Dəniz neftçiləri ili uğurla başa vurmaq əzmilə çalışır

“28 May” NQÇİ 2012–ci il üzrə neft və qaz hasilatı üzrə tapşırıqlarını artıqlaması ilə yerinə yetirmişdir.

Neft hasilatı üzrə 4 995 800 ton plana qarşı 5 010 541 ton neft hasil edərək tapşırığa 100,3 faiz əməl olunmuşdur.

Hasil edilmiş neftin 73,2 faizi yəni 3 669 729 tonu qazlift, 26,8 faizi isə və ya 1 340 812 tonu fontan üsulu ilə çıxarılmışdır.

Kateqoriyalar üzrə neft hasilatına nəzər yetirdikdə görürük ki, 2012 –ci ildə hasil olunan neftin 95,3 faizi və ya 4 772 685 tonu keçən ildən keçən quyuların, 4,2 faizi və ya 211 103 tonu yeni quyuların və 0,5 faizi və ya 26 753 tonu isə fəaliyyətsiz fonddan daxil olan quyuların hesabına olmuşdur.

Neftin nəqlə təhvili üzrə 4 982 080 ton plana qarşı 4 992 007 ton təhvil verilərək tapşırığa 100,2 faiz əməl olunmuşdur.

6 021 939 min kubmetr qaz hasil edilmişdir. Hasil edilən qazın 1 072 027 min kubmetri səmt qazı, 4 949 912 min kubmetri isə təbii qazdır.

5 227 629 min kubmetr q

az təhvil verilmişdir.

Keçən illə müqayisədə qaz satışı 37 457 min kubmetr artmışdır və artım tempi 0,7 faiz təşkil etmişdir.

Bu ilin əvvəlinə istismar quyu fondu 277 quyu olmuşdur ki, bunların 258–i fəaliyyətdə olan quyu fondunu təşkil etmişdir. Fəaliyyətdə olan quyu fondunun 199–u neft quyusu, 59–u isə qaz–kondensat quyusu olmuşdur. Fəaliyyətdə olan neft quyularının 173–ü qazlift üsulu ilə, 26–sı isə fontan üsulu ilə istismar olunub. Həmin dövrə fəaliyyətsiz fondda 19 quyu olmuşdur ki, bunlardan da 16–sı neft, 3–ü qaz–kondensat quyusu olmuşdur.

Təkcə ötən il ərzində 12 yeni quyu istismara daxil edilmiş (5–i qaz, 7–si neft quyusu) və həmin quyulardan 211 103 ton neft və 196 516 min kubmetr təbii qaz hasil edilmişdir. Yeni quyuların 11–i qazmadan, 1–i isə digər fondlardan təzə quyu kimi daxil olmuşdur. Qazmadan alınan quyuların 7–si neft, 4–ü isə qaz— kondensat quyuları olmuşdur ki, onlardan da müvafiq olaraq 211 103 ton neft və 157 359 min kubmetr təbii qaz hasil edilmişdir.

Fəaliyyətsiz quyu fondundan 3 neft quyusu istismara daxil edilmiş və onlardan 26 753 ton neft hasil edilmişdir.

Fəaliyyətdə olan quyu fondunu saxlamaq və neft hasilatını artırmaq məqsədi ilə hesabat dövründə 40 geoloji tədbir əvəzinə 31 tədbir həyata keçirilmişdir. Bu tədbirlər nəticəsində 145 443 ton neft hasil olunmuşdur.

Hesabat dövründə 160 texniki tədbir əvəzinə 192 texniki tədbir həyata keçirilmiş və nəticədə 20 959 ton neft alınmışdır. Keçən illə müqayisədə səmərə də 334 ton çox olmuşdur.

“28 May” NQÇİ–nin yeni texnika və texnologiyanın tətbiqi planında bir sıra tədbirlərin yerinə yetirilməsi nəzərdə tutulmuşdur ki, bu tədbirlər də neft hasilatının artırılmasına yönəldilmiş tədbirlərdir.

Yataqların əksəriyyəti istismarın son mərhələsində olduğundan, lay təzyiqinin saxlanması və layların neftveriminin artırılması məqsədilə laylara su vurulması üsulu tətbiq edilir. 2012–ci ildə bu məqsədlə laylara 2 769 916 kubmetr su vurulmuş və bunun hesabına 76 866 ton neft hasil olunmuşdur.

Bundan başqa, NQÇİ–də 3–cü təsir üsulları, yəni laylara səthi aktiv maddələrin vurulması hesabına da 7 680 ton neft hasil olunmuşdur.

Yataqların işlənməsinə nəzarət üçün elmi–tədqiqat işlərinin aparılması vacib şərtlərdəndir. Belə ki, cari ildə bu işlər kompleks şəkildə davam etdirilmişdir.

Alınan nəticələrin interpretasiyası aparılaraq qrafiki materiallar tərtib olunmuşdur.

Hesabat ilində quyularda hasilatın səviyyəsinin saxlanılması məqsədilə bir çox əsaslı və yeraltı təmir işləri də aparılmışdır.

Bu baxımdan hesabat dövründə quyularda 80 əsaslı təmir planına qarşı 87 əsaslı təmir, 72 yeraltı təmir planına qarşı isə 81 yeraltı təmir işləri aparılmış və nəticədə əsaslı təmir aparılmış quyulardan 145 109 ton, yeraltı təmir aparılmış quyulardan isə 36 099 ton neft hasil edilmişdir.

Avadanlıqların etibarlılığının artırılması, yenilənməsi, müasir avadanlıqların istehsalata tətbiqi və təhlükəsizlik qaydalarına əməl olunması istiqamətində bir sıra işlər görülmüşdür.

2012–ci ildə “28 May” NQÇİ–nin sosial sahəsində də xeyli işlər görülmüşdür.

“28 May” NQÇİ–nin köhnə inzibati binasında təmir işləri aparılıb və istilik sistemi ilə təchiz olunmuşdur. 2,9,15 saylı özüllərdəki və Neft Daşları sahəsindəki NİH və NS–nin yaşayış blokları əsaslı təmir olunub, yeni mebel və avadanlıqlarla təchiz edilərək işçilərin istifadəsinə verilmişdir: 2012–ci il ərzində mütəmadi olaraq, təmirə ehtiyacı olan məişət avadanlıqları təmir olunmuşdur. Dəniz özüllərinin hər biri 1 ədəd yeni paltaryuyan maşın və 1 ədəd çörəkbişirmə sobası ilə təmin olunmuşlar. Bütün DDÖ–lərin yeməkxanaları qab–qaşıqlarla təmin edilmişdir.

“28 May” NQÇİ–də ətraf mühitin mühafizəsi sahəsində 2012–ci il ərzində bir–sıra tədbirlər həyata keçirilmişdir. 24 quyuda keçirilmiş geoloji tədbirlər nəticəsində 27 460 ton lay suyunun qarşısı alınmışdır. İdarənin “Neft Daşları”nda yerləşən sahəsində neftin ilkin hazırlanması zamanı ayrılan lay suları, yeni istismara verilmiş, müasir təmizləyici qurğuda təmizlənib utilizasiya olunmuşdur. Dəniz özüllərində formalaşan məişət–təsərrüfat çirkab sularının təmizlənməsi məqsədilə, 8, 15 və 19 saylı özüllərdə “Topaz–75″ markalı, bioloji təmizləyici qurğular quraşdırılmışdır.

“Baku STEEL” MMC tərəfindən 3 136 ton qara metal qırıntısı sahilə daşınmışdır. Çilov adasında çirkab sularının “KU–200″ qurğusunda bioloji üsulla təmizlənməsi aparılmışdır. Çilov adasında il ərzində 7 200, hazırkı dövrə qədər isə 42 200 ağac əkilmişdir. Ağac əkilmiş sahələr metal torla hasarlanmış və suvarma sistemi ilə təchiz olunmuşdur. Çilov əmtəə çənləri parkının ətrafında uzun müddət formalaşan çirkli gölməçələrin qurudulması məqsədilə 7 ha ərazidə mexaniki rekultivasiya işləri aparılmışdır. Məişət tullantılarının utilizasiyası məqsədilə məişət tullantıları sobası istismara verilmişdir.

“28 May” NQÇİ–nin əmək kollektivi 2013–cü ildə öz istehsalat fəaliyyətini ARDNŞ və “Azneft” İB–nin qarşıya qoyduğu vəzifələrə uyğun olaraq neft–qaz hasilatını sabit saxlamaq və qismən artırmaq üçün intellektual potensialını və daxili ehtiyat mənbələrini üzə çıxarmaqla, beynəlxalq standartlara söykənərək keyfiyyətli, ətraf mühitə ziyan vurmadan və təhlükəsiz yerinə yetirmək əzmindədir.

Ötən ayların yekunları da deyilənlərin uğurla yerinə yetiriləcəyindən xəbər verir. İki ayın tapşırıqları neft hasilatı üzrə 100,6 faiz, neft təhvili üzrə 100,65 faiz yerinə yetirən neftçilərimiz 2013–cü ilə böyük ruh yüksəkliyi ilə başlamışdır. Qaz hasilatı planını 102,64 faiz, qaz təhvili planını isə 100,72 faiz yerinə yetirmişlər.

Qarşıda duran məsul və şərəfli vəzifələrin yerinə yetirilməsi 2013–cü ilin tapşırıqlarına artıqlaması ilə əməl olunması üçün səylərimizi bundan sonra da səfərbər edəcəyik.

Rövşən Qarayev,

“Azneft” İB–nin “28 May” NQÇİ–nin rəisi

Respublika.- 2013.- 4 aprel.- S. 6.