Suvarma tədbirlərinə diqqət artırılır

Əhalinin maddi rifahının, sosial vəziyyətinin yaxşılaşdırılması torpaqlara və onların suvarılmasına xüsusi diqqət yetirilməsindən başlanır. Neftçala torpaqlarının da suvarma və meliorasiya tədbirlərinə həmişə ehtiyacı olub, indi də belədir, sabah da bu cür olacaq. Torpaqlar genişdir, böyük bir hissəsi şorandır, fasiləsiz hidromeliorasiya işləri görmədən bu əraziləri cana gətirmək mümkün deyildir. Bu işlərin əsas hissəsi Neftçala Suvarma Sistemləri idarəsinin kollektivinin çiyinlərinə düşür.

İdarənin rəhbəri Elçin Əsədov təcrübəli mütəxəssisdir, uzun illərdir ki, meliorasiya və su təsərrüfatı sistemində çalışır, doğma peşəsinin sirlərini incəliklərinə qədər bilir.

E.Əsədov ilk olaraq kollektivin həyata keçirdiyi tədbirlər haqqında məlumat verərək qeyd etdi ki, rayonun kənd təsərrüfatı işçiləri həmişə olduğu kimi, 2013–cü ilin ilk aylarında da yeni qüvvə və ruh yüksəkliyi ilə yaşayır və işləyirlər. Onlar torpağın qədrini bilirlər, onu əsas dolanışıq mənbəyi kimi qəbul edirlər. Torpaqların məhsuldarlığını artırmaq üçün meliorasiya və suvarma tədbirləri genişləndirilir, suvarma kanalları, kollektor–dren sistemi lildən təmizlənir, hidrotexniki qurğu və nasos aqreqatları əsaslı və cari təmir edilir.

Regionların sosial–iqtisadi inkişafına, əhalinin ərzaq məhsulları ilə etibarlı təminatına, habelə meliorasiya və irriqasiya, suvarma tədbirlərinin miqyasının genişləndirilməsinə dair Dövlət proqramları aqrar bölmənin dinamik inkişafını təmin etmək üçün suvarma və meliorasiyanı əsas vəzifələrdən biri kimi meydana qoymuşdur. İdarəmizin kollektivi bu sahədə öz işlərini yeni tələblər səviyyəsində qurmağa çalışır.

Son illərdə rayonumuzda torpaqların meliorativ cəhətdən yaxşılaşdırılması, münbitliyin artırılması, şoranlaşmanın qarşısının alınması və təsərrüfatların suvarma suyu ilə təminatının yüksəldilməsi istiqamətində xeyli iş görülmüş, təsirli tədbirlər həyata keçirilmişdir.

Ərazilərdə yeni kollektor drenaj şəbəkələri tikilib istifadəyə verilmiş, mövcud şəbəkələr və suvarma kanalları lildən təmizlənmiş, hidrotexniki qurğular əsaslı təmir olunmuşdur.

Yeni–yeni əmək göstəriciləri əldə edən kənd əməkçilərinin fəaliyyəti haqqında ürəkdolusu söz açan Elçin müəllim söylədi ki, görülən işlər birbaşa kənd təsərrüfatı məhsulları istehsalının yüksəldilməsinə xidmət edir və bunun sayəsində rayonda aqrar bölmə sürətlə inkişaf edir.

O sözünə davam etdi:

—İşgüzar kollektivimiz var. Mən burada çalışdığım uzun illər boyu bir dəfə də müşahidə etməmişəm ki, fəaliyyətimizdən kimsə narazılıq etsin. Başqa cür ola da bilməz, kifayət qədər təcrübəmiz vardır, doğma işə öyrəncəliyik, torpaq üzərində çalışan insanlara üz–gözümüz öyrəşib.

21 Sudan istifadə birliyi ilə birgə fəaliyyət yaxşı nəticələr verir, suların paylanmasında, bu zaman ədalətlilik, şəffaflığın gözlənilməsində mühüm rol oynayır.

Müsahibim deyir:

—Meliorasiya və suvarma münasibət həm ümumsiyasi, həm də ekoloji problemdir, bu, insanın bioloji varlığı, gələcək həyatımızla bağlı olan məsələdir. Mən bir mütəxəssis kimi sevinirəm ki, xüsusilə son vaxtlar bu problemə dövlət səviyyəsində ciddi münasibət bəslənir, ulu öndər Heydər Əliyevin əsasını qoyduğu aqrar islahatlara uyğun kompleks tədbirlər silsiləsində torpaqlardan və sudan istifadə problemi prioritetə çevrilmişdir. Prezident cənab İlham Əliyev, demək olar ki, hər çıxışında həmin məsələyə toxunur, işlərin nə qədər ciddi olduğunu vurğulayır, qarşımıza vəzifələr qoyur.

İdarənin kollektivi 38138 hektar torpaq sahəsinin suvarılmasını öz çiyinlərinə götürmüşdür. 2012–ci ildə 2600 hektar pambıq tarlası 3 dəfə suvarılmışdır. 23789 hektar taxıl zəmilərinə orta hesabla 2,5 dəfə su verilmişdir. Bundan başqa 1400 hektar həyətyanı sahə, 10000 hektardan çox yoncalıq, xeyli tərəvəz və bostan əkinləri suvarılmış, torpaqlar meliorasiya cəhətdən yaxşılaşdırılmışdır. Bu qədər işləri görmək üçün 996 kilometrlik suvarma kanalları, 41 stasionar nasos stansiyası, 1369 hidrotexniki qurğu istifadədədir. 2012–ci ildə 70 hidrotexniki qurğu, 22 nasos aqreqatı, 35 elektrik mühərriki əsaslı və cari təmirdən çıxmışdır. 485 kilometr kanal lildən təmizlənmiş, bu işin vüsəti əvvəlki illərdəkinə nisbətən iki dəfə artmışdır. Uzunbabalı–82, Qaravəlli, Tatarməhlə, Qələbə və Xanlar nasos stansiyalarında keyfiyyətli təmir və bərpa işləri aparılmış, onların təkcə texniki göstəriciləri deyil, eyni zamanda xarici estetik görkəmi də xeyli yaxşılaşdırılmışdır. Əlavə olaraq keçmiş kolxozlardan miras qalmış 654 kilometr köhnə kanalların bərpası sahəsində xeyli iş aparılmışdır. Düşünürük ki, bu kanallar primitiv olsa da, relyef və əkin sahələrinə yaxınlıq cəhətdən hələ müəyyən səmərə verə bilər.

Bu il Ərəbqardaşbəyli, Şirvan–Qaraqaşlı, Abbasallı, Aşağı Surra, Xoşçobanlı nasos stansiyalarında təmir və bərpa işlərinə başlanılmışdır. Xolqarabucaq–Neftçala magistral su kanalının çəkilməsi ən iri layihələrdəndir, onun həcmi təqribən 70 milyon manatlığa çatır. İndiyədək 10 milyon manatlıqdan çox iş görülmüşdür. İlkin mərhələdə burada 3 milyon manatlıq tikinti–quraşdırma tədbirlərinin aparılması nəzərdə tutulmuşdur. Bu mühüm iş başa çatdırıldıqdan sonra təqribən 5600 hektar yeni taxıl sahələri dövriyyəyə daxil olacaqdır.

Son illərdə Aşağı Qaramanlı nasos stansiyasında vaxtilə Kür çayında daşqınlar zamanı yeni qol çəkilməsi nəticəsində yaranmış su qıtlığı üzündən işlər yaxşı getmirdi, yerli fermerlər tez–tez su çatışmazlığından narazılıq edirdilər. Əlaqədar təşkilatların, rayon rəhbərliyinin köməyi ilə bu problem tez bir zamanda qismən aradan qaldırıldı. Lakin burada işlər davam etdirilir, irihəcmli layihənin həyata keçirilməsi tezliklə başa çatdırılacaq, su çatışmazlığına son qoyulacaqdır.

Şübhəsizdir ki, bütün bu işləri görmək texniki vasitələr, güclü nasoslar, maşın və mexanizmlər olmadan qeyri–mümkündür. Buna görə də hər şeydən əvvəl maşın–texnika parkının komplektləşdirilməsinə diqqəti gücləndiririk. Hazırda idarəmizin balansında kifayət qədər texniki vasitələr, maşın və mexanizmlər, yük maşınları vardır. 8 ekskavator, 2 buldozer, 16 avtonəqliyyat və kifayət qədər digər maşınlar suçuların istifadəsindədir. Rayon rəhbərliyinin, respublika Meliorasiya və Su Təsərrüfatı ASC əməkdaşlarının, suvarma ilə məşğul olan təşkilatların bu işdə köməyini yüksək qiymətləndiririk.

Elçin Əsədov söhbətimizin yekununda belə dedi:

–Biz yaxşı başa düşürük ki, görülmüş işlər son hədd deyildir, möhtərəm Prezidentimizin qarşıya qoyduğu məsul vəzifələri, rayon rəhbərliyinin hazırlayıb həyata keçirdiyi planları yerinə yetirməkdə səylərimizi ardıcıl olaraq davam etdirməliyik. Yazın gəlişi qayğılarımızı daha da artırmışdır. Hazırda işçilərimizin boş vaxtı, demək olar ki, yoxdur, obyektlərə vaxtlı–vaxtında su verilməsinə, su kəmərlərinə, hidrotexniki qurğulara və avadanlıqlara ciddi nəzarət edirik.

Bəli, bu il suvarma işçilərinin işgüzarlığı olduqca yüksəkdir, onlar bu günlər yalnız yenilik hissi ilə yaşayıb yaradırlar. Bu yüksək fəallığa əsaslanaraq qəti əminliklə deyə bilərik ki, onlar qarşıda duran vəzifələri uğurla həyata keçirəcək, su təminatı tədbirlərini daha yüksək səviyyədə aparacaq, aqrar sahəni inkişaf etdirmək və əhalinin ərzaq məhsulları ilə təminatını daha da yaxşılaşdırmaq işinə sanballı kömək göstərəcəklər.

Sabir MUSTAFAYEV

Respublika.- 2013.- 4 aprel.- S. 6.