Nəqliyyat xidməti daha yaxşı olmalıdır

Vaxtilə sükan arxasında əyləşib idarə etdiyi nəqliyyat vasitəsilə əhaliyə xidmət göstərəndə heç xəyalına belə gətirməzdi ki, sonralar özü yol nəqliyyatında minik və yük avtomabillərinin hərəkət fəaliyyətinə nəzarət edənlərdən biri olacaq. Ali təhsilli nəqliyyatçı diplomunu alanda yiyələndiyi ixtisas bəlkə də özündən asılı olmayaraq onu sənətə yönəltdi. Nəhayət, Nəqliyyat Nazirliyi, Dövlət Avtomobil Xidmətinin Şəki Regional şöbəsinin məsləhətçisi vəzifəsinə kimi çəkib gətirdi. Əlbəttə, xəyalına gəlməsə də, ürəyində istəyi, arzusu vardı bu sahəyə. Elə ürəyinin səsi, bir də sevib–seçdiyi peşəyə məhəbbətdir ki, haqqında söhbət açdığımız Samir Hüseynovu bu gün sürücülərə də, hətta xidməti ərazinin ünvanı olan Zaqatala və Balakən camaatına sevdirən, bir sözlə, hamının hörmətlisinə çevrilən. Bizi də bu ünvana haqqında eşitdiyimiz xidmət işçisi barədə yazmağa səsləyən də bu oldu.

Onunla Zaqatalada iş üstündə görüşdük. Söhbətimizin əvvəlində dedi ki, əsas vəzifələri müvafiq inzibati ərazidə avtomobil nəqliyyatı sisteminin idarə edilməsi və tənzimlənməsi, həmçinin Nəqliyyat Nazirliyi tərəfindən avtomobil nəqliyyatı ilə yük və sərnişin daşımaları sahəsində vahid dövlət siyasətinin və nəzarətinin həyata keçirilməsidir. Bununla əlaqədar xüsusi əsasnaməmiz var. Həmin əsasnamədən, eyni zamanda, Azərbaycan Respublikasının Konstitusiyasından, müvafiq qanunlardan, Azərbaycan Respublikası Prezidentinin fərman və sərəncamlarından, Respublika Nazirlər Kabinetinin qərarlarından, həmçinin digər müvafiq dövlət sənədlərindən irəli gələn vəzifələr fəaliyyətimizin ana xəttini təşkil edir.

Həmsöhbətim onu da vurğuladı ki, fəaliyyətinin düzgün tənzimlənməsində, nümunəvi xidmətlərlə həm dövlətin həm də nəqliyyatçıların mənafeyinin gözlənilməsində, bütün bunlarla yanaşı, xidməti ərazilərində “Azərbaycan Respublikasının Sosial İqtisadi inkişafına dair Dövlət Proqramı”nın uğurla icra olunmasında bu sahənin də yaxından iştirakının təmin olunmasında regional şöbənin, onun rəhbəri Anar Səfərlinin məqsədyönlü istiqaməti böyük rol oynayır. Başqa sözlə onlara həmişə uğur qazandırır.

Yuxarıda qeyd olunanların təkcə Zaqatala rayonu üzrə konkret faktlarla təhlilini versək bunu aydın görərik. Qeyd edək ki, yalnız Zaqatala rayonunda 85 sərnişin, 100–dən çox yükdaşıma nəqliyyatı, 65 taksi xidməti fəaliyyət göstərir. Avtomobil nəqliyyatı ilə yük və sərnişin daşımalarını həyata keçirən daşıyıcılar onların müraciəti əsasında qanunvericilikdə nəzərdə tutulmuş qaydada daşımaların müvafiq, növünə xüsusi razılıq, yəni lisenziya verilməsi diqqət mərkəzində saxlanılır. Eyni zamanda sözügedən qurumun xidmət işçiləri xüsusi razılıq şərtlərinə hüquqi şəxslər və fərdi sahibkarlar tərəfindən əməl olunmasına ciddi nəzarət olunur. Buna görə də xüsusi razılığı olanlar tərəfindən rüsumların vaxtlı–vaxtında ödənilməsi təmin olunur. Diqqətçəkən ən mühüm amillərdən biri də odur ki, yük və sərnişindaşımalarını yerinə yetirən avtomobil nəqliyyatı subyektləri tərəfindən təsdiqlənmiş norma və qaydalara, həmçinin Azərbaycan Respublikasının normativ–hüquqi aktlarına riayət olunmasına nəzarət qətiyyən unudulmur. Bu zaman təhlükəsizlik tədbirlərinə ciddi riayət olunmasına bir nömrəli iş kimi yanaşılır. Samir Hüseynov söhbət əsasında bildirdi ki, yuxarıda qeyd olunanların icra vəziyyəti vaxtaşırı keçirilən yoxlama və reydlər zamanı iş üstündə aşkarlanır, işdə nöqsan və çatışmazlıqlara yol verənlər haqqında lazimi tədbirlər görülür. Müntəzəm sərnişindaşıma fəaliyyəti göstərən sahibkarlarla 3 aydan bir müqavilə bağlanılır. Belələri 85 nəfərdir. Son vaxtlar aparılan yoxlamalar və reydlər zamanı 10–a yaxın sərnişin avtobusu yeni marşrut tipli avtobuslarla dəyişdirilmişdir. İstismar müddətini başa vuran köhnə, təmirə ciddi ehtiyacı olan maşınlara fərqlənmə nişanları verilmir.

Haqqında söhbət gedən regional xidmət sahəsinin fəaliyyətinin bir üstünlüyü də odur ki, məhz onların vasitəsilə lisenziyalaşdırılmış nəqliyyat vəasitələrinin texniki müayinəsi həmin nəqliyyat vasitələrini idarə edənlərin tibbi müayinədən keçməsi təşkil olunur. Bu tələblərə riayət etməyənlərin fəaliyyəti dayandırılır və tapşırıq icra olunur.

Avtobus və taksi dayanacaqlarının yerinin müəyyən edilməsində iştirak etmək, müvafiq qaydalara uyğun olaraq yerli marşrutların açılması, mövcud marşrutların bağlanması, dəyişdirilməsi, paralel marşrutların ləğv olunması barədə tədbirlər görmək, avtonəqliyyat vasitələrinin təhlükəsiz hərəkətlərinin təmin edilməsi, mövcud tariflərə gediş haqlarının tətbiq qaydalarına riayət olunmasına nəzarət də daim diqqət mərkəzində saxlanılır.

Yuxarıda qeyd etdiyimiz kimi ərazidə olan rayonların əlaqədar qurumlarının regionlıarın sosial–iqtisadi inkişafı ilə əlaqədar Dövlət Proqramından irəli gələn vəzifələrin icrasında da sözügedən xidmət sahələrinin özlərinə aid olan bu və ya digər köməklikləri də unudulmur. Söhbət əsasında məlum oldu ki, Samir Hüseynovun, həmçinin Şəki regional şöbəsinin bu sahədəki fəaliyyətindən elə Zaqatala rayonunda razılıqla danışırlar. Son vaxtlarda baş verən təbii fəlakətin–zəlzələnin vurduğu ziyanların aradan qaldırılmasında, həmçinin rayonun hər hansı bir sahəsində aparılan tikinti–quruculuqda onların köməyi də böyük rol oynayır. Yuxarıda qeyd olunanların hamısının bölgədə olan Balakən, Qax rayonlarında da eyni qaydada icra olunması, ümumilikdə isə ölkəmizdə nəqliyyat xidmətinin günün tələbləri səviyyəsində təşkili üçün görülən tədbirlər sözügedən xidmət sahələrinin fəaliyyətinin lazimi səviyyədə qurulduğunu təsdiq edir. İşiniz uğurlu, fəaliyyətiniz daha səmərəli olsun deyib həmsöhbətimdən ayrıldım.

Rasim AMANOV

Respublika.- 2012.- 28 noyabr.- S. 6.