YAP RAYON TƏŞKİLATLARI QADINLAR ŞURALARININ KONFRANSLARI

Masallı

Yeni Azərbaycan Partiyası Masallı rayon Təşkilatı Qadınlar Şurasının konfransı keçirilmişdir. Konfrans iştirakçıları əvvəl ümummilli lider Heydər Əliyevin abidəsi önünə gül dəstələri düzmüş, ulu öndərin xatirəsini ehtiramla yad etmişlər.

Konfrans YAP Masallı rayon təşkilatının iclas zalında öz işinə başlamışdır. Azərbaycan Respublikasının Dövlət Himni səsələnmişdir.

YAP Masallı rayon Təşkilatı Qadınlar Şurasının sədri Naibə Aslanovanın məruzəsi dinlənilmişdir. O, bildirmişdir ki, ötən müddət ərzində partiya üzvləri ulu öndərin siyasi kursuna sadiq qalmış, müstəqilliyimizin və dövlətçiliyimizin möhkəmləndirilməsinə öz layiqli töhfələrini vermişlər.

Heydər Əliyevin ideyalarının və siyasi kursunun layiqli davamçısı, dövlətimizin başçısı cənab İlham Əliyevin Azərbaycanın milli maraqları naminə gördüyü işlər ölkə həyatının bütün sahələrinin sürətli inkişafına və tərəqqisinə zəmin yaratmışdır. Əldə olunan nailiyyətlərdə qadınların da rolu az deyildir.

Heydər Əliyev Fondunun prezidenti, Azərbaycan Respublikasının birinci xanımı Mehriban Əliyevanın misilsiz xidmətləri, həyata keçirdiyi möhtəşəm layihələr xalqımız tərəfindən çox böyük rəğbətlə qarşılanır.

Son illər Yeni Azərbaycan Partiyası Masallı rayon Təşkilatının Qadınlar Şurasının sıraları xeyli artmışdır. 8875 nəfəri birləşdirən YAP rayon təşkilatının üzvlərinin 27 faizini qadınlar təşkil edir. Partiya sıralarında gənc qadınların sayı 733 nəfərdir. Təkcə ötən il ərazi ilk partiya təşkilatlarından 258 qadın ərizə ilə müraciət edərək Yeni Azərbaycan Partiyasının sıralarına daxil olmuşdur.

Qadınlar qarşıdakı seçkilərlə əlaqədar təbliğat işini gücləndirir, Azərbaycanın parlaq gələcəyi və daha da qüdrətlənməsi naminə möhtərəm Prezidentimiz cənab İlham Əliyevi dəstəkləyəcəklərini bildirirlər.

Sonra konfransda Göyçək Ələsgərova, Günay Mehrəliyeva, Mina Quliyeva və başqaları çıxış edərək rayonun qadınlarının bundan sonra da ölkəmizin, eləcə də rayonun sosial–iqtisadi və mədəni inkişafına layiqli töhfələr verəcəklərini, qarşıdakı prezident seçkilərində yüksək siyasi fəallıq nümayiş etdirəcəklərini və partiyanın alternativsiz namizədi, cənab İlham Əliyevə səs verəcəklərini bildirmişlər.

Konfransda təşkilati məsələlərə baxılmış, şuranın 21 nəfərdən ibarət tərkibi seçilmişdir. Naibə Rəsul qızı Aslanova yenidən YAP Masallı Rayon Təşkilatı Qadınlar Şurasının sədri seçilmişdir.

Konfransda Yeni Azərbaycan Partiyası Masallı rayon təşkilatının sədri Seyfəddin Əliyev çıxış etmişdir.

Konfrans iştirakçıları tərəfindən Azərbaycan Respublikasının Prezidenti cənab İlham Əliyevə müraciət qəbul olunmuşdur.

Astara

Yeni Azərbaycan Partiyası Astara rayon Təşkilatı Qadınlar Şurasının ikinci konfransı keçirilmişdir.

Yeni Azərbaycan Partiyası Astara rayon təşkilatının sədri Firudin Əhmədov konfransı giriş sözü ilə açaraq rayonun ictimai–siyasi və mədəni həyatında qadınların rolundan, fəal mövqeyindən danışmışdır.

YAP rayon Təşkilatı Qadınlar Şurasının sədri Bəsti Əliyeva konfransda çıxış etmiş, ümummilli lider Heydər Əliyevin Azərbaycan qadınının əməyini, cəmiyyətdəki rolunu həmişə yüksək qiymətləndirdiyini bildirmişdir.

Dövlət quruculuğunun bütün sahələrində xidmətləri olan qadınlar ölkəmizdə ictimai–siyasi sabitliyin və əmin–amanlığın qorunması, milli dövlətçiliyimizin daha da möhkəmləndirilməsi yolunda var qüvvələrini sərf edirlər.

Astara rayonunda yaşayan 100 min nəfər əhalinin yarıdan çoxu qadınlardır. Yeni Azərbaycan Partiyası Astara rayon təşkilatı ətrafında birləşən 6 min nəfərdən çox partiya üzvünün də təxminən yarısını qadınlar təşkil edir. Yeni Azərbaycan Partiyasının üzvü olan qadınların əksəriyyəti 18–35 yaşında olan gənclərdir. Astaralı qadınlar əməksevərliyi, işgüzarlığı, dövlətə və dövlətçiliyə sədaqətləri ilə seçilirlər.

Konfransda rayon təhsil şöbəsinin müdiri Qızbəs Məmmədova, Heydər Əliyev Mərkəzinin direktoru Gülnarə Məcidova, Dövlət Sığorta Agentliyinin rayon filialının müdiri İlhamə Həşimova, rayon mərkəzi xəstəxanasının həkimi Aliyə Cavadova çıxış edərək bildirdilər ki, ulu öndərin siyasi kursunu uğurla davam etdirən möhtərəm Prezidentimiz cənab İlham Əliyevin ardıcıl, məqsədyönlü siyasəti nəticəsində ölkəmiz azad, müstəqil, qüdrətli, nüfuzlu bir dövlətə çevrilmişdir. Bu il keçiriləcək prezident seçkilərində astaralı qadınlar cənab İlham Əliyevin namizədliyini dəstəkləyəcəklərini bildirirlər.

Konfransda YAP Astara rayon Təşkilatı Qadınlar Şurasının yeni tərkibi və Yeni Azərbaycan Partiyası Qadınlar Şurasının konfransına nümayəndələr seçilmişdir.

Konfransda Aygül Məmmədova YAP Astara Rayon Təşkilatı Qadınlar Şurasının sədri seçilmişdir.

Lerik

Yeni Azərbaycan Partiyası Lerik Rayon Təşkilatı Qadınlar Şurası öz sıralarında 559 nəfər partiya üzvünü birləşdirir.

Şuranın sədri Arzu Vəliməmmədova konfransda hesabat məruzəsi ilə çıxış edərək bildirmişdir ki, YAP Lerik Rayon Təşkilatının Qadınlar Şurası ötən illər ərzində rayonda qadınlarla aparılan işin təşkili, onların ictimai–siyasi fəallığının artırılması istiqamətində bir sıra işlər görmüşdür. Rayonun fəal qadınlarının, əsasən də gənclərin iştirakı ilə “Dəyirmi masa”lar, diskussiyalar və digər kütləvi tədbirlər keçirilmiş, xalqımızın ümummilli lideri Heydər Əliyevin cəmiyyətin inkişafında qadınlara verdiyi yüksək qiymət minnətdarlıqla xatırlanmışdır.

Lerik şəhər 1 saylı texniki fənlər təmayüllü liseyin direktoru, respublikanın əməkdar müəllimi Gültəkin Şıxəliyeva, şəhər 3 saylı tam orta məktəbin müəllimi Lütfiyyə Vəliyeva, rayon mərkəzi xəstəxanasının tibb işçisi Turac Nəzərova ölkəmizdə qadınlara göstərilən dövlət qayğısından, qadınların cəmiyyətdə rolundan, lerikli qadınların rayonun ictimai–siyasi və mədəni həyatında fəal iştirakından danışmışlar.

YAP rayon təşkilatının sədri Elxan Qənbərov çıxışında bildirmişdir ki, ümummilli lider Heydər Əliyevin ideyalarına sadiq və sədaqətli insanları birləşdirən Yeni Azərbaycan Partiyası ölkəmizdə güclü və nüfuzlu siyasi qüvvəyə çevrilmişdir. Natiq qazanılan uğurlarda qadınların fədakar əməyini, onların dövlətə və dövlətçiliyə sədaqətini qeyd etmişdir.

Konfransda təşkilati məsələlərə baxılmış, şuranın yeni tərkibi və idarə heyəti seçilmişdir. Arzu Vəliməmmədova yenidən YAP Lerik rayon Təşkilatı Qadınlar Şurasının sədri seçilmişdir.

Konfrans iştirakçıları tərəfindən Azərbaycan Respublikasının Prezidenti, Yeni Azərbaycan Partiyasının sədri cənab İlham Əliyevə müraciət qəbul olunmuşdur.

Əlisəfa HƏSƏNOV

Respublika.- 2013.- 24 aprel.- S. 11.