Heydər Əliyev əbədiyaşar liderdir

Böyük və dahi şəxsiyyətlər nadir hallarda dünyaya gəlirlər. Onlar öz xalqlarının taleyüklü məsələlərinin həllində həlledici rol oynayır, lider olurlar.

Bu liderlər öz xalqlarının taleyində mühüm rol oynayır, bəzən xalqlar öz liderləri ilə tanınırlar. Həmin liderlər yaşadıqları dövrdə xalqlarını düşdüyü çətin vəziyyətdən çıxarır, bəziləri bacarıqlı dövlət xadimi, bəziləri görkəmli siyasətçi, mütəfəkkir, sərkərdə kimi öz xalqlarının həyatında dönüş yaradaraq liderlik zirvəsinə ucalırlar. Lakin həmin liderlər öz xalqlarının tarixinin müəyyən mərhələsində öz liderlik missiyalarını həyata keçirərək tarixə çevrilirlər. Heydər Əliyev isə onlardan fərqli olaraq daha uca zirvəyə qalxa bilmiş və əbədiyaşar lider olmuşdur.

Əlbəttə, liderlik zirvəsinə ucalmaq xoşbəxtliyi hər kəsə nəsib olmur. Bu Allah–Taalanın həmin adamlara bəxş etdiyi töhfədir.

Birinci növbədə, qeyd etmək lazımdır ki, Heydər Əliyev xilaskar lider idi. Ötən əsrin 90–cı illərində xalqımızın əldə etdiyi müstəqillik təhlükə altında olduqda, ölkənin parçalanmaq, məhv olmaq, “olum, ölüm” dilemması qarşısında qaldığı bir vaxtda Heydər Əliyev xalqın çağırışına səs verərək xalqı düşdüyü bu bəladan xilas etdi. O dövrdə, yəni ötən əsrin 90–cı illərinin əvvəllərində ölkədə yaranmış xaosdan, anarxiyadan, özbaşınalıqlardan, hakimiyyətdə olan AXC–Müsavat cütlüyünün xalqa zidd siyasətindən cana doyan xalq nicat yolunu uzun illər dövlətçilik təcrübəsi olan Heydər Əliyevdə görürdü. Ona görə də hamının nəzərləri o vaxtlar Naxçıvanda yaşayan Heydər Əliyevə yönəlmişdi. Qabaqcıl ziyalılar, sonralar “91″lər adlandırılacaq şəxslər Heydər Əliyevə müraciət edərək onu xalqın düşdüyü bu ağır vəziyyətdən xilas etməyə, cəmiyyətin mütərəqqi qüvvələrini özündə birləşdirən partiya yaradaraq ona rəhbərlik etməyi xahiş etdilər. Beləliklə, dünənin, bugünün və gələcəyin partiyası olan YAP yarandı və Heydər Əliyev onun sədri oldu.

Heydər Əliyev yaradıcı lider idi. Bütün təqib və təzyiqlərə baxmayaraq, YAP Heydər Əliyevin rəhbərliyi ilə çox qısa bır vaxtdan—cəmi 6 aydan sonra iqtidara gəldi. Özü də dinc yolla. Ölkədə silahlı qruplaşmaların, hakimiyyəti silahlı yolla ələ keçirmək cəhdlərinin olduğu bir vaxtda.

Heydər Əliyev müdrik lider idi. Hakimiyyətə gələn kimi “Müstəqilliyin əldə edilməsindən daha çətin olan onun qorunması və möhkəmləndirilməsi”dir deyərək Heydər Əliyev, ilk növbədə ölkədəki mövcud vəziyyəti geniş, ətraflı təhlil edərək, ən düzgün yol seçərək müstəqil dövlətin atributlarını yaratmağa, bütün uğurların, inkişafın təməlində dayanan ictimai–siyasi sabitliyi bərpa etdi. Silahlı qruplaşmalar ləğv edildi. Cəbhədə atəşkəs elan edildi. İqtisadiyyatın inkişafı üçün əsaslı və cəsarətli islahatlar həyata keçirildi. Hüquqi, dünyəvi, demokratik dövlət quruculuğu sahəsində müdrik addımlar atıldı. Müstəqil respublikamızın ilk Konstitusiyası qəbul edildi.

Bütün bunlara görə xalqımız haqlı olaraq Heydər Əliyevi müstəqil Azərbaycanın qurucusu, yaradıcısı, memarı adlandırır.

Heydər Əliyev qurucu lider idi. Ölkənin iqtisadi inkişaf strategiyasını, xarici siyasət xəttini müəyyənləşdirdi və bunu bütün dünyaya bəyan etdi. Bu, bazar iqtisadiyyatı, balanslaşdırılmış xarici siyasət xətti idi.

Heydər Əliyev fenomen şəxsiyyət, görkəmli dövlət xadimi, uzaqgörən siyasətçi idi. Haqlı olaraq Heydər Əliyevin Azərbaycan dövlətinə rəhbərliyinin 34 ili milli intibah dövrü kimi səciyyələndirilir.

1969–82–ci illərdə respublikada 213 yeni sənaye müəssisəsi istismara verildi. Cəmşid Naxçıvanski adına Hərbi Məktəb açıldı. Bir sözlə, Heydər Əliyev Azərbaycana rəhbərlik etdiyi 1969–82–ci illərdə Sovet İttifaqı çərçivəsində gələcək müstəqil Azərbaycan dövləti üçün xidmət edə biləcək bütün zəruri tədbirləri həyata keçirməyə nail oldu.

Heydər Əliyev şəxsiyyətinin əsas cəhətlərindən biri onun fəaliyyətinin yaşadığı dövrlə məhdudlaşmamasıdır. Onun fəaliyyəti, onun müəyyənləşdirdıyi strategiya Azərbaycanın bugünkü və gələcək inkşafına xidmət edir.

Bəli, Heydər Əliyev yolu Azərbaycan dövlətçiliyini iflasdan, Azərbaycan xalqını fəlakətdən xilas etdi. Azərbaycan dövlətini möhkəmlətdi, onu xain əllərdən, çevriliş, qiyam cəhdlərindən hifz edərək dirçəliş və inkişafa doğru apardı. Azərbaycan xalqında özünəinam hissini bərpa etdi, sabitlik və firavanlığa təminat yaratdı. Bu yolun davam etdirilməsi Azərbaycan dövlətinin gələcəyi, onun daha da güclənməsi, ərazi bütövlüyünün bərpa olunması, hər bir vətəndaşımız üçün zəngin və rahat həyat şəraitinin yaradılması deməkdir.

Azərbaycanda müstəqil dövlətçilik ənənələrini formalaşdıran ümummilli lider Heydər Əliyevin xalqımız qarşısındakı ən böyük xidməti bundan ibarətdir ki, o, müəllifi olduğu ənənələrin davamlılığını təmin etmiş, dərin zəkası hesabına respublikamızın gələcək uğurlarına təminat yaratmışdır.

Ulu öndər Heydər Əliyev cənab İlham Əliyevin timsalında özünün qurub yaratdığı, möhkəmləndirdiyi dövləti parlaq sabahlara aparacaq, yeni dövrdə Azərbaycanın yüksəlişinin, müstəqilliyinin, əbədiliyinin təminatçısı olacaq layiqli varisini yetişdirərək cəmiyyətə və dünyaya təqdim etmişdir: “İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm”.

Heydər Əliyev siyasi kursunu ləyaqətlə davam etdirən möhtərəm Prezidentimiz İlham Əliyevin həyata keçirdiyi uğurlu daxili və xarici siyasət nəticəsində müstəqilliyimiz daha da möhkəmlənmiş, Azərbaycan regionun lider dövlətinə çevrilmişdır. Xalqımızın həyat səviyyəsi günbəgün yaxşılaşmaqdadır. Hər bir azərbaycanlı kimi biz qobustanlılar da bu yüksəlişi, bu tərəqqini, bu inkişafı, rifahımızın yaxşılaşmasını gündəlik həyatımızda hiss edir və görürük.

1993–2003–cü illər Azərbaycan tarixinə dirçəliş, tərəqqi, inkişaf dövrü kimi daxil olub. 2003–cü ildən sonrakı dövr isə uğurlu yolun davamı kimi dəyərləndirilir. Müasir Azərbaycan dövlətinin qurucusu, ümummilli lider Heydər Əliyevin müəyyənləşdirdiyi strategiyanın Prezident İlham Əliyev tərəfindən uğurla həyata keçirilməsi Azərbaycanın qarşısında böyük imkanlar açır. Bu gün müstəqil Azərbaycanımızın beynəlxalq aləmdə iqtisadi və siyasi mövqeyini daha da möhkəmləndirməsi Heydər Əliyev yolu ilə inamla irəliləyən Azərbaycammızın daha böyük uğurlar əldə edəcəyinə inam yaradır. Cənab Prezident İlham Əliyev Azərbaycanın bu gününü və gələcək inkişafını müəyyənləşdirərək demişdir: “Azərbaycan daha da güclənəcək və dünya miqyasında güclü, qüdrətli dövlətə çevriləcəkdir”.

Heydər Əliyev siyasəti Azərbaycanda yaşayır və qalib gəlir.

Ümummilli liderimız deyirdi: “Müstəqil Azərbaycanın böyük gələcəyi var. Mən bu gələcəyə inanıram”.

Azərbaycanin müstəqilliyinin əbədi, dönməz, sarsılmaz olduğuna inamındandır ki, Heydər Əliyev haqlı olaraq hələ 1998–ci ildə demişdır: “Nə qədər ki Azərbaycan var, mən də varam. Mən isə Azərbaycanda əbədi olacağam!”. Bəli, nə qədər ki müstəqil Azərbaycan dövləti var, Azərbaycan xalqı var, Heydər Əliyev ürəklərdə yaşayacaqdır!

Füzuli GÜLƏLİYEV,

YAP Qobustan rayon təşkilatının sədri,

rayon icra hakimiyyəti başçısının müavini

Respublika.- 2013.- 25 aprel.- S. 9.