“Abşeronneft” NQÇİ neft və qaz hasilatını artırıb

2013–cü ilin 3 ayında “Abşeronneft” NQÇİ–də nəzərdə tutulan neft hasilatı üzrə tapşırıq 51 790 ton əvəzinə 54 513 ton, yəni 105,3 faiz yerinə yetirilmişdir, əlavə 2 723 ton artıma nail olunmuşdur. Keçən ilin müvafiq dövrü ilə müqayisədə neft hasilatı 1 808 ton artmışdır.

Neft təhvili üzrə tapşırıq 50 870 ton əvəzinə 53 723,3 ton, yəni 105,6 faiz yerinə yetirilmişdir və plandan əlavə 2 853,3 ton neft təhvil verilmişdir. Keçən illə müqayisədə neft təhvili 791,6 ton artmışdır.

Qaz hasilatı planı 101,1 faiz yerinə yetirilmişdir, plandan əlavə 126 min kubmetr artıq qaz hasil edilmişdir.

Qaz təhvili planı 101,9 faiz yerinə yetirilmişdir və plandan əlavə 127,1 min kubmetr artıq qaz təhvil verilmişdir.

“Abşeronneft” NQÇİ–də 3 ay ərzində 1 milyon 653,5 min kubmetr qaz sərfi olub. Onun 1 milyon 490 min kubmetri neftin hazırlanmasında, 123 min kubmetri idarənin struktur bölmələrinə və 40,5 min kubmetri “Azəriqaz” İB–dən alınan və sexdaxili ehtiyaclara sərf olunan yanacaq qazı olmuşdur.

2013–cü ilin 2 ayında fəaliyyətsiz fonda quyu keçməyib. 2012–ci ildə isə fəaliyyətsiz fonda 1 quyu keçib.

Hazırda Neftqazçıxarma İdarəsi üzrə istismarda 519 quyu var. Bunların da 7–si qaz quyusudur.

Mənimsəmədə olan quyu fondunda 15 quyu var. Bu da keçən illə müqayisədə 2 quyu çoxdur.

Bu ilin 2 ayında fəaliyyətsiz fonda quyu keçməyib.

2013–cü ilin 3 ayında fəaliyyətsiz quyu fondundan 6 quyu təmir edilərək istismara daxil olunmuşdur (plan—2 quyu), nəticədə 639 ton neft hasil edilmişdir (plan—55 ton). 2012–ci ilin 3 ayında 14 quyu istismara daxil edilib və bu quyudan 1 671 ton neft hasil edilib.

Qazmadan 2013–cü ilin 3 ayında istismara 4 quyu daxil edilib, nəticədə 1 220 ton neft hasil edilmişdir.

Keçici fonddan 52 654 ton və planda nəzərdə tutulduğundan 2 120 ton çox neft hasil edilmişdir. 2012–ci ilin 3 ayında keçici fonddan 49 153 ton neft hasil edilib. Keçən illə müqayisədə bu il 3 501 ton çox neft hasil edilib.

2013–cü ilin 3 ayında 165 texniki tədbir həyata keçirilmişdir (plan—100 tədbir) və bu tədbirdən 882 ton neft hasil edilmişdir (plan—480 ton). 2012–ci ilin 3 ayında 104 texniki tədbir keçirilmiş və onlardan 387 ton neft hasil olunmuşdur. Keçən illə müqayisədə tədbirlərin sayı 61 tədbir, hasil edilən neft isə 495 ton artıb.

Bu ilin 3 ayında 16 geoloji tədbir keçirilib (plan—5 tədbir) və bu tədbirlərdən 271 ton neft səmərə alınıb (plan—200 ton). 2012–ci ilin 3 ayında 8 geoloji tədbir keçirilib və bu tədbirdən 82 ton neft alınıb.

2013–cü ilin 3 ayında 14 yeraltı təmir briqadaları vasitəsilə 511 yeraltı təmir həyata keçirilmişdir, bu da plana (plan—395 təmir) nisbətən 116 təmir çox olmuşdur. 2012–ci ilin müvafiq dövründə 409 təmir olmuşdur, keçən ilə nisbətən təmirlərin sayı 102 təmir artıb.

2013–cü ilin 3 ayında 10 əsaslı təmir briqadaları vasitəsilə 36 əsaslı təmir həyata keçirilib, bu da plandan 8 təmir çox olmuşdur. Bu göstərici 2012–ci ilin müvafiq dövrü ilə müqayisədə 14 təmir artıb. Əsaslı təmirdən sonra təmir olunmuş quyulardan 2 ay ərzində 340,1 ton neft hasil olunmuşdur.

2013–cü ilin 3 ayı ərzində NQÇİ–nin ekologiya sahəsində, təbii sərvətlərdən səmərəli istifadə və ətraf mühitin mühafizəsinə dair təsdiq olunmuş tədbirlər planı üzrə xeyli işlər yerinə yetirilmişdir. 3 ay ərzində 1120 metr müxtəlif ölçülərdə neft kollektoru, 90 metr qaz xətti, 735 metr atqı xətti təmir edilmişdir. Neftyığma məntəqəsində, sexlərdə planda nəzərdə tutulmuş 15 ədəd su və 14 ədəd nasoslar təmir edilmişdir.

2013–cü ilin 3 ayı ərzində 47 ədəd müxtəlif ölçülü siyirtmə və ventillər təmir edilmişdir, 56,4 min kubmetr lay suyu çıxarılmış və “28 May” NQÇİ–dən müqavilə əsasında—2,840 min kubmetr lay suyu alınmış—111,3 min kubmetr su utilizasiya edilmişdir. Müqavilə əsasında Xəzər Rayon Su–Kanal Departamentindən 2,7 min kubmetr su alınmış, sosial–məişət və istehsalat məqsədlərinə sərf edilmişdir.

Cari ilin 3 ayı ərzində 12,5 min kubmetr dəniz suyu götürülmüş “ƏKS–OSMOS” qurğusunda 4,2 min kubmetr təmizlənib və nasoslar vasitəsilə dörd istiqamətdə nəql edilib. İdarənin daxili imkanları hesabına yol kənarları təmizlənib və hamarlanıb. 2 ədəd gölməçə qurudulmuş, ərazi məişət və istehsalat tullantılarından təmizlənmiş və abadlaşdırma işləri aparılmışdır.

“Ekol Mühəndislik Xidmətləri” QSC tərəfindən 8850 ədəd ağaca qulluq göstərilir. İdarənin öz gücü ilə mart ayı ərzində inzibati binasında, sex və sahələrində 600 ədəd zeytun ağacı, 150 ədəd dekorativ ağac kolu, 700 ədəd qızılgül kolu və 400 ədəd mövsümi gül əkilib.

Quyuların yeraltı və cari təmiri zamanı istifadə olunan qapalı yuma qurğusu hazırlanıb 210, 190, 340 saylı özüllərə quraşdırılmaq üçün qoyulub.

2013–cü ilin 3 ayı ərzində “STANDART–2005″ MMC–yə 2 ton əlvan metal qırıntısı (alüminium) təhvil verilmişdir. Ekologiya İdarəsi tullantılar mərkəzinə 0,068 ton işlənmiş təşkilati avadanlıqları, 50 kiloqram süzgəc, 10 kiloqram boya qabları, 20 kiloqram lüminessensiya lampaları və 20 kiloqram yağlı və neftli əskilər təhvil verilib.

2013–cü ilin 3 ayı ərzində Azərbaycan Respublikası Ekologiya və Təbii Sərvətlər Nazirliyinin Ətraf Mühitin Mühafizəsi Departamentinin mütəxəssisləri tərəfindən ətraf mühitin mühafizəsi qanunvericiliyinin tələblərinə riayət olunması ilə əlaqədar NQÇİ–nin sex və sahələrində real vəziyyət yoxlanılmışdır.

2013–cü ilin yanvar ayında əvvəlki illərdə olduğu kimi, sosial məsələlərin həlli istiqamətində NQÇİ–də xeyli işlər görülmüşdür.

İşçilərin iş yerlərində su ilə təchizatını yaxşılaşdırmaq məqsədilə qablaşdırılmış su ilə təmin edilməsi davam etdirilməkdədir. Bu məqsədlə “Soyuq bulaq” MMC–dən 570 ədəd Panaqua suyu alınmış və işçilərə paylanmışdır.

ARDNŞ–in işçilərinə maddi yardım verilməsi haqqında əsasnaməyə müvafiq olaraq maddi yardımların göstərilməsi davam etdirilmişdir.

ARDNŞ Sosial İnkişaf İdarəsinin Gigiyena və Epidemiologiya Mərkəzinin işçiləri yanvar ayında idarənin sex və sahələrində dezinfeksiya, deratizasiya işləri aparmışlar.

İşçilərin məişət şəraitinin yaxşılaşdırılması məqsədilə “Neft Daşları” NQÇİ–dən 9 ədəd konteyner alınmışdır. Onlardan 2 ədədinin təmirinə lazım olan materiallar alınmış və təmir işləri davam edir. Konteynerlərin içərisində istifadə etmək üçün lazım olan məişət avadanlıqlarının siyahısı hazırlanmış və “Azneft” İB–yə müraciət edilmişdir.

2 saylı NQÇS–nin yeni tikilməkdə olan inzibati binasına tələb olunan məişət avadanlıqları və mebellər haqqında məlumat “Azneft” İB–yə göndərilmişdir.

QYƏTS–in quru sahələrində istifadə etmək üçün 4 ədəd 2 oxlu təkərli vaqon evcik alınmışdır və evciklərin içərisində elektrik xətlərinin qoşulması işləri davam etdirilir.

NQÇİ–nin inzibati binasının ətrafında sex və sahələrində təmizlik və abadlıq işləri daim nəzarətdə saxlanılır. Ortaya çıxan sosial problemlərin həll olunması istiqamətində fəal iştirak etməklə köməklik göstərilir.

Müntəzəm olaraq mart ayı ərzində quru və dəniz şəraitində işləyən işçilərlə əlaqə saxlanmış, onların sosial–məişət şəraitinin yaxşılaşdırılması istiqamətində işlər görülmüşdür.

Qarşımıza ARDNŞ–in “Azneft” İstehsalat Birliyinin rəhbərliyi tərəfindən məsul və şərəfli vəzifələr qoyulmuşdur. Bu vəzifələrin öhdəsindən layiqincə gəlmək üçün səylərimizi bundan sonra da səfərbər edəcək, yeni neft strategiyasına töhfələr verməkdə davam edəcəyik.

Şahmar HÜSEYNOV,

“Azneft” İB–nin “Abşeronneft”

Neft və Qazçıxarma İdarəsinin rəisi

Respublika.- 2013.- 13 aprel.- S. 10.