Neft Daşları yeni gənclik dövrünü yaşayır

Bu gün hər bir Azərbaycan vətəndaşı ümummilli liderimiz Heydər Əliyevin dövlətçiliyimizin möhkəmləndirilməsində, iqtisadiyyatımızın dirçəlişi və yüksəlişi, ölkəmizin daxili və xarici düşmənlərdən qorunub saxlanması naminə məntiqi ardıcıllıqla apardığı düşünülmüş və uzaqgörən siyasətinin, memarı və ilhamvericisi olduğu yeni neft strategiyasının bugünkü müsbət nəticələrinin canlı şahidi olmaq xoşbəxtliyinə nail olub. Azərbaycanın ən yeni tarixinin dönüş nöqtəsi olan bir hadisənin – “Əsrin müqaviləsi”nin imzalanmasının hər ildönümü çox haqlı olaraq xalqımızın taleyində əlamətdar hadisə kimi böyük təntənə ilə qeyd olunur. Dövlət müstəqilliyimizin qazanılmasında və möhkəmləndirilməsində misilsiz xidmətləri olan neftçilərimiz də təbii ki, əsl bayram əhval–ruhiyyəsindədir. Ümummilli liderimiz Heydər Əliyevin 16 avqust 2001–ci il tarixli fərmanı ilə 20 sentyabr Neftçilər Günü elan olunmuşdur. Bu gün təkcə neftimizin deyil, dövlətimizin, xalqımızın, eləcə də dünyanın tarixində mühüm hadisə – “Əsrin müqaviləsi”nin imzalanması günüdür. Bu gün – dünyada neft ölkəsi kimi tanınan Azərbaycanın “Qara qızıl səltənəti” kimi təsdiqi bayramıdır. Azərbaycan nefti dünyaya axdıqca dövlətimizin və xalqımızın da beynəlxalq nüfuzu artmağa başladı. Yeni Neft Strategiyası ulu öndər Heydər Əliyevin tariximizə möhür vurduğu ən böyük xidmətlərindən biridir. 18 il öncə imzalanmış neft kontraktı 21–ci ildönümünü qeyd etdiyimiz Dövlət müstəqilliyimizin qarantlarından birinə çevrilmişdir, ölkəmizin qüdrətlənməsi yolunda yaşıl işıq yandırmışdır.

Ulu öndərin Azərbaycan qarşısında xidmətlərini neft sənayemizin, elə Neft Daşlarının timsalında aydın görmək olar. O, respublikaya rəhbərliyə gəldiyi ilk gündən iqtisadiyyatımızın aparıcı sahəsi olan neft sənayesinin, dəniz neftinin beşiyi olan əfsanəvi Neft Daşlarının inkişafına xüsusi diqqət yetirmişdir. Ulu öndər dəfələrlə Neft Daşlarını ziyarət etmiş, qəhrəman neftçilərimizlə görüşmüş, onların iş, yaşayış şəraiti ilə maraqlanmış, problemləri ilə tanış olmuş və onların həlli istiqamətində operativ tədbirlər görmüşdür. Məhz Heydər Əliyevin rəhbərlik etdiyi hələ ilk dövrdə Neft Daşlarının inkişafında yeni mərhələ başlamışdır. Xəzərin daha dərin qatlarına, o cümlədən “Günəşli”, “Azəri”yə doğru ilk addımlar atılmışdır. Neft sənayesinin güclü infrastrukturu yaradıldı. Ən müasir tələblərə cavab verən yeni– yeni tikinti, emal, istehsal sahələri yaradıldı, neft sənayesinin maddi–texniki bazası xeyli gücləndirildi. Bu addımlar Neft Daşlarının da inkişafına təkan verdi. Neft Daşlarında istehsal kompleksinin inkişafı ilə yanaşı, neftçilərə etibarlı infrastruktur yaradılmış, ictimai–iaşə, ticarət, sosial xidmətin səviyyəsi xeyli yüksəlmiş, mədəni–kütləvi tədbirlərin sayı, məzmunu və miqyası əhəmiyyətli dərəcədə artmışdır. Heydər Əliyev Neft Daşlarının 25 illik yubileyində çoxsaylı nümayəndə heyəti ilə birgə iştirak etmiş, “Möcüzələr adası”nın daha dinamik inkişafı ilə bağlı bir sıra səmərəli təkliflər irəli sürmüş və onların həyata keçirilməsinə nail olmuşdur. Neft Daşlarında 5 və 9 mərtəbəli yataqxana binalarının, Bakının 8–ci kilometr, Suraxanı, Zığ, Lökbatan, Sahil və digər qəsəbələrində yaşayış binalarının tikilməsi, qara qızıl ustalarının mənzil probleminin əsaslı şəkildə həlli də ulu öndərin neftçilərə qayğısının ifadəsidir. Prezident Heydər Əliyev 1997–ci ildə iki il öncədən Neft Daşlarının 50 illik yubileyi ilə bağlı sərəncam imzalamış, “Neft Daşları – XX əsrdən XXI əsrə atılmış bir körpüdür” indi dillər əzbəri olmuş müdrik fikrini tarixə həkk etmişdir. 50 illik yubiley tədbirləri mötəbər qonaqların iştirakıyla çox yüksək səviyyədə keçirilmişdir.

Ümummilli liderin düşünülmüş və qətiyyətli siyasəti Azərbaycana çox böyük uğurlar gətirib. Onun siyasi kursu bu gün onun layiqli siyasi varisi, Azərbaycan Respublikasının Prezidenti cənab İlham Əliyev tərəfindən qloballaşan müasir dünyanın tələblərinə uyğun olaraq yeni keyfiyyət və məzmunda davam etdirilir. Onun rəhbərlik etdiyi dövrdə Azərbaycan sözün əsl mənasında hərtərəfli və dinamik inkişaf mərhələsinə qədəm qoyub. İqtisadi artım sürətinə görə ölkəmiz liderlik mövqeyinə çıxıb. Qərbə, Avratlantik strukturlara, beynəlxalq qurumlara inteqrasiya prosesi daha da sürətlənib. Azərbaycanımızın beynəlxalq nüfuzunun və siyasi çəkisinin durmadan artması göz önündədir. Müasir Azərbaycanın davamlı, uğurlu inkişafı artıq reallıqdır. Azərbaycanın qüdrətli dövlətə çevriləcəyi artıq heç kəsdə şübhə doğurmur. Biz Neft Daşları əməkçiləri bunu öz gözlərimizlə görür, gündəlik həyatımızda bu yüksəlişi hiss edirik. Möhtərəm Prezidentimiz cənab İlham Əliyev 22 noyabr 2004–cü ildə Neft Daşlarının 55, sonradan – 5 noyabr 2009–cu ildə isə 60 illik yubileylərində iştirak etmiş, ümummilli liderin abidəsinin, bir sıra istehsal, sosial, mədəni təyinatlı obyektlərin açılışında iştirak etmiş, neftçilərimizlə çox isti və səmimi görüşlər keçirmiş, yubileyə həsr olunmuş təntənəli yığıncaqlarda böyük nitqlə çıxış etmiş, Neft Daşlarının perspektiv inkişafı ilə bağlı proqram xarakterli fikirlər söyləmişdir. Prezidentimizin bu fikri Neft Daşlarının rolunu, əhəmiyyətini və perspektivlərini daha aydın göstərir: “Əminəm ki, Neft Daşları hələ uzun illər Azərbaycana çox ləyaqətlə xidmət edəcəkdir… Hamımız yaxşı bilirik ki, Neft Daşları olmadan Azərbaycanda heç bir böyük neft və yaxud qaz layihəsi mümkün deyildir. Bizim bütün xətlərimiz və gələcəkdə istismara veriləcək yeni layihələr hamısı Neft Daşlarında birləşir. Ona görə də Neft Daşlarının əhəmiyyəti heç vaxt aşağı düşməməlidir, biz hamımız bunu bilməliyik”.

Biz dəniz neftçiləri ölkə rəhbərliyinin dəstəyindən, qayğıkeş münasibətindən, bütün ehtiyac və problemlərimizə həssaslıqla yanaşan ARDNŞ rəhbərliyinə dərin minnətdarlığımızı bildiririk və əmin edirik ki, ölkəmizin, dövlətimizin və xalqımızın taleyi üçün çox vacib və əvəzsiz olan neft və qazın hasilatı sahəsində möhtərəm Prezidentimizin, müstəqil dövlətimizin etimadını doğrultmaq üçün maksimum enerji və təşəbbüskarlıqla işləyəcəyik! Neft Daşları əməkçiləri həmişə tariximizə qəhrəmanlıq səhifələri yazıblar, bu gün də bu ənənələri yaşatmaq və artırmaq əzmindədirlər. Əziz peşə bayramlarını— Neftçilər Gününü alnıaçıq, üzüağ qarşılayırlar. Bayram bir növ hesabatdır, bu əziz gündə gördüyümüz işlərə nəzər salmaq yaxşı olardı.

“Neft Daşları” NQÇİ–nin əməksevər kollektivi ənənəvi olaraq 2012–ci ilin 8 ayı ərzində də neft, qaz hasilatı və təhvili üzrə qarşıya qoyulmuş tapşırıqları uğurla yerinə yetirmişdir. Neft hasilatı üzrə 616 150 ton plana qarşı 619 731 ton neft hasil edilərək tapşırığı 100,6 faiz yerinə yetirmişdir. Keçən ilin müvafiq dövrü ilə müqayisədə artım tempi +1,6 faiz və yaxud 8495 ton təşkil etmişdir. Neft təhvili tapşırığına 100,8 faiz əməl olunaraq 5155 ton artıq neft dövlətə təhvil verilmişdir. Keçən ilin müvafiq dövrü ilə müqayisədə neft təhvili 10 305 ton çox, artım tempi isə +2 faiz təşkil etmişdir. Qaz hasilatı üzrə plan tam yerinə yetirilmiş, 44 360 min kubmetr qaz hasil edilmişdir. 2012–ci il 1 sentyabr tarixinə 504 istismar quyu fondu olmuş, ondan da 93,8 faizi, yəni 473–ü fəaliyyətdə olan quyu fondunu təşkil etmişdir. Bu quyu fondunun 411 qazlift üsulu ilə, 58–i fontan və 4–i isə dərinlik nasosu üsulu ilə istismar olunur. Qazımadan 6 quyu istismara daxil olmuş və onlardan 10 284 ton neft hasil edilmişdir. Fəaliyyətsiz fonddan 8 quyu əvəzinə 9 quyu bərpa edilib istismara daxil edilmişdir ki, bu da keçən ilin müvafiq dövrünə nisbətən 1 quyu çox olmuş, bu quyulardan hasilat isə 3365 tona qarşı 5471 ton (+2106 t) olmuşdur.

Köhnə quyularda neft hasilatının səviyyəsini sabit saxlamaq məqsədilə 164 əvəzinə 246 texniki tədbirin həyata keçirilməsi nəticəsində 9322 ton neft hasil olunmuşdur ki, bu da keçən illə müqayisədə sayca 37 tədbir az olsa da, hasilat 248 ton çoxdur. Bu dövr ərzində 63 geoloji tədbir həyata keçirilməsi hesabına 29 907 ton neft hasil olunmuşdur. Keçən illə müqayisədə 10 tədbir az olmasına baxmayaraq hasilat 6936 ton çox olmuşdur. İstismar quyularında hasilatı sabit saxlamaq üçün əsaslı və cari təmirin aparılmasına ciddi diqqət yetirilir. Cari ilin 7 ayı ərzində 127 əvəzinə 133 əsaslı, 364 əvəzinə 369 yeraltı təmir işi aparılmışdır ki, bunun da sayəsində 44 346 ton əlavə neft hasil edilmişdir ki, bu da ötən ilin müvafiq dövrü ilə müqayisədə 1263 ton çox olmuşdur.

Neft Daşlarında istismar olunan hər iki yataq – “Neft Daşları” və “Palçıq pilpiləsi” istismar dövrünün son mərhələsində olduğu üçün lay təzyiqinin saxlanması və neft verimini artırmaq məqsədilə mütərəqqi üsullardan istifadə olunur. Lay təzyiqini sabit saxlamaq üçün 12 quyu vasitəsilə 187 735 kubmetr həcmində su vurulmuş və bunun hesabına 11 686 ton, 3–cü təsir üsulları hesabına isə 490 ton neft hasil olunmuşdur. Bu ilin müvafiq dövrü ərzində neftqazçıxarma ilə əlaqədar 8 adda yeni texnika və texnologiyanın tətbiqi üzrə 62 texniki–texnoloji tədbir həyata keçirilmiş və əlavə olaraq 4183 ton neft hasil edilmişdir. Elmi–tədqiqat institutları və “Nanotexnologiyalar Elm–İstehsalat Mərkəzi”nin nümayəndələri ilə birgə bir sıra sınaq və tətbiqi işləri müzakirə olunaraq planlaşdırılmışdır və həyata keçirilməyə başlanmışdır.

Sosial problemlərin həllində də nailiyyətlər əldə olunmuşdur. Neftçilərin əmək, yaşayış və istirahət şəraitinin yaxşılaşdırılması istiqamətində böyük işlər görülmüşdür. Bu gün Neft Daşları əməkçiləri müasir standartlara cavab verən iş və yaşayış şəraitinə malikdir. 2 ay öncə 9 mərtəbəli yataqxana binası əsaslı təmir olunaraq neftçilərin ixtiyarına verilmişdir. Kişilər üçün nəzərdə tutulmuş bu korpusda bütün otaqlar müasir inventar və avadanlıqlarla təchiz edilmişdir. Açılış mərasimində ARDNŞ–in prezidenti R.Abdullayev və digər rəhbər şəxslər iştirak etmişlər. Fürsətdən istifadə edərək qazandığımız bütün uğurlarımızda bizə dəstək və yardımçı olmuş ARDNŞ rəhbərliyinə, şəxsən R.Abdullayevə, “Azneft” İB–nin rəhbərliyinə neftçilərimizin səmimi minnətdarlığını bildirmək istəyirəm. Cari ildə sosialyönümlü tədbirlər davam etdirilmişdir. İAKTS–nin yerləşdiyi ərazinin qəzalı vəziyyətində olduğu üçün başqa meydançada sex üçün yeni inzibati binanın və köməkçi sexlərin, yeni istilik–elektrik stansiyasının tikintisi ilə əlaqədar İES üçün yeni inzibati binanın tikintisinə başlanmışdır. Özüllərdə neftçilərin əməyi, istirahəti üçün əlverişli şərait yaradılmışdır. Yataqxana korpuslarında, çay evində, qəsəbə ərazisində, vertolyot meydançasında, sex və briqadalarda, ayrı–ayrı özüllərdə cari təmir işləri aparılmışdır. Gözəlliyinə görə Bakıdakı parklardan heç də fərqlənməyən parkımızda Neft Daşları yatağını kəşf etmiş əfsanəvi geoloq Ağaqurban Əliyevin barelyefi qoyulmuşdur. Neftçilər 20 Yanvar, Xocalı soyqırımı mərasimlərində ehsan verməklə şəhidlərimiz yad edilir. Novruz Bayramı, Qurtuluş Bayramı, Qadınlar Günü, Neftçilər Günü böyük coşqu ilə qeyd olunur.

İdman yarışlarında neftçilərimizin uğurları ildən–ilə artır. “Neftçi” İSM–in təşkil etdiyi kişilər arasında voleybol yarışında “Neft Daşları” NQÇİ–nin komandası 1–ci yeri tutaraq mükafata layiq görülmüşdür. 28 may – Respublika Günü münasibətilə Neft Daşlarında yerləşən idarə və müəssisələr arasında mini futbol yarışı keçirilmiş və bizim komandamız bu yarışın da qalibi olmuşdur. Neftçilərin idman və bədən tərbiyəsi ilə məşğul olması, sağlamlıqlarının mühafizəsi üçün gözəl şərait yaradılmışdır. Neftçilərin yay istirahəti də diqqət mərkəzində saxlanılmışdır.

Neft Daşları müasir tariximizin ən parlaq səhifələrindən biri kimi fəxarət yerimizdir. Neft Daşları xalqımızın Xəzərə vurduğu tarixi möhür kimi fəxarət yerimizdir və daim onun şöhrətini yaşatmağa, uğurlarının statistikasını və coğrafiyasını artırmağa və genişləndirməyə çalışırıq. Bu gün böyük qürur hissi ilə qeyd edə bilərik ki, 63 il əvvəl fırtınalı Xəzərin dalğaları qoynunda təməli qoyulan Neft Daşları bu gün yeni yüksəliş dövrünü yaşayır, nəhəng neft– qaz istehsalı kompleksinə, gözəlliyi və abadlığı ilə hamını heyran qoyan müasir şəhərə çevrilmişdir. Bu gün “Möcüzələr adası”nın hər bir əməkçisi çox rahat, müasir beynəlxalq standartlara cavab verən iş, yaşayış və istirahət şəraiti ilə təmin olunmuşdur. Bütün bu uğurlar təşəbbüskarı, təşkilatçısı və memarı ümummilli liderimiz Heydər Əliyevin olduğu Yeni Neft Strategiyasının möhtərəm Prezidentimiz İlham Əliyev tərəfindən uğurla davam etdirilməsi sayəsində mümkün olmuşdur. Hər addımımızda bu gün beynəlxalq nüfuzu günbəgün artan, dünyanın aparıcı şirkətləri səviyyəsinə yüksələn ARDNŞ–in, onun rəhbərliyinin ardıcıl qayğısını və dəstəyini hiss edirik. Biz bu əziz bayram günündə əmin edirik ki, Neft Daşları dəniz neftinin bayraqdarı kimi öz qəhrəmanlıq ənənələrinə sadiq qalacaq, neft–qaz hasilatının sabit saxlanması və artırılması üçün bütün gücünü səfərbər edib qarşıya qoyulmuş məqsədə nail olacaq, dövlət tapşırıqlarını həmişəki kimi vicdanla yerinə yetirəcək!

Bayramınız mübarək, əziz neftçilər!

Sərxan Babaşov

Respublika.- 2012.- 20 sentyabr.- S. 6.