərasimi keçirilmişdir. Məktəbin direktor müavini Xədicə Əliyevanın təşkilatçılığı və məktəbin müəllim və şagird kollektivinin, millət vəkillərinin, ayrı–ayrı ictimai birliklərin, şair və yazıçıların, müharibə və əmək veteranlarının iştirakı ilə keçirilmiş tədbirdə məktəbin ədəbiyyat müəllimi, şairə Məhbubə Salmanova 10 il bu təhsil ocağında dərs almış Milli Qəhrəman Gültəkin Əsgərovanın qısa, lakin şərəfli ömür yolundan söhbət açdı, şagirdlər onun qəhrəmana həsr etdiyi vətənpərvər mövzulu şeirlərini söylədilər.

Milli Məclisin deputatı Qənirə Paşayeva qəhrəmanın ağsaçlı anasına üz tutdu: “Rəfiqə ana! Siz xoşbəxt insansınız ki, hamının gözünün içinə dik baxa bilirsiniz. Siz kədərlənməməli, əksinə, başınızı uca tutmalısınız. Çünki övladınız vətənimizin bütövlüyü, torpağımızın müdafiəsi uğrunda şəhid olub. Şəhidlər hər zaman pak və müqəddəsdir. O zirvəyə hər kəs ucala bilməz”.

Qarabağ müharibəsi veteranı, polis mayoru, şair Aidə Şirin, dünya şöhrətli alim Əli Quliyev, Ombudsman aparatı mətbuat xidmətinin rəhbəri Zenfira Məhərrəmli, əməkdar mədəniyyət işçisi Səriyyə İsmayılova, jurnalist R.Allahverdiyev və başqaları xatirələrini söylədilər.

Gültəkin Əsgərovanın yeganə övladı Əminə İldırım bildirdi ki, Əsgərovlar ocağında indi balaca Gültəkin böyüyür.

Sonda Milli Qəhrəmanın anası, “Şəhid anaları” xeyriyyə mərkəzinin sədri, pedaqoji elmlər üzrə fəlsəfə doktoru, dosent, Ankara Beynəlxalq Elmlər Akademiyasının professoru Rəfiqə Əsgərova tədbir iştirakçılarına təşəkkürünü bildirdi.

R.ALLAHVERDİYEV

Respublika.- 2012.- 25 noyabr.- S.7.