Bresser Eurasiya BV Holland şirkəti ilə anlaşma memorandumu imzalanıb

Dünən Azərbaycan Memarlar İttifaqında Bresser Eurasiya BV Holland şirkəti ilə memorandum imzalanmışdır. Tərəflər arasında imzalanan memorandumdan öncə Füzuli küçəsi, 39 ünvanında yerləşən tarixi binanın sürüşdürülməsi ilə bağlı layihə işləri və görüləcək işlər barəsində Bresser Eurasiya BV şirkətinin texniki heyəti ətraflı məlumat vermişlər.

Məlum olduğu kimi, Füzuli küçəsindəki 39 nömrəli yaşayış binası tarixi memarlıq nümunəsi olduğu üçün sökülmədən arxaya sürüşdürüləcəkdir. Ağırlığı 18 min ton olan bu tarixi memarlıq nümunəsinin sürüşdürülməsini bu şirkət həyata keçirəcəkdir. Tədbirdə qeyd edilmişdir ki, binanın sürüşdürülməsi məqsədilə ən müasir texnologiyadan istifadə ediləcəkdir. Texnoloji proses binanın bir neçə millimetr qaldırılması və binanın altında quraşdırılmış 210 hidravlik qurğunun köməyi ilə köçürülmə zamanı binanın yerdəyişməsini nəzərdə tutur. Binanın köçürülməsi bu qurğuların yerini dəyişməsi ilə mümkün olacaq. Bresser Eurasiya BV şirkətinin əməkdaşları binanın 5 gün ərzində sürüşdürülməsinin davam edəcəyini və bu zaman heç bir titrəmə belə olmadan yeni özülə oturdulacağını bildirmişlər. Tədbirdə işin gedişini göstərən plan və videofilm nümayiş etdirilmişdir.

Ətraflı məlumatdan sonra memorandumun imzalanma mərasimi olmuşdur. Sənədi Azərbaycan Memarlar İttifaqının sədri Elbay Qasımzadə və Bresser Eurasiya BV şirkətinin rəhbəri Leon Sveyxers imzalamışlar. Memarlar İttifaqının xarici şirkətlə imzaladığı bu ilk sənəd müxtəlif sahələrdə qarşılıqlı münasibətləri, xüsusilə Azərbaycan şəhərlərinin tikinti–bərpa potensialının artımına dəstək, yüksək ixtisaslı mütəxəssislərin hazırlanması sahəsində əməkdaşlıq, mühəndis və inşaat sahəsində təcrübə mübadiləsi, həmçinin müxtəlif xarakterli birgə layihələrin həyata keçirilməsini nəzərdə tutur.

Görüşdə Mİ sədri Elbay Qasımzadə demişdir: “Azərbaycanda uğurlu fəaliyyət, həmçinin sahibkarlıq sahəsində çalışmaq üçün bütün şərait yaradılıb. Biz əməkdaşlığa açığıq”.

Bresser Eurasiya BV şirkətinin rəhbəri Leon Sveyxers: “Tərəfimizdən imzalanan memorandum münasibətlərimizdə mühüm addımdır. Biz öz təcrübəmizi bölüşməyə hazırıq və Azərbaycanda qabaqcıl texnologiyamızı nümayiş etdirmək imkanına malik olduğumuz üçün şadıq”.

Qeyd edək ki, Bresser Eurasiya BV şirkəti bu sahədə 30 illik iş təcrübəsinə malikdir və onun tərəfindən köçürülən binaların sayı 35–dən artıqdır.

Samir Zeynalov

Respublika.- 2013.- 20 aprel.- S. 7.